ᑲᔫᖅ ᐊᑯᓐᓂᖅᓱᖅᑐᒥᒃ ᐊᖏᓂᓕᒃ ᓂᕿᑐᔅᓲᖑᓪᓗᑎᒃ (ᐅᖁᒪᐃᓐᓂᖃᕋᔪᒃᑐᑦ ᑕᒫᓂ 950-g-ᓂᒃ ᐊᖑᓴᓪᓗᐃᑦ ᐊᒻᒪᓗ 1200-g-ᓂᒃ ᐊᕐᓇᓪᓗᐃᑦ) ᐅᑭᐅᖅᑕᖅᑐᖅᐸᓯᖕᒥᔅᓲᖑᓪᓗᑎᒃ. ᑲᓇᑕᐅᑉ ᐅᐊᖕᓇᖓᓂ ᓄᓕᐊᖅᐸᒃᑐᑦ ᑕᒪᒃᑯᐊ (ᑕᐅᕙᓂᓗ ᒥᑦᑎᒪᑕᓕᐅᑉ ᕿᑭᖅᑕᖓᓂ) ᐅᑮᕙᒃᓱᑎᒃ ᑲᓇᑕᐅᑉ ᓂᒋᐊᓂᒃ ᐊᒻᒪᓗ ᐅᐊᖕᓇᖅᐸᓯᖓᓂ ᐊᒥᐊᑲᒥᐅᑦ ᓄᓇᖏᓐᓂ. ᑳᔫᖅ ᖃᐅᔨᒪᔭᐅᒐᓗᐊᖅᓱᓂ ᓂᕿᖃᓲᖑᓂᖓᓂ ᐊᕕᓐᖓᕐᓂᒃ ᓄᓕᐊᕐᓇᐅᓂᖓᓂ, ᐃᓛᓂᒃᑯᑦᑕᐅᖅ ᓂᕿᖃᓲᖑᒋᕗᑦ ᐆᒪᔪᓂᒃ ᐊᓯᖏᓐᓂᒃ, ᓲᕐᓗ ᖁᐸᓄᐊᕐᓂᖅ, ᐊᕿᒡᒋᕐᓂᒃ, ᒥᑦᑎᕐᓂᒃ ᐊᒻᒪᓗ ᐅᑲᓕᖕᓂᒃ. ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐊᕕᖓᖃᑦᑎᐊᕈᓐᓃᖅᑎᓪᓗᒍ, ᐊᒥᔅᓲᖏᑐᒻᒪᕆᐅᕙᒃᑐᑦ ᐱᑕᖃᖏᑦᑎᐊᒻᒪᕆᓕᖃᑦᑕᖅᓱᑎᒡᓗᓐᓃᑦ ᑲᔫᑦ ᓄᓕᐊᖃᑕᕐᓂᖏᑦ. ᑕᐃᒪᖃᑕᕐᓂᖏᓐᓂ ᐃᓱᒪᓇᖅᑐᖅ ᐊᓯᖔᖏᓐᓂᒃ ᓂᕿᖃᕋᓗᐊᕌᖓᒥᒃ ᓈᒻᒪᖏᓗᐊᖃᑦᑕᖅᑐᑦ ᓄᓕᐊᕈᓐᓇᕐᑲᑦᑕᕐᓂᖏᓐᓄᑦ ᕿᑭᖅᑕᖓᓂ ᑕᐅᕙᓂ.

ᓄᓕᐊᕐᕕᐅᕙᖕᓂᖏᑦ ᐊᕙᑏᑦ

ᑕᐃᒪᖓᓂᒃ 2007-ᒥ, ᖃᐅᔨᓴᖃᑦᑕᕆᐊᓕᓚᐅᖅᑐᑦ ᑳᔫᕐᓂᒃ ᓂᒋᖅᐸᓯᐊᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐅᖓᑖᓂ ᐊᖏᓂᓕᖕᒥ ᑕᒫᓂ 500 km2-ᓂᒃ ᑭᑉᐹᕆᒃᑐᓂ ᑕᒫᓂᑭᓛᒥᑕᓕᖕᒥ ᐱᑕᖃᖃᑕᖅᓯᒪᖕᒪᑕ ᐅᖓᑖᓂ ᕼᐊᓐᓇᓚᓂᒃ 100 ᐅᖓᑖᓂ ᐅᓪᓗᖃᕐᕕᐅᓂᖏᑦ ᐅᓪᓗᒥᒧᑦ ᑎᑭᓪᓗᒍ. ᑕᒪᒃᑯᐊ ᑕᑯᒋᐊᖅᑕᐅᖃᑦᑕᐃᓐᓇᖅᐳᑦ ᐊᕐᕋᒍᑕᒫᖅ, ᐊᒻᒪᓗ ᕿᓂᕐᕕᐅᖃᑦᑕᖅᓱᑎᒃ ᑕᒪᐃᓐᓂᒃ ᐅᓪᓗᖃᕐᕕᐅᒐᔪᖕᓂᖏᑦ ᑳᔫᕐᓄᑦ, ᓲᕐᓗ ᖃᖃᔮᖑᓂᐅᔪᓂ, ᖃᐃᖅᑐᐊᓗᖕᓂᓗ ᐅᕝᕙᓗᓐᓃᑦ ᐊᖏᔫᑎᐊᓗᖕᓂ ᐅᔭᕋᓪᓛᖑᓂᕐᒥ ᖁᑦᑎᒃᑐᐊᓗᖕᓂ, ᑕᐃᒪᒃ ᓇᓂᔭᐅᔪᒪᓪᓗᑎᒃ ᐅᓪᓗᖃᕐᕕᐅᔪᓐᓇᕐᓂᖏᑦ. ᐃᓄᖕᓄᑦ ᖃᐅᔨᓴᖅᑎᓄᑦ ᐅᕝᕙᓗᓐᓂᑦ ᑕᒪᒃᑯᓄᖓ ᓂᕿᒃᓴᖅᓯᐅᖅᑐᓄᑦ ᖃᒡᓕᔭᐅᑐᐊᕌᖓᒥᒃ, ᓂᓪᓕᐊᔪᐊᓗᓕᖃᑦᑕᖅᑐᑦ ᖃᐅᔨᕕᐅᖃᑦᑕᖅᑐᑦ ᓇᓂᓯᓇᓱᒃᑐᓄᑦ ᐅᓪᓗᖏᓐᓂ. ᑕᒫᓃᓕᖅᑐᑦ 42-ᖏᓐᓂ ᐅᓪᓗᖃᕐᕕᐅᓂᖏᑦ, ᐊᑐᖅᑕᐅᑲᓐᓂᖃᑕᖅᑐᑦ ᐊᕐᕋᒍᑕᒫᖅ ᖃᐅᔨᓴᕐᕕᒋᕙᒃᑕᑦᑎᓐᓂ ᓄᓇᒥ, ᓇᐅᑦᑎᖅᑐᖅᑕᐅᖃᑦᑕᖅᓱᑎᒃ ᑕᐃᒪᖓᑦ, ᒪᓐᓂᒃᑖᕋᖓᒥᒃ, ᐃᓐᓄᒃᐸᖕᓂᖏᓐᓂ ᒪᓐᓂᖏᑦ ᐊᒻᒪᓗ ᐱᐊᕋᖃᓕᖅᑎᓪᓗᒋᑦ ᑕᒫᓂ ᑕᕿᐅᑉ ᐊᒐᓯᑉ ᕿᑎᖅᐸᓯᐊᓂ ᖃᐅᔨᓴᖅᑕᐅᓪᓗᑎᒃ.

ᐃᓚᖏᓐᓂ ᐃᓂᖃᕐᕕᐅᔪᓂ, ᑳᔫᑉ ᐅᓪᓗᓕᐅᖃᑦᑕᖅᑐᑦ ᓄᓇᒥ ᑭᓯᐊᓂᓕ ᑕᒪᕐᒥᒃ ᐅᓪᓗᖏᑦ ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ ᖃᖃᔮᖑᓂᕐᒥᓲᖑᕗᑦ, ᓄᓇᐅᓪᓘᓐᓃᑦ ᐳᖅᑐᓂᖓᓂᒃ ᖃᑦᑎᖕᓂᓕᖕᒥ ᐊᒻᒪᓗ ᐅᔭᕌᓗᖑᖕᓂᕐᒥ ᐳᖅᑐᔪᐊᓗᖕᓂ, ᑕᐃᒫᒃ ᑎᑭᑕᐅᓴᕋᐃᖏᑦᑐᓂ ᓂᕿᒃᓴᖅᓯᐅᖅᑎᐅᕙᒃᑐᓄᑦ ᐆᒪᔪᓄᑦ ᑎᑭᑕᐅᓴᕋᐃᖏᓂᖏᓐᓂ, ᓲᕐᓗ ᑎᕆᒐᓂᐊᕐᓄᑦ. ᐅᓪᓗᓕᐅᕆᐊᕌᖓᒥᒃ, ᑲᔫᑦ ᐊᑐᖃᑦᑕᖅᐳᑦ ᕿᔪᖕᓂᒃ ᐱᕈᖅᑐᕕᓂᕐᓂᒃ ᓄᓇᒥ ᐊᒻᒪᓗ ᐊᐃᕋᕕᓂᖏᓐᓂᒃ ᐊᖏᓂᓕᖕᒥᒃ ᓴᓇᓪᓗᑎᒃ ᑕᐃᒫᑎᒋ 60-ᓂᒃ 90-ᓄᑦ ᓴᓐᑎᒦᑕᓂᒃ ᐆᒃᑐᕋᐅᑎᓕᖕᓂᒃ ᐊᖕᒪᓗᖅᑐᓂᒃ. ᐊᓯᒥᑎᑐᑦ ᑎᖕᒥᐊᖅᑎᑐᑦ ᓂᕿᒃᓴᖅᓯᐅᖅᐸᒃᑐᑎᑐᑦ ᑳᔫᑦᑕᐅᖅ ᐊᑐᖅᐸᒃᑭᕗᑦ ᑕᐃᒃᑯᓂᖓᑦᓴᐃᓐᓇᖅ ᐅᓪᓗᖃᕐᕕᒋᓚᐅᖅᑕᖏᓐᓂᒃ ᐊᕐᕋᒍᓂ ᑭᖑᓕᕇᒃᑐᓂ. ᑕᐃᒪᐃᓂᖏᓐᓄᑦ ᐱᒻᒪᕆᐊᓗᖕᒥᒃ ᐱᓕᕆᓇᖏᓂᖅᓴᐅᕙᖕᒪᑦ ᐅᓪᓗᓕᐅᕐᓂᖏᓐᓄᑦ, ᐊᒻᒪᓗ ᓈᒻᒪᓇᖅᓯᒪᕙᖕᓂᖏᓐᓄᑦ ᑎᑭᓯᒪᓂᖏᓐᓂ ᒪᓂᑲᐅᑎᒋᔪᓐᓇᕐᓂᖏᓐᓄᑦ. ᐊᒻᒪᑦᑕᐅᖅ, ᕿᔪᒃᓴᖃᑦᑎᐊᖏᓗᐊᖃᑕᕐᓂᖓᓄᑦ ᐱᕈᖅᓯᒪᔪᓂᒃ ᓄᓇᒥᒃ ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐱᔭᕐᓂᖅᑑᕙᖏᓐᓂᕗᑦ ᐅᓪᓗᓕᐅᕈᑎᒃᓴᕆᔪᓐᓇᖅᑕᖏᑦ. ᐅᖓᑎᑦᑎᐊᖓᓃᒻᒪᑕ ᐊᑐᓂ 40% ᐳᓴᓐᑎᖏᓐᓂᒃ ᓄᓇᐃᑦ ᐊᖏᓂᖏᑦ (ᐊᑐᖅᑕᐅᕙᒃᑐᑦ ᐊᐃᑉᐹᕇᒃᑐᓄᑦ ᑳᔫᕐᓄᑦ ᑕᐃᒪᖓᑦ) ᐅᓪᓗᖃᕐᕕᐅᕙᒃᑐᓂᒃ ᐊᑕᐅᓯᕐᒥᒡᓗᓐᓂᑦ ᐊᒥᔅᓲᓂᖅᓴᓂᒡᓗᓐᓂᑦ ᐅᖓᑕᓃ (ᐊᑕᐅᓯᕐᒥᒃ ᓯᑕᒪᓄᑦ ᐅᓪᓗᖃᕐᕕᐅᔪᓐᓇᖅᓱᑎᒃ) ᑭᓯᐊᓂ ᐊᑐᖅᑕᐅᖃᑦᑕᖅᑐᑦ ᐊᑕᐅᓰᓐᓇᐃᑦ ᐅᓪᓗᐃᑦ. ᑭᓯᐊᓂᓕᑦᑕᐅᖅ, ᐊᓯᖏᑦ ᐊᑑᑎᖃᕈᓐᓇᕈᓐᓇᕆᕗᑦ ᐅᓪᓗᕕᓃᑦ ᓱᕋᖅᑎᕐᓂᕈᑎᒃ ᐅᓪᓗᕆᓚᐅᖅᑕᖏᑦ. ᐃᓱᒪᒋᓪᓗᒋᑦ ᓄᓇᖃᕐᕕᒋᕙᒃᑕᖏᑦ ᑲᔫᑦ, ᐅᖓᓯᓂᖃᕋᔪᒃᐳᑦ ᐊᑐᖅᑕᐅᓂᖏᓐᓂ ᐅᓪᓗᖃᕐᕕᑦ ᑕᒫᓃ 3.3 ᑭᓚᒥᑕᓕᖕᓂᒃ.

ᐊᕐᓇᐃᓪᓗ ᒪᓂᖃᕆᐊᓕᖅᐸᒃᑐᑦ ᑎᑭᓵᖅᓯᒪᓂᖏᓐᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᑕᒪᖓᑦ ᐃᓱᖅᐸᓯᐊᓂᒃ ᒪᐃᒥᒃ ᕿᑎᖅᐸᓯᐊᓄᑦ ᔪᓐᓂᐅᑉ (ᑕᒫᓂᐅᒐᔪᒃᑐᖅ ᔪᓐᓂ 7-ᒥ). ᐊᕐᓇᓪᓗᐃᑦ ᒪᓐᓂᒃᑖᖅᓯᒪᓲᑦ ᐱᖓᓱᓂᒃ ᑕᓪᓕᒪᓄᑦ, ᐃᓪᓛᓐᓂᒃᑯᓪᓗ ᐱᖓᓲᔪᖅᑐᒻᒪᕆᖕᓂᒃ. ᐅᓪᓗᐃᑦ 31-ᓂᒃ 33-ᒧᑦ ᖄᖏᕋᖓᑕ, ᓯᕗᓪᓕᖅ ᒪᓐᓂᖓ ᐃᓐᓄᒃᐸᒃᑐᖅ, (ᑕᒫᓂ ᐊᑯᓂᖏᓐᓂ ᔪᓐᓂ 28 ᐊᒻᒪᓗ ᔪᓚᐃ 21). ᒪᓐᓂᖃᓕᑐᐊᕈᑎᒃ ᐃᓐᓄᒃᓯᐊᕆᔭᐅᓕᖅᐸᒃᑐᑦ ᓯᕗᓪᓕᕐᒥᒃ, ᐃᓐᓄᒃᐸᓪᓕᐊᖃᑕᕐᓂᖏᑦ ᐊᑕᐅᑎᒃᑰᖓᕙᖏᓐᓂᕗᑦ ᑭᖑᓕᕇᒃᑎᒋᔪᓐᓇᖅᓱᑎᒃ ᒪᕐᕈᖕᓂᒃ 2 ᐱᖓᓱᓄᑦ 3 ᐅᓪᓗᓂᒃ ᐊᑯᓐᓂᖏᓐᓂ. ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐃᓐᓄᒃᐸᓪᓕᐊᔪᓐᓇᕐᓂᖏᑦ ᒪᓂᖏᑦ (ᐊᒥᓱᓂᓕᖕᓂ ᐅᓪᓗᖏᓐᓂ ᐊᑕᐅᓯᕐᒥᒡᓗᓐᓃᑦ ᐃᓐᓄᒃᓯᒪᔪᓇᖅᐳᑦ), ᑲᔪᓯᑦᑎᐊᖃᑕᕐᓂᖏᑦ ᖁᑦᑎᒃᑐᒻᒪᕆᖕᒦᓲᖑᔪᑦ (ᖃᓂᒋᔭᖏᓐᓂ 80% ᐳᓴᓐᑎᓂᒃ). ᑭᓯᐊᓂᓕ ᒫᓐᓇᓵᖅ ᖃᐅᔨᓴᖅᑕᐅᓚᐅᖅᑐᓂᒃ ᒥᑦᑎᒪᑕᓕᐅᑉ ᕿᑭᖅᑕᖓᓂ ᑕᑯᒃᓴᐅᓕᓚᐅᖅᑐᑦ ᐊᒥᓱᒐᓴᐃᑦ ᐱᔾᔪᑕᐅᓲᖑᓂᖏᓐᓄᑦ ᐃᓐᓄᒍᓐᓇᖃᑕᕐᓂᖏᓐᓄᑦ ᒪᓐᓂᖏᑦ, ᓲᕐᓗ ᐊᑐᐃᓐᓇᐅᑎᒋᓂᖏᓐᓂᒃ ᓂᕿᒃᓴᕆᔪᓐᓇᖅᑕᖏᑦ, ᐅᖓᓯᒌᖕᓂᖏᓄᑦ ᐅᓪᓗᖃᕐᕕᐅᔪᑦ ᐊᓯᖏᓐᓄᑦ, ᐊᒻᒪᓗ ᒪᖁᖃᑦᑕᕐᓂᖓᓄᑦ ᐊᒻᒪᓗ ᖃᓄᖅ ᓴᓇᓯᒪᓂᖓᓂᒃ ᐅᓪᓗᖏᑦ ᐱᔾᔪᑕᐅᖃᑦᑕᖅᑐᑦ ᐅᓪᓗᓕᐅᖃᑦᑕᕐᓂᖏᓐᓄᑦ ᐊᒻᒪᓗ ᒪᓂᒃᑖᑦᑎᐊᕈᓐᓇᕐᓂᖏᓄᑦ ᐊᐃᑉᐹᕇᒃᑐᑦ. ᐱᓗᐊᖅᑐᒥᒃ, ᐊᒥᔅᓲᓂᖏᑦ ᐊᕕᓐᖓᐃᑦ ᐊᒻᒪᓗ ᓂᕕᖓᓂᖃᕐᓂᖏᑦ ᐅᓪᓗᖓᑕ ᐃᑲᔪᕐᓂᖃᕈᓐᓇᖅᑐᖅ ᐅᓪᓗᖃᑦᑎᐊᕈᑕᐅᔪᓐᓇᕐᓂᕐᒧᑦ ᐊᒻᒪᓗ ᒪᓐᓂᖃᕈᓐᓇᕐᓂᖏᓐᓄᑦ ᑕᐃᒪᖓᓂᒃ ᓄᓕᐊᓚᐅᕐᓂᖏᓐᓂ. ᑕᒪᓐᓇ ᓂᕕᖓᓂᖅ ᐅᖁᐊᒃᓴᓂᒍᑕᐅᕙᖕᒪᑦ ᐅᓪᓗᖏᓐᓄᑦ, ᐱᓗᐊᖅᑐᒥᒃ ᐅᔭᕋᖕᓄᑦ ᑲᑕᒐᕐᕕᐅᔪᓐᓇᕐᓂᖏᓐᓂᒃ, ᒪᖁᖕᓂᕐᒥᒃ ᐊᒻᒪᓗ ᓴᖏᔪᒥᒃ ᐊᓄᕆᔪᓐᓇᕐᓂᕐᒥᒃ. ᓴᓂᐊᓂᓕᑦᑕᐅᖅ, ᐅᐊᖕᓇᖅᐸᓯᖕᒧᑦ ᓵᖓᔪᓂᒃ ᐅᓪᓗᓕᐅᕋᔪᐃᑉᐳᑦ ᐱᔾᔪᑕᐅᓂᕐᒧᑦ ᓯᕿᓐᓂᖏᓐᓂᖅᓴᐅᓲᖑᓂᖓᓄᑦ ᑕᒫᓂ ᐊᒻᒪᓗ ᓂᒡᓚᓱᒃᑐᒥᒃ ᐊᓄᕌᕐᕕᐅᓂᖅᓴᐅᖃᑕᕐᓂᖓᓄᑦ ᐊᒻᒪᓗ ᓯᓚᓗᖕᓂᐊᓗᕐᒧᑦ, ᐊᒃᑐᖅᑕᐅᓯᒪᔪᓐᓇᕐᒪᑕ ᒪᓂᒃᑖᖃᑦᑕᕈᓐᓇᕐᓂᖏᑦ. ᐊᓯᖓᓂᒃᑕᐅᖅ ᐱᔾᔪᑎᖃᕐᒥᔪᑦ ᒪᓐᓂᒃᑖᑦᑎᐊᕈᓐᓇᕐᓂᖏᑦ ᐱᔾᔪᑎᖃᖅᑐᖅ ᐅᓪᓗᖃᕈᓐᓇᕐᓂᖏᓐᓂᒃ ᐃᓂᒃᓴᖃᑦᑎᐊᖅᑐᒥᒃ ᑎᑭᑕᐅᔪᓐᓇᖏᑦᑐᓂ ᓄᓇᒥᐅᑕᓄᑦ ᐆᒪᔪᕐᓄᑦ ᓂᕿᒃᓴᓂᖅᓯᐅᖅᑎᐅᕙᒃᑐᓄᑦ. ᐅᓪᓗᖃᕐᕕᐅᓂᖏᓐᓂ ᐊᒥᔅᓲᖏᑦᑐᑦ ᓈᒻᒪᒍᓃᖅᓯᒪᓚᐅᖅᑐᑦ ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᑕᒪᕐᒥᒃ ᓈᒻᒪᒍᓃᖅᓯᒪᓚᐅᖅᑐᑦ ᑕᐃᒪᐃᓚᐅᖅᑐᑦ ᑎᑭᑕᐅᔪᓐᓇᕐᓂᖏᓐᓄᑦ ᐆᒪᔪᓄᑦ ᓂᕿᒃᓴᖅᓯᐅᖅᑐᓄᑦ, ᐱᓗᐊᖅᑐᒥᒃ ᑎᑭᑕᐅᖃᑕᕐᓂᖏᓐᓄᑦ ᑎᕆᒐᓂᐊᕐᓄᑦ.

ᑕᒪᐃᓐᓂᒃ ᑕᑯᔪᒪᒍᕕᑦ ᖃᐅᔨᔭᐅᓯᒪᔪᓂᒃ ᐅᓂᒃᑳᖅᑐᓂᒃ ᑳᔫᕐᓂᒃ ᐅᓪᓗᖃᕐᕕᐅᓂᖏᓐᓂᒃ ᖃᐅᔨᓴᖅᑕᐅᓚᐅᖅᑐᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᐊᑐᐃᓐᓇᐅᕗᑦ ᐅᕙᖓᑦ ᖃᕆᑕᐅᔭᒃᑯᑦ ᑐᕌᕈᑎᓕᖕᒥ NordicanaD.

ᐅᓗᕆᐊᓇᖅᑐᒥᑦᑐᓐᓇᕐᓂᖏᑦ ᐊᑦᑕᕐᓇᖅᑐᑦ ᑳᔫᑦ ᐅᓪᓗᖃᕈᓐᓇᕐᖏᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ

ᑲᐅᔨᓴᖅᑕᐅᖃᑦᑕᕐᒥᔪᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ ᖃᐅᔨᒋᐊᖅᑕᐅᓚᐅᖅᑐᑦ ᐅᓗᕆᐊᓇᖅᑐᖃᕐᓂᖏᑦ ᓄᓇᖏᑦ ᑲᔫᕐᓄᑦ ᐅᓪᓗᖃᕐᕕᒋᕙᒃᑕᖏᑦ. ᓯᓚᖓ ᐅᑭᐅᖅᑕᖅᑐᒥ ᐅᖁᓇᖅᕙᓪᓕᐊᓕᖅᑎᓪᓗᒍ, ᐅᓪᓗᖃᕐᕕᐅᕙᒃᑐᑦ ᓄᓇᖏᑦ ᑐᖓᕕᒃᓴᐅᔪᓐᓃᕈᓐᓇᕐᒪᑕ. ᖃᐅᔨᓴᖅᑕᐅᓂᖏᓐᓂ ᖃᐅᔨᓚᐅᖅᑐᑦ ᐊᐅᔭᒃᑯᑦ ᐅᖂᓇᕐᓂᖅᓴᐅᖃᑕᕐᓂᖓᓄᑦ ᒪᖁᒐᔪᖕᓂᖅᓴᐅᕙᓕᖅᑐᖅ ᑕᒪᒃᑯᐊᓗ ᐊᑦᑕᕐᓇᕈᑕᐅᓗᑎᒃ ᐅᓪᓗᕆᔭᖏᓐᓄᑦ ᓱᕋᖅᑎᕈᑕᐅᔪᓐᓇᕐᓂᖅ. ᐃᒡᓗᐊᒍᖔᕐᓕᑦᑕᐅᖅ, ᐱᕈᖅᑐᖃᕐᓂᖏᓐᓂ ᐊᕙᓗᐊᓂ ᐳᖅᑐᓂᐅᓂᖓᑕ ᓄᓇᐅᑉ ᐅᓪᓗᖃᕐᕕᐅᔫᑉ ᐅᓗᕆᐊᓇᖏᓂᖅᓴᐅᔾᔪᑕᐅᕙᒃᑭᕗᑦ ᐱᔾᔪᑕᐅᓂᕐᒧᑦ ᐱᕈᖅᑐᑦ ᐱᑕᖃᕐᓂᖏᓐᓄᑦ ᑐᖓᕕᐅᓂᖅᓴᐅᖃᑕᕈᓐᓇᕐᒪᑕ ᓄᓇᒥ, ᒪᖁᖕᓂᖓᓂ ᐊᒻᒪᓗ ᐃᑉᔫᑉ ᓄᓇᐅᑉ ᐊᐅᒃᐸᓪᓕᐊᓂᖓᓂ ᖁᓛᒍᑦ. ᑭᖑᓪᓕᕐᒥ, ᖃᓄᐃᑦᑑᓂᖏᑦ ᓄᓇᖏᑦ ᐊᖏᔪᒥᒃ ᐊᐅᓚᑦᑎᕙᒃᑐᑦ ᑐᖓᕕᐅᔪᓐᓇᕐᓂᖏᓐᓄᑦ ᐊᒻᒪᓗ ᐅᓪᓗᖃᕐᕕᐅᔪᓐᓇᕐᓂᖏᓐᓄᑦ ᓱᕋᒃᑎᕆᔪᓐᓇᕐᓂᕐᒧᑦ. ᐅᓪᓗᖅ ᑐᖓᕕᖃᕈᓂ ᐊᕿᓐᓂᖅᓴᒥᒃ ᐊᐅᒫᓗᕕᓂᕐᓂᖓᖅᑐᓂᒃ ᐅᔭᕋᖕᒥᒃ (ᐱᓗᐊᖅᑐᒥᒃ ᓯᐅᕋᕕᓂᕐᓂᒃ ᐅᔭᕋᓐᖑᖅᓯᒪᔪᕕᓂᕐᓂᒃ) ᐃᓚᖏᓐᓂᒃ ᖁᐱᓯᒪᕙᒌᖃᑦᑕᖅᑐᓂᒃ ᐱᑕᖃᖅᑐᑦ ᐱᐅᔪᐊᓘᕙᒃᑐᑦ ᑳᔫᕐᓄᑦ ᐅᓪᓗᓕᐅᕐᕕᐅᔪᓐᓇᕐᓂᖅ. ᑭᓯᐊᓂ, ᓱᕋᖅᑎᖅᓴᕋᐃᓐᓂᖅᓴᐅᕙᖕᒥᔪᑦ ᐅᔭᕋᐃᑦ ᐊᒥᓱᒐᓴᖕᓂᒃ ᖁᐱᓕᒑᓯᒪᒍᑎᒃ ᐃᓗᑐᓂᖃᐅᕈᑎᒡᓗᓐᓃᑦ ᐅᔭᕋᐃᑦ, ᐅᕝᕙᓗᓐᓃᑦ ᐅᓪᓗᖓ ᑐᖓᕕᒃᓴᐅᑦᑎᐊᖏᑦᑐᒦᓕᕇᕈᓂ ᓲᕐᓗ ᒪᕋᒃᓴᔭᕕᓂᕐᒥᒃ, ᓯᐅᕋᕐᒥᓗᓐᓃᑦ, ᑐᐊᐸᒥᒡᓗᓐᓃᑦ. ᑳᔫᑦ ᐅᓪᓗᓕᐅᖅᑕᐃᓕᒪᖃᑕᖅᐳᑦ ᑕᐃᒪᐃᑦᑐᓂᒃ ᐊᕙᓗᓕᖕᓂᒃ, ᐱᔾᔪᑕᐅᒐᔪᐃᑲᓗᐊᖅᑎᓪᓗᒋᑦ ᒪᓂᑖᕈᓂᐃᓪᓕᔪᓐᓇᕐᓂᖏᓐᓄᑦ. ᖃᐅᔨᓴᓚᐅᖅᑕᑦᑎᓐᓂᒃ, ᓇᓂᓯᓚᐅᖅᑐᒍᑦ ᓱᕋᖅᑎᖅᓯᒪᔪᓂᒃ ᐅᓪᓗᕕᓂᕐᓂᒃ ᐊᕐᕋᒍᐃᑦ ᐊᑯᓐᓂᖏᓐᓂ 2007-ᒥ ᐊᒻᒪᓗ 2015-ᒥ, ᑕᒫᓂ 17-ᖑᓚᐅᖅᑐᑦ ᓱᕋᖅᑎᖅᓯᒪᔪᕕᓃᑦ ᓄᓇᐅᑉ ᐳᖅᑐᓂᖓᓂ ᖃᑦᑎᖕᓂᖓᒍᑦ ᓱᕋᖅᑎᓚᐅᕐᓂᖏᓐᓄᑦ, ᐱᖓᓱᑦ 3 ᐅᔭᕋᖕᒧᑦ ᑲᑕᒐᕐᕕᐅᔪᕕᓂᐅᓚᐅᖅᑐᑦ ᐊᒻᒪᓗ ᐱᖓᓱᑦ 3 ᓯᓚᓗᒡᔪᐊᓚᐅᕐᓂᖓᓄᑦ ᓱᕐᓗ ᐊᓄᕆᔪᐊᓘᓚᐅᕐᓂᖏᓐᓄᑦ ᓱᕋᖅᑎᖅᓯᒪᓚᐅᖅᑐᑦ.

ᐊᔾᔨᖁᑏᑦ ᑕᑯᒃᓴᐅᑎᑦᑎᔪᑦ ᓱᕋᖅᑎᖅᓯᒪᓂᖏᓐᓂᒃ ᒪᕐᕉᖕᓂᒃ ᑳᔫᕐᓄᑦ ᐅᓪᓗᖃᕐᕕᕕᓃᖕᓂᒃ (ᑕᒫᓂ ᖃᐅᓪᓗᑐᒥ ᐊᖕᒪᓗᖅᓯᓯᒪᔫᑉ ᐃᓗᐊᓂ). ᓱᕋᒃᑎᖅᓯᒪᓕᖅᑐᑦ ᐅᓪᓗᕕᓂᖏᑦ (A) ᐅᔭᕋᖕᓄᑦ ᑲᑕᒐᕐᕕᕕᐅᔪᑦ ᑕᒫᓂ ᐊᕐᕋᒍᒥ 2013-ᒥ, ᐊᑯᓂᖏᓐᓂ (A1) ᔫᓐ 14-ᒥ ᐊᒻᒪᓗ (A2) ᔪᓚᐃ 30-ᒥ. ᓱᕋᖅᑎᖅᓯᒪᓚᐅᖅᑐᑦ ᐅᓪᓗᕆᔭᕕᓂᖅ (b) ᓄᓇᐅᑉ ᐳᖅᑐᓂᖓᓂ ᖃᑦᑎᖕᓂᖓᒍᑦ ᓱᕋᖅᑎᓚᐅᕐᓂᖓᓄᑦ ᑕᒫᓂ (B1) ᔪᓚᐃ 2014-ᒥ ᐊᒻᒪᓗ (B2) ᔫᓐ 2015-ᒥ. Breadsell et al. 2017, DOI: 10.1139/as-2016-0025.