ᒪᕐᕉᓐᓃᑦ ᐊᕕᙵᖃᖅᑐᖅ ᒥᑦᑎᒪᓕᐅᑉ ᐊᑭᐊᖓ: ᑲᔪᖅ ᐊᕕᙵᖅ, ᐊᒥᓲᓛᖑᓲᖅ, ᐊᒻᒪᓗ ᐊᒥᖅᖤᒃ ᐊᕕᙵᑦ. ᐊᕕᙵᑦ ᓇᓂᔭᐅᒐᔪᓲᑦ ᒪᓴᐅᔪᑦ ᓄᓇᖏᓐᓂᒃ ᐱᕈᖅᑐᓂᒃ ᓂᕿᖃᖅᖢᑎᒃ ᑭᓕᕐᓇᑦ, ᐃᕕᒃᓱᒐᑦ, ᐃᔾᔪᑦ ᐊᒻᒪᓗ ᐊᕚᓚᕿᐊᑦ. ᐃᒡᓗᖔᒍᑦ, ᑕᒪᒃᑯᐊ ᐊᒥᖅᖤᑦ ᐊᕕᙵᖏᑦ ᓇᔪᒐᖃᓲᑦ ᐸᓂᕐᓂᖅᓴᑦ ᓄᓇᖏᓐᓂᒃ (ᓇᑦᑎᓐᓇᒡᔪᐊᑦ) ᐃᕕᒃᓱᒐᓂᒃ, ᐱᕈᓕᓵᖅᑐᑦ ᐊᒻᒪᓗ ᐅᖅᐱᒐᒐᓛᑦ. ᑕᒪᐃᓐᓂᒃ ᑖᒃᑯᐊ ᐊᕕᙶᒃ ᓇᓂᔭᐅᓲᖑᔪᑦ ᒥᑦᑎᒪᑕᓕᐅᑉ ᐊᑭᐊᖓᓄᑦ ᐊᖏᔪᒥᒃ ᐆᒪᔪᑦ ᐊᐅᓚᓂᕆᔭᑕ ᐃᓂᖃᓪᓚᕆᒃᑑᒃ ᓄᓇᐅᑉ ᐆᒪᔪᑦ ᐊᐅᓚᓂᕆᓲᖏᓄᑦ. ᓂᖃᐅᒻᒪᑕ ᐊᒥᓱᐋᓗᖕᓄᑦ ᐅᑭᐅᖅᑕᖅᑑᑉ ᓂᕿᑐᖅᑎᖏᓄᑦ ᓲᕐᓗᓕ ᑎᕆᒐᓂᐊᑦ, ᑎᕆᐊᑦ, ᑳᔫᑦ, ᑭᒡᒐᕕᐊᕐᔪᑦ, ᓇᐅᔭᑦ, ᐃᓱᙵᑦ ᑎᖕᒥᐊᖏᑦ ᐊᒻᒪᓗ ᐅᒃᐱᔾᔪᐊᑦ.

ᐊᕕᓐᖓᖅ		ᐊᒥᖅᖤᖅ

ᐅᓇ ᐊᔾᔨᐅᑦᑎᐊᙱᑦᑐᑦ ᐃᓕᖅᑯᓯᖓ ᑖᒃᑯᐊᒃ ᒪᕐᕉᒃ ᐊᕕᙵᐃᑦ ᐅᒪᔪᖏᑕ ᑲᐃᕙᓲᖑᓂᖏᑕ ᐅᓄᕐᓂᕆᔭᖏᑦ ᑲᑕᒃᖢᑎᒃ ᐱᕈᖅᐸᒃᖢᑎᒃ. ᑐᑭᖃᖅᐳᖅ ᐊᕕᙵᑦ ᐊᒻᒪᓗ ᐊᒥᖅᖤᐃᑦ ᐊᒥᓲᓂᕆᓲᖏᑦ ᐊᖅᑯᓵᕆᔭᖃᓲᑦ ᐊᕐᕌᒍᓂᒃ ᐃᓕᖅᑯᓯᖃᖅᑐᓂᒃ ᐊᖅᐸᓯᒃᑐᐋᓘᓕᖅᖢᑎᒃ ᓄᖑᒪᖅᑰᔨᔪᑦ ᐊᒻᒪᓗ ᐅᓄᓗᐊᖅᑐᐋᓘᔪᓄᑦ. ᒥᑦᑎᒪᑕᓕᐅᑉ ᐊᑭᐊᖓᓂ, ᐱᖓᓱᑦ ᑎᓴᒪᓪᓗ ᐊᕐᕌᒍᑦ ᐊᑯᓐᓂᖃᓲᑦ ᐊᖅᐸᓯᓛᒥᒃ ᐊᒥᓲᓛᖏᓐᓄᑦ ᐊᕕᙵᖁᑎᖏᑕ ᐊᖏᔪᐋᓗᖕᒥᑦᑕᐅᖅ ᐊᖏᔪᐋᓘᖕᒥᑦ ᐊᒃᑐᐊᓲᖑᔪᒥᒃ ᑭᖑᕚᓕᐅᕆᓂᖏᑕ ᓂᖁᑎᖅᑎᒋᓪᓗᐊᖏᓐᓄᑦ. ᐅᓄᖅᑐᐋᓗᐃᑦ ᐃᓗᓕᕆᔭᖏᑦ ᓲᕐᓗᓕ ᓂᖃᐅᔭᐅᓂᖏᑦ, ᓂᕿᒃᓴᒥᓂᒃ ᐊᑐᐃᓐᓇᖃᓐᓂᖏᑦ, ᑯᒪᒋᔭᖏᑦ, ᐊᐱᓯᒪᓂᕆᔮᑕ ᐊᒻᒪᓗ ᐊᒃᓱᕈᓐᓂᕆᔮᑕ ᑎᑎᖅᑕᐅᓯᒪᔪᑦ ᐱᔾᔪᑎᐅᔪᓐᓇᓲᑦ ᐊᒃᑐᐃᓪᓗᑎᒃ ᐊᕕᙵᑦ ᑲᐃᕙᑕᖏᓄᑦ. ᒥᑦᑎᒪᑕᓕᐅᑉ ᐊᑭᐊᖓᓂ, ᓂᖃᐅᔭᐅᓂᖏᑦ ᐊᑑᑎᖃᓪᓚᕆᓲᖅ ᑕᒪᐃᓐᓄᑦ ᐊᐅᔭᒃᑯᑦ ᐅᑭᐅᒃᑯᓪᓗ ᐊᕕᒃᓯᒪᓂᕆᓲᖏᓄᑦ. ᓂᕿᖃᖅᑏᑦ ᐆᒪᔪᖏᑦ ᑐᙵᕕᖃᓪᓗᐊᑕᖅᑐᑦ ᐊᕕᙵᓐᓂᒃ ᓂᕿᓪᓗᐊᑕᕆᓪᓗᒍ (ᐱᓪᓚᕆᒃᑐᑦ ᓲᕐᓗ ᐅᒃᐱᒡᔪᐊᑦ, ᐃᓱᙵᑦ ᐊᒻᒪᓗ ᑎᕆᐊᑦ) ᓇᔪᒐᖃᓲᖑᖏᑦᑐᑦ ᓄᓇᖓᓐᓂᒃ ᐊᕕᙵᑭᓪᓚᕆᒃᑎᓪᓗᒍ. ᐃᒡᓗᖔᖓᒍᑦ, ᓂᕿᑐᓲᑦ ᐆᒪᔪᖏᑦ ᐊᓯᖏᓐᓂᒃ ᓂᕿᖃᓲᑦ (ᐊᔾᔨᒌᖏᑦᑐᕘᖅᑐᑦ, ᓲᕐᓗ ᑎᕆᒐᓂᐊᑦ, ᑳᔫᑦ ᐊᒻᒪ ᓇᐅᔭᑦ) ᓇᔪᒐᖃᓲᑦ ᓄᓇᖏᓐᓂᒃ ᐊᕐᕌᒍᖏᒍᑦ ᑭᓯᐊᓂᓕ ᐅᓄᙱᓐᓂᖅᓵᓘᓪᓗᑎᒃ ᐱᐊᕋᓕᐊᖏᓪᓗ ᐅᓄᕋᑎᒃ. ᑕᐃᒪᓕ ᐊᕕᙵᑦ ᐊᒥᓲᓂᖏᑦ ᖁᑦᑎᓛᒧᑦ ᑎᑭᐅᑎᔭᕌᖓᑕ, ᓄᓇᐃᓐᓇᖅ ᐊᐅᓚᓕᓲᖅ ᐅᓄᕐᓂᖅᓵᓗᓐᓂᒃ ᐆᒪᔪᓂᒃ ᓇᔪᖅᑕᐅᓕᖅᖢᑎᒃ ᐱᐅᔪᒃᑯᑦ ᐊᒃᑐᐃᔪᑦ ᑕᑯᒃᓴᐅᔪᒃᑯᑦ ᑕᑯᒃᓴᐅᙱᑦᑐᒃᑯᓪᓗ ᐱᑕᖃᓐᓂᖏᓐᓄᑦ ᒥᑭᑦᑐᔪᑦ ᒥᖅᑯᓖᑦ ᑕᒪᒃᑯᐊ. ᐄᓪᓚᑦᑖᖅ, ᐅᓄᕐᓂᖅᓴᑦ ᐆᒪᔪᑦ ᐱᐋᕋᖃᑦᑎᐊᓲᑦ ᐊᕕᙵᑦ ᐊᒥᓲᑎᓪᓗᒋᑦ, ᐱᓗᐊᖅᑐᒥᒃ ᓂᕿᑐᖅᑎᐅᙱᑦᑑᒐᓗᐊᑦ ᓂᕐᔪᑎᖏᑦ ᓲᕐᓗ ᒪᑯᐊ ᐊᖏᓂᖅᓴᑦᑲᖑᐃᑦ, ᕿᓐᓂᖅᑖᑦ ᑎᖕᒥᐊᑦ ᐊᒻᒪᓗ ᓯᒡᔭᕆᐊᑦ ᑎᖕᒥᐊᖓ.

ᐅᔾᔨᖅᓵᕆᓯᒪᕙᕗᑦ ᐊᐅᔭᒃᑯᑦ ᐊᒥᓲᓂᕆᓲᖏᑦ ᐊᕕᙵᑦ ᒥᑦᑎᒪᑕᓕᐅᑉ ᐊᑭᐊᖓᓐᓂᒃ ᑕᐃᑲᙵᑦ 1994 ᐊᑐᖅᖢᑎᒍᑦ ᐊᕕᙵᕈᑏ ᖃᐅᔨᓴᐅᑎᖏᑦ. ᑕᐃᑲᙵᑦ ᐊᕐᕌᒎᑉ 2004, ᖃᐅᔨᓵᖃᖃᑦᑕᕆᕗᒍᑦ ᑕᖅᑭᖏᒍᑦ ᐊᕐᕌᒎᓪᓗ ᐊᔾᔨᒋᙱᑦᑑᓂᐊ ᐊᒥᓲᓂᕆᖏᓄᑦ, ᐊᕕᙵᓛᓕᐅᕆᔪᑦ, ᐊᒻᒪ ᐊᓐᓇᐅᒪᓂᖏᑦ ᐊᑐᖅᖢᒍ ᖃᐅᔨᓴᐃᓂᕐᒧᑦ ᑕᑯᒃᓴᐅᑎᑖ ᐆᒪᓪᓗᑎᒃ ᐱᔭᕆᔭᐅᓂᖏᒍᑦ (ᐱᔭᕆᔭᑦ−ᓇᓗᓇᐃᖅᑲᑦ) ᐱᐅᓯᕚᓪᓕᕋᓱᒃᖢᒋᑦ ᐊᒥᓲᓕᕋᓱᖕᓂᐊᓄᑦ ᖃᓄᖅ ᐊᐅᓚᓱᖑᓂᖏᑕ.

ᐆᒪᔪᖅᓯᒪᕝᕖᑦ ᓇᐅᑦᑎᖅᑐᐃᓂᕐᒧᑦ ᐊᕕᖓᖃᖅᑎᒋᓂᖏᓐᓂᒃ ᒪᑦᑎᒪᑕᓕᐅᑉ ᐊᑭᐊᓂ ᕿᑭᖅᑖᓘᐊᓂ.

ᐊᕕᙵᑦ ᐊᕐᕌᒎᑉ ᐃᓗᐊᒍᑦ ᐅᓄᖅᑐᐋᓗᐃᖅᓱᖅᖢᑎᒃ ᐊᕕᙵᓛᖃᓲᑦ, ᐱᖃᓯᐅᑎᓪᓗᒍ ᐅᑭᐅᑉ ᑕᖅᑭᖏᖑᑦ. ᑕᐃᑲᓂ, ᐊᕕᙵᑦ ᐃᕙᕝᕕᖃᓲᑦ ᑐᖁᖓᔪᓂᒃ ᐱᕈᖅᑐᓂᒃ, ᐊᕚᓚᕿᐊᑦ ᐊᒻᒪᓗ ᓂᖃᐅᓲᑦ ᐱᕈᖅᑐᑦ ᐅᔅᓯᒃᓴᖅᖢᒍ ᐅᖅᑰᖁᓪᓗᒋᑦ ᐊᕕᙵᓛᕆᔭᖏᑦ. ᑕᒪᒃᑯᐊ ᐃᕙᕝᕕᖏᑦ ᕿᒪᕈᖅᑕᐅᓪᓗᑎᒃ ᐅᐱᕐᖓᕌᖓᑦ ᐊᑑᑎᖃᓲᑦ ᓇᓚᐅᑦᑖᖃᕋᓱᒃᖢᓂ ᐅᑭᐅᒃᑯᑦ ᐊᒥᓲᓂᕆᔭᖏᓐᓄᑦ ᐊᕕᙵᐃᑦ ᖃᓄᑎᒋᓗ ᑭᖑᕚᓕᐅᕐᒪᖔᑕ. ᖄᒃᑲᓐᓂᐊᒍᑦ, ᓇᓂᓯᓚᐅᓲᖑᔪᒍᑦ ᐊᕕᙵᕕᓂᕐᓂᒃ ᑐᖁᔪᕕᓃᑦ ᐃᕙᕝᕕᐊᓂ, ᓴᖅᑮᔭᖃᖅᑐᖅ ᓂᖃᐅᓂᕕᓂᖏᑕ. ᐅᓇ ᖃᐅᔨᓴᐃᓂᖅ ᐱᒋᐊᖅᑕᐅᓂᑯ ᐊᕐᕋᒍᐊᒍᑦ 2007 ᐊᒻᒪ ᑲᑎᑕᐅᓪᓗᑎᒃ ᐅᑭᐅᒃᑯᑦ ᐊᐅᔭᒃᑯᓪᓗ ᐅᓄᕐᓂᕆᔭᖏᓐᓂᒃ, ᓇᓗᓇᐃᖅᑕᕗᑦ ᓴᖅᑮᒐᔪᒃᑐᑦ ᓄᖑᒋᐊᕋᖓᒥᒃ ᑲᑕᒋᐊᓲᑦ ᐊᐅᔭᒃᑯᑦ ᑕᒪᒃᑯᐊᓕ ᐊᒥᓱᕈᕆᐋᓐᓂᖏᑦ ᐱᒋᐊᖅᑎᑕᐅᓲᑦ ᐅᑭᐅᒃᑯᑦ ᑭᖑᕚᓕᐅᓕᕌᖓᒥᒃ ᓂᖃᐅᔭᐅᑎᓐᓇᒋᑦ, ᐊᒻᒪᓗ ᐸᒡᕕᓵᕆᔭᐅᓇᑎᒃ ᐊᕕᙵᑦ ᑭᖑᕚᓕᐅᕆᔪᓐᓴᓕᓲᑦ ᐅᓄᖅᓯᕚᓪᓕᖅᖢᑎᒃ ᐊᐳᑎᐅᑉ ᐃᑭᐊᖓᓂ.

ᐃᓕᑉᐹᓪᓕᕈᒪᒍᕕᑦ ᖃᓄᖅ ᓄᓇᐃᓐᓇᕐᒥᑦ ᖃᐅᔨᓵᖃᓱᖑᓂᑦᑎᓐᓄᑦ, ᐅᓇ ᐅᖃᓕᒫᕈᒃ ᐱᒋᔭᕗᑦ ᐱᔭᕆᑐᔪᓄᑦ ᒪᓕᒐᒃᓴᕆᔭᑦ ᑐᕌᖓᔪᑦ ᒥᑭᑦᑐᓄᑦ ᒥᖅᑯᓕᓐᓄᑦ. ᑖᓐᓇ ᐃᓗᐃᑦᑑᔪᖅ ᖃᐅᔨᓵᑦᑕ ᓇᓗᓇᐃᕈᑎᖏᑦ ᐊᕕᙵᓂᒃ ᖃᐅᔨᓵᖃᕈᑎᑦᑎᓐᓄᑦ ᒥᑦᑎᒪᑕᓕᐅᑉ ᐊᑭᐊᖓᓂ ᐊᑐᐃᓐᓇᐅᓲᑦ ᐅᕙᓂ Nordicana D.

ᐊᕕᙵᑦ ᐊᓐᓇᐅᒪᔪᓐᓇᓲᑦ ᐅᑭᐅᖅᑕᖅᑑᑉ ᓂᒡᓚᓱᐋᓘᓂᐊᑕ ᐃᑭᐊᖓᒍᑦ ᐊᐳᑎᖓᑕ

ᓯᕗᓂᐊᑕ ᐱᒋᐊᓐᓂᖓᑕ ᐅᑭᐅᑉ, ᐅᓄᓛᑦ ᑎᖕᒥᐊᑦ ᕿᒪᕉᑎᓲᑦ ᒥᑦᑎᒪᑕᓕᐅᑉ ᐊᑭᐊᖓᓂᒃ ᐅᖅᑯᖔᒧᑦ ᐊᐅᓪᓛᖅᖢᑎᒃ ᐅᑮᔭᖅᑐᓕᖅᖢᑎᒃ ᐅᖅᑰᓂᖅᓴᐅᔪᓂᒃ. ᑭᓯᐊᓂᓕ, ᓄᓇᐅᑉ ᓂᕐᔪᑎᖏᑦ, ᓲᕐᓗᓕ ᓇᓄᐃᑦ, ᑎᕆᒐᓂᐊᑦ, ᐅᑲᓖᑦ, ᑎᕆᐊᑦ ᐊᒻᒪᓗ ᐊᕕᙵᑦ, ᑎᒥᒥᒍᑦ ᓱᖏᐅᑎᔾᔪᑎᖏᓐᓂᒃ ᓴᖅᑮᓯᒪᖕᒪᑕ ᐅᒪᔾᔭᖓᓪᓗᑎᒃ ᐊᒻᒪ ᐊᓐᓇᐅᒪᐃᓐᓇᕈᓐᓇᖅᖢᑎᒃ ᐅᑭᐅᖅᕌᓘᒐᓗᐊᒃᑯᑦ. ᐅᑭᐅᖅᑕᖅᑐᒥᓪᓕ, ᐊᐱᓯᒪᓂᖓ ᐊᑐᓲᖑᕗᖅ ᐊᒃᑑᕙᒥᑦ ᑎᑭᖢᒍ ᔫᓂ ᐃᓚᖏᓄᓪᓗ ᓂᔾᔪᑎᓄᑦ ᐊᒃᓱᕉᑕᐅᕙᒃᖢᓂ ᓂᕿᒋᓂᐊᖅᑕᖏᑦ ᓴᐅᔭᐅᓯᒪᑎᓪᓗᒋᑦ ᑭᓯᐊᓂᑦᑕᐅᖅ ᐊᑑᑎᖃᕆᓪᓗᓂ ᐊᓯᖏᓐᓄᑦ ᓂᔾᔪᑎᓄᑦ. ᑕᐃᒪᓕ ᐊᕕᙵᑦ ᐱᓪᓗᒋᑦ, ᑎᓯᓕᐅᓲᖑᔪᑦ ᐊᐱᑐᒃᑯᑦ ᕿᒫᓯᒪᓪᓗᑎᒃ ᓂᕿᑐᖅᑎᓂᒃ, ᓂᕿᒋᔭᒥᓂᒃ ᑎᑭᑦᑎᓇᓱᒃᖢᑎᒃ (ᐱᕈᖅᑐᑦ) ᓄᓇᐅᑉ ᖄᖓᒍᑦ ᐃᕙᕝᕕᓕᐅᓲᖑᒋᓪᓗᑎᒃ ᓈᒻᒪᒑᖓᑦ ᐅᑮᓯᒪᔫᑉ ᐊᐱᓯᒪᓂᖓ. ᑕᒪᓐᓇ ᐊᐳᑎᖓ ᐅᖅᑯᐃᓲᖑᒋᕗᖅ ᓂᒡᓚᓱᒃᑐᐋᓘᑎᓪᓗᒍ ᐃᑭᐊᖓᓂ ᐅᖅᑰᓂᖅᓴᒥᒃ ᓇᔪᒐᖃᓲᑦ ᓂᒡᓚᓱᖏᓐᓂᖅᓴᐅᒻᒪᑦ. ᑭᓯᐊᓂᓕ, ᐊᐳᔾᔭᕆᒃᑎᓐᓇᒍ ᓄᓇᖓ, ᓲᕐᓗᓕ ᑎᓯᔪᐋᓗᖕᒥᑦ−ᖄᒥᓯᒪᑎᓪᓗᒍ ᐊᐳᑎᖓ ᒪᖁᑦᑐᕕᓂᐅᑎᓪᓗᒍ ᐅᑭᐊᒃᓵᒃᑯᑦ ᐊᔪᕐᓇᖅᑎᑦᑎᓲᑦ ᐊᕕᙵᓂᒃ ᐊᓯᖏᓐᓂᓪᓗ ᐱᕈᖅᑐᖅᑎᓄᑦ ᐊᒻᒪᓗ ᐱᕐᓕᕈᓐᓇᖅᑐᑦ ᓂᕿᒃᓴᒥᓂᒃ ᑎᑭᐅᑎᔪᓐᓇᙱᑦᑕᕌᖓᒥᒃ. ᑕᐃᒪᐃᒻᒪᑦ, ᐅᖃᐅᓯᖅ ᐅᓇ ᑎᓯᒡᓕᓯᒪᑎᓪᓗᒍ ᐊᐱᓯᒪᓂᕆᔭᖓ ᐱᐅᙱᑦᑐᒥᒃ ᓄᖑᓴᐃᔪᓐᓇᓲᖑᒋᕗᖅ ᐊᕕᙵᑦ ᐊᒥᓲᓂᕆᔭᖏᓄᑦ ᐅᑭᐅᒃᑯᑦ.

ᑕᐃᑲᙵᓂᑦ 2017, ᕿᒥᕐᕈᐃᔭᖃᖅᓯᒪᕗ ᓇᐅᒃᑰᖓᓂᖏᑕ ᑕᑭᓂᕆᓲᖏᑕᓗ ᑎᓯᒋᔮᑕ ᐊᕕᙵᓄᑦ ᐊᒡᒐᒃᑕᐅᓂᑯᑦ ᐊᒃᑐᐊᓗᑎᒃ ᐊᐳᑎᐅᑉ ᐃᓕᖅᑯᓯᕆᔭᖓ ᖃᓄᐃᑦᑑᓂᖓᓄᑦ ᑐᑭᓯᕚᓪᓕᕈᓐᓇᖁᓪᓗᑕ ᖃᓄᐃᑦᑐᒥᒃ ᐊᐳᑎᒥᒃ ᐊᑐᓲᖑᓂᖏᑦ ᐅᑭᐅᑉ ᐊᐳᑎᒋᓲᖏᓄᑦ. ᓇᓂᓯᓲᖑᔪᒍᑦ ᑎᓯᖏᓐᓂᒃ ᖃᓗᕋᖅᖢᒍ ᐊᐱᓯᒪᓂᖏᑦ ᓇᓂᓯᔭᕌᖓᑦᑕ ᑎᕆᒐᓂᐊᓄᑦ ᐱᔭᕆᔭᐅᓂᑯᑦ ᐃᓂᖏᓐᓂᒃ. ᐊᕕᙵᑦ ᑎᓯᖏᑦ ᐊᑕᓃᒐᔪᒃᑐᑦ ᐊᑎᑦᑎᐊᖓᑕ ᑎᓯᓂᐅᑉ ᐊᐳᑎᐅᑉ, ᐊᕿᓛᖑᔪᒃᑯᑦ ᐊᐱᓯᒪᓂᐊᒍᑦ ᓄᓇᒧᑦ ᐊᒃᑐᐊᔪᖅ ᐊᕿᑦᑐᒻᒪᕆᒃ (ᖃᐅᔨᒪᔭᖅ ᓱᑲᐅᔭᖅ ᐅᕝᕙᓗ ᐳᑲᔭᒃ ᐃᓄᒃᑎᑐᑦ). ᑕᒪᓐᓇ ᐳᑲᔭᖓ ᐃᓛᓐᓂᒃᑯᑦ ᓄᓇᒧᑦ ᐊᒃᑐᐊᓲᖑᓇᓂ, ᓄᓇᒧᑦ ᐊᒃᑐᐊᔪᒥᒃ, ᑭᓯᐊᓂᓕ ᐱᑕᖃᕌᖓᑦ ᐊᕕᙵᑦ ᐳᑲᔭᒻᒥ ᐊᑐᒐᔪᓲᑦ ᑎᓯᒥᓄᑦ, ᐃᒻᒪᖄ ᐊᒃᓱᕈᕆᐊᖃᓐᓂᓂ ᐊᖅᐸᓯᓛᖑᓇᓱᒃᖢᒍ. ᑕᒪᓐᓇ ᐊᒡᒐᓲᖑᓂᖏᑕ ᑎᓯᔪᒃᑯᑦ ᖄᖃᖅᑐᒃᑯᑦ ᐃᒻᒪᖄ ᑎᓯᖓᓐᓂᒃ ᓴᐅᔭᐅᔪᓐᓇᖅᑎᑦᑎᓇᑎᒃ, ᑕᐃᒫᒃ ᑎᓯᖏᑦ ᐊᑐᐃᓐᓇᕈᓐᓇᓲᕆᓪᓗᓂᒋᑦ ᐅᑭᐅᒃᑯᑦ ᓴᐅᔭᐅᓯᒪᙱᑦᑐᑦ. ᑕᐃᒫᒃ ᓂᒡᓚᓱᒃᑐᐋᓗᒻᒥ ᐅᑭᐅᒃᑯᑦ ᐊᑐᓗᐊᖅᑕᐃᓕᓂᖅ ᐊᓐᓇᐅᒪᔾᔪᑖᓄᑦ ᐊᑑᑎᖃᓪᓚᕆᒃᑐᑦ ᐊᓐᓇᐅᒪᔪᓐᓇᖅᑎᑦᑎᓗᓂ ᐊᒻᒪᓗ ᑭᖑᕚᓕᐅᕈᓐᓇᖅᖢᑎᒃ ᑎᓯᒥᒍᑦ.

ᑕᑯᔭᐅᓚᐅᖅᑐᖅ ᑎᕆᒐᓂᐊᖅ ᐊᕕᓐᖓᖅᑐᖅ ᐊᐳᑎᐅᑉ ᐃᓗᐊᓃᑐᒥᒃ.		ᖃᐅᔨᓴᖅᑎ ᖃᓗᕋᐃᔪᖅ ᐳᐊᕐᕆᔭᖅᑐᖅ ᐊᐳᒻᒥ ᐃᓗᑐᓂᕐᒥᒃ.

ᐊᐳᒻᒥ ᐃᓗᑐᓂᖅ ᑎᕆᒐᓂᐊᑉ ᕿᓂᕐᕕᒋᔭᖓ ᓂᕿᒃᓴᖅᓯᐅᓂᕐᒥᓂ.		ᐊᕕᖓᐃᑦ ᐊᖅᑯᑎᖏᑦ ᐊᐳᑎᐅᑉ ᐃᓗᐊᒍᑦ.