ᖁᑦᑎᖕᓂᕐᒥ ᐅᑭᐅᖅᑕᖅᑐᒥ ᓯᓚ ᐊᓯᔾᔨᖅᑐᐊᓘᓯᒪᓕᖅᑐᖅ ᓴᓂᐊᓂᒃ ᐊᓯᖏᓐᓂᒃ ᓄᓇᕐᔪᐊᖃᖃᑕᐅᔪᓂ. ᓂᒡᓚᓱᑲᐅᖕᒪᑦ, ᑖᖅᑐᐊᓘᖃᑦᑕᖅᓱᓂᓗ ᐅᑭᐅᖅᑕᖅᑐᒥ ᐅᑭᐅᒃᑯᑦ ᑕᒪᐃᓐᓂᖓᓄᓪᓗ ᓂᒡᓚᓱᖕᓂᖓᓂ ᑭᓂᐸᓂᑭᒃᑑᕙᒃᐳᖅ, ᑕᒪᐃᓐᓂᑲᓴᒡᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᐅᔪᓂ ᒪᖁᒐᔪᐃᑦᑑᓪᓗᓂ. ᑕᒪᐃᓂᖓᓄᑦ, ᑕᒪᕐᒥᑲᓴᐃᑦ ᐅᑭᐅᖅᑕᖅᑐᑉ ᓄᓇᖃᕐᕕᖏᑦ ᐃᓱᒪᒋᔭᐅᕙᒃᑐᑦ ᑭᓂᐊᓂᖃᑦᑎᐊᖏᑦᑐᑎᑐᑦ ᐸᓂᖅᑐᒥᒃ, ᐊᑯᓐᓂᖅᓱᖅᑐᒥᒡᓗᓐᓃᑦ ᐸᓂᖅᓯᒪᓂᐅᕙᒃᑐᒥᒃ. ᐊᐅᔭᐅᓂᖓᓂ, ᓯᕿᓐᓂᕈᓐᓇᖅᑐᖅ 24-ᓂᒃ ᐃᑲᕐᕋᓂᒃ, ᑕᐃᒪᐃᑲᓗᐊᖅᑎᓪᓗᒍᓗ ᐊᐅᔭᐅᓂᖓ ᕿᓚᒥᐅᕙᒃᑐᖅ, ᓂᒡᓚᓱᒍᓂᑲᐃᓐᓇᖃᑦᑕᖅᓱᓂᓗ ᐃᓚᖏᓐᓂ ᐅᖓᑎᑦᑎᐊᖓᓂᒃ ᖁᐊᕐᕕᐅᒃᑲᓐᓂᕈᓐᓇᕐᓂᐅᑉ ᖁᓛᓂᒃ. ᐊᒃᓱᕈᕐᓇᖃᑦᑕᕐᓂᖓ ᓯᓚᖓ ᐃᓕᑕᕐᓇᖅᐳᖅ ᖁᑦᑎᒃᑐᒥ ᐅᑭᐅᖅᑕᖅᑑᓂᕐᒥ ᐱᒻᒪᕆᐅᔪᓂᒃ ᐱᔾᔪᑕᐅᖃᑕᕐᒪᑦ ᐆᒪᔪᖃᕈᓐᓇᑦᑎᐊᕐᓂᖏᓐᓂ ᐅᑭᐅᖅᑕᖅᑐᕐᒥᐅᑕᐅᕙᒃᑐᓂᒃ. ᑕᐃᒪᐃᓂᖓᓄᑦ, ᑎᑎᕋᖅᑕᐅᕙᓪᓕᐊᖃᑕᕐᓂᖏᑦ ᓯᓚᖓᑕ ᖃᓄᐃᓕᕙᓪᓕᐊᓂᖏᑦ ᐱᒻᒪᕆᐊᓘᕙᒃᑐᑦ ᐆᒪᔪᓕᕆᔨᓄᑦ ᑐᑭᓯᐅᒪᔭᐅᔭᓂᐊᕈᑎᒃ ᐱᔾᔪᑕᐅᕙᖕᓂᖏᑦ ᐊᒃᑐᐃᓂᖃᖅᐸᒃᑐᑦ ᐅᑭᐅᖅᑕᖅᑐᒥ ᐊᕙᑎᒥᒃ ᐊᕙᑎᐅᒥᑕᕆᔭᖏᓐᓂᒡᓗ. ᑕᒪᓐᓇ ᓱᓕᔫᓗᐊᒃᑲᓐᓂᖅᐳᖅ ᐃᓱᒪᒋᓪᓗᒍ ᓄᓇᕐᔪᐊᕐᒥ ᓯᓚᐅᑉ ᐊᓯᔾᔨᖅᐸᓕᐊᓂᐊᕋᓱᒋᔭᐅᓂᖓᓂᒃ ᐊᕐᕋᒍᓂ 2200-ᖏᓃᓕᖅᐸᑕ, ᐅᑭᐅᖅᑕᖅᑐᒥ ᐊᐅᔭᐅᕙᖕᓂᖏᑦ ᐅᖂᓇᕐᓂᖅᓴᐅᓕᕈᓐᓇᕐᒪᑦ ᐃᒪᓐᓇᑎᒋ 4-ᓂᒃ 8°-ᓄᑦ. ᑭᓂᐸᓂᖅᓴᐅᓕᕈᓐᓇᕐᓂᖓᑦᑕᐅᖅ ᒪᖁᒍᓐᓇᕐᓂᕐᒥᒃ ᓂᕆᐅᒋᔭᐅᒋᕗᖅ ᓄᓇᖏᓐᓂ ᑕᒪᐅᖓ 10-20% ᐳᓴᓐᑎᖏᓃᑦᑐᓐᓇᕐᓂᖅ, ᐊᒻᒪᓗ ᓇᓚᐅᑖᖅᑕᐅᓯᒪᔪᓂᒃ ᖃᐅᑕᒪᖅ ᐊᕐᕋᒎᒥ ᓯᓚᒥ ᖃᓄᐃᓕᕙᓪᓕᐊᓂᖓᓂ ᑕᐃᒪᓐᓂ ᓂᒡᓚᓱᒃᐸᖕᓂᖓᓂ ᐊᒻᒪᓗ ᒪᖁᖃᑦᑕᕈᓐᓇᕐᓂᖓᓂ ᑭᓂᐸᓗᑕᐅᕙᖕᓂᖅ, ᐱᔾᔪᑕᐅᓗᐊᒃᑲᓐᓂᕐᓂᐊᖅᑐᓂᒃ ᓯᓚᐅᑉ ᐊᓯᔾᔨᖅᓯᒪᕐᔪᐊᕈᓐᓇᕐᓂᖓᓄᑦ. ᒫᓐᓇᓵᖅ ᖃᐅᔨᓴᖅᑕᐅᒐᒥᒃ ᑐᑭᓯᓇᖅᓯᓚᐅᖅᑐᑦ ᓂᒡᓚᓱᒃᐸᖕᓂᖓ ᓯᓚᐅᑉ ᐅᑭᐅᖅᑕᖅᑐᒥ ᖁᕝᕙᖅᐸᓪᓕᐊᖏᓐᓇᖅᑐᐃᓐᓇᖅᑐᖅ ᖁᓕᐅᓯᒪᓕᖅᑐᓂ ᐊᓂᐊᒐᓂᒃᑐᓂ ᐊᕐᕋᒍᓂᒃ, ᐊᒻᒪᓗ ᐱᑕᖃᕐᓂᖓ ᐃᔾᔪᑎᒋᓂᖓᓗ ᓯᑰᑉ ᒥᑭᒡᓕᕚᓪᓕᖅᓯᒪᕐᔪᐊᖅᓱᓂ ᐊᖏᔪᒥᒃ.

ᒥᑦᑎᒪᑕᓕᐅᑉ ᕿᑭᖅᑕᖓᓂ, ᓯᓚᓕᕆᕕᖕᒥ ᖃᐅᔨᔭᐅᓯᒪᓂᖏᑦ ᑲᑎᖅᓱᖅᑕᐅᓯᒪᔪᑦ ᐃᖕᒥᒍᑦ ᐊᐅᓚᑦᑕᐅᕙᒃᑐᒥ ᓯᓚᓕᕆᕕᖕᒥ ᑕᐃᒪᖓᓂᒃ ᐊᕐᕋᒍᒥᒃ 1994-ᒥᒃ. ᖃᕐᓕᒃᑐᕐᕕᐅᑉ ᓄᓇᖓᓂ ᑕᒪᑯᐊ ᐱᑕᖃᕐᒪᑕ ᑕᕆᐅᑉ ᓇᑎᖓᓂᒃ ᐃᕿᖓᓂᒃ ᐳᖅᑐᓂᖃᖅᑎᒋᔪᓃᑦᑐᓂᒃ 20-ᓂᒃ 400-ᒥᑕᓕᖕᓄᑦ ᐳᖅᑐᓂᓕᖕᓂᒃ, ᖃᐅᔨᓴᕈᑎᖏᑦ ᖃᐅᔨᑲᐅᑎᒋᔪᓐᓇᖃᑦᑕᖅᓱᑎᒃ ᖃᓄᐃᓕᕙᓪᓕᐊᓂᖏᓐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖏᓐᓂᒃ ᐃᑲᕐᕋᑕᒫᖅ. ᐊᐅᔭᒃᑯᑦ ᑭᓂᐸᓕᖅᐸᖕᓂᖓ ᒪᖁᒃᐸᖕᓂᖓᓗᓐᓂᑦ ᑎᑎᕋᖅᑕᐅᕙᓪᓕᐊᖃᑦᑕᐃᓐᓇᕆᕗᖅ ᖃᐅᔨᓴᕈᑎᖏᓐᓄᑦ, ᒪᖁᖕᓂᖓᓂᒃ ᐆᒃᑐᕋᐅᑎᓕᖕᒥᒃ, ᑲᑎᖅᓱᐃᖃᑕᖅᑐᒥᒃ ᒪᖁᕐᓂᖓᓂᒃ ᑯᑐᒡᕕᐅᓂᕐᒥᒃ ᓱᓪᓗᓕᖕᒥ, ᐅᖃᓕᒫᖅᑕᐅᔪᓐᓇᕐᓂᐊᕐᒪᑦ ᖃᓄᑎᒋ ᐆᒃᑐᕋᐅᑎᒃᑯᑦ ᒥᓕᒦᑕᓂᒃ ᑲᑕᒐᒃᓯᒪᖕᒪᖔᑕ ᒪᖁᕐᓂᖓᓂ. ᑕᒡᕙᓂ ᑕᑯᒃᓴᐅᕗᑦ ᐃᓚᖏᑦ ᖃᐅᔨᔭᐅᓯᒪᓕᖅᑐᑦ ᓯᕗᒻᒧᐊᒃᐸᓪᓕᐊᓂᖏᓐᓂ. ᑕᒪᐃᓐᓂᒃ ᑕᑯᔪᒪᒍᕕᑦ ᖃᐅᔨᔭᐅᓯᒪᔪᓂᒃ ᐅᓂᒃᑳᖅᑐᑦ ᐊᑐᐃᓐᓇᐅᕗᑦ ᐅᕙᖓᑦ ᖃᕆᑕᐅᔭᒃᑯᑦ ᑐᕌᕈᑎᓕᖕᒥ Nordicana D (ᑕᑯᓗᒋᑦ ᐅᖃᓕᒫᒐᓕᐊᖑᓯᒪᒧᑦ D2-ᒥ ᐊᒻᒪᓗ D8-ᒥ).

ᓯᓚᓕᕆᕕᒃ BYLJACK	ᓯᓚᓕᕆᕕᒃ BYLCAMP	ᓯᓚᓕᕆᕕᒃ SILA

ᓯᓚᐅᑉ ᓂᒡᓚᓱᖕᓂᖓ

ᐊᕐᕋᒍᑕᒫᖅ ᓯᓚᐅᑉ ᓂᒡᓚᓱᖕᓂᖓ ᐊᔾᔨᒌᖃᑦᑕᖏᑦᑐᑦ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐃᓚᖏᓐᓂ ᖃᓄᐃᓚᐅᕐᓂᖓ ᓯᓚᐅᑉ ᐃᖃᐅᒪᔭᐅᓪᓗᓂ ᐅᖂᓇᕐᓂᖅᓵᓘᓚᐅᕐᓂᖓᓄᑦ (ᓲᕐᓗ ᑕᐃᔅᓱᒪᓂ 2010-ᖑᓚᐅᑐᖅ) ᐅᕝᕙᓗᓐᓃᑦ ᐃᒃᑮᓐᓇᖅᑐᒻᒪᕆᐊᓘᓚᐅᕐᓂᖓᓄᑦ (ᓲᕐᓗ ᑕᐃᔅᓱᒪᓂ ᑕᒫᓂ 2004, 2015 ᐊᒻᒪᓗ 2018-ᒥ) ᐊᓯᖏᓐᓂᒃ ᐊᕐᕋᒍᓂᒃ. ᓂᒡᓚᓱᖕᓂᖃᕋᔪᓚᐅᕐᒪᑕ ᑕᐃᒪᖓᓂᒃ 1995 ᑕᒫᓂ -14.4°C-ᒥᒃ. ᐅᖂᓇᕐᓂᖅᐹᖑᕙᒃᑐᖅ ᑕᕿᖓ ᐊᕐᕋᒍᒥ ᔪᓚᐃᒦᒻᒪᑦ, ᐅᖂᓇᕐᓂᖃᕋᔪᒃᓱᓂ ᑕᒫᓂ 6.4°C-ᒥ, ᓂᒡᓚᓱᖕᓂᖅᐹᖑᕙᒃᓱᓂ ᑕᕿᖓ ᕕᕗᐊᕆ, ᓂᒡᓚᓱᖕᓂᖃᕋᔪᖕᒪᑦ ᑕᒫᓂ -34.8°C-ᒥ. ᓱᓕ ᐅᓪᓗᒥᒧᑦ, ᓯᓚᐅᑉ ᓂᒡᓚᓱᒃᐸᓂᖓ ᓴᕿᑎᑦᑎᕕᐅᓯᒪᖏᑦᑐᑦ ᖃᓄᐃᓕᕙᓪᓕᐊᓂᖏᓐᓂᒃ ᐊᕐᕋᒍᑕᒫᖅ ᓂᒡᓚᓱᒃᐸᖕᓂᖓ ᓯᓚ ᒥᑦᑎᒪᑕᓕᐅᑉ ᕿᑭᖅᑕᖓᓂ.

ᓯᓚᐅᑉ ᐊᓯᔾᔨᖅᐸᓪᓕᐊᕙᖕᓂᖓ ᓂᒡᓚᓱᖕᓂᖓᓂ ᐊᓯᔾᔨᖃᑦᑕᖅᐳᖅ ᐊᕐᕋᒍᒐᓴᐅᓂᖏᓐᓂ ᐊᑐᖅᐸᓪᓕᐊᔪᓂ. ᐅᐱᖔᒃᑯᑦ (ᒫᔾᔨᒥ-ᐄᐳ-ᒪᐃᒥᓗ) ᑕᒪᓃᒐᔪᒃᐳᖅ ᓂᒡᓚᓱᖕᓂᖓ -19.4°C-ᒥ, ᐊᐅᔭᒃᑯᑦ (ᔫᓐᓂ-ᔪᓚᐃ-ᐋᒐᓯ) ᖁᕝᕙᓯᖕᓂᓕᖕᒧᐊᓲᖅ ᑕᒫᓃᒐᔪᒃᑐᒥ 4.7°C-ᒥ, ᐅᑭᐊᒃᓵᒃᑯᑦ ᑲᑕᒃᐸᓪᓕᐊᓕᖃᑦᑕᖅᓱᓂ (ᓯᑎᐱᕆ-ᐊᒃᑑᐱᕆ-ᓄᕕᐱᕆ) ᑕᒪᐅᖓ -11.0°C-ᒧᑦ ᑎᑭᓐᓂᐊᕐᒥᒐᒥ ᓂᒡᓚᓱᖕᓂᖅᐹᖑᕙᖕᓂᖓᓄᑦ (ᑕᒫᓂ ᑎᓯᐱ-ᔭᓄᐊᕆ-ᕕᕗᐊᕆᒥ) ᑕᒪᓃᒐᔪᒃᑐᒧᑦ -32.4°C. ᑕᑯᓪᓗᒋᑦ ᐊᕐᕋᒎᑉ ᓯᓚᖓᑕ ᖃᓄᐃᓕᖓᓂᖓ, ᐊᐅᔭᒃᑯᑦ ᐅᖂᓇᖅᓯᕙᖕᓂᖓ ᖁᕝᕙᖅᐸᓪᓕᐊᓯᒪᑎᒋᕗᑦ ᑕᒫᓂ 0.4°C-ᖑᕙᓕᖅᑐᒥᒃ, ᖁᓕᐅᔪᑦ 10 ᐊᕐᕋᒍᐃᑦ ᓈᓯᒪᓂᖏᓐᓂ ᑕᐃᒪᖓᑦ ᐱᒋᐊᓚᐅᖅᑐᓂᒃ ᖃᐅᔨᓴᖅᑕᐅᓂᖏᑦ 1995-ᒥ. ᐊᓯᖏᓐᓂ ᐊᕐᕋᒍᒥ ᓯᓚᐅᑉ ᖃᓄᐃᓕᖓᓂᖓᓂᒃ ᐊᑐᕐᓂᖏᓐᓂ ᓱᓕ ᐃᓕᑕᕆᔭᐅᓯᒪᔪᖃᖏᓚᖅ ᐅᖂᓇᖅᓯᕙᓪᓕᐊᓯᒪᓂᖏᓐᓂᒡᓗᓐᓂᑦ ᓂᒡᓚᓱᖕᓂᖅᓴᐅᖃᑦᑕᓕᕐᓂᖏᓐᓂᒡᓗᓐᓃᑦ.

ᒪᓕᒃᑕᐅᓪᓗᑎᒃ ᓯᓚᐅᑉ ᓂᒡᓚᓱᖕᓂᖓᓂᒃ ᖃᐅᔨᔭᐅᓯᒪᔪᑦ, ᓈᓴᐅᓯᕆᔪᓐᓇᖅᑐᒍᑦ ᒪᖑᒃᐸᓪᓕᐊᕝᕕᐅᔪᓐᓇᕐᓂᖏᓐᓂᒃ ᐅᓪᓗᖏᓐᓂᒃ ᐊᒻᒪᓗ ᐊᒥᓲᓂᖏᓐᓂᒃ ᓯᑯᕙᓪᓕᐊᕝᕕᐅᔪᓐᓇᓚᐅᓐᖏᓂᖏᓐᓂᒃ ᐅᓪᓗᓂᒃ. ᑕᒪᒃᑯᐊ ᒪᓐᖑᖅᐸᓪᓕᐊᕝᕕᐅᔪᓐᓇᕐᓂᖏᑦ ᐋᕿᐅᒪᔭᐅᕗᑦ ᑲᑎᑕᐅᓪᓗᑎᒃ ᑕᒪᕐᒥᒃ ᖃᐅᑕᒫᖅ ᐅᓪᓗᖏᑦ ᓂᒡᓚᓱᖕᓂᖃᖅᑐᓂᒃ ᖁᓛᓃᑦᑐᓂᒃ 0°C-ᒥᒃ. ᑕᐃᒪᐃᓂᖓᓄᑦ, ᑭᒡᒐᖅᑐᐃᕗᑦ ᓈᓴᐅᑎᖏᑦ ᐅᖂᓇᕐᓂᖃᓇᕐᓂᖏᓐᓂᒃ ᑲᔪᓯᕙᓪᓕᐊᔪᓂᒃ, ᐱᒻᒪᕆᐅᓂᖃᖅᐸᒃᑐᓂᒃ ᐱᕈᖅᑐᓄᑦ, ᐱᕈᕈᓐᓇᕐᓂᖏᓐᓄᑦ ᐊᒻᒪᓗ ᐱᕈᐊᓂᒍᓐᓇᖃᑦᑕᕐᓂᖏᓐᓄᑦ (ᓲᕐᓗ ᓄᓇᕋᖃᓕᕈᓐᓇᕐᓂᖏᓐᓂ). ᑕᐃᑲᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᑕᒪᕐᒥᒃ ᑲᑎᓪᓗᒋᑦ ᐅᓪᓗᖏᑦ ᓂᒡᓚᓱᖕᓂᖃᓚᐅᖅᑐᑦ ᑕᒪᓂ ᓯᑯᕕᐅᕙᓪᓕᐊᔪᓇᖏᓂᖏᓐᓂ, ᐊᕐᕋᒍᓕᒫᖑᔪᒥ, ᐱᑕᖃᕋᔪᒃᓯᒪᕗᑦ ᑕᒪᕐᒥᒃ 465-ᓂᒃ ᐅᓪᓗᓂᒃ ᑕᒫᓂ 94% ᐳᓴᓐᑎᖏᓃᑦᑐᓂᒃ ᐅᖅᑯᓇᕐᓂᖅᓴᐅᖃᑦᑕᖅᑐᓂ ᐊᐅᔭᒃᑯᑦ ᑕᕿᖏᓐᓂ, ᐱᓗᐊᖅᑐᒥᒃ ᑕᒫᓂ ᐱᓗᐊᖅᑐᒥᒃ ᑕᕿᖓᓂ ᔪᓚᐃᒥ (195-ᖏᓃᔅᓱᑎᒃ ᐅᓪᓗᖏᑦ ᖁᐊᕐᕕᐅᔪᓐᓇᖏᓂᖏᓐᓂ/ ᓯᑯᕙᕝᕕᐅᕙᓪᓕᐊᔪᓐᓇᓐᖏᓂᖏᑦ ᐅᓪᓗᖏᑦ) ᐊᒻᒪᓗ ᑕᒫᓂ ᐋᒐᓯᒥ (158-ᖏᓃᔅᓱᑎᒃ ᒪᖑᒃᓯᕐᕕᐅᕙᓪᓕᐊᖃᑦᑕᕈᓐᓇᕐᖏᓂᑦ/ᐊᐅᑉᐸᓪᓕᐊᕝᕕᐅᖃᑕᕈᓐᓇᕐᓂᖏᑦ ᐅᓪᓗᖏᑦ). ᒪᖑᖅᐸᓪᓕᐊᔪᓐᓇᕐᓂᖏᓐᓂ ᐅᓪᓗᖏᑦ ᖃᐅᔨᒪᓇᖅᑐᑦ ᑕᐃᒪᐃᓕᖓᔪᓂᒃ ᐱᐅᓯᖃᖃᑕᕐᓂᖏᓐᓂᒃ ᖃᓄᐃᓕᖓᒐᔪᖕᓂᖏᓐᓂ ᐊᐅᔭᒃᑯᑦ ᐅᖂᓇᕐᓂᖅᓴᐅᑎᓪᓗᒍ (ᑕᑯᓗᒋᑦ ᐊᕐᕋᒍᒥ ᖃᓄᐃᓕᐅᖅᐸᓪᓕᐊᓚᐅᕐᓂᖏᑦ ᖁᓛᓂ). ᐊᕐᕋᒎᓚᐅᖅᑐᒥ 1996-ᒥ ᐊᒥᔅᓲᖏᓛᖑᓚᐅᖅᑐᑦ ᒪᖑᖅᓰᕝᕕᐅᔪᓐᓇᕐᓂᕐᒧᑦ ᐅᓪᓗᑭᓐᓂᖅᐹᖑᓚᐅᕐᓂᖅ ᐊᒻᒪᓗ ᑕᒪᓐᓇ ᐊᕐᕌᒎᓚᐅᖅᑐᖅ 2009-ᒥ ᒪᖑᖅᓰᕕᐅᔪᓐᓇᕐᓂᖏᑦ ᐅᓪᓗᐃᑦ ᐊᒥᔅᓱᓂᖅᐹᖑᓚᐅᖅᑐᑦ ᑕᐃᒪᖓᑦ ᑎᑎᕋᖅᑕᐅᖃᑦᑕᕆᐊᓕᓚᐅᖅᑎᓪᓗᒋ ᐅᓪᓗᒥᒧᑦ ᑎᑭᓪᓗᒍ ᕿᑭᖅᑕᖓᓂ. ᑕᐃᒫᒃᓴᐃᓐᓇᑲᓴᑦᑎᐊᖅᑕᐅᖅ ᒪᓕᒃᑐᓂᒃ ᐊᐅᔭᒃᑯᑦ ᓯᓚᐅᑉ ᐅᖂᓇᕐᓂᕆᕙᒃᑕᖓᓂᒃ, ᐅᖂᓇᕐᓂᖃᓚᐅᕐᓂᖏᑦ ᒥᑦᑎᒪᓕᑕᐅᑉ ᕿᑭᖅᑕᖓᓂ ᖃᐅᔨᔭᓚᐅᕐᒥᔪᑦ ᒥᑭᔪᒥᒃ ᐱᕙᓪᓕᐊᒐᓛᒃᓯᒪᓂᖏᓐᓂᒃ 16-ᖑᓚᐅᖅᑐᓂᒃ ᒪᖑᖅᓰᕝᕕᐅᔪᓐᓇᓚᐅᕐᓂᖏᓐᓂᒃ ᐅᖂᓇᕐᓂᖅᓴᐅᓚᐅᕐᓂᖏᓐᓂ ᐅᓪᓗᓂᒃ, ᖁᓕᐅᔪᓂᒃ ᐊᕐᕋᒎᐃᑦ ᓈᓯᒪᓕᕐᓂᖏᓐᓂ 1994-ᒥ ᐱᒋᐊᓚᐅᖅᑐᓂ.

ᐊᕐᕋᒍᑕᒪᖅ, ᐆᒪᔪᐃᓪᓗ ᐱᕈᖅᑐᓪᓗ ᐱᑕᖃᖃᑦᑕᖅᓯᒪᔪᑦ ᑕᒫᓂᒐᔪᒃᑐᓂᒃ 102-ᓂᒃ ᐅᓪᓗᖃᕐᓂᖏᓐᓂ ᕿᕿᕝᕕᐅᔪᓇᖏᓐᓂᕐᒥ, ᑕᒫᓂ ᑕᕿᖓᓂ ᐱᒋᐊᓚᐅᖅᑐᓂᒃ ᒪᐃᒥᒃ ᑕᒪᐅᖓ ᑎᑭᓪᓗᒍ ᓯᑎᐱᕆᒧᑦ. ᓇᓗᓇᖏᓚᖅ ᑕᒪᒃᑯᐊ ᐊᐅᔭᐅᓂᖏᓐᓂ ᐅᓪᓗᕆᔭᐅᖕᒪᑕ (ᑕᕿᖏᓐᓂ ᔫᓂ-ᔪᓚᐃ-ᐋᒐᓯᒥᓗ). ᒥᑦᑎᒪᑕᓕᐅᑉ ᕿᑭᖅᑕᖓᓂ ᐅᓪᓗᐃᑦ ᕿᕿᑎᕐᕕᐅᔪᓐᓇᖏᓐᓂᖏᑦ ᐊᒥᔅᓱᖏᑐᒪᕆᐅᓚᐅᖅᑐᑦ ᐊᕐᕋᒎᓚᐅᖅᑐᒥ 1997-ᒥ, ᐱᔾᔪᑕᐅᓚᐅᕐᓂᖓᓄᑦ ᑕᐃᔅᓱᒪᓂ ᑕᕿᖓᓂ ᓯᑎᐱᕆᒥ ᐊᒃᓱᐊᓗᒃ ᓂᒡᓚᓱᓚᐅᖅᓯᒪᖕᒪᑦ (ᓂᒡᓕᓇᕐᓂᖃᕋᔪᒃᑐᒥ ᑕᒫᓂ 5.4°C-ᒦᖃᑦᑕᓚᐅᖅᑐᓂᒃ) ᐊᒻᒪᓗ ᑕᐃᔅᓱᒪᓂ ᐊᕐᕋᒎᓚᐅᖅᑐᒥ 1998-ᒥ ᐊᒥᓲᓂᖅᐹᖑᓚᐅᖅᑐᑦ ᐅᖂᓇᕐᓂᖅᓴᐅᔪᓂ ᐅᓪᓗᖃᓚᐅᕐᓂᖏᑦ ᓂᒡᓚᓱᖕᓂᖃᖅᑐᓂ ᖁᓛᓂ 0°-ᒥᒃ ᓯᑎᐱᕆᒥᓗ ᐅᖂᓇᕐᓂᖅᓴᒻᒪᕆᐅᓚᐅᕐᓂᖓᓄᑦ ᓯᓚ (ᐅᖂᓇᕐᓂᖃᖅᑎᒋᕙᓚᐅᕐᒪᑕ ᑕᒫᓂ 2.8°C-ᒥᒃ) ᓴᓂᐊᓂ ᐱᐅᓯᑐᖃᕆᒐᔪᒃᑕᖏᓐᓂᒃ ᐊᑯᓂᐊᓗᒃ ᓂᒡᓚᓱᖕᓂᖃᕋᔪᖕᓂᖅ ᑕᒫᓂ ᓯᑎᐱᕆᒥ: -1.1°C-ᒥ). ᖃᐅᔨᓴᖅᑕᐅᖃᑦᑕᖅᓯᒪᓂᖏᓐᓂ ᓱᓕ ᐃᓕᑕᕆᔭᐅᓯᒪᔪᖃᖏᓚᖅ ᖃᓄᐃᓕᕙᓪᓕᐊᓂᖏᓐᓂᒃ ᕿᕿᕝᕕᐅᔪᓐᓇᖃᑦᑕᖏᓂᖏᓐᓂᒃ ᐅᓪᓗᕆᔭᐅᕙᒃᑐᓂᒃ ᑕᐃᒪᖓᓂᒃ 1994-ᖑᓚᐅᖅᑐᒥᒃ.

ᒪᖁᒃᐸᖕᓂᖅ

ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐊᐅᔭᒃᑯᑦ ᒪᖁᖅᐸᖕᓂᖓ ᑎᑎᕋᖅᑕᐅᕙᓪᓕᐊᖃᑦᑕᐃᓐᓇᖅᑐᖅ. ᓲᖃᐃᒻᒪᓗᓐᓃᑦ, ᖃᐅᔨᒪᔾᔪᑎᒃᓴᐃᑦ ᐱᓯᒪᔪᑦ ᔫᓐᓂ 1-ᒥᒃ ᐋᒐᓯ 17-ᒧᑦ, ᑕᐃᒪᖓᓂᒃ ᑎᑎᕋᖅᑕᐅᕙᓪᓕᐊᓕᓚᐅᖅᑐᑦ 1995-ᖑᓚᐅᖅᑐᒥᒃ ᐱᒋᐊᖅᓱᑎᒃ. ᒪᖁᖕᓂᖃᕋᔪᖅᐳᑦ ᑕᒪᓐᓇ ᑕᐃᒪᖓᓂᒃ ᐃᒪᓐᓇᑎᒋ 77.5 mm ᒥᓕᒦᑕᓕᒥᒃ. ᑕᕿᖓᓂ ᔪᓚᐃᒥ ᒪᖁᒐᔪᖕᓂᖅᐸᖑᕙᒃᑐᑦ ᑭᓂᖅᐹᖑᕝᕕᐅᕙᖕᑐᖅ ᑕᒪᓐᓇ ᑕᕿᖓ ᐊᐅᔭᒃᑯᑦ, ᒪᖁᖕᓂᖃᖅᑎᒋᕙᒃᑐᒥᒃ ᑕᒫᓂ 36.9 mm ᒥᓕᒦᑕᓕᖕᒥᒃ. ᐅᓪᓗᒥᒧᑦ ᑎᑭᓪᓗᒍ ᑕᐃᒪᖓᑦ, ᐊᕐᕋᒍᖓ 2015 ᐸᓂᕐᓂᖅᐹᖑᓚᐅᖅᑐᖅ ᑎᑎᕋᖅᖃᑦᑕᕆᐊᓕᓚᐅᕐᓂᖏᓐᓂᒃ (8.5 mm ᒥᓕᒦᑕᓕᖕᒥᒃ) ᑕᐃᔅᓱᒪᓂᓗ ᐊᕐᕋᒍᒥ 2012 ᑭᓂᖅᐸᖑᓚᐅᖅᓱᓂ ᓄᓇᖓᓂ ᒪᖁᒡᕕᓯᒪᓚᐅᕐᓂᖓᓂ ᐊᖏᓂᖃᓚᐅᕐᒪᑦ ᐆᒃᑐᕋᐅᑎᑎᒍᑦ 153 ᒥᓕᒦᑕᓕᖕᒥᒃ. ᑕᒪᐃᓐᓂᒃ, ᒥᑭᒡᓕᒋᐊᖅᓯᒪᓕᖅᓱᓂ ᑕᒪᓐᓇ ᐆᒃᑐᕋᐅᑎᓕᖕᓄᑦ 21 mm ᒥᓕᒦᑕᓕᖕᓄᑦ, ᖁᓖᑦ ᐊᕐᕋᒍᐃᑦ ᓈᓯᒪᓕᖅᑎᓪᓗᒋᑦ, ᑕᑯᔭᐅᖃᑕᖅᓯᒪᔪᓂ ᑕᒪᐃᓐᓂᒃ ᒪᖁᖃᑦᑕᕐᓂᖏᓐᓂᒃ ᐊᐅᔭᒃᑯᑦ ᕿᑭᖅᑕᖓᓂ ᑕᐅᕙᓂ.

ᐊᕐᕋᒎᑉ ᐊᑐᕐᓂᖓᓂ ᐊᓯᖏᓐᓂ, ᓯᓚᓕᕆᕕᖕᒥ ᖃᐅᔨᓴᖅᑕᐅᕙᖕᒥᔪᑦ ᓄᓇᐅᑉ ᐊᐱᓯᒪᓂᖓᑕ ᐃᔾᔪᑎᒋᓂᖏᑦ. ᐊᕐᕋᒍᓕᒫᑲᓴᖕᒥ, ᐊᐱᓯᒪᓂᖅ ᓵᑦᑑᕙᒃᑐᖅ, ᐃᔾᔪᓂᖃᕋᔪᒃᑐᒥ ᑕᒫᓂ 16.2 cm ᓴᓐᑎᒥᑕᓕᖕᒥᒃ. ᑭᓯᐊᓂᓕᑦᑕᐅᖅ, ᑕᒫᓂ ᒪᐃᖑᑎᓪᓗᒍ ᐊᐱᓯᒪᓗᐊᒃᑲᓐᓂᓕᖃᑦᑕᖅᐳᖅ ᑕᒫᓃᓕᕈᓐᓇᖅᑐᒥᒃ 29.2 cm ᓴᓐᑎᒦᑕᓕᖕᒥᒃ. ᑕᒪᓐᓇ ᐊᐳᑎᖃᕐᓂᖅᓴᐅᓕᖅᐸᖕᓂᖅ ᐱᔾᔪᑎᖃᖅᑐᖅ ᐊᓯᔾᔨᖅᓯᒪᓂᖓᓄᑦ ᓯᓚᐅᑉ ᐅᖂᓇᕐᓂᖅᓴᐅᓕᖃᑦᑕᕐᓂᖓᓄᑦ ᐅᐱᕐᖔᒃᑯᑦ (ᑕᑯᓗᒋᑦ ᐊᕐᕋᒍᑕᒫᖅ ᓄᓇᐅᑉ ᐊᐱᓯᒪᕙᖓ ᑕᐃᑲᓂ ᓯᓚᐅᑉ ᖃᐅᔨᓴᖅᑕᐅᓯᒪᓂᖓ).

ᐊᓄᕆᐅᑉ ᐊᓄᕆᑎᒋᕙᖕᓂᖓ

ᐊᐅᔭᐅᓂᖓᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ ᐊᓄᕆᓂᖅᐸᖑᕙᒃᑐᖅ, ᐊᓄᕆᓂᖃᖅᑎᒋᔪᓐᓇᖅᓱᓂ ᑕᒫᓂ 10.1 ᑭᓛᒥᑕᓂᒃ/ᐃᑲᕐᕋᑕᒫᖅ. ᐃᒡᓗᐊᓄᖔᖓᔫᔮᖅᑐᒥᒃᑕᐅᖅ, ᐅᑭᐅᒃᑯᑦ ᓯᓚᐅᑉ ᓂᒡᓚᓱᖕᓂᖓᓂ, ᕿᑲᕐᓇᕐᓂᖅᓴᐅᕙᒃᐳᖅ, ᐊᓂᕆᑎᒋᔪᓐᓇᖅᓱᓂᓗ ᑕᒪᓃᒐᔪᒃᑐᒥᒃ 3.6 ᑭᓛᒥᑕᓂᒃ/ᐃᑲᕐᕋᑕᒫᖅ. ᐅᐱᕐᖔᑯᓂᖓᓂ ᐅᑭᐊᒃᓵᒻᒥᓗ, ᐊᓄᕆᓂᖏᓐᓂ ᐊᑯᓐᓂᖅᓱᖅᐸᒃᑐᑦ ᑕᐃᒃᑯᓇᖓᑦ ᐊᐅᔭᐅᓂᕐᒥᒃ ᐊᒻᒪᓗ ᐅᑭᐅᖑᓂᕐᒥᒃ, ᑕᒫᓃᒐᔪᒃᓱᑎᒃ ᐊᓄᕌᖃᑕᕐᓂᖏᑦ 5.2 ᑭᓛᒥᑕᓂᒃ/ᐃᑲᕐᕋᑕᒫᖅ ᐊᒻᒪᓗ ᑕᒪᓂ 7.4 ᑭᓛᒥᑕᓂᒃ/ᐃᑲᕐᕋᑕᒪᖅ, ᐊᑐᓂ.

ᓂᒡᓕᓇᖅᑎᒋᕙᖕᓂᖏᑦ ᐅᑭᐅᖅᑕᖅᑐᒥ ᓄᓇᐅᑉ ᐃᓗᐊᓂ ᐃᑉᔪᖅ