ᐃᓄᓪᓚᕆᓐᓄᑦ ᐊᑐᖅᑕᐅᕙᓐᓂᖏᑦ ᐱᖅᑯᓯᖃᖅᑎᓂᓪᓗ ᐊᓐᓂᕆᔭᐅᓂᕆᔮ

ᑕᐅᖅᓰᔭᐅᓂᖏᑦ ᑎᕆᒐᓂᐊᑦ ᒥᖅᑯᖏᑦ ᑮᓇᐅᔭᓕᐅᕈᑎᓪᓚᕆᐅᓂᑰᕗᖅ ᐃᓄᐃᑦ ᖃᑕᙳᑎᒌᖏᓄᑦ ᐊᑯᓐᓂᐊᑕ ᐊᕐᕌᒍᑦ 1920 ᑎᑭᖢᒍ 1970 ᐊᕐᕌᒍᖏᑦ. ᐃᓗᐊᒍᑦ ᑖᔅᓱᒪ, ᒥᖅᑯᖏᑦ ᑎᕆᒐᓂᐊᑦ ᓂᐅᕐᕈᑕᐅᕙᒃᖢᑎᒃ ᓂᐅᕕᖅᑎᒃᑯᑦ ᓂᐅᕕᕝᕕᐊᓄᑦ, ᓴᖅᑭᑕᐅᓂᑰᔪᖅ ᒥᑦᑎᒪᑕᓕᖕᒥ ᐊᕐᕌᒍᐊᒍᑦ 1921, ᑕᐅᖅᓰᑦᑕᕈᑕᐅᓪᓗᑎᒃ ᐊᑑᑎᓛᕆᔭᐅᔪᓂᒃ ᐱᖁᑎᓂᒃ ᓲᕐᓗᓕ ᖁᑭᐅᑎᑦ, ᓱᓇᒐᐃᑦ, ᒥᖅᓱᒐᒃᓴᑦ ᖁᓕᑦᑕᐅᔭᒃᓴᓪᓗ, ᐅᐊᓴᐅᑏᑦ, ᐊᓯᖏᓪᓗ. ᒪᓕᒃᖢᒋᑦ ᐅᓂᒃᑳᖏᑦ ᐃᓐᓇᑐᖃᐃᑦ ᐊᖑᓇᓱᒃᑏᓪᓗ ᐊᐱᖅᓱᓕᕋᑦᑎᒍᓐ, ᑎᕆᒐᓂᐊᑦ ᐊᒃᓱᐋᓗᒃ ᐊᑑᑎᖃᓚᐅᖅᓯᒪᔪᑦ ᓲᕐᓗ ᑮᓇᐅᔭᑑᓂᖏᓐᓄᑦ ᐱᖁᑎᑖᕈᒪᓪᓗᑎᒃ ᖃᑕᐅᒫᑦ ᐃᑲᔫᑎᒋᔪᓐᓇᖅᑕᖏᓐᓂᒃ ᑎᕆᒐᓂᐊᕋᓱᐊᖅᑎᓪᓗᒋᓪᓗ.

ᑕᐃᒪᓕ ᑎᕆᒐᓂᐊᓂᒃ ᑕᐅᖅᓰᔭᖃᕈᒪᓪᓗᑎᒃ, ᐊᐱᖅᓱᖅᑕᑦ ᐅᖃᐅᓯᖃᓚᐅᖅᑐᑦ ᑕᒪᕐᒥᑦᑎᐋᐸᓗᒃ ᐃᓄᐃᑦ ᖃᑕᙳᑎᒌᑦ ᐅᑭᐅᒥᒃ ᒥᑭᒋᔾᔨᕆᕙᓚᐅᖅᓯᒪᔪᑦ. ᒥᑭᒋᐊᖃᖅᖢᑎᒃ ᖃᐅᔨᓵᕆᖃᑦᑕᖅᑕᒥᓂᒃ ᓯᒡᔭᖅᐸᓯᒐᔪᒃᖢᑎᒡᓗ. ᑕᒪᓐᓇ ᕿᒧᒃᓯᖅᑐᓄᑦ ᐃᓗᐊᓐᓂᖅᓴᐅᓪᓗᓂ ᐊᒻᒪᑦᑕᐅᖅ ᓇᑦᑎᕋᓱᐄᓐᓇᕈᓐᓇᖅᖢᑎᒃ ᒥᑭᒋᔾᔨᕆᓕᕌᖓᒥᒃ ᓂᕿᒃᓴᒥᓄᑦ ᐊᒻᒪᑦᑕᖅᐅ ᐅᖅᓱᖓᓄᑦ ᖃᐅᒪᔾᔪᑖ ᐅᖅᑰᔾᔪᑖᓗ (ᖁᓪᓕᕐᒧᑦ ᐊᑐᖅᖢᑎᒃ).

ᐊᓯᐊᒍᑦ ᑕᐅᖅᓰᔭᐅᖃᑦᑕᓐᓂᖏᑕ, ᑎᕆᒐᓂᐊᑦ ᒥᖅᑯᖏᑦ ᐊᑐᖅᑕᐅᕙᓚᐅᕆᕗᑦ ᐃᓚᒋᔭᐅᓪᓗᑎᒃ ᐊᓐᓄᕌᕆᔭᒧᑦ. ᐸᒥᐅᖓ ᖁᖓᓯᕈᓕᐊᖑᓪᓗᓂ ᓄᐃᓚᓪᓗ, ᐸᒥᐅᖓᑕ ᓄᑭᖏᑦ ᐊᑐᖅᑕᐅᓪᓗᑎᒃ ᐃᕙᓗᓕᐊᖏᓪᓗᑎᒃ. ᑎᕆᒐᓂᐊᑦ ᐃᓚᔭᐅᓲᖑᒋᕗᑦ ᓄᐃᓚᐅᑉ ᐱᐅᓴᐅᑖ ᐅᕝᕙᓘᓐᓃᑦ ᖁᓕᑦᑕᐅᔭᖓᑕ ᐃᓗᐊᒍᑦ ᓈᖅᐸᓯᒧᐊᖅᑕᐅᓪᓗᓂ ᐅᖅᑰᔾᔪᑎᒃᓴᖓᑦ. ᑕᒪᓐᓇ ᐃᓄᒃᑎᑐᑦ ᑕᐃᔭᐅᓲᖅ “ᖃᐅᒻᒪᐃᓕᔅᓴᖅ”.

ᑎᕆᒐᓂᐊᑦ ᒥᖅᑯᖏᑦ ᐊᑐᖅᑕᐅᖃᑦᑕᓚᐅᕆᕗᑦ ᐊᖑᓇᓱᒃᑎᓄᑦ ᓇᑦᑎᕋᓱᒋᐊᓕᕌᖓᒥᒃ ᐅᑭᐅᒃᑯᑦ. ᑲᒥᖓᑕ ᐊᓗᖓᒍᑦ ᐃᓕᔭᐅᓪᓗᑎᒃ, ᒥᖅᑯᖓ ᓂᐱᖃᖅᑎᑦᑎᓇᓂ ᐊᒡᓗᖓᓄᑦ ᐅᐸᒍᑎᓕᖅᑐᒧᑦ, ᑕᐃᒫᒃ ᐱᔭᕆᐋᑭᕙᓪᓕᖅᑎᑦᑎᓪᓗᑎᒃ. ᑕᒪᒃᑯᐊ ᐅᑲᓖᑦ ᒥᖅᑯᖏᑦ ᐊᑐᖅᑕᐅᖃᑦᑕᕐᓂᕆᕗᑦ ᑕᐃᒪᓐᓇ. ᑭᖑᓂᐊᑕ ᓄᓇᓖᑦ ᓴᓇᔭᐅᓂᕆᔭᖏᑦ ᖃᑕᙳᑎᒌᑦ ᐃᒡᓗᑖᖅᑐᖅᑎᑕᐅᓪᓗᑎᒃ ᐃᓱᓕᓕᒻᒪᑕ 1960 ᐊᕐᕌᒍᖏᑦ, ᑕᒪᓐᓇ ᑕᐅᖅᓰᖃᑦᑕᕐᓂᖅ ᓱᓕ ᐊᑑᑎᖃᓪᓚᕆᓚᐅᖅᑐᖅ ᑲᔪᓰᓐᓇᖅᖢᓂ ᑮᓇᐅᔭᓕᐅᕈᑕᐅᓪᓗᓂ, ᖃᖓᑦᑎᐊᕋᑖᖅ ᑲᑕᒋᐊᕋᒥ ᐅᑎᓇᓂ 1980 ᐃᓱᓕᓕᖅᑎᓪᓗᒋᑦ. ᐅᓪᓗᒥ, ᑎᕆᒐᓂᐊᑦ ᒥᖅᑯᖏᑦ ᐊᑐᖅᑕᐅᓪᓗᐊᑕᖅᑐᑦ ᓄᐃᓚᒋᔭᐅᓪᓗᑎᒃ. ᐃᓚᖏᓄᑦ ᐃᓐᓇᑐᖃᑦ ᐊᒻᒪᑦᑕᐅᖅ ᐊᖑᓇᓱᒃᑎᓄᑦ, ᑎᕆᒐᓂᐊᕐᓂᒃ ᒥᑭᒋᔾᔨᕆᖃᑦᑕᕐᓂᖅ ᓱᓕ ᐊᑑᑎᖃᖅᐳᖅ ᐃᓅᑉ ᐃᓕᖅᑯᓯᖃᑐᖃᖓᓐᓂᒃ ᑲᔪᓯᑎᑦᑎᔪᖅ.

ᐆᒪᓂᐊᒍᑦ ᐊᐅᓚᓂᕆᓲᖏᑦ ᑎᕆᒐᓂᐊᑦ

ᐅᑭᐅᒃᑯᑦ ᓂᕆᓇᓱᖃᑦᑕᕐᓂᖏᑦ ᐊᐅᓚᓂᕆᓲᖏᑦ ᐊᒻᒪᑦᑕᐅᖅ ᓇᒧᙵᖅᑕᕐᓂᖏᑦ

ᒪᓕᒃᖢᒍ ᖃᐅᔨᓴᖅᑏᑦ ᑐᑭᓯᐅᒪᓂᕆᔭᖏᑦ ᑕᒪᒃᑯᓄᖓ, ᖃᐅᔨᒪᔭᖃᓗᐊᙱᑦᑐᑦ ᐅᑭᐅᒃᑯᑦ ᓂᕿᒋᓲᖏᑕ ᐅᑭᐅᖅᑕᖅᑐᒥ ᑎᕆᒐᓂᐊᖏᑕ ᖃᓂᒋᔮᒍᑦ ᒥᑦᑎᒪᑕᓕᐅᑉ ᐊᕙᑎᐊᑕ. ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᑐᓄᓂᕐᒥᐅᑕᑦ ᐊᓱᐃᓛᒃ ᐊᐱᖅᓱᖢᑎᒍᑦ ᖃᐅᔨᒪᓂᕆᔭᒥᓐᓂᒃ ᐅᓂᒃᑳᖁᓪᓗᒋᑦ ᖃᓄᖅ ᓂᕆᓇᓱᓲᖑᓂᖏᑕ ᑎᕆᒐᓂᐊᑦ ᓇᒥᓪᓗ ᑕᑯᔭᐅᒐᔪᓐᓂᖅᐸᖑᓕᖏᑦ. ᑖᒃᑯᓇᓂ 21 ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᐊᐱᖅᓱᖅᑕᐅᔪᓂᒃ 18 ᐅᓂᒃᑳᕆᔭᖃᖅᖢᑎᒃ ᓇᒥ ᑕᑯᒐᔪᓐᓂᕐᒥᓂᒃ ᑎᕆᒐᖤᐊᓂᒃ ᐅᑭᐅᑉ ᐃᓚᖓᒍᑦ. ᑖᒃᑯᓇᙵᑦ, ᑎᓴᒪᐅᔪᖅᑐᑦ (8) ᐅᓂᒃᑳᖅᖢᑎᒃ ᑎᕆᒐᓂᐊᑦ ᑕᑯᒐᔪᓛᕆᓂᕋᖅᖢᒋᑦ ᓄᓇᐃᓐᓇᕐᒥᒃ, ᐱᖓᓱᑦ ᐅᓂᒃᑳᖅᖢᑎᒃ ᓯᒡᔭᖅᐸᓯᒻᒥ ᑕᑯᓲᖑᓂᕐᒥᓂᒃ, ᐱᖓᓱᒃᑲᓐᓃᑦ ᓄᓇᒥᒃ ᓯᑯᒥᓪᓘᓐᓃᑦ, ᒪᕐᕉᒃ ᓯᑯᐃᓐᓇᕐᒥ, ᐊᑕᐅᓯᖅ ᓯᓈᖓᓐᓂ (ᓯᑯᓯᒪᓂᐊ ᑕᕆᐅᖓᓄᑦ), ᐊᒻᒪᓗ ᐃᓚᖓ ᓯᓈᖓᓂ ᓄᓇᐃᓐᓇᕐᒥᓪᓗ.

ᖁᓕᑦ ᐊᕐᕕᓂᓕᓪᓗ (16) ᐊᐱᖅᓱᖅᑕᑦ ᐅᖃᐅᓯᖃᖅᖢᑎᒃ ᖃᓄᐃᑦᑑᓂᖓᑕ ᐅᑭᐅᒃᑯᑦ ᓂᕿᒋᔭᐅᓲᑦ ᑎᕆᒐᓂᐊᓄᑦ. ᒪᓕᒃᖢᒋᑦ ᐅᓂᒃᑳᖏᑦ, ᐊᔾᔨᒌᒋᑦᑐᓂᒃ ᓂᕆᔭᖃᓲᑦ ᐅᑭᐅᒃᑯᑦ: ᐅᓄᓛᖑᔪᑦ ᑕᑯᔭᐅᓂᑯᑦ ᐳᐃᔩᑦ ᓂᕿᖓ ᐊᕕᙵᐃᓪᓗ. ᐃᓚᖏᑦ ᓇᓗᓇᐃᖅᓯᓪᓗᑎᒃ ᑕᒪᒃᑯᐊ ᒥᒃᑭᖅᑕᐅᓂᑰᔪᑦ ᓯᓗᕕᓂᕐᓂᒃ ᐅᕝᕙᓘᓐᓃᑦ ᓇᓄᕐᓄᑦ ᕿᒪᒃᑕᐅᓂᑯᓂᒃ ᐊᖑᓇᓱᒃᑎᓂᓪᓘᓐᓃᑦ. ᑐᒃᑐᕕᓂᖅ, ᐅᑲᓖᑦ, ᑎᖕᒥᐊᑦ (ᐊᕿᒡᒌᑦ), ᐊᒻᒪᓗ ᕿᖕᓂᔭᐅᓂᑯᑦ ᐊᖑᓇᓱᒃᑎᓄᑦ ᐳᓚᔭᐅᓐᓂᕌᖓᒥᒃ ᑎᕆᒐᓂᐊᓄᑦ ᓂᖃᐅᓲᖑᒋᕗᑦ.

ᑐᓴᕈᒥᓇᖅᖢᓂ ᐅᓇ, ᖁᓖᑦ ᐊᑕᐅᓯᕐᓗ ᐊᐱᖅᓱᖅᑕᕗᑦ ᓂᕆᐅᒋᙱᑕᑦᑎᒍᑦ ᐅᓂᒃᑳᕆᔭᖃᖅᖢᑎᒃ ᐊᔾᔨᒌᖏᑦᑑᓂᖏᑕ ᑎᕆᒐᓂᐊᑦ ᒪᕐᕈᐃᓕᖓᓂᕋᖅᖢᓂᒋᑦ ᓇᓗᓇᐃᖅᑕᐅᔪᓐᓇᖅᖢᑎᒡᓗ ᐊᔾᔨᒌᙱᑦᑐᒥᒃ ᐅᑭᐅᒃᑯᑦ ᐊᓐᓇᐅᒪᓇᓱᐊᕆᓂᖏᑕ: ᐃᓚᖏᑦ ᑎᕆᒐᓂᐊᑦ ᓂᒡᓚᓱᒃᑎᓪᓗᒍ ᓄᓇᒦᙱᓐᓇᓲᖅ ᐊᐃᑉᐸᖏᑦ ᓯᑯᒦᖏᓐᓇᓲᑦ. ᒪᓕᒃᖢᒋᑦ ᐅᓂᒃᑳᖏᑦ ᑖᒃᑯᐊ ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᓇᓗᓇᐃᕆᓪᓗᑎᒃ ᒪᕐᕉᒍᔫᓐᓂᒃ ᐅᑯᓅᓇ “ᓄᓇᐅᑉ ᑎᕆᒐᓂᐊᖓ” ᑐᕐᕈᓂᖅᓴᒥᒃ ᒥᖅᑯᓕᒃ, ᖁᔾᔫᓂᖅᓴᖅ ᐊᒻᒪᑦᑕᐅᖅ ᑎᒥᖓ ᐊᖏᓂᖅᓴᐅᓪᓗᓂ. ᐊᓯᖏᓄᑦ ᑐᑭᓯᐅᒪᑎᑦᑎᔪᓄᑦ ᐅᖃᐅᓯᐅᓪᓗᑎᒃ ᑕᒪᒃᑯᐊ “ᓄᓇᒥᐅᑕᑦ” ᑎᓯᓂᖅᓴᒥᒃ ᐅᖅᓲᖏᓐᓂᖅᓴᒥᒃ ᐅᖅᓱᖃᓲᑦ, ᒥᖅᑯᑐᓂᖅᓴᑦ, ᒪᒥᑭᓐᓂᖅᓴᑦ, ᒪᒪᓐᓂᖅᓴᐅᓪᓗᑎᒃ ᓂᕆᒋᐊᖓᓂᒃ ᐊᒻᒪᓗ ᖁᔾᔪᕈᖄᓲᑦ. ᐊᔾᔨᒌᙱᑦᑐᓂᒃ ᓂᕿᖃᓐᓂᖏᑦ ᓂᒡᓚᓱᖕᓂᐊᑕᓗ ᐊᔾᔨᒌᖏᓐᓂᖓ ᑐᕙᐅᑉ ᓄᓇᐅᓪᓗ ᐱᔾᔪᑎᒋᓂᕋᖅᑕᐅᓪᓗᑎᒃ ᐊᕐᕕᓂᓕᑦ ᐊᑕᐅᓯᕐᒧᓪᓗ (7) ᐊᑯᓐᓂᐊᒍᑦ ᑎᕆᒐᓂᐊᖏᑕ ᓄᓇᐅᑉ ᑕᕆᐅᓪᓗ.

ᑐᓴᕈᒥᓇᓚᐅᕆᕗᖅ ᐅᓄᕐᓂᖅᓴᑦ ᑐᓴᖅᑎᑦᑎᔪᑦ ᑕᕝᕙᙵᑲᐅᑎᒋ ᐅᓂᒃᑳᖃᑦᑕᖅᖢᑎ ᑎᕆᒐᓂᐊᑦ ᐅᓄᖅᑑᓪᓗᑎᒃ ᐊᐅᓪᓛᓲᑦ ᒫᔾᔨᒥ ᐄᑉᐳᕈᒧᑦ ᑐᕙᕐᒦᑲᑕᓕᖅᖢᑎᒃ ᓇᑦᑎᐋᕋᓱᒃᖢᑎᒃ ᐃᕐᓂᐋᖑᓕᓵᖅᑐᓂᒃ.

ᑎᑭᑉᐸᓪᓕᐊᓂᖏᑦ ᑲᔪᖅᑐᑦ ᑎᕆᒐᓂᐊᑦ ᑐᓄᓂᕐᒧᑦ

ᑲᔪᖅᑐᑦ ᑎᕆᒐᓂᐊᑦ ᖃᖓᑦᑎᐊᕈᓗᒃ ᑎᑭᐅᑎᕋᑖᕐᓂᑯᑦ ᕿᑭᖅᑖᓘᑉ ᐅᐊᖕᓇᖓᑕ ᓄᓇᖏᓐᓄᑦ. ᑕᒪᓐᓇ ᑎᑭᐆᑎᕋᑖᕐᓂᑯᖓ ᑕᒪᐅᖓ ᖃᐅᔨᓴᖅᑎᓄᑦ ᑎᑎᕋᐅᓯᐅᓗᐋᖅᓯᒪᖕᒥᓇᓂᓗ ᖃᓄᓪᓗ ᐊᒃᑐᐃᓯᒪᖕᒪᖔᑦ ᑎᕆᒐᓂᐊᓪᓚᑦᑖᑦ ᐊᒥᓲᔪᓐᓇᓐᓂᐊᑕ ᐋᑦᐅᑎᐅᓕᙱᒃᑲᓗᐊᕐᒪᖔᑕ ᓇᔪᒐᕆᓲᖏᓐᓂᒃ ᐃᓱᒫᓗᒐᓚᓐᓇᖅᑐᖅ. ᑕᐃᒪᓕ ᐃᑲᔪᐃᔾᔪᑎᒋᓇᓱᒃᖢᒍ ᑐᑭᓯᐅᒪᔾᔪᑎᒃᓴᓄᑦ ᐊᑐᐃᓐᓇᐅᔪᖃᖅᑐᑦ ᖃᖓ ᑲᔪᖅᑐᑦ ᑎᕆᒐᓂᐊᑦ ᑎᑭᓐᓂᑰᓂᐊᑕ ᒥᑦᑎᒪᑕᓕᐅᑉ ᐊᕙᑖᓄᑦ, ᑐᙵᕕᒋᓪᓗᒋᑦ ᓂᐅᕐᕈᑎᕕᓃᑦ ᑎᕆᒐᓂᐊᑦ ᓂᐅᕕᕝᕕᐅᑉ ᐸᐃᑉᐹᕆᔭᖏᓐᓂᒃ, ᐊᐱᖅᓱᖅᑕᐅᔪᑦ ᐊᐱᕆᔭᐅᕙᒃᖢᑎᒃ ᖃᖓᒃᑯᑦ ᐃᖅᑲᐅᒪᔭᖃᒻᒪᖔᑕ ᖃᖓ ᑕᑯᔭᕆᐅᓐᓂᕐᒪᖔᑕ ᑲᔪᖅᑐᑦ ᑎᕆᒐᓂᐊᖓᓂᒃ ᐊᖑᓇᓱᕕᒋᓲᖓᓐᓂᒃ. ᖁᓖᑦ ᐊᕝᕕᓂᓖᑦ ᐊᑕᐅᓯᕐᓗ (17) ᑭᐅᓪᓗᑎᒃ ᐅᖃᐅᓯᖃᖅᖢᑎᒡᓗ, ᐱᖓᓱᑦ ᓇᔪᕝᕕᒋᓲᒥᑕ ᓄᓇᖓᓂ ᑕᑯᓚᐅᓲᖑᕙᓐᓂᖏᑕ ᑲᔪᖅᑐᑦ ᑎᕆᒐᓂᐊᖓᓂᒃ, ᐊᑕᐅᓯᖅ ᐅᒃᐱᕈᓱᒃᖢᓂ, ᒪᓕᒃᖢᒍ ᐅᖃᐅᓯᖏᑦ ᐊᖓᔪᖅᑳᖓᑕ, ᑐᓃᑦ ᐃᓚᖓᓂ ᐱᑕᖃᐃᓐᓇᐅᔭᖅᑐᖅ, ᐊᓯᖏᑦᑕᐅᖅ ᐃᖅᑲᖅᖢᑎᒃ ᖃᖓ ᑕᑯᔭᕆᐆᕈᑖᓂᒃ ᑲᔪᖅᑐᑦ ᑎᕆᒐᓂᐊᖓᓂ. ᐃᓚᖏᑦ ᐊᐱᖅᓱᖅᑕᑦ ᐃᖅᑲᐅᒪᓪᓗᑎᒃ ᑕᑯᔭᕆᐅᕈᑎᒥᓂᒃ, ᐃᓚᖓ ᑕᑯᔭᕆᐅᖅᖢᓂ ᑕᒫᓂ 1943, ᐃᒡᓗᓕᖕᒥ, ᒪᕐᕉᒃ ᐅᖃᖅᖢᑎᒃ ᑕᑯᓚᐅᖅᓯᒪᓂᕐᒥᒃ ᐊᑕᐅᓯᕐᒥᒃ 1947-1948 ᒥᑦᑎᒪᑕᓕᐅᑉ ᖃᓂᒋᔮᓂ, ᑎᓴᒪᐅᔪᖅᑐᑦ ᐊᐱᖅᓱᖅᑕᑦ ᐅᖃᐅᓯᖃᖅᖢᑎᒃ ᑕᑯᔭᕆᐅᓐᓂᕕᓈᑕ ᐊᕐᕌᒍᖏᒍᑦ 1950 ᒪᕐᕉᒃᑕᐅᖅ ᐊᕐᕌᒍᖏᒍᑦ 1960. ᖁᓕᐅᙱᑦᑐᑦ ᖁᓕᐅᔪᓂᒃ ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᐅᖃᐅᓯᖃᕆᓪᓗᑎᒃ ᑕᐃᒪᙵᑦ ᑎᑭᐅᑎᒐᒥᒃ ᒥᑦᑎᒪᑕᓕᐅᑉ ᓄᓇᖏᓄᑦ, ᑲᔪᖅᑐᑦ ᑎᕆᒐᓂᐊᑦ ᐅᓄᖅᓯᕙᓪᓕᐊᔪᑦ. ᖄᒃᑲᓐᓂᐊᒍᑦ, ᑖᒃᑯᐊ ᒥᖅᑭᐋᖑᓂᓖᑦ ᖁᔾᔫᔭᖅ ᐊᒻᒪᑦᑕᐅᖅ ᑕᖅᓴᓕᑦ ᒥᖅᑯᑦᑎᐊᕆᒃᑐᑦ (ᐊᔾᔨᒌᖏᔾᔪᑖ) ᑲᔪᖅᑑᑉ ᑎᕆᒐᓂᐊᖓᓂ ᑕᑯᔭᐅᖃᑦᑕᖅᓯᒪᔪᑦ ᑕᒫᓂ ᓄᓇᖏᓐᓂ.

ᓇᒦᓐᓂᖏᑕ ᐃᓕᖅᑯᓯᕆᔭᐅᓲᓪᓗ ᑎᓱᖃᕝᕕᒋᔭᖏᑕ ᓄᓇᐃᑦ

ᐃᓄᐃᑦ ᐊᐱᖅᓱᖅᑕᐅᔪᑦ ᐊᐱᕆᔭᐅᒋᓪᓗᑎᒃ ᓇᐅᒃᑯᑦ ᓄᓇᑎᒍᑦ ᐱᐅᓛᖑᔭᖃᒻᒪᖔᑕ ᑎᕆᒐᓂᐊᑦ ᑎᓯᓕᐅᕋᓱᒃᖢᑎᒃ. ᐅᔾᔨᕆᔭᑦ ᑎᓯᖃᕝᕖᑦ ᓄᓇᙳᐊᑎᒍᑦ ᑎᑎᖅᑕᐅᓪᓗᑎᒃ, ᐃᓚᖃᖅᖢᑎᒃ ᑕᕝᕗᖓᓪᓚᑦᑖᖅ ᑐᕌᖅᑐᒥᒃ ᐊᒻᒪᑦᑕᐅᖅ ᐱᑕᖃᒐᔪᓲᑦ ᐃᓚᖏᑕ ᓄᓇᖏᓐᓂᒃ ᑕᒪᐃᓐᓄᑦ ᑎᕆᒐᓂᐊᓄᑦ ᑲᔪᖅᑐᓄᓪᓗ. ᖁᓖᑦ ᐊᕐᕕᓂᓕᑦ ᐊᑕᐅᓯᓪᓗ ᐊᐱᖅᓱᖅᑕᑦ ᐅᓂᒃᑳᕆᔭᖃᕆᓪᓗᑎᒃ ᖃᓄᐃᑦᑐᓂᒃ ᐃᓕᖅᑯᓯᖃᖅᑐᑦ ᓄᓇᐃᑦ ᐱᐅᒋᔭᐅᓲᖑᓂᖏᑕ ᓇᔪᖅᑕᐅᒐᔪᒃᖢᑎᒃ. ᐅᓄᓛᑦ ᐅᓂᒃᑳᕆᔭᖃᖅᖢᑎᒃ ᑕᒪᓐᓇ ᓯᐅᖅᑭᓯᒪᑦᑎᐊᖅᑐᑦ ᓯᐅᕋᑦᑎᐊᒻᒪᕆᒡᓘᓐᓃᑦ ᓄᓇᐃᑦ ᐊᒡᒐᒃᑕᐅᔪᓐᓇᖅᑐᑦ ᐊᑑᑎᖃᓛᑦ ᐃᓕᖅᑯᓯᕆᔭᐅᓲᓂᒃ. ᐱᑕᖃᓐᓂᖓ ᐃᖃᓗᖕᓂᒃ, ᐃᔾᔪᖃᑦᑎᐊᖅᑐᓂᒃ ᐱᕈᖅᑐᓕᖕᓂᒃ, ᓄᓇᑭᑦᑐᑦ ᐊᒻᒪᓗ ᐱᖑᐊᔾᔪᖃᐅᖅᑐᑦ ᐅᖃᐅᓯᐅᒋᓪᓗᑎᒃ ᐊᑑᑎᒋᔭᐅᓲᑦ ᐃᓕᖅᑯᓯᐅᔪᓂᒃ ᑎᕆᒐᓂᐊᓄᑦ ᑎᓯᓕᐅᖅᑐᓄᑦ.

ᐃᓐᓇᑐᖃᑦ−ᒪᒃᑯᒃᑐᓪᓗ ᑕᖕᒫᕝᕕᒋᔭᖓ

ᐃᓄᐃᑦ ᖃᐅᔨᒪᓂᖏᑦ ᑲᖑᓐᓂᒃ