ᓇᐅᔭᕐᔪᐊᑦ ᐱᑕᓕᐊᓘᕗᖃᑦᑕᖅᐳᑦ ᓇᓂᑐᐃᓐᓇᖅ ᐅᑭᐅᖅᑕᖅᑐᖅᐸᓯᐅᓂᕐᒥ. ᑕᒪᒃᑯᐊ ᐅᑎᖅᐸᒃᑐᑦ ᐅᑭᐅᖅᑕᖅᑑᓂᕐᒧᑦ ᐊᐅᔭᒃᑯᑦ, ᑭᓯᐊᓂᑦᑕᐅᖅ ᐃᓚᖏᑦ ᓂᒋᖅᐸᓯᐅᓂᕐᒦᖃᑕᕐᒥᔪᑦ ᐅᑭᐅᖅᑕᖅᑐᒥ, ᐅᑭᐅᒃᑯᑦ. ᐊᓯᖏᓐᓂᓗ, ᐅᑮᕙᒃᑐᑦ ᑲᓇᖕᓇᖅᐸᓯᖓᓂ ᐊᒥᐊᓕᑲᐃᑦ ᓄᓇᐃᑦ ᐅᐊᖕᓇᖓᓂ, ᑕᐅᕙᓂᓗ ᓯᒡᔭᖅᐸᓯᖏᓐᓂ ᓂᐅᕙᓐᓛᓐᒥ ᐊᒻᒪᓗ ᓚᐸᑐᐊᕐᒥᓗ ᑕᐅᕗᖓ ᐊᒥᐊᓕᑲᒥᐅᑦ ᓄᓇᖏᓐᓂ ᑕᐃᔭᐅᔪᒥ ᑳᓚᐃᓇᐅᑉ ᐅᐊᖕᓇᖓᓂ ᑕᐅᕙᓂᓗ ᓴᐃᓐᑦ ᓗᐊᕆᓐᓯᐅᑉ ᑲᖏᖅᑐᖓᓂ, ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖅᐸᓯᐊᓂᒃ ᐅᐊᖕᓇᖅᐸᓯᕐᒥᒃ, ᐊᓛᔅᑲᒥᒃ ᑕᐅᓄᖓᐅᕙᒃᓱᑎᒡᓗ ᑎᑭᐅᑎᔪᓄᑦ ᑳᓕᕗᐊᓂᐊᒧᑦ. ᑕᒪᒃᑯᐊ ᐊᒥᓱᑦ ᓇᐅᔭᕐᔪᐊᑦ ᓄᓕᐊᖃᑕᖅᐳᑦ ᐃᓐᓈᕈᐊᓗᖕᓂ ᐊᒻᒪᓗ ᓇᓂᑐᐃᓐᓇᖅ ᐅᑭᐅᖅᑕᖅᑐᒥ. ᒥᑦᑎᒪᑕᓕᐅᑉ ᕿᑭᖅᑕᖓᓃᓲᖑᓗᑎᒡᓗ ᒥᑭᔫᑎᐅᓂᖅᓴᓂ ᕿᑭᖅᑕᒐᓴᖕᓂ ᑕᐃᒃᑯᓇᓂᓗᓐᓃᑦ ᑕᕆᐅᖑᖏᑐᓂ ᑕᓯᕐᓂᒃ ᐊᒻᒪᓗ ᑕᓯᐊᕐᔪᖕᓂ, ᒪᔅᓴᐅᓂᖏᓐᓂ. ᓇᐅᔭᕐᔪᐊᑦ ᐅᓪᓗᖃᕐᕕᖏᑦ ᓄᓇᖓᓃᓲᑦ ᖃᓕᒃᑐᕐᕕᖕᒥ, ᐱᑕᖃᕋᔪᒃᐳᑦ ᐃᒪᓐᓇᑎᒋ 1.2 ᑕᒫᓂ ᐅᓪᓗᖏᑦ/ᑭᑉᐸᕆᒃᑐᒥᒃ ᑭᓛᒥᑕᑕᒫᖅ (km²-ᓂᒃ).

ᓄᓕᐊᕐᕕᐅᕙᖕᓂᖏᑦ ᐊᕙᑏᑦ

ᓇᐅᔭᕐᔪᐊᑦ ᐊᑐᑲᓐᓂᖃᑦᑕᐃᓐᓇᓲᑦ ᐅᓪᓗᖃᕐᕕᒋᓚᐅᖅᑕᖏᓐᓂ ᐊᕐᕋᒎᑉ ᓯᕗᓂᕆᓚᐅᖅᑕᖓᓂᒃ. ᑕᒪᒃᑯᐊ ᐅᓪᓗᓕᐅᖃᑦᑕᖅᑐᑦ ᓄᓇᒥᒃ ᐱᕈᖅᑐᕕᓂᕐᓂᒃ ᐃᕙᕝᕕᖏᑦ, ᐃᓚᓐᓂᒃᑯᑦ ᐳᖅᑐᓂᖃᕈᓐᓇᖅᑐᑦ 30 ᓴᓐᑎᒥᑕᓂᒃ-cm-ᓂᒃ ᐆᒃᑐᕋᐅᑎᓕᖕᓂᒃ, ᐅᖓᑖᓅᓗᓐᓃᑦ. ᐊᕐᓇᓪᓗᐃᑦ ᒪᓐᓂᖃᓲᑦ ᒪᕐᕉᖕᓂᒃ ᐱᖓᓱᓂᒡᓗᓐᓃᑦ ᐃᕙᐅᔭᓂᒃ ᑕᖅᓵᖃᖅᑐᓂᒃ ᑲᔪᕐᓂᒡᓗ ᑐᓵᖅᑐᓂᒃ. ᐃᓐᓄᒃᓯᐊᕆᔭᐅᕙᒃᑐᑦ ᐊᑯᓂᐅᓂᖃᕋᔪᒃᑐᓂᒃ 27-ᓂᒃ ᐅᓪᓗᓂᒃ, ᒪᓐᓂᓄᖏᓐᓂᒃ ᐃᓐᓂᒃᓰᕙᒃᑐᑦ ᑕᒫᓂᐅᒐᔪᒃᑐᖅ ᔪᓐᓂ 5-ᒥᒃ 19-ᒧᑦ, ᐃᓐᓄᖃᑦᑕᖅᓱᑎᒃ ᓯᕗᓪᓖᖕᓂᒃ ᐱᓇᓱᐊᕈᓰᖕᓂᒃ ᔪᓚᐃᒥ. ᐱᐊᕋᖏᑦ ᐅᓪᓗᓂᒃ 42-ᓂᒃ 50-ᓅᖑᔪᓐᓇᖅᑐᓂᒃ ᓇᐅᔭᕋᓛᖑᓕᖅᑎᓪᓗᒋᑦ ᐅᓪᓗᖏᓐᓃᖃᑦᑕᖅᐳᑦ ᓄᓇᒥᓗᓐᓃᑦ ᐅᓪᓗᖓᑕ ᖃᓂᒋᔭᖏᓐᓂ. ᑕᒪᕐᒥᒃ ᐊᖓᔪᖄᕆᔭᐅᔫᒃ ᓂᕿᒃᓴᖅᓯᐅᕈᔾᔨᕙᒃᑐᑦ ᐊᒻᒪᓗ ᓴᐳᓐᓂᐊᖅᑎᐅᕙᒃᓱᑎᒃ. ᐅᓪᓗᖃᕐᓂᖏᓐᓂ ᓇᐅᔭᕐᔪᐊᑦ ᐃᖅᓯᓵᒃᑲᐅᕗᑦ ᖃᖓᑐᐃᓐᓇᖅ ᐊᓯᖏᓐᓄᑦ ᖃᒡᓕᔭᐅᑐᐊᕈᑎᒃ ᐅᓪᓗᖏᑦ, ᑕᒫᓂᓗᓐᓃᑦ ᐅᖓᓯᖕᓂᓕᖕᒥ 100 ᒥᑕᓃᑦᑑᒐᓗᖓᓂᒃ, ᓂᐱᖅᑯᖅᑐᔪᒥᒃ ᓂᓪᓕᐊᖃᑦᑕᑐᑦ ᐊᐅᖅᓵᕋᖃᑦᑕᖅᓱᑎ ᕿᓚᒥᐊᓗᒃ ᖁᒻᒧᑕᒃᑲᓐᓂᖃᑦᑕᖅᓱᑎᒡᓗ ᐊᖃᖃᑦᑕᖅᓱᑎᒃ ᐊᐅᖅᓵᕋᑲᓐᓂᕐᓂᐊᕋᒥᒃ. ᑕᒪᕐᒥᒃ ᐊᕐᓇᓪᓗᐃᓪᓗ ᐊᖑᓴᓪᓗᐃᓪᓗ ᐊᐅᖅᓵᕋᖃᑦᑕᖅᐳᑦ ᑕᐃᒪᐃᓕᐅᖏᓐᓇᓚᖓᓪᓗᑎᒡᓗ ᑭᓯᐊᓂ ᕿᒪᒃᑕᐅᒍᑎᒃ.

ᑕᒪᒃᑯᐊ ᓇᐅᔭᕐᔪᐊᑦ ᓂᕿᖃᓲᖑᒐᓗᐊᖅᓱᑎᒃ ᐊᕕᓐᖓᕐᓂᒃ (ᐊᑕᓃᑦᑐᑦ ᑕᑯᓗᒋᑦ), ᐊᔾᔨᖃᓲᖑᖏᓐᓂᕗᑦ ᐊᓯᖏᓐᓂ ᑎᖕᒥᐊᕐᓂᒃ ᐊᒻᒪᓗ ᓄᓇᒥ ᐆᒪᔪᕐᓂᒃ ᓂᕿᒃᓴᖅᓯᐅᖅᐸᒃᑐᓂᒃ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᓄᓕᐊᕈᓐᓇᕐᓂᖏᑦ ᑐᓐᖓᕕᖃᖅᐸᓐᖏᒪᑕ ᐊᕕᓐᖓᐃᑦ ᐱᑕᖃᕐᓂᖏᓐᓂᒃ. ᑭᓯᐊᓂᓕ, ᒪᓐᓂᖏᑕ ᐃᓐᓄᒍᓐᓇᕐᓂᖏᑦ ᐊᒥᔅᓲᖏᓂᖅᓴᐅᕙᒃᑭᕗᑦ ᐊᕕᖓᖃᑦᑎᐊᖏᑎᓪᓗᒍ. ᑕᒪᓐᓇ ᐱᔾᔪᑕᐅᔪᖅ ᓂᒃᓴᖅᓯᐅᕐᓂᖅᓴᐅᕙᖕᓂᖏᓐᓄᑦ ᐊᓯᖏᑦ ᐆᒪᔪᐃᑦ ᓲᕐᓗ ᑕᕆᒐᓂᐊᑦ, ᐃᔅᓱᖓᐃᑦ ᑐᓗᒐᐃᓪᓗ ᒪᓐᓂᒃᓯᐅᖅᐸᖕᓂᖏᓐᓄᑦ ᓇᐅᔭᕐᔪᐊᑦ ᐅᓪᓗᖏᓐᓂᒃ ᐊᓯᖏᓂᒃ ᓂᕿᒃᓴᕆᖅᓯᐅᑲᓐᓂᖃᑕᕆᐊᖃᕐᓂᖏᓐᓄᑦ. ᓇᐅᔭᕐᔪᐊᑦ ᐊᐃᑉᐸᕆᒃᐸᒃᑐᑦ ᓈᒻᒪᓈᕐᓂᖅᓴᐅᖃᑦᑕᖅᑐᑦ ᓄᓕᐊᖃᑕᕈᓐᓇᕐᓂᖏᓐᓂ ᕿᑭᖅᑕᒐᓴᐅᔪᓂ ᐱᔾᔪᑕᐅᓗᓂ ᐱᐅᓂᖅᓴᓂᒃ ᓴᐳᓐᓂᐊᖅᑕᐅᓯᒪᔪᓐᓇᕐᓂᖏᑦ ᑕᒪᒃᑯᓇᖓᑦ ᓂᕿᒃᓴᖅᓯᐅᖅᑎᒻᒪᕆᐅᕙᒃᑐᓂᒃ, ᑎᕆᒐᓂᐊᕐᓂᖅ, ᐊᕐᕋᒍᓂ ᐊᕕᓐᖓᐃᑦ ᐊᒥᓲᔪᓐᓂᖅᓯᒪᓂᖏᓐᓂ ᑎᑭᑕᐅᓴᕋᐃᖏᓂᖅᓴᐅᖃᑕᕋᒥᒃ ᕿᑭᖅᑕᓃᑎᓪᓗᒋᑦ.

ᓂᕿᒃᓴᕆᕙᒃᑕᖏᑦ

ᓇᐅᔭᕐᔪᐊᑦ ᑕᒪᐃᓐᓂᒃ ᓂᕿᒃᓴᓂᒐᓱᐊᖅᑎᐅᕙᒃᑐᑦ ᖃᓄᐃᑐᑐᐃᓐᓇᕐᓂᒃ, ᓲᕐᓗ ᐆᒃᑑᑎᒋᓗᒍ ᐊᒥᔅᓱᓂᒃ ᐊᔾᔨᒌᖏᑐᓂᒃ ᐆᒪᔪᖅᓯᐅᖅᐸᒃᑐᑦ ᓂᕿᒃᓴᕆᔪᓐᓇᖅᑕᒥᓂ. ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐊᕕᓐᖓᐃᑦ ᐊᒥᔅᓲᓂᖏᓐᓂ, ᓂᕿᒃᓴᖃᕐᓂᖅᓴᐅᓲᖑᕗᑦ ᐱᓗᐊᖅᑐᒥᒃ ᓄᓇᒥᐅᑕᓂᒃ ᐆᒪᔪᓂᒃ (63% ᐳᓴᓐᑎᖏᓃᑦᑐᓂᒃ) ᐊᓯᖏᓐᓂᒡᓗ ᐊᒥᐊᒃᑯᖏᓐᓂᒃ ᑕᕆᐅᕐᒥᐅᑕᓂᒃ ᐆᒪᔪᓂᒃ (31% ᐳᓴᓐᑎᖏᓃᑦᑐᓂᒃ ᑕᕆᐅᕐᒥᐅᑕᓂᒃ ᐊᒻᒪᓗ 6% ᐳᓴᓐᑎᖏᓃᑦᑐᓂᒃ ᑕᕆᐅᖑᖏᑦᑐᒥ ᐃᒪᕐᓂᖔᖅᑐᓂᒃ). ᑭᓯᐊᓂᓕᑦᑕᐅᖅ, ᐊᕕᖓᐃᑦ ᐊᒥᔅᓲᔪᓐᓂᖅᐸᓪᓕᐊᓂᖏᓐᓂ, ᓄᓇᒥ ᐆᒪᔪᖅᓯᐅᖃᑕᕐᓂᖏᑦ ᑲᑕᒃᐸᒃᑐᑦ ᐃᒪᓐᓇᑎᒋ 50% ᐳᓴᓐᑎᒥᒃ ᓂᕿᒋᕙᒃᑕᖏᓐᓂ, ᑕᐃᒃᑯᐊᓗ ᑕᕆᐅᕐᒥᐅᑕᐃᑦ ᓂᕿᒃᓴᕆᕙᒃᑕᖏᑦ ᓂᕿᒃᓴᕆᓂᖅᓴᐅᓕᖃᑦᑕᖅᓱᓂᒋᑦ 43% ᐳᓴᓐᑎᖏᓐᓂ ᐊᒻᒪᓗ ᑕᕆᐅᖑᖏᑦᑐᒥ ᐃᒪᕐᒥᒃ ᓂᕿᒃᓴᖃᓲᖑᓂᖏᑦ ᐊᖏᒡᓕᒋᐊᖃᑦᑕᖅᑐᑦ ᑕᒪᐅᖓ 7% ᐳᓴᓐᑎᓄᑦ. ᓂᕿᒃᓴᓂᓗᐊᖃᑦᑕᖏᒃᑲᓗᐊᖅᑎᓪᓗᒋᑦ ᑕᕆᐅᖑᖏᓐᓂᕐᒥ ᐃᒪᕐᓂᒃ, ᐃᑲᔪᕐᓂᖃᕆᕗᖅ ᓇᐅᔭᕐᔪᐊᓄᑦ ᐅᓪᓗᖃᕐᓂᖏᓐᓂ ᓄᓇᖅᐱᐅᓂᖅᓴᐅᓂᕐᒥ.

ᑎᖕᒥᐊᕐᓂ ᐊᓯᖏᓐᓂᒃ ᓂᕿᑐᓲᖑᔪᑎᑐᑦ, ᐱᐅᓯᖃᖃᑕᐅᒋᕗᑦ ᓇᐅᔭᕐᔪᐊᑦ ᒥᕆᐊᖅᓴᖃᑦᑕᓲᖑᓂᖅ ᓂᕆᓚᐅᖅᑕᒥᓂᒃ ᑎᒥᖓᓄᑦ ᓯᖃᓕᑎᖅᑕᐅᔪᓐᓇᓲᖑᖏᓐᓂᖏᓐᓂ. ᖃᐅᔨᓴᖅᑕᐅᒐᒥᒃ ᒥᕆᐊᖅᑕᐅᖃᑕᕐᓂᑯᐃᑦ ᓄᓇᒥ 1,000-ᖏᓐᓃᑦᑐᑦ ᑲᑎᖅᓱᖅᑕᐅᓚᐅᖅᑐᑦ ᒥᑦᑎᒪᑕᓕᐅᑉ ᕿᑭᖅᑕᖓᓐᓂ ᓴᕿᑎᑦᑎᕝᕕᐅᓚᐅᖅᑐᑦ ᖃᓄᐃᑦᑐᓂᒃ ᓄᓇᒥᐅᑕᓂᒃ ᐃᒪᕐᒥᐅᑕᓂᒡᓗ ᑕᕆᐅᕐᒥ ᓂᕿᖃᓲᖑᓂᖏᓐᓂᒃ, ᖃᐅᔨᕝᕕᐅᔪᓐᓇᕐᓂᖏᓄᑦ ᑕᒪᒃᑯᐊ. ᓲᖃᐃᒻᒪᓗᓐᓂᑦ, ᓂᕿᒋᔭᐅᒐᔪᖕᓂᖅᐹᖑᕙᒃᑐᑦ ᓇᐅᔭᕐᔪᐊᕐᓄᑦ ᑕᐃᒃᑯᐊ ᑲᖑᐃᑦ ᐊᕕᖓᐃᓪᓗ, ᑕᐃᒃᑯᐊ ᖃᐅᓪᓗᖅᑐᑦ ᐊᕕᖓᐃᑦ ᐊᒥᖅᖤᐃᑦ ᐱᓗᐊᖅᑐᒥᒃ. ᖃᓂᒋᔭᖏᓃᔅᓲᖑᓂᖏᑦ ᓇᐅᔭᐃᑦ ᑲᖑᖃᕐᕕᐅᕙᒃᑐᓂ, ᓂᕿᒃᓴᕆᔭᐅᓂᖅᓴᐅᕙᒃᐳᑦ ᑕᐃᒪᐃᓂᖏᓐᓄᑦ ᓇᐅᔭᕐᔪᐊᕐᓄᑦ. ᑲᖑᐃᑦ ᒪᓐᓂᕕᓂᖏᓐᓂᒃ ᐊᒻᒪᓗ ᑲᖑᐊᕋᕕᓂᕐᓂᒃ ᓂᕆᖃᑦᑕᖅᓯᒪᔭᖏᓂᒃ ᖃᐅᔨᓐᓇᖃᑦᑕᖅᑐᑦ ᒥᕆᐊᕆᔭᕕᓂᖏᓐᓂ ᓇᐅᔭᐃᑦ ᐱᓗᐊᖅᑐᒥᒃ ᓂᕆᑎᑦᑎᖃᑕᓕᖅᑎᓪᓗᒋᑦ ᐱᐊᕋᖏᓐᓂ ᓇᐅᔭᕌᓚᕐᒥᓂᒃ. ᓇᐅᔭᕐᔪᐊᑦ ᒪᓂᖃᑐᐃᓐᓇᕐᓂᖏᓐᓂᓗ ᓱᓕ ᐃᓐᓄᓚᐅᖏᓂᖏᓐᓂ, ᑲᖑᕐᓂᒃ ᓂᕿᖃᓲᖑᓂᖏᓐᓂᒃ ᖃᐅᔨᓐᓇᖃᑦᑕᓚᐅᖅᑐᑦ, ᒥᕆᐊᕆᕙᒃᑕᖏᓐᓂ ᐊᖏᔫᑕᐅᕙᓚᐅᖏᒪᑕ ᑲᖑᖅᑑᒪᓂᕕᓂᖏᑦ ᑕᒪᒃᑯᓇᖓᑦ. ᐊᕐᕋᒍᓂᓕ ᐊᕕᖓᓕᐊᓘᓂᖏᓐᓂ, ᓂᕿᒋᕙᒃᑕᖏᑦ ᓇᐅᔭᕐᔪᐊᑦ ᒪᓐᓂᖏᑦ ᓱᓕ ᐃᓐᓄᓚᐅᖏᓂᖏᓐᓂ, ᑲᖑᖅᑐᖃᒪᖃᑦᑕᕐᓂᖅᓴᐅᓚᐅᕆᕗᑦ, ᐊᒻᒪᓗ ᐊᕐᕋᒍᖏᓐᓂ ᐊᕕᖓᖃᑦᑎᐊᓐᖏᓂᖏᓐᓂ, ᐃᒡᓗᐊᓄᖔᖓᖃᑦᑕᖅᓱᑎ ᓂᕿᒋᕙᒃᑕᖏᓐᓂ ᑕᒪᒃᑯᓂᖓ ᖃᐅᔨᔭᐅᖃᑦᑕᓚᐅᖅᑐᓂ. ᒪᓐᓂᖃᓕᖅᑎᓪᓗᒋᓪᓕ ᑕᐃᒪ, ᓇᐅᔭᕐᔪᐊᑦ ᓂᕿᖃᕐᓂᖅᓴᐅᓕᖅᐸᒃᑐᑦ ᑲᖑᕐᓂᒃ. ᑕᕆᕐᒥᐅᑕᐃᑦ ᐆᒪᔪᖅᑐᖅᑕᕕᓂᖏᑦ ᖃᐅᔨᓇᖅᑐᑦ ᒥᕆᐊᕆᖃᑦᑕᖅᑕᖏᓐᓂᒃ, ᐃᓚᖃᕐᒪᑕ ᑕᒪᒃᑯᓂᖓ ᑕᕆᐅᕐᒥᐅᑕᕕᓂᕐᓂᒃ ᕿᒥᕐᓗᖃᖏᑦᑐᓂᒃ, ᐃᖃᓗᖕᓂᒃ ᐊᒻᒪᓗ ᑕᕆᐅᕐᒥᐅᑕᓂᒃ ᐆᒪᔪᓂᒃ. ᓂᕿᖃᓲᖑᖕᒥᔪᑦ ᐊᓯᖏᓐᓂᒃ, ᖃᓄᐃᑦᑐᑐᐃᓐᓇᕐᓂᒃ ᖃᐅᔨᔭᐅᖃᑦᑕᖅᓯᒪᖕᒥᔪᑦ ᓂᕿᖃᕐᓂᖏᑦ ᑎᖕᒥᐊᕐᓂᒃ ᐊᔅᓯᖏᓐᓂᒃᑕᐅᖅ (ᓲᕐᓗ ᒥᑦᑎᕐᓂᒃ, ᐃᔅᓱᖓᕐᓂᒃ, ᖁᐸᓄᐊᒐᓴᐅᕙᒃᑐᓂᒃ, ᓯᒡᔭᖅᐸᓯᐅᓂᕐᒥᓲᖑᔪᓂᒡᓗ ᑎᖕᒥᐊᕐᓂᒃ), ᑎᕆᒐᓂᐊᕕᓂᕐᓂᖅ ᐊᒻᒪᓗ ᖁᐱᕐᕈᕐᓂᒃ ᐊᓯᕙᖕᓂᒡᓗ ᑕᒪᒃᑯᓂᖓᕈᓘᔭᖅ. ᐃᓱᒪᒋᓪᓗᒋᑦ ᓇᐅᔭᕐᔪᐊᑦ ᐊᔾᔨᒌᖏᑑᑎᐅᕙᒃᑐᓂᒃ ᐃᕙᕕᖃᓲᖑᓂᖏᑦ ᐅᓪᓗᖃᕐᕕᒋᔅᓲᕆᔭᖏᑦ, ᖃᓄᐃᑦᑐᓂᒃ ᓂᕿᒃᓴᖃᓲᖑᓂᖏᑦ ᐊᔾᔨᒌᖃᑦᑕᖏᓪᓚᑦ ᒪᓕᒃᑐᓂᒃ ᓇᓃᓐᓂᖏᓐᓂᒃ. ᐅᖓᓯᖕᓂᖏᑦ ᓯᒡᔭᖅᐸᓯᐅᓂᕐᒥ ᐊᒻᒪᓗ ᐱᑕᖃᕈᓐᓇᓂᖏᓐᓂ ᑕᒪᒃᑯᐊ ᓂᕿᒃᓴᐃᑦ ᖃᓄᐃᓕᖓᓂᖏᓐᓄᑦ ᒥᕆᐊᕆᕙᒃᑕᖏᑦ ᐊᔾᔨᒌᖏᓗᑕᐅᕙᖕᒪᑕ.

ᐱᑕᖃᕋᔪᖕᓂᖏᑦ ᓂᕿᒋᕙᒃᑕᖏᑦ ᖃᐅᔨᔭᐅᖃᑦᑕᖅᐳᑦ ᒥᕆᐊᕆᔭᕕᓂᖏᓐᓂᒃ ᑲᑎᖅᓱᖅᑕᐅᓯᒪᔪᓂ ᓇᐅᔭᕐᔪᐊᑦ ᐅᓪᓗᖃᕐᕕᒋᕙᒃᑕᖏᓐᓂ ᒪᓐᓂᐅᑎᓪᓗᒋᑦ ᓱᓕ ᐊᒻᒪᓗ ᐃᓐᓄᒃᓯᒪᓕᖅᑎᓪᓗᒋᑦ ᒪᓐᓂᐅᓚᐅᖅᑐᑦ ᐊᕐᕋᒍᖏᓐᓂᒃ ᑕᒫᓂ ᐊᒥᔅᓲᖏᓐᓂᖏᓐᓂ ᐊᕕᖓᐃᑦ ᐊᒻᒪᓗ ᖁᑦᑎᒃᑐᒦᓐᓂᖏᓐᓂ ᐊᒥᔅᓱᓂᖏᑦ ᐊᕕᓐᖓᐃᑦ ᒥᑦᑎᒪᑕᓕᐅᑉ ᕿᑭᖅᑕᖓᓂ. ᑕᕆᐅᕐᒥᐅᑕᐃᑦ ᓂᕿᒋᕙᖕᒥᔭᖏᑦ ᓲᕐᓗ ᐃᖃᓗᐃᓪᓗ, ᑕᕆᐅᕐᒥᐅᑕᐃᓪᓗ ᕿᒥᕐᓗᖃᓐᖏᑦᑐᑦ ᐊᒻᒪᓗ ᑕᕆᐅᕐᒥᐅᑕᐃᑦ ᐆᒪᔪᐃᑦ. ᐊᓯᖏᑦᑕᐅᖅ ᓂᕿᒃᓴᕆᔭᐅᕙᖕᒥᔪᑦ ᐃᓚᖃᕐᒥᔪᑦ ᑎᖕᒥᐊᕐᓂᒃ, ᑲᖑᐃᑦ ᐊᓯᖏᓐᓂᒃ, ᓄᓇᒥᐅᑕᓂᒃ ᐆᒪᔪᓂᒃ ᐊᒫᒪᒃᑎᑦᑎᕙᒃᑐᓂᒃ ᐊᕕᖓᐃᑦ ᐊᓯᖏᓐᓂᒃ ᐊᒻᒪᓗ ᖁᐱᕐᕈᕐᓂᒃ, ᐊᓯᕙᖕᓂᒡᓗ ᑕᒪᒃᑯᓂᖓᕈᓘᔭᖅ. Gauthier et al. 2015, DOI: 10.1642/AUK-14-273.1.