ᓯᓚᒋᔭᖓ ᑐᑭᖃᖅᑎᑕᐅᓲᖅ ᐃᓕᖅᑯᓯᐅᒐᔪᒃᑐᖅ ᓯᓚᖓᑕ ᖃᓄᐃᑦᑑᓂᖏᑦ ᐃᓂᐆᔪᒧᑦ ᐊᕐᕌᒍᒐᓴᑦ ᑕᑯᓇᒃᖢᒋᑦ ᐃᓗᐊᒍᑦ. ᐅᓂᒃᑳᕆᔭᐅᒐᔪᓲᖅ ᑭᒡᓕᖃᖅᑎᑕᐅᓪᓗᓂ ᓯᓚᐅᑉ ᐊᔾᔨᒌᙱᔾᔪᑎᒋᓲᖏᓐᓄᑦ ᐱᖃᓯᐅᑎᓪᓗᒍ ᓯᓚᐅᑉ ᐆᓇᔪᖕᓂᕆᔭᖓ ᐅᓪᓗᐊᒍᑦ, ᐊᓄᕌᓐᓂᐊᑕ ᐅᕝᕙᓘᓐᓃᑦ ᓯᓚᕈᔫᓂᖓᑕ ᑲᑕᒐᕐᓂᕆᔮ ᐊᐱᒍᓂ ᒪᖁᒃᑯᓂᓘᓐᓃᑦ. ᑐᕌᖓᔪᖅ ᐊᕕᒃᓯᒪᔪᒧᑦ ᓯᓚᖓ ᓇᓗᓇᐃᕈᓐᓇᖅᑐᖅ ᓯᓚᖁᑎᖓ ᐊᑯᓂᒻᒪᕆᒃ ᓇᐅᑦᑎᖅᓱᐊᕆᓗᒍ ᓇᓗᓇᐃᖏᓐᓇᓪᓗᒍᓗ ᐊᓱᐃᓛᒃ ᓇᐄᓴᐅᑎᒃᑯᑦ ᐊᔾᔨᒌᖏᑦᑑᓂᖏᑦ ᓇᓗᓇᐃᖅᐸᓪᓕᐊᓗᒋᑦ. ᑕᒪᒃᑯᐊ ᓯᓚᐅᑉ ᖃᓄᐃᑦᑑᓂᖏᑦ ᓇᓗᓇᐃᖅᑕᐅᓪᓗᑎᒃ ᐃᒻᒥᒃᑯᑦ ᐊᐅᓚᓲᒥᒃ ᓯᓚᓐᓂᐊᕈᑎᒥᒃ ᑖᒃᑯᐊ ᐳᖅᑐᓪᓗᑎᒃ ᓇᑉᐸᖅᑯᑎᓖᑦ ᖃᐅᔨᓴᐅᑎᖃᖅᖢᑎᒃ, ᑐᑭᓕᐅᑎᓗᒍ, ᖃᓄᑎᒋ ᓯᕿᓂᖅ ᐊᑭᖕᒥᒃᑎᒋᒻᒪᖔᑦ, ᓯᓚᐅᑉ ᐆᓇᔪᓐᓂᖓ, ᐳᖅᑐᓂᕆᔮᑕ ᐊᐱᓯᒪᓂᐅᑉ ᐊᓄᕌᓐᓂᕆᔭᖓᑕᓗ. ᐱᐅᓛᕆᔭᖓ ᐊᑐᖅᖢᓂ ᐃᒻᒥᒃᑯᑦ ᐊᐅᓚᓲᓂᒃ ᓯᓚᓐᓂᐊᕈᑎᓂᒃ ᐊᕐᕌᒍᓕᒫᖅ ᐅᐸᒃᑕᐅᓯᒪᓇᑎᒃ ᖃᐅᔨᓵᖃᕈᓐᓇᓲᖑᒻᒪᑕ ᓯᓚᐅᑉ ᖃᓄᐃᑉᐸᓪᓕᐊᔭᖓᓂᒃ. ᖃᔅᓯᒐᓚᑦ ᓯᓚᓐᓂᐊᕈᑏᑦ ᐃᒻᒥᒃᑯᑦ ᐊᐅᓚᓲᑦ ᐃᓕᓯᒪᔭᕗᑦ ᒥᑦᑎᒪᑕᓕᐅᑉ ᐊᑭᐊᖓᓂ ᓂᐱᓕᐅᕇᓐᓇᖅᑐᑦ ᓯᓚᖓᓐᓂᒃ ᑕᐃᒪᙵᑦ 1994.

ᖃᐅᔨᒪᔭᖃᖅᖢᓂ ᓯᓚᖓᓂᒃ ᑐᓴᕈᒪᓇᖅᑐᖅ ᐱᔾᔪᑎᒋᓪᓗᒍ ᑭᓱᓕᒫᓂᒃ ᐊᒃᑐᐃᓂᖃᓲᖑᒻᒪᑦ ᐃᓅᓯᑦᑎᓐᓂᒃ: ᓇᓗᓇᐃᕆᓲᖅ ᖃᓄᐃᑦᑐᓂᒃ ᓂᕐᔪᑎᓂᒃ ᓴᓂᕋᑦᑎᒍᑦ ᓇᔪᖅᑐᖃᓲᖑᓂᖏᑕ, ᖃᓄᐃᑦᑐᑦ ᓄᓇᕋᐃᑦ ᐱᕈᕐᓂᖏᑕ, ᐊᓐᓄᕌᑦ ᐃᒡᓗᐃᓪᓗ ᐊᑐᕆᐊᖃᓲᕗᑦ ᐊᒻᒪᓗ ᐅᓪᓗᒥ ᓂᒡᓚᓱᖕᓂᐊᕐᒪᖔᑦ ᐅᖅᑰᓂᐊᕐᒪᖔᓪᓘᓐᓃᑦ. ᐅᑭᐅᖅᑕᖅᑐᒥᓪᓕ, ᓄᓇᓖᑦ ᐃᓄᖏᑦ ᐊᒃᑐᐊᖕᒪᑕᓱᓕ ᓄᓇᒧᑦ, ᓯᓚᖓ ᐊᖏᔪᒥᒃ ᐊᒃᑐᐃᓂᖃᕈᓐᓇᓲᖅ ᐃᓅᓯᕆᔭᐅᔪᒥᒃ. ᓇᓗᓇᐃᕆᓲᖅ ᖃᓄᑎᒋ ᓂᕐᔪᑎᑦ ᐊᒥᓲᓂᖏᑕ ᐊᖑᓇᓱᒐᒃᓴᐅᓲᑦ ᓂᕿᒃᓴᐅᔪᓪᓗ, ᓇᓗᓇᐃᕆᓲᖅ ᖃᓄᑎᒋ ᐊᐳᔾᔭᕆᓐᓂᐊᕐᒪᖔᑦ ᖃᓄᒃᑯᓪᓗ ᑕᕆᐅᖅ ᓯᑯᓕᕈᑖᑕ ᐊᒻᒪᓗ ᐊᐅᓕᕈᑖᑕ. ᐊᓯᐊᒍᑦ ᐅᖃᐅᓯᒃᑯᑦ, ᓯᓚᖓ ᑐᙵᕕᒋᔭᐅᓲᖅ ᐆᒪᔪᑦ ᐊᐅᓚᓂᕆᔮᓄᑦ ᐃᓅᖃᑎᒌᓪᓗ ᖃᓄᖅ ᐃᓕᖅᑯᓯᖃᕐᓂᖏᓄᑦ. ᑭᓯᐊᓂᓕ, ᓯᓚᖓ ᑖᓐᓇᑦᑕᐃᓐᓇᐅᔪᓐᓇᙱᑦᑐᖅ ᑭᓯᐊᓂ ᐊᓯᔾᔨᓲᖑᓪᓗᓂ ᑕᖅᑮᑦ ᒪᓕᒃᖢᒋᑦ, ᑕᒪᓐᓇ ᐊᑑᑎᔪᒥᒃ ᐊᒃᑐᐃᓂᖃᓲᖑᒋᕗᖅ ᐱᕈᖅᑐᓄᑦ ᓂᕐᔪᑎᓄᓪᓗ ᐊᒻᒪᑦᑕᐅᖅ ᐃᓅᖃᑎᒌᑦ ᖃᓄᖅ ᐃᓅᖃᓐᓂᐊᕈᓯᕆᓲᖏᑕ. ᑕᐃᒪᓕ ᐅᔾᔨᕆᔭᖃᓐᓂᐊᓪᓗᓂ ᐊᔾᔨᒋᔪᓐᓃᕈᑎᐅᔪᓂᒃ ᓯᓚᖓᓄᑦ ᐃᓕᓐᓇᓱᒡᓗᑎᒡᓗ ᖃᓄᐃᑦᑑᓂᖓᑕ ᐊᒃᑐᐃᓂᖃᕈᑎᖏᑦ, ᓯᓚᖓ ᓇᐅᑦᑎᖅᓱᖅᑕᐅᔭᕆᐊᓕᒃ ᑕᐃᒪᙵᑦ ᐊᕐᕌᒍᒐᓵᓗᓐᓄᓪᓗ. ᓇᐅᑦᑎᖅᓱᐊᕆᓪᓗᒍ ᓯᓚᖓ, ᖃᐅᔨᓴᖅᑏᑦ ᓴᖅᑮᔭᖃᖅᓯᒪᕗᑦ ᐅᓪᓗᒥ ᐊᔾᔨᒋᔪᓐᓃᖅᐸᓪᓕᐊᓕᒻᒪᒍ ᓄᓇᔾᔪᐊᓪᓗ ᐅᖅᑰᓯᕙᓪᓕᐊᓂᖓᑕ, ᐱᓗᐊᖅᑐᒥᒃ ᐅᑭᐅᖅᑕᖅᑐᒥ.

ᓯᓚᒋᒐᔪᒃᑕᖓ ᒥᑦᑎᒪᑕᓕᐅᑉ ᐊᑭᐊᖓᓂ

ᒥᑦᑎᒪᑕᓕᐅᑉ ᐊᑭᐊᖓᓂ, ᓯᓚᖓ ᐊᒃᓱᒻᒪᕆᒃ ᓴᙱᔪᒥᒃ ᐊᐅᓚᑕᕆᔭᐅᕗᖅ ᑕᐅᖅᓰᑦᑕᓐᓂᖏᑕ ᖁᑦᑎᒃᑑᑉ ᑕᐅᕕᒡᔪᐊᖓᑕ ᐊᒻᒪᓗ ᖃᐆᒪᐃᓐᓇᕈᑖᑕ. ᖁᑦᑎᒃᑑᑉ ᑕᐅᕕᒡᔪᐊᖓ ᑐᑭᖃᖅᑎᑕᖅ ᓯᕿᓐᓂᖅ ᓂᐱᙵᓕᕌᖓᑦ ᐅᓪᓗᓕᒫᖅ ᑖᙱᓐᓇᖅᖢᓂ 24 ᐃᑲᕐᕋᓄᑦ, ᑖᓐᓇᓗ ᑕᖅᑭᒐᓴᓂᒃ ᐊᐅᓚᓲᖑᓪᓗᓂ ᐱᒋᐊᖅᖢᓂ ᓄᕕᐱᕆᐅᑉ ᐱᒋᐊᓐᓂᖓᒍᑦ ᑎᑭᓐᓇᓱᖕᓂᐊᑕ ᐃᓱᐊᑕ ᔮᓐᓄᐊᕆᐅᑉ (ᑐᖑᔪᖅᑎᑕᖅ ᑕᖅᓵ ᑕᑯᒃᓴᑎᒍᑦ). ᐃᒡᓗᖔᖓᒍᓪᓕ ᖁᑦᑎᒃᑑᑉ ᐅᓪᓗᖓ ᑕᖅᑭᒐᓴᐅᓲᑦ ᓯᕿᓂᖅ ᐅᐃᔾᔮᑐᐃᓐᓇᖅᖢᓂ ᓂᐱᓚᐅᖅᓯᒪᓇᓂ, ᐅᓪᓗᖏᓪᓗ ᑎᑭᖢᑎᒃ 24 ᐃᑲᕐᕋᓄᑦ ᖃᐅᒪᐃᓐᓇᓕᒫᖅᖢᓂ. ᑕᒪᓐᓇ ᐱᒋᐊᓲᖅ ᒪᐃ ᐱᒋᐊᓂᐸᓗᐊᒍᑦ ᑎᑭᓐᓇᓱᒃᖢᒍ ᕿᑎᖅᐸᓯᖓ ᐋᒡᒐᓯ (ᐊᐅᐸᔮᕈᔪᒃᑐᖅ ᑕᖅᓴᖓ ᑕᑯᒃᓴᑎᒍᑦ). ᑖᒃᑯᐊ ᑕᐅᕕᒡᔪᐊᖅ ᖃᐅᒪᐃᓐᓇᓪᓗ ᑕᐅᖅᓰᖃᑎᒌᒃᑎᓪᖢᒋᑦ, ᑖᔅᓱᒪᐅᑉ ᓯᕿᓂᐅᑉ ᐊᑭᖕᒥᖕᓂᖓ ᐊᖏᔪᐋᓗᖕᒥᒃ ᐊᔾᔨᒌᖏᓐᓂᖃᓲᖅ. ᑕᒪᓐᓇ ᓯᕿᓂᐅᑉ ᐊᑭᖕᒥᒃᑖ, ᑕᐃᔭᐅᓲᖑᒻᒥᔪᖅ ᓯᕿᓂᐅᑉ ᐆᓇᔪᖕᓂᖓ, ᐊᒃᑐᐊᓪᓚᕆᒃᑐᖅ ᓯᓚᐅᑉ ᐊᔾᔨᒋᔪᓐᓃᖃᑦᑕᓐᓂᐊᓄᑦ ᐱᓪᓗᒍ ᓯᕿᓂᐅᑉ ᐊᑭᖕᒥᒃᑖᓄᑦ ᐅᖅᑰᓯᖃᑦᑕᕐᒪᑦ ᓯᓚᖓ ᓄᓇᒋᔭᖓᓗ. ᐊᒃᑎᒋᓂᖓ ᑎᑭᐅᑎᔫᑉ ᐊᑭᖕᒥᒃᑖᑕ ᑕᐃᒫᒃ ᓇᓗᓇᐃᕆᓲᖅ ᐅᖅᑰᓂᕆᓂᐊᖅᑖᑕ ᐊᐳᑎᐊᑕᓗ ᐊᐱᓯᒪᑯᑖᓐᓂᐊᑕ, ᐊᒻᒪᓗ ᓄᓇᐅᑉ ᐆᓇᔪᖕᓂᖓᓂᒃ ᐊᐅᓚᑦᑎᒋᓪᓗᓂ. ᑕᑯᒃᓴᐅᔪᒃᑯᑦ ᐊᒃᑐᐊᓂᖓ ᐊᑯᓐᓂᐊᑕ ᓯᕿᓂᐅᑉ ᐊᑭᖕᒥᒃᑖᑕ ᐊᒻᒪᓗ ᓯᓚᐅᑉ ᐊᔾᔨᒌᙱᓐᓂᕆᓲᖏᑦ ᑕᑯᒃᓴᐅᓕᕈᓐᓇᖅᑐᑦ ᕿᒥᕐᕈᓪᓗᒍ ᐊᕐᕌᒍᒃᑯᑦ ᐊᔾᔨᒋᖏᑦᑑᖃᑦᑕᕐᓂᖓ, ᓴᖅᑭᔮᖅᑎᑕᖅ ᑕᑯᒃᓴᐅᑎᑕᐅᔪᓂᒃ ᑲᓅᓇ.

ᐊᕐᕌᒍᒥ ᓯᕿᓐᓂᐅᑉ ᐊᑭᖕᒥᒃᑕᖓ - ᐅᓇ ᐊᐅᐸᖅᑐᖅ ᑐᑭᒨᖓᔪᖅ ᑕᑯᒃᓴᐅᑎᑕᑦᑎᒍᑦ ᓴᖅᑭᔮᖅᑎᑦᑎᔪᖅ ᐊᕐᕌᒍᒐᓴᓄᑦ ᖃᐅᑕᒫᖅ ᕿᑎᕋᓪᓗᐊᖅᑕᕆᓲᖓᓂᒃ ᑎᑭᑦᑑᑉ ᓯᕿᓂᐅᑉ ᐊᑭᖕᒥᒃᑕᖓᑕ ᐊᑐᖅᖢᑎᒍᑦ ᕚᑦ ᐊᑐᓂ ᑭᑉᐹᕆᖓᔪᑦ−ᒦᑕᐃᑦ (W/m²). ᑕᒪᓐᓇ ᑕᖅᓯᖅᓯᒪᔪᖅ ᐊᕙᑖᒍᑦ ᐊᐅᐸᖅᑑᑉ ᑕᑯᒃᓴᐅᑎᑦᑎᕗᖅ ᐊᔾᔨᒌᙱᒐᔪᖕᓂᕆᓲᖓᑕ, ᑕᒪᓐᓇ ᓲᕐᓗ ᐊᕙᑖᒍᑦ ᑭᒡᓕᕆᔭᖓ ᓇᓗᓇᐃᕆᔪᖅ ᖃᓄᐃᑦᑐᒥᒃ ᓇᐄᓴᐅᑎᒃᑯᑦ ᐊᕐᕌᒍᖓᓄᑦ ᓲᕐᓗ ᐊᕙᓗᓕᐊᖃᓲᖑᒻᒪᖔᑦ ᕿᑎᕋᕋᓱᒃᖢᓂ, ᑐᑭᓕᐅᑎᓗᒍ ᐊᖏᓂᖅᓴᐅᒍᓂ ᑕᖅᓯᖅᓯᒪᔪᖅ ᑕᒪᐃᓕ ᓇᐄᓴᐅᑎᑦ ᐊᔾᔨᒋᖏᓐᓂᖅᓴᕆᕙᐃᑦ ᐊᕐᕌᒍᒥᑦ ᐊᕐᕌᒍᒧᑦ. ᑕᒪᓐᓇ ᐊᑭᖕᒥᒃᑕᖓᑕ ᐊᕙᓗᕆᔭᖓ ᑕᑯᒃᓴᐅᔪᒥᒃ ᓴᖅᑮᔭᖃᖅᖢᓂ ᐃᓱᒋᔮᑕ ᐊᔾᔨᒌᖏᑦᑑᑎᐅᓂᕆᔭᖏᓄᑦ ᐊᑭᖕᒥᒃᑕᖓᑕ ᑕᐅᖅᓰᑎᓪᓗᒋᑦ ᑕᐅᕕᒡᔪᐊᖅ ᐊᒻᒪᓗ ᖃᐅᒪᐃᓐᓇᓐᓂᖓᑕ. ᑕᐅᕕᒡᔪᐊᖑᑎᓪᓗᒍ, ᐊᑯᓐᓂᐊᑕ ᓄᕕᐱᕆᐅᑉ ᐱᒋᐊᓐᓂᐸᓗᐊᓂᒃ ᐃᓱᖅᐸᓯᐊᓄᑦ ᔮᓐᓄᐊᕆᐅᑉ, ᓇᐄᓴᐅᑎᖃᙱᑦᑐᑦ ᐊᑭᖕᒥᒃᑕᐅᔪᒥᒃ ᐅᕙᓃᓲᑦ 0 W/m² ᓯᕿᓐᓂᖅ ᓂᐱᓯᒪᑐᐃᓐᓇᕐᓂᖓᓄᑦ. ᓯᕗᓪᓕᖅᐹᒥᒃ ᓯᕿᓐᓂᕆᐊᓐᓂᐊᑕ, ᑕᒫᓂᐸᓗᒃ ᕿᑎᐸᓗᐊᑕ-ᔮᓐᓄᐊᕆᐅᑉ, ᑎᑭᓐᓂᖓ ᐊᑭᖕᒥᒃᑕᖓᑕ ᐊᖏᒡᓕᕙᓪᓕᐊᖏᓐᓇᖅᖢᑎᒃ ᑎᑭᓐᓇᓱᒃᖢᒍ ᖃᐅᒪᐃᓐᓇᖅᑑᑉ ᐅᓪᓗᖓ. ᑕᐃᑲᓂ ᔫᓂ 21 ᓯᕿᓂᖅ ᖁᑦᑎᓛᒥᓂᒃ ᖁᕝᕙᓯᖕᓂᖃᓕᓲᖅ ᑲᑕᒋᐊᓯᓪᓗᓂ ᑭᖑᓂᐊᒍᑦ. ᑖᓐᓇ ᐅᖃᐅᓯᐅᓲᖅ ᐊᐅᔭᐅᑉ ᕿᑎᖓ, ᑕᒪᓐᓇᓗ ᐊᑭᖕᒥᒃᑕᖓ ᖁᑦᑎᓛᖑᓪᓗᓂ ᐊᕐᕌᒎᔪᒥᒃ. ᐊᐅᔭᐅᑉ ᕿᑎᖓᑕ ᑭᖑᓂᐊᒍᑦ ᐊᓯᐅᕙᓪᓕᐊᓪᓗᓂ ᓯᕿᓂᖅ ᐊᓱᐃᓛᒃ ᓯᕗᓪᓕᖅᐹᖅ ᓯᕿᓂᐅᑉ ᓂᐱᑦᑕᕆᐅᕐᓂᖓ ᓴᖅᑭᖢᓂ ᐱᒋᐊᕋᑖᖅᓯᒪᓕᖅᑎᓪᓗᒍ ᐋᒡᒐᓯ ᓇᓗᓇᐃᒐᒃᓴᖓ ᓯᕿᓂᐅᑉ ᐊᑭᖕᒥᒃᑖ ᑲᑕᒃᐸᓪᓕᐊᖏᓐᓇᖅᖢᓂ ᐊᓱᐃᓛᒃ 0 ᑎᑭᖢᒍ ᓄᕕᐱᕆᐅᑉ ᑕᖅᑭᐊᓂ, ᑕᐅᕕᒡᔪᐊᖅ ᐊᑐᓯᒋᐊᓕᕌᖓᑦ ᐊᕐᕌᒍᒧᑦ. ᑐᓴᕈᒥᓇᖅᑐᖓ, ᓇᓗᓇᐃᖅᑕᐅᔪᖅ ᓯᕿᓂᐅᑉ ᐊᑭᖕᒥᒃᑖ ᐊᔾᔨᒌᖏᑦᑑᔪᒥᒃ ᐊᖏᔪᒥᒃ ᓴᖅᑮᖃᑦᑕᖅᑐᖅ ᖃᐅᒪᐃᓐᓇᖅᑎᓪᓗᒍ ᐱᔾᔪᑎᒋᓇᓱᒋᔭᕗᑦ ᓯᕿᓂᖅ ᑕᕐᕆᑦᑕᕌᖓ ᓄᕗᔭᑦᑐᒧᑦ. ᑕᒪᒃᑯᐊ ᓄᕗᔭᐃᑦ ᑕᓕᑎᑦᑎᔪᓐᓇᕐᒪᑕ ᓯᕿᓂᐅᑉ ᐊᑭᖕᒥᒃᑖᓂᒃ ᓄᓇᒧᑦ ᑎᑭᐅᒪᔪᓐᓃᖅᖢᓂ ᑲᑕᒋᐊᖅᑎ:ᖢᒍᓗ ᓯᕿᓂᐅᑉ ᐊᑭᖕᒥᒃᑕᖓ. ᑭᓯᐊᓂᓕ, ᓄᕗᔭᑦᑕᖏᑦ ᐅᓪᓗᐃᑦ ᐊᔾᔨᒌᒍᓐᓇᖏᑦᑐᑦ ᐊᕐᕌᒍᒥ ᐊᕐᕌᒍᒧᑦ ᐊᓱᐃᓛᒃ ᕿᑎᕋᖅᑐᒧᑦ ᓇᐄᓴᐅᑎᑦ ᑕᑯᒃᓴᐅᑎᑦᑎᔪᑦ ᐊᖏᓂᖅᓴᐅᔪᓂᒃ ᐊᔾᔨᒌᖏᔾᔪᑕᐅᔪᓂᒃ.

ᐊᕐᕌᒍᒥ ᓯᓚᐃᓐᓇᐅᑉ ᐆᓇᔪᖕᓂᖓ - ᐊᓯᔾᔨᖅᐸᓪᓕᐊᕋᔮᖕᓂᖓᑕ ᓯᓚᐅᓐᓇᐅᑉ ᐆᓇᔪᖕᓂᖓᑕ ᐊᕐᕌᒎᑉ ᐃᓗᐊᒍᑦ ᑕᑯᒃᓴᖅ ᐊᐅᐸᖅᑐᖅ ᑐᑭᒨᖓᔪᖅ ᓴᖅᑭᔮᖅᑎᑦᑎᔪᖅ (ᑕᖅᓯᖅᓯᒪᔪᖅ ᐊᔾᔨᒌᙱᒐᔪᒍᑖᑕ ᓇᓗᓇᐃᕆᔭᖓ). ᓴᓂᕌᒍᑦ ᑕᑯᓇᒃᖢᒋᑦ ᓯᓚᐃᓐᓇᐅᑉ ᐆᓇᔪᖕᓂᖓ ᓯᕿᓂᐅᑉ ᐊᑭᖕᒥᒃᑖᓄᑦ ᑕᑯᒃᓴᐅᑎᑦᑎᔪᖅ ᖃᓄᑎᒋᑦ ᐊᒃᑐᐋᖃᑎᒌᓪᓚᕆᖕᒪᖔᖏᑕ. ᑕᐅᕕᒡᔪᐊᒃᑯᑦ, ᓯᓚᐃᓐᓇᐅᑉ ᓂᒡᓚᓱᖕᓂᖓ ᐊᖅᐸᓯᒃᑐᐊᓘᕙᒃᖢᑎᒃ ᐊᑯᓐᓂᐊᑕ -30°C ᑎᑭᖢᒍ -35°C ᐱᓪᓗᒍ ᐆᓇᔪᒃᓯᔾᔪᑖᓂᒃ ᐊᑭᖕᒥᒃᑖᑕ ᓯᕿᓂᐅᑉ ᐱᑕᖃᖏᓐᓂᐊᓄᑦ ᓂᐱᙵᓂᐊᓄᑦ. ᐃᓱᓕᑦᑕᕌᖓᑦ ᑕᐅᕕᒡᔪᐊᖓ ᔮᓐᓄᐊᕆᒥᑦ, ᓯᕿᓂᐅᑉ ᐊᑭᖕᒥᒃᑖ ᓯᓚᐃᓐᓇᐅᓪᓗ ᐆᓇᔪᖕᓂᖓ ᐳᖅᑐᓯᓕᖅᖢᑎᒃ ᖁᒻᒨᖅᑕᓕᖅᖢᑎᒃ. ᑕᐃᒪᓕ ᐊᖏᓂᖓ ᐊᑭᖕᒥᒃᑑᑉ ᐱᕈᓕᕌᖓᑦ, ᓯᓚᐃᓐᓇᐅᑉ ᐆᓇᔪᖕᓂᖓ ᖁᑦᑎᒃᓯᓕᓲᖅ ᒪᓕᒃᖢᓂ, ᑎᑭᒐᔪᓲᖅ ᐅᖅᑰᓚᕆᔮᑕ 9°C ᐃᓱᓕᓕᕌᖓᑦ ᖃᐅᒪᐃᓐᓇᕈᑖᑕ ᑕᖅᑭᖏᑦ. ᑕᖅᑭᐊᓂ ᐋᒡᒐᓯᐅᑉ, ᓯᕿᓂᖅ ᓂᐱᖃᑦᑕᓕᕋᖓᑦ, ᑖᖅᑎᓪᓗᒍ ᓯᕿᓂᐅᑉ ᐊᑭᖕᒥᒃᑖ ᐱᑕᖃᕈᓐᓃᖃᑦᑕᕐᒪᑦ. ᑕᒪᓐᓇᑦᑕᐅᖅ ᐱᒋᐊᕈᑕᐅᓕᓲᖅ ᓂᒡᓚᓕᖅᖢᓂ ᓯᓚ.

ᐊᕐᕌᒍᒥ ᐊᐱᓯᒪᓂᐊᑕ ᐳᖅᑐᓂᕆᔭᖓ - ᐊᐅᐸᖅᑐᖅ ᑐᑭᒨᖓᔪᖅ ᑕᑯᒃᓴᐅᑎᑕᑦᑎᒍᑦ ᓴᖅᑭᔮᖅᑎᑦᑎᔪᖅ ᕿᑎᕋᓪᓗᐊᖅᑖᑕ ᐳᖅᑐᓂᕆᓲᖓ ᐊᐱᓯᒪᓂᐊᑕ ᐊᑐᖅᖢᒋᑦ ᒦᑕᐃᑦ (ᑕᖅᓯᖅᓯᒪᔪᑦ ᑕᑯᒃᓴᐅᑎᑦᑎᔪᑦ ᐊᔾᔨᒋᖃᑦᑕᖏᓐᓂᐊᓂᒃ). ᐊᓯᔾᔨᖅᐸᓪᓕᐊᓂᖓ ᐊᐱᓯᒪᓂᐊᑕ ᒪᓕᒐᔪᓲᖅ ᓯᓚᐅᑉ ᓂᒡᓚᓱᖕᓂᐊᓄᑦ ᐱᓪᓗᒍ ᐊᐳᑎᓕᐅᕈᓐᓇᓲᖑᒻᒪᑦ ᑕᑉᐸᖕᓇ ᓯᓚᐃᓐᓇᖅ ᑐᖔᓃᓕᕌᖓᑦ 0°C. ᑕᒪᓐᓇ ᐊᒃᑐᐊᖃᑎᒌᓐᓂᖓ ᐊᑯᓐᓂᐊᑕ ᓯᓚᐃᓐᓇᐅᑉ ᓂᒡᓇᓱᖕᓂᖓ ᐊᒻᒪ ᐊᐱᓯᒪᓂᐊᑕ ᑕᑯᒃᓴᐅᓕᓲᖅ ᓴᓂᕋᒍᑦ ᕿᒥᕐᕈᓪᓗᒋᑦ ᐊᐱᓯᒪᓂᐊᑕ ᐊᒻᒪᑦᑕᐅᖅ ᓯᓚᐃᓐᓇᐅᑉ ᓂᒡᓚᓱᖕᓂᐊᓄᑦ ᓇᐄᓴᐅᑎᖏᑕ ᐊᒡᒍᖅᓯᒪᓂᖏᑦ: ᐱᒋᐊᓕᕌᖓᑦ ᑕᖅᑭᖓ ᔫᓂ, ᓯᓚᐃᓐᓇᖅ ᐆᓇᔪᒃᓯᔭᕌᖓᑦ ᐅᖓᑖᓄᑦ 0°C, ᐊᐅᒃᐸᓪᓕᐊᓯᑲᐅᑎᒋᓲᖅ ᐊᐳᑎᖓ. ᑕᒪᓐᓇ ᓱᒃᑲᔪᒥᒃ ᑲᑕᒋᐊᕐᓂᖓ ᑕᑯᒃᓴᕈᓲᖅ ᐊᐅᓯᒋᐊᕌᖓᑦ ᓄᓇᖓ ᐊᐳᑕᐃᕈᑎᓕᖅᖢᓂ, ᐅᖅᑰᓯᓕᑐᐊᕌᖓᑦ ᓯᓚᐃᓐᓇᐅᑉ ᐆᓇᔪᖕᓂᖓ. ᐅᖅᒻᑰᓂᖅᓴᐅᖃᑦᑕᓕᕌᖓᑦ ᑖᔅᓱᒪᙵᑦ 0°C, ᐱᒋᐊᖅᖢᒍ ᔫᓂᒥ ᓯᑎᐱᕆᐅᑉ ᐱᒋᐊᓐᓂᖓᓄᑦ, ᐊᐱᕙᓪᓕᐊᔪᓐᓇᖏᑦᑐᖅ ᐊᐱᓯᒪᓂᖓ 0−ᒥᑦ ᑎᑭᐅᒪᓪᓗᓂ (ᐅᕝᕙᓘᓐᓃᑦ ᖃᓂᒋᔮᑕ). ᑕᒪᓐᓇ ᓇᓗᓇᐃᕆᔾᔪᑎᖓ ᓴᖅᑮᔪᖅ ᐊᐱᕙᓪᓕᐊᓕᑕᐃᓐᓇᓲᖅ ᓯᑎᐱᕆᐅᑉ ᐱᒋᐊᓐᓂᖓᒍᑦ, ᑕᒪᓐᓇ ᓂᒡᓚᕆᐊᓕᓵᖅᑎᓪᓗᒍ ᓯᓚᖓ ᓯᑎᐱᕆᒥ, ᓂᒡᓚᓕᖅᑎᓪᓗᒍ ᑎᑭᑉᐸᓕᖅᖢᓂ ᐊᑖᓄᑦ 0°C. ᐅᓇ ᑐᓴᕈᒥᓇᕆᔭᕗᑦ ᐃᓕᖅᑯᓯᕆᔭᖓ ᐊᐱᕙᓪᓕᐊᓂᖓ ᐳᖅᑐᓯᓂᖓᒍᑦ ᓴᙱᔪᐋᓗᖕᒥᒃ ᐊᖏᓕᒋᐊᓲᖑᓂᖓ ᐃᓱᓕᑦᑕᕌᖓ ᕖᕗᐊᕆ ᑎᑭᖢᒍ ᐊᐅᒋᐊᕈᑖᑕ ᐊᐳᑎᐊᑕ ᔫᓂᒥᑦ. ᑕᒪᓐᓇ ᐊᖏᓕᒋᐊᕈᑎᖓ ᓇᓗᓇᐃᕆᔪᖅ ᐊᖏᔪᐋᓗᖕᒥᑦ ᐊᐱᕙᓪᓕᐊᓕᓲᖅ ᐅᑭᐅᖅ ᐃᓱᓕᓕᕌᖓᑦ ᐅᐱᕐᖓᒃᓴᓕᓵᖅᑎᓪᓗᒍ ᓄᓇᖓ, ᑕᒪᓐᓇ ᐱᑕᖃᕈᓐᓇᖅᖢᓂ ᓲᖃᐃᒻᒪ ᓯᓚᐃᓐᓇᐅᑉ ᐅᖅᑰᓯᕙᓪᓕᐊᓂᕆᔭᖓᓄᑦ. ᐆᓇᔪᒃᑐᖅ ᓯᓚᐃᓐᓇᖅ ᐊᖏᓂᖅᓴᒥᒃ ᐃᒪᖃᖅᑐᒥᒃ ᐅᓯᔪᓐᓇᓲᖅ ᓂᒡᓚᓱᒃᑐᒥᒃ, ᑕᒪᓐᓇ ᐃᓕᖅᑯᓯᖃᖅᑎᑦᑎᔪᖅ ᐊᐱᕐᔪᐊᕆᐊᕈᑎᖏᑕ ᓄᓇᐃᑦ.

ᐊᕐᕌᒍᒧᑦ ᓄᓇᐅᑉ ᖄᖓᑕ ᐆᓇᔪᖕᓂᕆᓲᖓ - ᐊᔾᔨᒋᔪᓐᓃᖅᐸᓪᓕᐊᓂᖓ ᓄᓇᐅᑉ ᖄᖓᑕ ᐆᓇᔪᖕᓂᕆᓲᖓ (ᐃᑎᓂᐊᒍᑦ 2 ᓴᓐᑕᒦᑕ) ᒪᓕᓪᓗᐊᓲᖅ ᐊᔾᔨᐸᓗᖓᓄᑦ ᓯᓚᐃᓐᓇᐅᑉ ᐆᓇᔪᒃᓯᕙᓪᓕᐊᓂᖓᓄᑦ ᐱᓪᓗᒍ ᑕᒪᐃᓐᓂᒃ ᓴᖅᑭᑉᐸᓪᓕᐊᓲᖑᒻᒪᑕ ᐅᖅᑰᓯᑎᑦᑎᓂᐊᓄᑦ ᓯᕿᓂᐅᑉ ᐊᑭᖕᒥᒃᑖ ᓄᓇᕐᔪᐊᕐᒥᑦ. ᑭᓯᐊᓂᓕ, ᓄᓇᐅᑉ ᖄᖓᑕ ᐆᓇᔪᖕᓂᕆᓲᖏᑦ ᐊᒃᑐᖅᑕᐅᓲᖑᒋᕗᑦ ᐊᐱᓯᒪᓂᐊᑕ ᓄᓇᐅᑉ, ᑕᒪᓐᓇ ᖃᔅᓯᒐᓚᓐᓂ ᐊᒃᑐᐃᓂᖃᓲᖅ ᐊᐅᓚᔾᔭᓕᖅᑎᓪᓗᒍ ᓄᓇᐅᑉ ᖃᖓᑕ ᐆᓇᔪᖕᓂᕆᓲᖓ. ᐅᑭᐊᒃᓵᒃᑯᑦ ᐅᑭᐅᒃᑯᓪᓗ, ᐊᐳᑎᖓ ᓲᕐᓗ ᕿᐱᒋᔭᐅᕗᖅ ᓄᓇᐅᑉ ᖄᐹᕆᓪᓗᒍ, ᑕᒪᒃᑯᐊᓗ ᓄᓇᐅᑉ ᖄᖏᑕ ᐆᓇᔪᖕᓂᖏᑦ ᐃᒻᒪᖄ 10°C ᐅᖅᑰᓂᖅᓴᐅᓲᖅ ᓯᓚᐃᓐᓇᐅᑉ ᓂᒡᓚᓱᖕᓂᐊᑕ (-20°C ᑎᑭᓪᓗᒍ -25°C ᓴᓂᕌᑕ -30°C ᑎᑭᓪᓗᒍ -35°C, ᐊᑐᓃᖓᔫᒃ). ᐅᐱᕐᖔᒃᑯᑦ, ᓯᕿᓂᐅᑉ ᐊᑭᖕᒥᒃᑖ ᐊᖏᒡᓕᓕᕌᖓᑦ, ᐊᐳᑎᐅᑉ ᖄᖓ ᐃᒡᓗᖔᖓᓄᑦ ᐃᓕᖅᑯᓯᖃᓕᖅᖢᓂ: ᓯᕿᓂᐅᑉ ᐊᑭᖕᒥᒃᑖ ᓯᒥᒃᑎᖔᓕᖅᖢᒍ ᓄᓇᒧᑦ ᑕᒪᓐᓇ ᓄᓇᐅᑉ ᖄᖓ ᑭᖑᕙᖓᔪᒥᒃ ᐆᓇᔪᒃᓯᓕᑕᐃᓐᓇᖅᖢᓂ. ᐱᒋᐊᓕᕌᖓ ᔫᓂ, ᓯᓚᐅᑉ ᐆᓇᔪᖕᓂᖓ ᐅᖓᑖᓃᓕᕌᖓ 0°C ᑕᒪᓐᓇᓗ ᐊᐱᓯᒪᔭᕕᓈ ᐊᐅᒃᓯᒪᓕᖅᑎᓪᓗᒍ< ᐅᔾᔨᕆᔭᖃᓲᖑᔪᒍᑦ ᐊᖏᔪᐋᓗᖕᒥᒃ ᖁᕝᕙᓯᒋᐊᕆᔪᒥᒃ ᓄᓇᐅᑉ ᖄᖓᑕ ᐆᓇᔪᖕᓂᖓᓄᑦ ᐱᓪᓗᒍ ᐊᐳᑎᖃᙱᑦᑐᑦ ᓄᓇᖓ ᐊᑭᖕᒥᒃᑕᐅᑲᐅᑎᒋᖕᒪᑦ ᕿᓚᒥᐊᓐᓄᒃ ᐆᓇᔪᒃᓯᓲᖅ. ᑕᒪᓐᓇ ᑲᑕᒋᐊᕐᓂᖓ ᓄᓇᐅᑉ ᖄᖓᑕ ᐆᓇᔪᖕᓂᖓ ᐃᓱᓕᓕᕌᖓᑦ ᖃᐅᒪᐃᓐᓇᓲᑦ ᑕᖅᑭᖏᑦ ᐊᔾᔨᒋᐸᓗᓲᖓ ᓯᓚᐃᓐᓇᐅᑉ ᐆᓇᔪᖕᓂᐊᑕ ᐊᑐᓂ ᑎᑭᑦᑕᕌᖓᒥᒃ ᖁᐊᓐᓇᖅᑐᒧᑦ 0°C. ᑖᓐᓇ ᑎᑭᓐᓇᒥᐅᒃ, ᓯᓚᐃᓐᓇᐅᑉ ᓂᒡᓚᓱᓕᖅᐸᓪᓕᐊᓂᖓ ᓱᓕ ᑲᑕᒃᐸᓪᓕᐊᖏᓇᖅᖢᓂ ᑭᓯᐊᓂᓕ ᓄᓇᐅᑉ ᖄᖓᑕ ᐆᓇᔪᖕᓂᕆᔭᖓ ᐊᑯᓂᐊᕐᔪᒃ ᓂᐸᓲᖅ ᖃᓂᒋᔮᑕ 0°C ᑭᖑᓂᐊᒍᑦ ᑲᑕᒃᐸᓪᓕᐊᓕᖅᖢᓂ. ᑕᒪᓐᓇ ᓂᐸᑲᐃᓐᓇᕐᓂᖓ ᑕᕝᕙᓂ ᑕᐃᔭᐅᓲᖅ “ᔨᕉᑉ ᑕᓗᖓ”, ᐃᓕᖅᑯᓯᕆᔭᐅᓪᓗᓂ ᐅᑭᐅᖅᑕᖅᑑᑉ ᐃᔾᔪᕆᓲᖏᑕ, ᑕᐃᔭᐅᓲᖑᒋᕗᖅ ᐃᑭᐊᖓᑕ ᖁᐊᖑᓂᖓ. ᒪᓕᒃᑐᖅ ᐅᓪᓗᖁᑎᖏᓄᑦ ᑕᒪᓐᓇ ᐃᒪᖓ ᓄᓇᐅᑉ ᐃᑭᐊᖓᓃᑦᑐᖅ ᖁᐋᓯᒋᐊᕌᖓᑦ ᑕᒪᓐᓇᓗ ᖁᐊᕋᓱᖕᓂᖓ ᓂᐸᑲᐃᓐᓇᖅᑎᑦᑎᓲᖅ ᐆᓇᔪᖕᓂᖓᓂᒃ 0°C ᖁᐊᕋᓱᓕᒫᓐᓂᖓᓂᒃ ᑲᑕᒃᐸᓪᓕᐊᓇᓂ ᓂᒡᓕᓇᓕᖅᐸᓪᓕᐊᓂᖓ. ᑭᓯᐊᓂᓕ ᐃᒪᖃᓐᓂᓕᒪᖏᑦ ᖁᐊᕌᖓᑕ ᐃᔾᔪᖓᓃᑦᑐᑦ, ᑕᒪᓐᓇ ᓄᓇᐅᑉ ᖄᖓᑕ ᐆᓇᔪᑉᖕᓂᕆᓲᖓ ᑲᑕᒃᐸᓪᓕᐊᓕᓲᖅ.