ᓄᓇᐅᑉ ᐃᑉᔫᓂᖏᑦ ᐱᐅᓯᖃᖅᐳᑦ ᐊᑯᓯᒪᕙᒃᑐᒥᒃ ᓄᓇᒥᒃ, ᐃᒪᕐᒥᒃ ᐊᒻᒪᓗ ᓯᓚᒥᒃ ᐊᓂᕐᓂᒥᒃ. ᐊᓯᖏᓐᓂ ᓇᓂᑐᐃᓐᓇᖅ ᐃᑉᔪᐃᑦ ᓄᓇᒥ ᐃᒪᐃᓐᓇᐅᓲᖑᒐᓗᐊᖅᑎᓪᓗᒋᑦ, ᑕᐃᒪᑉᐸᖏᑦᑐᑦ ᐅᑭᐅᖅᑕᖅᑐᖅᐸᓯᐅᓂᕐᒥ, ᖁᐊᖑᐃᓐᓇᕐᓂᖅᓴᐅᕙᖕᓂᖓᓄᑦ ᐃᑉᔪᖅ ᑕᒫᓂ. ᑕᐃᒪᐃᓕᖓᕗᑦ ᐅᑭᐅᖅᑑᑉ ᐃᑉᔪᖃᕐᕕᐅᓂᖏᑦ ᓂᒡᓚᓱᒡᔪᐊᖃᑕᕐᒪᑦ ᓄᓇᖓ ᐅᑭᐅᒃᑯᑦ, ᐊᖏᔪᐊᓗᒃ ᓄᓇᖓ ᓂᒡᓕᖃᑕᕐᒪᑦ, ᐃᑉᔪᖃᕐᓂᖏᓪᓗ ᓂᒡᓚᓱᖕᓂᖃᓲᖑᓪᓗᑎᒃ ᐊᑕᓃ 0°C-ᒥ. ᑕᒪᒃᑯᐊ ᐃᑉᔪᖃᕐᓂᖏᑦ ᖁᐊᖑᐃᓐᓇᕌᖓᒥᒃ ᒪᕐᕉᖕᓂᒃ ᐊᕐᕋᒎᖕᓂᒃ, ᑕᐃᔭᐅᓕᖅᐸᒃᑐᑦ ᓄᓇᐅᑉ ᐃᓗᐊᒍᑦ ᖁᐊᖑᐃᓐᓇᕐᓂᕐᒥᒃ, ᑕᐃᒪᐃᓕᖓᔪᐃᓐᓇᑲᓴᐅᓪᓗᓂ ᓄᓇᖓ ᐅᑭᐅᖅᑕᖅᑐᖅᐸᓯᐅᓂᕐᒥ. ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᓯᓚᓕᕕᒃ ᖃᓂᒋᔭᖓᓃᑦᑐᑦ ᖃᐅᔨᓴᕐᕕᒋᕙᒃᑕᓐᓂ ᐆᒃᑐᕋᐃᕐᕕᐅᕙᒃᑐᖅ ᐃᑉᔫᑉ ᓂᒡᓚᓱᖕᓂᖃᕐᓂᖏᓐᓂᒃ ᑕᐃᒪᖓᓂᒃ ᐊᕐᕋᒍᒥᒃ 2000-ᒥᒃ, ᖃᐅᔨᔭᐅᓯᒪᔪᓪᓗ ᐅᕙᑎᓐᓄᑦ ᑐᑭᓕᐅᕈᑕᐅᔪᓐᓇᖅᓱᑎᒃ ᓂᒡᓚᓱᒃᑎᒋᕙᖕᓂᖓᓂᒃ ᖃᕐᓕᒃᑐᕐᕕᖕᒥ ᓄᓇᒥᒃ ᐃᑉᔪᖃᕐᕕᐅᓂᖏᓐᓂ.

ᐊᔾᔨᒌᖏᓐᓂᖏᑦ ᐅᑭᐅᒃᑯᑦ ᐊᐅᔭᒃᑯᓪᓗ ᐃᑉᔪᖅ ᓄᓇᐅᑉ ᐃᓗᐊᓂ ᓂᒡᓚᓱᖕᓂᖏᑦ

ᐊᐅᔭᒃᑯᑦ (ᐋᒐᓯᒥ) ᓄᓇᐅᑉ ᐃᓗᐊᓂ ᐃᑉᔪᖅ ᐆᓇᕐᓂᖃᖅᑎᒋᕙᒃᑐᖅ ᑕᒫᓂ 7°C-ᒥ, ᐊᒻᒪᓗ ᐅᑭᐅᒃᑯᑦ (ᕕᕗᐊᕆᒥ) ᑲᑕᒃᐸᒃᓱᓂᓗ ᓂᒡᓚᓱᒃᐸᖕᓂᖓ ᑕᒪᐅᖓ -35°C-ᒧᑦ, ᐊᔾᔨᒌᒍᓐᓃᕐᓂᖏᑦ ᑕᐃᒪᐃᓕᕙᖕᒪᑕ ᓂᒡᓚᕐᔪᐊᕌᖓᑦ ᓄᓇᒥ ᐃᑉᔪᖅ. ᑕᒡᕘᓇ ᐊᔾᔨᒌᓐᖏᕐᔪᐊᕐᓂᖏᑦ ᑕᐃᒪᓕᕙᒃᑐᑦ ᓄᓇᑉ ᐊᒃᑐᖅᑕᐅᓯᒪᓪᓚᕆᖕᓂᖓᓄᑦ ᓯᓚᒧᑦ, ᓂᒡᓚᓱᓕᕐᔪᐊᖃᑕᕐᒪᑦ ᐊᕐᕌᒍᒥ ᓯᓚᒥᒃ ᒪᓕᒃᑐᓂᒃ (ᑕᑯᓗᒋᑦ ᓯᓚᐅᑉ ᖃᐅᔨᓴᖅᑕᐅᓯᒪᓂᖓ). ᓄᓇᐅᑉ ᐃᓗᐊᓂ ᑕᖅᑲᒧᖔᓗᒃ ᐊᒃᑐᖅᑕᐅᓯᒪᔪᓐᓇᕐᓂᖓ ᒥᑭᓐᓂᖅᓴᐅᕙᒃᐳᖅ ᐊᒻᒪᓗ ᐊᓯᔾᔨᑭᑕᖏᓂᖅᓴᐅᕙᒃᓱᑎᒃ ᓂᒡᓚᓱᒃᑎᒋᕙᖏᓐᓂ, ᐊᐅᔭᐅᓂᖓᓂᒃ ᐅᑭᐅᖑᒥᓗᓐᓂ. ᓲᕐᓗ ᐆᒃᑑᑎᒋᓗᒍ, ᓂᒡᓚᓱᖕᓂᖏᑦ ᓯᓚᓕᕆᕕᖕᒥ ᖃᓂᒋᔭᖓᓂ ᖃᐅᔨᓴᕐᕕᒃᑕ ᓄᓇᐅᑉ ᐃᓗᑐᓂᖓᓂ ᑕᒫᓂ 8 m ᒦᑕᓂᒃ ᐃᓗᑐᓂᕐᒥ ᓄᓇᒥ, ᐊᔾᔨᒌᖏᓐᓂᖃᑐᐃᓐᓇᓚᐅᖅᐳᖅ -10°C-ᒥᒃ ᐊᒻᒪᓗ -12°C-ᒥᒃ. ᑕᐃᒪᐃᓂᖓᓄᑦ, ᓄᓇᐃᑦ ᐃᑉᔫᓂᖓᑕ ᐊᐅ4ᑉᐸᓪᓕᐊᕙᖕᓂᖓ ᑲᔪᓯᔪᓐᓇᓲᖑᕗᖅ ᑕᒪᓃᓐᓇᖅ ᖃᓂᓐᓂᖅᓴᐅᓂᖏᓐᓂ ᓄᓇᐅᑉ ᖄᖓᓄᑦ ᐃᑉᔪᕐᓂ, ᓄᓇ ᐆᓇᖅᓯᔪᓐᓇᕐᓂᖓᓄᑦ ᐊᐅᔭᒃᑯᑦ ᖁᓛᓄᐊᕈᓐᓇᖅᑐᒥᒃ 0°C-ᒥᒃ. ᓄᓇᐅᑉ ᐃᓗᐊᓂ ᐃᓗᑐᓂᖅᓴᐅᔪᒥ ᑕᐃᒪᖓᑦ ᓂᒡᓚᓱᖕᓂᖃᐃᓐᓇᓲᖑᖕᒪᑕ ᐊᑖᓂ 0°C-ᒥᒃ ᐃᑉᔪᖅ ᐃᓗᐊᓂ ᖁᐊᖑᐃᓐᓇᓲᖑᓂᖓᓂ. ᖁᓕᕇᓕᖅᓯᒪᔪᓂᒃ ᓄᓇᐅᑉ ᐃᓗᐊᒍᑦ ᖁᐊᖃᑦᑕᕐᓂᖓᓄᑦ, ᐊᐅᒃᐸᖕᓂᖓᓄᓪᓗ ‘ᐊᓯᔾᔨᖃᑦᑕᕐᓂᖏᓐᓂ ᖁᓕᕇᓕᕐᓂᖏᑦ’ ᐃᔾᔪᑎᒋᓂᖓᓗ ᑕᒪᑐᒪᐅᑉ ᖁᐊᖑᕙᖕᓂᖓ ᒪᓕᒃᐸᒃᑐᖅ ᓂᒡᓚᓱᒃᑎᒋᓂᖓᓂᒃ ᐅᑭᐅᒃᑯᑦ ᐊᒻᒪᓗ ᐆᓇᖃᑕᕐᓂᖓᓂᒃ ᓯᓚᐅᑉ ᐊᐅᔭᒃᑯᑦ. ᐊᓯᔾᔨᑭᑕᖃᕐᓂᖏᑦ ᐃᑉᔪᖃᕐᓂᖏᑦ ᓄᓇᐅᑉ ᐃᓗᐊᓂ ᑕᐅᕙᓂ ᖃᐅᔨᓴᕐᕕᒃᑕ ᖃᓂᒋᔭᖓᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ ᐃᔾᔪᑎᒋᕗᖅ 85 cm ᓴᓐᑎᒦᑕᓂᒃ.

ᑲᒪᓇᕆᕗᖅ ᖃᐅᔨᔭᐅᓚᐅᖅᑐᖅ ᐃᓗᑐᓄᐊᓗᖕᒥ ᖁᓕᕇᖕᓂᖏᓐᓂ ᐃᑉᔪᖅᒥᒃ ᐱᔾᔪᑎᖃᖅᑐᖅ ᐃᑉᔪᕐᒥ ᓂᒡᓚᓱᖕᓂᖓ ᐆᓇᕐᓂᖅᓴᐅᕙᖕᓂᖓ ᐅᑭᐅᖑᓂᖓᓂ ᓴᓂᐊᓂ ᐊᐅᔭᐅᓂᖓᓂᒃ. ᐱᔾᔪᑕᐅᔪᖅ ᑕᐃᒪᐃᓕᖓᓂᖓᓄᑦ ᑭᐴᖓᔫᔭᕐᓂᖏᓐᓄᑦ ᓂᒡᓚᓱᖕᓂᖏᓐᓂ ᑕᒪᓐᓇ ᐅᖂᓇᕐᓂᖓ ᑎᑭᐅᑎᕙᓪᓕᐊᑯᑖᒋᐊᖃᕐᒪᑦ ᐃᑉᔪᖅᑎᒎᖅᐸᓪᓕᐊᓗᓂ. ᓄᓇᐅᑉ ᐃᓗᐊᒍᑦ ᐃᑉᔪᖅ ᐃᓗᑐᓂᒻᒪᕆᖕᒦᑦᑐᖅ ᓂᒡᓚᓱᒃᐸᖕᒪᑦ ᐊᐅᔭᐅᓂᖓᓂ ᒪᓕᖃᑦᑕᕐᒪᑦ ᓂᒡᓚᓱᖔᓚᐅᕐᓂᖓᓂᒃ ᓯᕗᓂᐊᒍᑦ ᐅᑭᐅᖑᓚᐅᖅᑑᑉ, ᑎᑭᐅᑎᓕᓵᖃᑕᕐᒪᑦ ᓄᓇᐅᑉ ᐃᓗᑐᓂᐊᓗᐊᓂ ᖁᓕᕆᖕᓂᖏᓐᓄᑦ ᑕᒫᓂ ᑭᓯᐊᓂ ᐊᐅᔭᐅᓕᖅᑎᓗᒍ. ᐃᒡᓗᐊᓄᖔᖓᒋᓪᓗᑎᒃ ᐆᓇᕐᓂᖅᓴᐅᓕᖃᑕᕐᓂᖏᑦ ᐅᑭᐅᖑᓕᖅᑎᓪᓗᒍ ᓄᓇᐅᑉ ᐃᓗᐊᒍᑦ, ᒪᓕᒃᑐᓂᒃᑕᐅᖅ ᓱᓕ ᓯᕗᓂᐊᓂ ᐊᐅᔭᐅᓚᐅᖅᑐᒥ ᐆᓇᕐᓂᕆᓚᐅᖅᑕᖏᓐᓂᒃ ᐃᑉᔪᖅᑎᒎᖅᐸᓪᓕᐊᔭᕆᐊᖃᕐᓂᖓᓄᑦ. ᑕᒪᓐᓇ ᐱᐅᓯᕆᔭᖅ ᐅᖂᓇᕐᓂᖅ ᐊᐅᓚᕙᓪᓕᐊᖃᑕᕐᓂᖓ ᓲᕐᓗ ᒪᓪᓕᖅᑐᑎᑐᑦ ᐃᑉᔫᓂᖓᒎᖅᑐᖅ ᑐᑭᓯᓇᖅᓯᑦᑎᐊᖃᑦᑕᖅᐳᖅ ᑕᑯᒋᐊᖅᑕᐅᔭᖄᖓᒥᒃ ᑕᕿᑕᒫᖅ ᖃᓄᐃᓕᕙᓪᓕᐊᖃᑕᕐᓂᖏᑦ ᓄᓇᐅᑉ ᐃᓗᐊᓂ ᐃᑉᔪᖅ (ᑕᑯᓗᒋᑦ ᐊᑕᓃᑦᑐᑦ).

ᑕᖅᑭᑕᒫᖅ ᓄᓇᒥ ᐃᑉᔪᓂᖏᓐᓂ ᖃᓄᐃᓕᖓᓂᖏᑦ ᓂᒡᓚᓱᖕᓂᕐᒥ

ᐃᓱᒪᒃᓴᖅᓯᐅᕈᑕᐅᔪᓐᓇᕐᓂᖏᑦ ᓂᒡᓚᓱᒃᑎᒋᕙᖕᓂᖏᑦ ᑕᕿᑕᒫᖅ ᓄᓇᒥ ᐃᑉᔪᕐᓂ ᐊᑑᑎᖃᖅᐳᑦ ᑕᑯᔭᐅᔪᓐᓇᕐᓂᖏᓐᓄᑦ ᖃᓄᖅ ᓂᒡᓚᓱᒃᑎᒋᓕᖅᐸᖕᒪᖔᑕ ᐅᑭᐅᒃᑯᑦ ᐊᒻᒪᓗ ᐅᖂᓇᕐᓂᖃᖅᐸᖕᒪᖔᑕ ᐊᐅᔭᒃᑯᑦ ᓱᒃᑲᐃᑦᑐᒥᒃ ᑎᑭᐅᑎᕙᓪᓕᐊᓂᖏᓐᓂᒃ ᓄᓇᐅᑉ ᖄᖓᓂᒃ ᐃᑉᔪᕐᒥᒃ ᑕᖅᑲᒧᖔᓗᒃ ᐃᓗᑐᓂᐊᓗᕐ ᓄᓇᐅᑉ ᖁᓕᕇᓕᖅᑐᖅᓯᒪᓂᖏᓐᓂ ᐃᑉᔪᐃᑦ. ᐱᖓᓱᓂᒃ ᑕᕿᓂᒃ ᐅᑭᐅᒃᑯᑦ, ᓄᓇᐅᑉ ᖄᖓᓃᑦᑐᖅ ᐃᑉᔪᖅ ᓂᒡᓚᓱᓕᖃᑕᖅᐳᖅ ᓯᓚᒥ ᓂᒡᓚᓱᖕᓂᕐᒧᑦ, ᐊᑦᑎᒃᑐᒦᖃᑦᑕᖅᓱᑎᒃ ᓈᓴᐅᑎᑎᒍᑦ ᓂᒡᓚᓱᒃᑎᒋᓂᖏᑦ, ᓂᒡᓚᓱᖕᓂᖅᐹᒦᖃᑦᑕᖅᓱᑎᒃ ᑕᒫᓂ ᕕᕗᐊᕆᐅᓕᕌᖓᑦ. ᐅᐱᕐᖔᖑᓕᕌᖓᑦ, ᓯᓚ ᐅᖂᓇᖅᓯᕙᓪᓕᐊᓕᖃᑦᑕᖅᑐᖅ, ᓄᓇᖓᓂᓗ ᓄᓇᐅᑉ ᖄᖓᓃᑦᑐᑦ ᐃᑉᔪᖃᕐᓂᖏᑦ ᓂᒡᓚᓱᒍᓐᓃᖅᐸᓪᓕᐊᓕᖃᑦᑕᖅᓱᑎᒃ ᓇᓴᐅᓯᕆᓪᓗᓂ ᖁᒻᒧᒃᐸᓪᓕᐊᖃᑕᕐᒪᑦ, ᓴᓂᐊᓂ ᐅᑭᐅᖑᓚᐅᖅᑐᒥᒃ. ᑕᐃᒃᑯᓇᓂᓗ ᓄᓇᐅᑉ ᐃᓗᑐᓄᐊᓗᖏᓐᓂ ᐃᑉᔪᕐᓂ ᖁᓕᕇᓕᖅᑐᖅᓯᒪᔪᓂ, ᐃᑉᔪᐃᑦ ᓂᒡᓚᓱᓕᖅᐸᓪᓕᐊᑐᐃᓐᓇᖃᑦᑕᖅᐳᑦ, ᐅᐱᕐᖏᕙᓪᓕᐊᓕᕋᓗᐊᖅᑎᓪᓗ, ᓴᕿᐅᒪᓂᖏᓐᓄᑦ ᓂᒡᓚᓱᓚᐅᕐᓂᖏᑦ ᓱᓕ ᓯᕗᓂᐊᒍᑦ ᐅᑭᐅᖑᓚᐅᖅᑐᒥᒃ. ᐊᐅᔭᐅᓂᖓᓂ, ᓯᓚ ᐅᖂᓇᕐᓂᖅᐸᕐᒥᓃᖃᑦᑕᖅᑐᖅ, ᖁᑦᑎᖕᓂᖅᐸᒥᑦᑐᓂᒃ ᑕᒫᓂ ᔪᓚᐃᖑᑎᓪᓗᒍ. ᐃᒡᓗᐊᓄᖔᖓᔪᒥᒡᓗ, ᐃᓗᑐᓂᐊᓗᖕᖏᓐᓂ ᓄᓇᐅᑉ ᐃᑉᔪᕐᓂ, ᓂᒡᓚᓱᓕᖅᐸᓪᓕᐊᓕᓵᑐᐃᓐᓇᕆᕗᑦ ᓯᕗᓂᐊᒍᑦ ᐅᑭᐅᖑᓚᐅᕐᓂᖓᓂᒃ ᐊᐅᓚᓂᖏᓐᓄᑦ. ᑕᒫᓂ ᐋᒐᓯᐅᓕᕌᖓᑦ, ᓯᓚ ᓂᒡᓚᖅᐸᓪᓕᐊᓕᖃᑦᑕᖅᑐᖅ, ᓄᓇᐅᑉ ᖄᖓᓃᑦᑐᑦ ᐃᑉᔪᖅ ᓂᒡᓚᖅᓯᕙᓪᓕᐊᖃᑕᐅᓪᓗᓂ, ᑕᐃᒃᑯᓇᓂ ᓄᓇᐅᑉ ᐃᓗᑐᓄᐊᓗᐊᓂ ᑕᖃᒪᓂ ᐃᑉᔪᖓ ᐆᓇᖅᓯᕙᓪᓕᐊᓕᓴᕆᓪᓗᑎᒃ ᐊᐅᓚᕙᓪᓕᐊᓂᖓᓄᑦ ᐃᑉᔪᖅᑎᒍᑦ. ᐅᑭᐅᒃᑯᑦ, ᐊᐅᔭᐅᓚᐅᖅᑐᒥᒃ ᐅᖂᓇᕐᓂᐅᓚᐅᖅᑐᖅ ᐃᖏᕐᕋᕙᓪᓕᐊᓕᓵᖅᐳᖅ ᐃᓗᑐᓄᐊᓗᐊᓄᑦ ᓄᓇᐅᑉ ᐃᑉᔪᕐᒧᑦ, ᐆᓇᕐᓂᖅᐸᕆᓂᐊᓕᕐᒥᔭᖏᓐᓄᑦ ᑎᑭᑕᐅᓂᐊᕋᒥᒃ. ᓱᒃᑲᐃᑦᑐᒥᒃ ᐱᕙᓪᓕᐊᖃᑕᕐᓂᖏᑦ ᐊᐅᔭᒃᑯᑦ ᐅᖂᓇᕐᓂᖓᓂᒃ ᐊᒻᒪᓗ ᐅᑭᐅᒃᑯᑦ ᓂᒡᓚᓱᖕᓂᖓᓂᒃ ᐊᐅᓚᕙᓪᓕᐊᓂᖏᑦ ᐃᒡᓗᐊᓄᖔᖓᕙᒃᐳᑦ; ᐊᐅᔭᐅᓂᖓᓂ ᓄᓇᐅᑉ ᖄᖓᓂ ᐅᖂᓇᕐᓂᖅᐹᕆᔭᖓᓂ, ᓄᓇᐅᑉ ᐃᓗᐊᒍᑦ ᐃᑉᔪᕐᓂ ᐃᓗᑐᔪᓂ ᓂᒡᓚᓱᖕᓂᖅᐹᕆᓪᓗᓂᒋᑦ ᐊᒻᒪᓗ ᐅᑭᐅᒃᑯᑦ ᓄᓇᐅᑉ ᖄᖓᓂ ᓂᒡᓚᓱᖕᓂᖅᐹᖑᓂᖓᓂ, ᓄᓇᐅᑉ ᐃᓗᑐᓂᐊᓗᐊᓂ ᐃᑉᔪᖅ ᐅᖂᓇᕐᓂᖅᐸᕆᔭᐅᓂᒧᐊᖃᑦᑕᕐᒪᑦ.

ᐊᑐᓂ ᐊᕐᕋᒍᑕᒫᖅ ᒪᓕᒃᑐᒥᒃ ᓯᓚᐅᑉ ᖃᓄᐃᓂᖓᓂᒃ, ᑕᕿᑕᒫᖅ ᓄᓇᐅᑉ ᐃᑉᔫᖃᕐᕕᖏᓐᓂ ᓂᒡᓚᓱᒃᑎᒋᓂᖏᑦ ᓴᖅᑭᐅᒪᑎᑕᐅᕗᑦ ᑕᖅᓵᖃᖅᑐᓂᒃ ᐊᔾᔨᒌᖏᑦᑑᑎᓂᒃ ᐊᑐᖅᓱᑎᒃ, ᑕᐃᒃᑯᐊᓗ ᐊᓯᖏᑦ ᖃᓄᐃᓕᖓᓂᖏᑦ ᐱᖓᓱᓂᒃ ᓯᓚᐅᑉ ᖃᓂᐃᓕᖓᓕᕐᓂᖓᓂᒃ ᒪᓕᒃᑐᓂᒃ ᑕᑯᒃᓴᐅᓗᑎᒃ ᑕᖅᓴᖃᖅᑐᒥ ᓯᐊᕐᓇᒥᒃ. ᖃᐅᔨᒪᔾᔪᑎᒃᓴᓂᒃᑕᐅᓯᒪᔪᑦ ᐅᕙᖓᑦ Allard et al., 2020 (doi: 10.5885/45291SL-34F28A9491014AFD).

ᑕᑯᒋᐊᑎᐊᒃᑲᓐᓂᖅᓱᒋᑦ ᓄᓇᐅᑉ ᖄᖓᓃᑦᑐᓂᒃ ᐃᑉᔪᖓᓐᓂ ᓂᒡᓚᓱᒃᑎᒋᕙᖕᓂᖓᓂ ᐅᑭᐊᒃᓵᒃᑯᑦ

ᑕᒫᓃᓕᕌᖓ ᐊᕐᕋᒍᒥ ᐋᒐᓯᒥ, ᑕᒪᕐᒥᑲᓴᒃ ᓄᓇᐅᑉ ᖄᖓᓃᑦᑐᑦ ᓂᒡᓚᓱᓕᖅᐸᖕᓂᖏᑦ ᖃᐅᔨᕝᕕᐅᓚᐅᖅᑐᑦ ᐊᓯᔾᔨᖅᓴᕋᐃᖏᓐᓂᖃᕐᓂᖓᓂᒃ ᓄᓇᐅᑉ ᐃᑉᔪᕐᕕᖏᓐᓂ, ᐱᔾᔪᑕᐅᓂᕐᒧᑦ ᓄᓇᐅᑉ ᐃᑉᔫᑉ ᓂᔅᓚᓱᖕᓂᖓ ᑕᐃᒪᐃᓕᖓᐃᓐᓇᑐᐃᓐᓇᓕᖃᑕᕐᒪᑦ 0°C-ᒥᖏᓐᓇᓕᖃᑦᑕᖅᓱᓂ ᐊᑯᓂᑲᓪᓚᒻᒪᕆᒃ. ᑕᒪᓐᓇ ᐊᓯᔾᔨᖅᓴᕋᐃᖏᓐᓂᕋᖅᑕᐅᔪᖅ ᐅᖃᐅᓯᐅᕙᒃᑐᖅ ᐃᒫᒃ ‘0-ᒦᖃᑦᑕᐃᓐᓇᕐᓂᖓ ᓂᒡᓚᓱᖕᓂᖓᓂ’. ᑕᒪᓐᓇ ᖃᐅᔨᔭᐅᒐᒥ ᑲᒪᓇᕆᔭᐅᓚᐅᖅᑐᖅ ᐱᔾᔪᑕᐅᓗᓂ ᐊᑕᐅᑎᒃᑯᑦ ᓄᓇᐅᑉ ᐃᑉᔫᖃᕐᕕᖏᑦ ᑎᑭᓯᒪᓕᖅᑎᓪᓗᒋᑦ ᓂᒡᓚᓱᖕᓂᓕᖕᒧᑦ 0-ᒦᑐᒥᒃ, ᓯᓚᐅᑉ ᓂᒡᓚᓱᒃᑎᒋᓂᖓ ᑲᑕᒃᐸᓪᓕᐊᑐᐃᓐᓇᖅᐳᖅ ᓂᒡᓕᕙᓪᓕᐊᑐᐃᓐᓇᓕᖅᓱᓂ ᐊᑖᓄᑦ ᓱᓕ 0°C-ᒧᑦ (ᑕᑯᓗᒋᑦ ᓯᓚᐅᑉ ᖃᐅᔨᓴᖅᑕᐅᓯᒪᓂᖓ) ᐊᒻᒪᓗ ᓂᕆᐅᖕᓇᕋᔭᖑᐊᕋᓗᐊᕐᒪᑦ ᓄᓇᒥ ᓂᒡᓚᓱᖕᓂᖅ ᒪᓕᒐᔭᖑᐊᕋᓗᐊᕐᒪᑦ ᓯᓚᐅᑉ ᓂᒡᓚᖅᐸᓪᓕᐊᓂᖓᓂᒃ. ᑕᒪᓐᓇ 0-ᒦᑐᐃᓐᓇᖃᑕᕐᓂᖓ ᓂᒡᓚᓱᖕᓂᕐᒥ ᑕᐃᒪᐃᖃᑦᑕᖅᐳᖅ ᐱᔾᔪᑕᐅᓂᕐᒧᑦ ᑭᓂᐸᓂᖅ ᐃᒪᖓ ᐃᑉᔪᕐᒥ, ᐊᐅᒪᖃᑦᑕᕐᒪᑦ ᑕᐃᒃᑯᓇᓂ ᓄᓇᐅᑉ ᐃᓗᐊᓂ ᐃᑉᔪᕐᒥ ‘ᐊᓯᔾᔨᖃᑦᑕᕐᓂᖏᓐᓂ ᖁᓕᕇᖕᓂᖏᓐᓂ’ ᐊᐅᔭᐅᕌᓂᓚᐅᖅᑎᓪᓗᒍ, ᐊᒻᒪᓗ ᖁᐊᖅᐸᓪᓕᐊᓂᐊᓕᕆᓗᑎᒃ ᓂᒡᓚᓱᖕᓂᕐᒧᑦ ᓄᓇᐅᑉ ᐃᓗᐊᓂ ᑎᑭᐅᑎᒍᓂ 0°C-ᒥᒃ ᐅᑭᐊᒃᓵᒃᑯᑦ. ᓄᓇᐅᑉ ᐃᑉᔫᑉ ᓂᒡᓚᓱᖕᓂᖓ ᑕᒫᓂᓐᓂᐊᖅᑐᖅ 0°C-ᒥ ᑭᓯᐊᓂ ᐃᒪᖃᕐᓂᖓ ᑭᓂᐸᓂᖅ ᐊᓯᔾᔨᐊᓂᑦᑎᐊᕈᓂ, ᑕᒪᕐᒥ ᐃᒪᖃᕐᓂᖏᑦ ᓯᑯᖕᒥᒍᑎᒃ, ᑕᐃᒫᒃ 0-ᒦᖏᓐᓇᑐᐃᓇᖃᑦᑕᖅᐳᑦ. ᖃᓄᖅ ᐊᑯᓂᐅᑎᒋᔪᓐᓇᕐᓂᖓ ᒪᓕᒃᐸᒃᑐᖅ ᐃᒻᒪᒃᓯᒪᓚᐅᕐᓂᖓᓂ ᐃᑉᔫᑉ, ᐊᐅᔭᐅᑉ ᐃᓱᐊᓂ, ᐃᒻᒪᒃᓯᒪᓂᖅᓴᐅᓚᐅᕈᑎᒃ ᐊᑯᓂᐅᓂᖅᓴᐅᓂᐊᕆᓪᓗᑎᒃ 0-ᒦᖏᓐᓇᓚᖓᓂᖓ. ᑕᒪᓐᓇ 0-ᒦᖏᓐᓇᕐᓂᖓ ᐱᒻᒪᕆᐊᓗᖕᓂᒃ ᐊᒃᑐᐃᓂᖃᖅᐸᒃᑐᑦ ᐅᑭᐅᖅᑕᖅᑐᒥ ᐱᕈᖅᑐᖃᕈᓐᓇᓚᖓᓂᕐᒧᑦ ᐊᒻᒪᓗ ᐆᒪᔪᖃᕈᓐᓇᓚᖓᓂᕐᒧᑦ, ᓄᓇᖓ ᑕᒪᓐᓇ ᐃᑉᔪᖅ ᐆᓇᔪᖑᓐᓇᕐᓂᖓᓄᑦ ᐅᑭᐊᒃᓵᒃᑯᑦ ᓯᓚ ᑕᒪᓐᓇ ᓂᒡᓚᓱᓕᖅᓯᒪᔪᑐᖃᐅᒐᓗᐊᖅᑎᓪᓗᒍ ᐊᒻᒪᓗ ᐊᐱᓯᒪᕝᕕᐅᔪᓐᓇᖅᓯᑎᓪᓗᒍ, ᑐᖓᕕᐅᖃᑕᕐᒪᑦ ᐊᐳᑎᐅᑉ ᐃᔾᔪᑎᒋᔪᓐᓇᕐᓂᖓᓐᓄᑦ, ᐊᐱᓯᒪᔪᓐᓇᕐᓂᖓᓄᓪᓗ, ᑕᒪᒃᑯᐊ ᑐᖓᕕᐅᕙᖕᓂᖏᓐᓄᑦ ᐅᑭᐅᖅᑕᖅᑐᒥ ᐱᕈᕈᓐᓇᕐᓂᐊᖅᑐᓄᑦ ᐆᒪᔪᐃᓪᓗ ᐊᒃᑐᖅᑕᐅᓯᒪᔪᓐᓇᕐᓂᖏᓐᓄᑦ ᓂᕿᒃᓴᖅᓯᐅᕐᓂᖏᓐᓂ ᐅᑭᐅᒃᑯᑦ.