ᑖᓐᓇ ᑎᕆᒐᓂᐊᖅ ᓂᕿᑐᖅᑎᓪᓗᐊᑕᐅᕗᖅ ᓄᓇᐅᒥᐅᑕᓂᒃ ᒥᑦᑎᒪᑕᓕᐅᑉ ᐊᑭᐊᖓᓂᑦ ᐊᒻᒪᓗ ᓂᖃᐅᒐᔪᓛᖏᑦ ᑕᒪᒃᑯᐊ ᒥᑭᐅᔭᖅᑐᑦ ᒥᖅᑯᓖᑦ ᑕᐃᒍᖅᑕᑦ ᐊᕕᙵᐃᑦ. ᑭᓯᐊᓂᑦᑕᐅᖅ, ᑎᕆᒐᓂᐋᑦ ᐱᓇᔪᓲᖑᒻᒥᔪᑦ ᐊᓯᖏᓐᓂᒃ ᐆᒪᔪᓂᒃ ᓲᕐᓗ ᑲᖑᐃᑦ ᒪᓐᓂᖏᓐᓂᒃ ᑲᖑᐋᕋᓂᒡᓗ, ᐊᓯᖏᑦ ᑎᑭᑦᑕᓲᑦ ᑎᖕᒥᐊᑦ, ᓇᑦᑏᓪᓗ ᑐᖁᖓᔪᕕᓃᓪᓗ ᓇᓂᔭᖏᑦ ᓯᑯᒥ. ᐊᕕᙵᐃᑦ ᐊᒥᓲᓂᖏᑦ ᐊᕐᕌᒍᓄᑦ ᒪᓕᒃᖢᑎᒃ ᐃᓛᓐᓂ ᐊᒥᓱᐋᓘᕙᒃᖢᑎᒃ ᐅᓄᕈᓐᓃᖅᑐᑯᓘᕙᒃᖢᑎᒃ, ᐃᒻᒪᖄ 3-5 ᐊᕐᕌᒍᓄᑦ (ᑕᑯᓗᒍ ᐊᕕᙵᐃᑦ), ᐊᕕᙵᐃᑦ), ᑕᐃᒪᐃᓐᓂᖓᓄᑦ ᑭᖑᕚᓕᐅᓐᓂᖏᑦ ᑎᕆᒐᓂᐋᑦ ᒪᓕᑲᑕᓲᖑᒻᒪᑦ ᐊᔾᔨᒌᖃᑦᑕᙱᑦᑐᖅ ᐊᕐᕌᒍᑦ ᑕᑯᓪᓗᒋᑦ. ᓱᓕᒋᕗᖅ ᑕᒪᒃᑯᓄᖓ ᑲᔪᖅᑐᑦ ᑎᕆᒐᓂᐋᑦ, ᑭᓯᐊᓂ ᐱᑕᖃᒐᔪᓗᐊᕌᓗᙱᑦᑐᑦ ᑕᒫᓂ ᒥᑦᑎᒪᑕᓕᐅᑉ ᐊᑭᐊᖓᓂ.

ᐱᒋᐊᖅᖢᒍ ᐊᕐᕉᒍᐊᓂ 1993, ᖃᐅᔨᒪᔭᐅᔪᑦ ᑎᓯᖃᕝᕖᑦ ᓇᑦᑎᓐᓈᓗᐊᓂ ᒥᑦᑎᒪᑕᓕᐅᑉ ᐊᑭᐊᖓᑕ ᐊᖅᑯᓵᖅᑕᐅᒑᖓᒥᒃ ᐅᐸᒃᑕᐅᕙᒃᖢᑎᒃ ᕿᒥᕐᕈᔭᐅᓪᓗᑎᒃ ᑎᕆᒐᓂᐊᒐᖃᕐᒪᖔᖏᓐᓂᒃ. ᐱᒋᐊᖅᖢᒍ ᐊᕐᕌᒍᐊᓂ 2003, ᐅᔾᔨᖅᓵᕆᔭᕗᑦ ᐊᓱᐃᓛᒃ ᓇᐄᓴᐅᑎᑎᒎᖓᓕᖅᖢᓂ. ᐃᓗᐃᑦᑑᔪᒥᒃ ᖃᐅᔨᓵᖃᖅᖢᑎᒃ ᑕᒪᐃᓐᓂᑦᑎᐊᖅ ᑎᓯᒋᔭᐅᓲᓂᒃ ᐃᓂᖃᕝᕕᐅᓲᓕᒫᑦ ᑕᑯᓇᒃᖢᒍ ᑎᑭᐅᒪᓪᓗᓂ 600 ᑭᓛᒥᑕ2 ᐱᒋᐊᖅᖢᒍ ᖃᓪᓗᒃᑐᕐᕕᐅᑉ ᓇᖅᓵᓂᑦ ᐅᔭᕋᓱᒡᔪᖕᒧᑦ ᐊᑯᐊᖓᓄᑦ. ᑕᐃᑲᙵᓂᑦ, ᐅᖓᑖᓄᑦ 110 ᑎᓰᑦ ᐊᖅᑯᓵᖃᑦᑕᖅᑕᕗᑦ ᒪᕐᕈᐊᖅᑎᖅᖢᑎᒍᑦ ᐊᐅᔭᑕᒫᖅ, ᒪᐃ ᕿᑎᓪᓗᐊᖓᒍᑦ ᐊᒻᒪᑦᑕᐅᖅ ᔫᓂ ᐃᓱᓕᓕᕌᖓᑦ. ᑕᒪᐃᓐᓂᒃ ᐅᐸᒍᑎᓂᕗᑦ ᐱᓇᓱᐊᕈᓯᐅᑉ ᐃᓗᐊᒍᑦ ᐊᑐᖃᑦᑕᖅᑕᕗᑦ ᐸᒡᕕᓴᖁᓇᒋᑦ ᒪᕐᕈᐊᖅᑎᖁᓇᒋᓪᓗ ᓇᐄᓴᖅᑕᕗᑦ ᐊᒻᒪᓗ ᓅᑎᕆᔭᕕᓃᑦ ᓇᐄᓴᒃᑲᓐᓂᖁᓇᒋᑦ. ᑕᒪᒃᑯᐊ ᑎᓰᑦ ᑕᑯᔭᐅᕝᕕᐅᔪᑦ ᑐᓵᕝᕕᐅᔪᓪᓘᓐᓃᑦ ᑎᑎᖅᑕᐅᓪᓗᑎᒃ ᑭᖑᕚᓕᐅᕝᕕᑦ ᑎᓰᑦ (ᐱᐊᕋᖃᕝᕕᖓ ᐱᕈᐃᕝᕕᖓᓘᓐᓃᑦ ᑎᓯ). ᑕᐃᑲᙵᑦ 2007, ᐊᔾᔨᓕᐅᕆᕙᓪᓕᐊᓲᑦ ᐊᐅᓚᔪᓂᒃ ᐃᓕᐅᕋᖅᓯᒪᓪᓗᑎᒍᑦ ᐃᑲᔫᑎᒃᓴᐅᓪᓗᑎᒃ ᐅᖓᓯᒃᑐᒥᒃ ᕿᙳᑎᒃᑯᑦ ᕿᒥᕐᕈᓂᑦᑎᓐᓂᒃ. ᐃᓗᐃᑦᑑᔪᖅ ᖃᐅᔨᓴᕈᑎᑦᑕ ᓇᓗᓇᐃᕆᔾᔪᑎᖏᑦ ᐊᑐᐃᓐᓇᐅᔪᑦ ᑎᓯᒧᑦ ᖃᐅᔨᓵᕆᔭᓄᑦ ᒥᑦᑎᒪᑕᓕᐅᑉ ᐊᑭᐊᖓᓂ ᐊᑐᐃᓐᓇᐅᓪᓗᓂ ᐅᕙᓂ NordicanaD. ᐃᓕᑉᐹᓪᓕᕈᒪᒍᕕᑦ ᖃᓄᖅ ᖃᐅᔨᓵᖃᓲᖑᒻᒪᖔᑦᑕ ᑕᒪᒃᑯᓂᖓ ᓄᓇᐃᓐᓇᒻᒥ, ᐅᓇ ᑕᑯᓇᒋᐊᖅᓯᐅᒃ ᐅᖃᓕᒫᓪᓗᒍ ᐱᔭᕆᑐᔪᑦ ᖃᐅᔨᓵᒧᑦ ᒪᓕᒍᑎᒃᓴᑦ ᑎᕆᒐᓂᐋᓄᑦ.

ᑎᕆᒐᓂᐊᑦ ᐊᓯᕙᓲᑦ ᐅᖓᓯᒃᑐᐋᓗᖕᒧᑦ ᐊᑭᐊᖓᑕ ᕿᑭᖅᑖᓂᒃ ᐅᑭᐅᒃᑯᑦ

ᐊᓂᒍᖅᑐᑦ 10 ᐊᕐᕌᒍᓂᒃ ᐊᑐᖅᐸᓪᓕᐊᔭᕗᑦ ᐱᔾᔪᐊᕌᓗᐃᑦ ᑕᑯᒃᓴᕈᖅᑐᑦ ᖃᐅᔨᓵᖃᕋᓱᒃᖢᑕ ᖃᓄ ᐊᐅᓚᓲᖑᓂᖏᑕ ᑎᕆᒐᓂᐊᖁᑎᕗᑦ. ᑐᑭᓕᐅᑎᓗᒍ, ᐃᓚᖏᑦ ᖁᖓᓯᕈᓕᖅᖢᑎᒍᑦ ᑎᕆᒐᓂᐋᑦ ᓈᒻᒪᒋᕋᓛᖅᑕᖏᓐᓂᒃ (ᑕᐃᔭᑦ ᐊᐅᒎᔅ ᖁᖓᓯᕈᖏᑦ) ᖁᒻᒧᒃᑎᑕᐅᓯᒪᔪᓄᑦ ᐅᖄᓚᓲᑦ, ᓇᒧᙵᐅᓂᓕᒫᖏᑦ ᖃᐅᔨᒪᓕᖅᖢᑎᒍᑦ ᑎᕆᒐᓂᐊᑦ ᓇᕈᓇᒃᑕᖏᑦ ᐅᑭᐅᒃᑯᑦ. ᑕᒪᓐᓇ ᓇᓗᔭᑦᑎᓐᓂᒃ ᓴᖅᑮᓯᒪᔪᖅ ᓂᕆᐅᒋᙱᑕᑦᑎᓐᓂᒃ. ᐱᓗᐊᖅᑐᒥᒡᓕ, ᖃᐅᔨᓯᒪᓕᖅᑐᒍᑦ ᐃᓚᖏᑦ ᑎᕆᒐᓂᐊᑦ ᓇᔪᒐᖃᖅᓯᒪᔪᑦ ᒥᑦᑎᒪᑕᓕᐅᑉ ᐊᑭᐊᖓᓂ ᐅᑭᐅᒃᑯᑦ ᓅᑦᑐᓐᓇᖅᑐᑦ ᓇᒧᕈᓘᔮᓗᒃ ᓄᓇᕘᒧᑦ ᐅᖓᑖᓄᓪᓘᓐᓃᑦ, ᐊᑯᑭᑦᑐᓄᑦ, ᑯᐸᒃᒧᑦ ᐊᒻᒪᓘᓐᓃᑦ ᔫᑳᓐᒧᑦ. ᐃᓚᖏᑦ ᐅᑎᓚᐅᓲᑦ ᑖᔅᓱᒧᖓ ᑎᓯᖃᕝᕕᕕᓂᕆᔭᒥᓄᑦ ᐊᓂᒍᕐᒪᑦ ᐊᕐᕌᒍ, ᑭᓯᐊᓂᓕ ᐃᓚᖏᑦ ᐅᑎᒃᑲᓐᓂᓚᐅᖅᓯᒪᔪᓐᓃᓲᑦ, ᓲᕐᓗᓕ ᐊᓂᑕᐅᓂᑰᓪᓗᑎᒃ ᐊᖏᓂᖅᓴᒧᑦ ᓴᙱᓂᖅᓴᒧᑦ ᑎᕆᒐᓂᐊᕐᒧᑦ.

ᑕᐃᒪᓕ ᓇᕈᓕᕌᖓᒥᒃ ᓄᓇᕘᑉ ᐃᓗᐊᒍᑦ, ᑎᕆᒐᓂᐊᑦ ᓄᓇᒃᑯ ᓯᑯᒃᑯᓪᓗ ᓇᕈᓇᓲᑦ. ᐅᓪᓗᐃᓐᓇᖅ ᓅᑲᐅᖅᑐᕈᓐᓇᖅᑐᑦ 90 ᑭᓛᒥᑕᒧᑦ, ᐃᓚᖏᓪᓗ ᐅᖓᑖᓅᕈᓐᓇᖅᖢᑎᒃ. ᑲᒪᓇᖅᑐᒻᒪᕆᐋᓗᒃ ᒥᑭᑦᑐᑯᓘᓪᓗᑎᒃ ᑕᐃᒫᕌᓗᒃ ᐱᔪᓐᓇᕐᓂᕆᔭᖏᑦ. ᓄᓇᙳᐊᖅ ᐅᓇ ᑕᑯᒃᓴᐅᑎᑦᑎᒐᓛᒃᑐᖅ ᓇᕈᓇᒃᑕᐅᔪᕕᓂᕐᓄᑦ. ᐃᓛᓐᓂᒃᑯᑦ ᑕᒪᒃᑯᐊ ᑎᕆᒐᓂᐊᑦ ᕿᑐᙱᐅᕝᕕᕕᓂᐊᓂᒃ ᕿᒪᕈᐃᓲᑦ ᐊᖓᔪᖅᑳᖏᑕ ᓇᔪᒐᕆᔭᖏᓐᓂᒃ ᐅᑭᐊᒃᓵᒃᑯᑦ. ᑭᓯᐊᓂᓕ, ᐃᓐᓇᖏᑦ ᓄᓇᒋᔭᒥᓐᓂᒃ ᓇᕈᓇᓗᐊᕌᓗᓲᖑᓇᑎᒃ ᐅᖓᓯᒃᑐᒨᓗᐊᕈᓐᓇᙱᒻᒥᔪᑦ ᐃᓂᖃᓐᓂᒻᒥᓄᑦ. ᑭᓯᐊᓂ ᕿᓂᖅᓴᓪᓚᕆᓲᑦ ᓯᑯᒥᒃ ᐊᕙᑖᒍᑦ ᒥᑦᑎᒪᑕᓕᐅᑉ ᐊᑭᐊᖓᑕ ᕿᓂᖅᖢᑎᒃ ᓇᑦᑎᐊᓂᒃ ᐅᕝᕙᓘᓐᓃᑦ ᕿᒪᒃᑕᕕᓂᕐᓂᒃ ᓇᑦᑎᖅᑕᕕᓂᕐᓂᒃ. ᖃᐅᔨᓯᒪᔭᕗᑦ ᐅᓄᖅᑐᒻᒪᕇᑦ ᑎᕆᒐᓂᐋᑦ, ᐃᒻᒪᖄ 10, 15 ᐅᖓᑖᓂᓪᓘᓐᓃᑦ, ᐃᓛᓐᓂᒃᑯᑦ ᑖᒃᑯᓂᖓᑦᑕᐃᓐᓇᖅ ᐊᖅᑯᓵᕆᓲᑦ ᐃᓂᐅᔪᓂᒃ ᓯᑯᒃᑯᑦ ᐊᑕᐅᑦᑎᒃᑰᖅᖢᑎᒃ. ᑖᒃᑯᐊ ᑕᐃᒍᓲᕗᑦ ᐃᓃᑦ “ᐆᓇᖅᑐᔮᑦ”. ᑎᕆᒐᓂᐊᑦ ᓇᕆᐊᓲᖑᓪᓗᑎᒃ ᐅᖓᓯᒃᑑᐊᓗᖕᒥᑦ ᓂᕿᑕᖃᓐᓂᐊᓂᒃ, ᐅᐸᒃᖢᑎᒃ ᐃᓂᐅᔪᒧᑦ. ᑎᕆᒐᓂᐊᑦ ᓂᕿᖃᖅᑐᒥᒃ ᐅᐸᒃᓯᒪᔅᓲᔭᓚᐅᖅᖢᑎᒃ, ᐊᓱᐃᓛᒃ ᐅᑎᓲᑦ ᓄᓇᖁᑎᒋᔭᒥᑕ ᓄᓇᖏᓄᑦ.

ᐃᓄᐃᑦ ᐊᖑᓇᓱᒃᑐᖏᑦ ᖁᙱᐊᖅᑲᑦᑕᖅᓯᒪᔪᑐᖄᓗᐃᑦ ᑕᒪᒃᑯᓂᖓ ᐃᓕᖅᑯᓯᐅᔪᓂᒃ ᖃᐅᔨᓕᓵᖅᑕᑦᑎᓐᓂᒃ ᐅᓂᒃᑳᕗᑦ ᖁᓛᒍᑦ, ᐊᒻᒪᓗ ᑕᒪᓐᓇ ᐅᕙᑦᑎᓐᓄᑦ ᑕᑯᔪᒥᓇᖅᖢᓂ ᐱᓪᓗᒍ ᐅᓪᓗᒥ ᓴᖅᑭᑎᖅᑐᓄᑦ ᑭᓯᐊᓂ ᓱᓕᓂᖏᓐᓂᒃ ᓴᖅᑮᖕᒪᑦ ᐃᓄᐃᑦ ᖃᐅᔨᒪᓂᖓᓂᒃ ᓱᓕᒐᔪᓐᓂᐊᓄᑦ. ᑐᑭᓕᐅᑎᓪᓗᒍ, ᐊᖑᓇᓱᒃᑏᑦ ᐅᑭᐅᒃᑯᑦ ᐊᐅᓪᓛᖅᓯᒪᓲᖑᒻᒪᑕ ᓯᑯᒥ ᐅᔾᔨᕆᔭᖃᖅᖢᑎᒃ ᑎᕆᒐᓂᐊᓂᒃ ᖃᐅᔨᓴᖅᑎᓄᑦ ᑕᑯᔭᐅᔪᓐᓇᖏᑦᑐᓂᒃ ᑕᒫᓃᙱᓐᓂᖏᓄᑦ. ᐃᓗᐊᒍᑦᑕᐅᖅ, ᑕᒪᒃᑯᐊ ᖁᒻᒧᒃᑎᑕᐅᓯᒪᔪᑦ ᑕᐅᑐᒃᑎᑦᑎᓕᕐᒪᑕ ᑖᔅᓱᒥᖓ ᑎᕆᒐᓂᐊᕐᒥᒃ ᐃᓛᓐᓂᒃᑯᑦ ᑕᖅᑭᒐᓵᕐᔪᓐᓄᑦ, ᑕᒪᓐᓇᓕ ᑭᐱᙳᒋᔭᐅᒐᔭᖅᑐᖅ ᐊᖑᓇᓱᒃᑎᒧᑦ ᑖᔅᓱᒥᖓᑦᑕᐃᓐᓇᖅ ᒪᓕᒡᓗᓂ. ᑕᐃᒪᐃᓐᓂᑯᐊᓄᑦ, ᑕᐅᖅᓰᖃᑎᒌᓐᓂᖏᑦ ᑕᒪᒃᑯᓂᖓ ᖃᐅᔨᒪᓂᐅᔪᓂᒃ ᐊᑯᓐᓂᐊᒍᑦ ᐊᖑᓇᓱᒃᑏᑦ ᖃᐅᔨᓴᖅᑏᓪᓗ ᐱᐅᓂᖅᓴᐅᒐᔪᒃᐳᖅ ᐃᓗᐃᑦᑑᔪᒥᒃ ᑐᑭᓯᐅᒪᔪᓐᓇᖁᓪᓗᑕ ᓂᔾᔪᑎᑦᑎᓐᓂᒃ (ᑕᑯᖃᓯᐅᑎᒍᒃ ᐃᓄᐃᑦ ᖃᐅᔨᒪᓂᖓ).

ᑎᕆᒐᓂᐊᑦ ᐊᑐᓪᓚᕆᓲᖑᔪᑦ ᓄᓇᒥᒃ ᐊᐅᔭᒃᑯᑦ ᕿᓂᖅᓴᓪᓚᕆᒃᑐᐋᓘᓪᓗᑎᒃ

ᑕᐃᑲᙵᑦ 2018, ᐊᑐᖅᐸᓪᓕᐊᔪᒍᑦ ᒥᑭᓐᓂᖅᓴᒃᑲᓐᓂᑯᓗᖕᓂᑦ ᐱᔾᔪᐋᖑᓂᖅᓴᑦ ᖁᒻᒧᒃᑎᑕᐅᓯᒪᔪᒧᑦ ᐅᖄᓚᓲᑦ ᖁᖓᓯᕈᑦ. ᑖᒃᑯᐊ ᓄᑖᑦ ᒥᑭᑦᑐᒻᒪᕆᐆᓕᖅᑐᑦ ᓯᕿᓐᓂᒻᒧᑦ ᓄᒃᑭᓪᓚᐅᑎᖃᖅᖢᑎᒃ ᕚᑐᖏᑦ ᓯᕿᓐᓂᖅᑐᒦᒃᑯᑎᒃ ᓄᒃᑭᒃᓴᕈᓐᓇᓲᑦ ᐊᐅᔭᒃᑯᑦ ᐱᓗᐊᖅᑐᖅ. ᖁᖓᓯᕈᖏᑦ ᐃᓚᖃᕆᕗᑦ ᓇᓗᓇᐃᕈᑎᒥᒃ GPS ᓴᖅᑮᔪᓐᓇᖅᑐᖅ ᓇᒧᑦ ᐊᐅᓪᓛᖅᑕᕐᓂᖓ ᑕᒪᐃᓐᓂᒃ ᐊᐅᓚᓂᕆᔮᓄᑦ ᑎᕆᒐᓂᐊᑉ. ᑐᑭᓕᐅᑎᓗᒍ, ᖃᐅᔨᒪᓲᖑᕗᒍᑦ ᐊᑐᓂᑦ 30 ᓴᑲᓐ ᐊᓂᒍᕌᖓᑦ ᑎᕆᒐᓂᐊᖅ ᓇᒦᓕᓐᓂᖓᓄᑦ. ᑕᑯᒃᓴᐅᔪᓐᓇᖅᓯᓲᖅ ᓇᓪᓕᐊᒃ ᑎᕆᒐᓂᐊᑉ ᓄᓇᖁᑎᒋᓂᖓᓂᒃ ᑭᒡᓕᖃᑦᑎᐊᖅᖢᑎᒃ. ᓄᓇᙳᐊᖅ ᓴᖅᑮᕗᖅ ᐅᕙᓂ ᐃᓂᒋᔭᖏᑦ 13 ᑎᕆᒐᓂᐋᑦ ᐊᔅᒍᖅᓯᒪᔪᑦ ᓄᓇᖃᐅᓯᓄᑦ 7. ᑎᑦᑕᒐᓛᑦ ᑕᒪᐃᓐᓂᒃ ᑎᕆᒐᓂᐊᑉ ᐃᓂᕕᓈ ᐊᔾᔨᒌᙱᑦᑐᓪᓗ ᑎᕆᒐᓂᐋᑦ ᑕᖅᓴᖃᖅᖢᑎᒃ ᐊᔾᔨᒌᙱᑦᑐᓂᒃ. ᑖᒃᑯᐊ ᓄᓇᖁᑎᒋᔭᖏᑦ ᑭᒡᓕᖃᑦᑎᐊᖅᐳᑦ ᑕᖅᓴᖏᑦ ᑕᐅᑐᒃᖢᒋᑦ. ᑐᑭᓕᐅᑎᓪᓗᒍ, ᐅᕙᓂ ᐅᐊᖕᓇᖅᐸᓯᒃᑐᒥᑦ ᓄᓇᖁᑖ ᓄᓇᙳᐊᒃᑯᑦ ᐱᒋᔭᐅᕗᖅ ᐊᖑᑎᒧᑦ (ᑖᓐᓂᖅᓴᑦ ᐅᐊᕋᐃᓐᓂᓯᑦ) ᐊᒻᒪᓗ ᐊᓐᓇᖓ (ᖃᐅᒪᓂᖅᓵᔾᔪᒃ ᐅᐊᕋᐃᓐᓂᓯᑦ). ᑎᕆᒐᓂᐋᑦ ᐃᓯᖅᑕᐃᓕᒪᓇᓱᓲᑦ ᐊᓯᒥᑕ ᓄᓇᖁᑖᓄᑦ, ᑭᓯᐊᓂᓕ ᐃᓛᓐᓂᒃᑯᑦ ᓴᖅᑭᓚᐅᓲᖅ ᐃᓵᖅᖢᑎᒃ. ᐸᔾᔭᓪᓗᖓᔪᑦ ᓄᓇᖁᑎᒋᔭᐅᔪᑦ ᐊᔾᔨᒌᐸᓘᖃᑦᑕᓲᑦ, ᑕᒪᓐᓇᐃᓛᒃ ᐊᔾᔨᖃᙱᑦᑐᖃᓲᖑᒋᕗᖅ. ᐅᔾᔨᕆᒍᔅᓯᐅᒃ ᐅᑯᐊ ᑐᑭᓕᐅᕆᔭᒃᓴᑦ ᓯᖓᖅᓯᒪᔪᖅ ᓄᓇᒋᔭᖅ ᐱᓯᒪᔭᐅᔪᖅ ᐆᒪ ᑎᕆᒐᓂᐊᑉ ᖃᐅᒪᓂᖅᓴᖅ ᓯᐊᕐᓇᖅ ᑎᑦᑕᖏᑦ ᐊᒻᒪᓗ ᑖᓐᓂᖅᓴᐃᑦ. ᑖᒃᑯᐊ ᑎᕆᒐᓂᐋᒃ ᐊᑯᓐᓂᐊᓂ ᓯᖓᖅᑕᐅᓯᒪᖅᑰᔨᔪᒃ ᐊᐃᑉᐸᖏᑕ ᑎᕆᒐᓂᐊᑦ ᐊᖏᔪᐋᓗᖕᒥᒃ ᓄᓇᖁᑎᖃᖅᑐᓂᒃ.

ᐅᓇ ᖃᓪᓗᓈᓄᑦ ᐃᓱᒪᓕᐅᕆᔭᐅᔪᖅ ᖃᐅᔨᔭᐅᒐᒥ ᖃᐅᔨᓵᕆᔭᐅᔪᓄᑦ ᑖᓐᓇ ᖃᐅᑕᒫᑦ ᑲᑎᒃᑯᑎᒃ ᐅᖓᓯᖕᓂᖏᑕ ᑎᕆᒐᓂᐊᑉ ᓇᕈᓂᕆᓲᖏᑦ ᐃᒻᒪᖄ ᑎᑭᐅᑎᓲᑦ 70 ᑭᓛᒥᑕᒥᒃ, ᐅᖓᓯᓛᖅ ᑎᑭᐅᒪᓪᓗᑎᒃ 85 ᑭᓛᒥᑕᒥᒃ ᐅᓪᓗᐃᓐᓇᕐᒥᒃ. ᑖᓐᓇ ᒪᓕᒃᖢᒍ ᖃᓪᓗᓈᑦ ᒪᕐᕉᒃ 26 ᒪᐃᓕᒥᒃ ᐅᓪᓚᖕᓃᒃ. ᑕᐅᑐᙳᐊᕈᓐᓇᖅᐲᑦ ᖃᐅᑕᒫᖅ ᐅᓪᓗᖃᑦᑕᓪᓗᑎᑦ ᑕᐅᒪᓐᓇ ᐊᑕᐅᓯᕐᒦᒃ, ᐃᓛᓐᓂᒃᑯᓪᓗ ᒪᕐᕉᓐᓂᒃ ᐅᓪᓗᐃᓐᓇᐅᒐᓗᐊᖅᑎᓪᓗᒍ? ᑕᒪᓐᓇ ᖃᐅᔨᔭᕗᑦ ᐅᕙᑦᑎᓐᓄᑦ ᐅᓄᖅᑐᓂᒃ ᐊᒃᑐᔭᖃᖅᐳᖅ ᑐᑭᓯᐅᒪᓂᑦᑎᓐᓄᑦ ᐆᒪᔪᑦ ᐊᐅᓚᓂᕆᓲᖏᑕ ᓄᓇᐃᓐᓇᐅᔪᒥᒃ. ᑐᑭᓕᐅᑎᓗᒍ, ᓄᓇᐃᓐᓇᕐᒥᑦ ᐱᔭᕆᑐᔫᔪᒃᓴᐅᕗᖅ ᑎᖕᒥᐊᒻᒥᒃ ᐃᕙᓇᓱᒃᑐᒥᒃ ᖃᐅᔨᔭᐅᙱᑦᑕᕆᐊᒃᓴᖅ ᑎᕆᒐᓂᐊᕐᒧᑦ. ᑕᒪᒃᑯᐊ ᑕᑯᓇᒃᑲᓐᓂᕆᐊᓕᕗᑦ ᓂᕿᑐᖅᑏᑦ−ᓂᖃᐅᓲᑦ ᐊᒃᑐᐊᖃᑎᒌᖕᓂᖏᑦ ᐊᒡᒋᖅᑐᓂᒃ ᐊᕐᕌᒍᓂᒃ.

ᓂᕆᐅᒋᔭᐅᙱᑦᑐᑦ ᐅᔾᔨᖅᕆᔭᐅᓯᒪᓕᖅᑐᑦ

ᑕᐃᒪᙵᑦ ᐊᑐᖃᑦᑕᓕᕋᑦᑕ ᐊᔾᔨᓕᐅᕆᓲᑦ ᐊᐅᓚᔾᔭᒃᑐᓂᒃ ᑎᕆᒐᓂᐊᓂᑦ ᖃᐅᔨᓵᖃᖅᖢᑕ ᑎᓯᖃᕝᕕᖏᒍᑦ ᐸᒡᕕᓵᕆᓇᑎᒍᑦ, ᑭᓯᐊᓂᓕ ᑕᑯᔭᖃᓲᖑᔪᒍᑦ ᐃᓛᓐᓂ ᐊᐅᓚᔪᓂᒃ ᐅᓄᙱᑦᑐᓄᑦ ᐃᓄᖕᓄᑦ ᑕᐅᑐᒃᑕᐅᓲᓂᒃ ᖁᙱᐊᖅᑕᓂᒡᓘᓐᓃᑦ. ᑐᑭᓕᐅᑎᓗᒍ ᑲᓇᓂ ᐊᔾᔨᓕᐅᕆᔭᑦ ᓴᖅᑮᕗᑦ ᓇᓄᕐᒥᒃ ᐱᓇᔪᒃᑐᒥᒃ ᑎᕆᒐᓂᐊᕋᓱᒃᖢᓂ ᑎᓯᒋᔭᖓᓂ. ᓯᕗᓪᓕᖅᐹᒥᒃ ᐊᔾᔨᙳᐊᒥᒃ (A), ᑖᓐᓇ ᑎᕆᒐᓂᐊᖅ ᐃᖅᓯᔪᑐᑦ ᐊᐅᓚᔪᖅ ᓲᕐᓗ ᐅᓗᕆᐋᓇᖅᑐᖅᑕᖃᓐᓂᐊᓂᒃ ᐃᒃᐱᒋᔭᓕᒃ ᐃᖅᓯᒋᔭᖓᓂᒃ. ᑕᑯᓇᑦᑎᐊᕈᕕᐅᒃ ᐊᔾᔨᙳᐊᖅ ᒥᒃᓵᓄᑦ ᑖᔅᓱᒪᐅᑉ ᑎᕆᒐᓂᐊᑉ ᐅᓗᕆᐋᓲᑎᒋᔭᖓᑕ, ᑕᑯᔪᓐᓇᖅᐳᑎᑦ ᖄᑐᐊᑯᓗᐊᑕ ᓇᓅᑉ ᓂᐊᖁᖓᑕ. ᑖᓐᓇ ᓇᓄᖅ ᐃᔨᖅᓯᒪᓇᓱᒃᑑᒐᓗᐊᖅ ᑎᕆᒐᓂᐊᕐᒥᒃ, ᑖᔅᓱᒪ ᑎᕆᒐᓂᐊᑉ ᖃᐅᔨᕙᒌᖅᓯᒪᔭᖓ ᓇᓄᖅ. ᐊᔾᔨᙳᐊᒥ (B) ᑖᓐᓇ ᓇᓄᖅ ᒥᓯᒃᖢᓂ ᑕᕐᕆᓯᒪᕝᕕᐊᓂᒃ ᐱᔭᕆᓇᓱᒃᖢᒍ ᑖᓐᓇ ᑎᕆᒐᓂᐊᖅ. ᑖᓐᓇ ᑎᕆᒐᓂᐊᖅ ᐳᓚᑲᐅᑎᒋᓪᓗᓂ ᑎᓯᒥᓄᑦ. ᐊᔾᔨᙳᐊᑦ (C) ᐊᒻᒪᓗ (D) ᓴᖅᑮᓪᓗᑎᒃ ᓇᓅᑉ ᓇᕆᐊᓐᓂᖓ ᑎᓯᐅᑉ ᐹᖓ ᐳᓚᕝᕕᒋᕋᑖᖅᑕᖓᑕ ᑎᕆᒐᓂᐊᑉ ᐃᓯᕈᓐᓇᙱᑕᖓᑕ. ᑖᒃᑯᐊ ᐊᔾᔨᙳᐊᖑᔪᑦ ᓴᖅᑮᕗᑦ ᓇᓄᐃᑦ ᐱᓇᓱᓚᐅᓲᑦ ᑎᕆᒐᓂᐊᓂᒃ ᓄᓇᐃᓐᓇᕐᒥᒃ ᐊᒻᒪᓗ ᑕᒪᒃᑯᐊ ᑎᓯᖏᑦ ᕿᒫᕝᕕᒋᔭᐅᔪᓐᓇᓲᑦ ᑎᕆᒐᓂᐊᕐᓄᑦ ᐅᒋᐊᖅᑕᐅᔾᔭᐃᕝᕕᒋᓪᓗᒍ. ᖃᔅᓯᒐᓵᓗᖕᓂᑦ ᐊᔾᔨᓕᐅᒐᑦᑎᓐᓂᒃ ᐱᑕᖃᓕᖅᑐᖅ ᐊᕐᕌᒍᒐᓵᓗᓐᓄᑦ ᖃᐅᔨᓵᖃᓕᕋᑦᑕ ᑲᑎᖢᒋᑦ ᑕᑯᒃᓴᕈᐃᕙᓪᓕᐊᓂᖏᑦᑕᐅᖅ, ᐊᒻᒪᓗ ᑕᒪᒃᑯᐊ ᑕᑯᒃᓴᐅᑎᑦᑎᕗᑦ ᐊᖏᔪᒻᒪᕆᖕᒥᒃ ᑐᖅᑯᖅᑕᐅᓯᒪᓕᖅᑐᓂᒃ ᑕᑯᓇᒃᑕᐅᔪᓐᓇᖅᑐᑦ ᑐᑭᓯᐅᒪᑦᑎᐊᕈᒪᔪᓄᑦ ᓂᕐᔪᑎᑦ ᐃᓕᖅᑯᓯᖏᓄᑦ ᐅᑭᐅᖅᑕᖅᑑᑉ ᓄᓇᐃᓐᓇᖏᓂ.