ᐊᖅᑯᑎᖃᖅᖢᑎᒃ ᑕᐅᓴᒐᓵᓗᐃᑦ ᐊᕐᕌᒍᐋᓗᖏᒍᑦ ᐊᒃᑐᐊᖃᑎᖃᓐᓂᕐᒧᑦ ᐊᑐᖃᑦᑕᕐᓂᕐᒥᒡᓗ ᐅᑭᐅᖅᑕᖅᑑᑉ ᐊᐅᓚᓂᕆᓲᖏᑕ ᐆᒪᔪᖏᒍᑦ, ᐃᓄᐃᑦ ᓴᓇᕙᓪᓕᐊᓪᓗᑎᒃ ᐃᓗᐃᑦᑑᔪᒥᒃ ᐆᒪᔪᖏᓄᑦ ᐅᑭᐅᖅᑕᖅᑐᒥ ᓇᔪᒐᖃᓲᖑᔪᓂᒃ. ᖃᖓᑦᑎᐊᒃᑯᑦ ᐊᕐᕌᒍᑦ ᖁᓕᐅᑦᑕᖅᑐᑦ ᐃᓗᐊᒍᑦ, ᑐᑭᓯᕙᓪᓕᐊᔪᓄᑦ ᐊᖏᓕᕙᓪᓕᐊᔪᒥᒃ ᐱᖃᓯᐅᔾᔨᔪᒪᓕᖅᑐᑦ ᐊᔾᔨᐅᙱᔾᔫᒥᔪᒃᑯᑦ ᐊᑐᓪᓗᑎᒃ ᐅᐃᒍᓗᒍᑦ ᓄᓇᖃᖅᑳᖅᓯᒪᔪᑦ ᐆᒪᔪᑦ ᐊᐅᓚᓂᕆᓲᖏᓄᑦ ᖃᐅᔨᒪᓂᖓᓂᒃ (TEK) ᐃᓗᐊᒍᑦ ᑲᒪᒋᔾᔪᑎᒋᔭᐅᓲᑦ ᐊᐅᓚᑦᑎᓃᑦ ᐱᓕᕆᐋᖃᓕᕈᑎᒃ ᕿᒥᕐᕈᓇᒡᓗᑎᒃ ᐊᕙᑎᒋᔮᑕ ᐊᐅᓚᓂᕆᓲᖏᓐᓂᒃ ᑲᒪᒋᔭᖃᓐᓂᓂ ᐊᑐᓪᓗᒍ.

ᑕᒪᓐᓇ ᑕᐅᑐᙳᐊᖅᖢᒍ, ᑲᓇᑕᒥ ᒥᕐᖑᐃᖅᓯᕝᕕᓕᕆᔨᒃᑯᑦ ᓴᖅᑮᔭᖃᖅᓯᒪᕗᑦ ᓯᕗᓕᐅᕆᔭᒥᓂᒃ ᐊᑐᕈᒪᓂᕐᒥᒃ ᓄᓇᖃᖅᑳᖅᑐᑦ ᖃᐅᒪᔨᓂᖓᓂᒃ ᑐᑭᒧᐊᕆᓂᐊᖅᑐᖅ ᐊᐅᓚᑦᑎᔨᑦ ᑲᒪᒋᔭᖃᕈᑎᖏᓄᑦ ᖃᐅᔨᓵᕆᔭᓄᓪᓗ ᑲᒪᒋᔭᖃᖅᑐᑦ ᐆᒪᔪᑦ ᐊᐅᓚᓂᖓᒍᑦ ᐃᓕᖅᑯᓯᖅᓱᑦᑎᐊᕐᓂᖏᓄᑦ ᒥᕐᖑᐃᖅᓯᕝᕕᒋᔭᖏᒍᑦ ᓄᓇᕘᒥ. ᐱᓗᐊᖅᑐᒥᒡᓕ ᑐᕌᖓᓪᓚᕆᒃᑐᖅ ᐃᓂᒋᔮᑕ ᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕝᕕᖓ ᐱᓪᓗᒍ, ᑲᑎᒪᑎᑦᑎᓚᐅᖅᓯᒪᕗᑦ ᐊᕐᕌᒍᐊᒍᑦ 2001 ᓇᓗᓇᐃᖅᓯᔭᖃᕝᕕᐅᓪᓗᑎᒃ ᐃᓱᒪᖃᑎᒋᓕᕐᓂᕐᒧᑦ ᑲᑎᖅᓱᐃᓂᖏᑦ ᐅᐃᒍᔭᖃᓐᓂᖏᑕᓗ ᖃᐅᔨᒪᓂᕆᔭᖏᑕ TEK ᑎᖕᒥᐊᓄᑦ, ᐆᒪᔪᖏᑕ ᐃᓕᖅᑯᓯᕆᓲᖏᓐᓄᑦ ᓇᓄᐃᓪᓗ ᑎᓯᖃᕝᕕᒋᓲᖏᑦ ᓯᕕᖓᔪᑦ ᓯᕗᓕᐅᕆᔭᐅᓗᑎᒃ ᓇᓗᓇᐃᖅᑕᐅᓂᒃᓴᖏᓄᑦ.

ᑭᐅᔭᖃᕋᓱᒃᖢᑕ ᐊᑐᓕᖁᔭᐅᓯᒪᔪᓄᑦ ᑖᒃᑯᓄᖓ, ᓴᓇᕙᓪᓕᐊᓯᒪᕗᒍᑦ ᖃᐅᔨᓴᐃᓂᒃᓴᐅᔪᒥᒃ ᑐᕌᒐᖃᓪᓚᕆᒃᑐᖅ ᑲᑎᑦᑎᓂᕐᒥᒃ ᐃᓄᐃᑦ ᖃᐅᔨᒪᓂᕆᓲᖏᓐᓂᒃ ᐱᔾᔪᑎᖃᖅᑐᑦ ᑲᖑᖁᑎᒋᔮᑕ ᑕᒪᒃᑯᐊᓗ ᑎᕆᒐᓂᐊᑦ ᐊᒻᒪᑦᑕᐅᖅ ᑲᔪᖅᑐᑦ ᑎᕆᒐᓂᐊᑦ (ᐃᓕᖅᑯᓯᖏᑦ, ᐊᕕᒃᑐᖅᓯᒪᐅᓐᓂᖏᑦ, ᓇᓕᐊᓐᓄᑦ ᐊᒥᓲᕆᓂᖏᑕ, ᐱᓇᓱᒃᑕᐅᓂᕆᓲᖏᓄᑦ, ᐱᖅᑯᓯᖃᑎᒌᓄᑦ ᐊᓐᓂᕆᔭᐅᓂᖏᑕ, ᐊᓯᖏᓪᓗ). ᑕᒪᐃᓐᓂᒃ ᓂᕐᔪᑏᒃ ᐊᑑᑎᖃᓪᓚᕆᒃᑑᒃ ᐊᒃᑐᐄᓪᓚᕆᓲᖑᓪᓗᑎᒡᓗ ᖃᐅᔨᓵᕆᔭᐅᓲᑉ ᓄᓇᖏᑕ ᐊᐅᓚᓂᕆᓲᖏᓐᓄᑦ.

ᐅᓇ ᐃᓄᖕᓄᑦ ᖃᐅᔨᒪᓂᕆᔭᖏᓄᑦ ᖃᐅᔨᓇᓱᒍᑖ ᑐᕌᒐᓕᒃ ᑎᕆᒐᓂᐊᓄᑦ ᑲᖑᕐᓄᓪᓗ ᑲᒪᒋᔭᐅᓇᓱᐊᕆᓯᒪᕗᖅ ᑲᑐᔾᔭᐅᓪᓗᓂ ᐃᓗᐃᑦᑑᓂᖅᓴᐅᔪᖅ ᑲᓇᑕᐅᑉ ᒥᕐᖑᐃᖅᓯᕝᕕᓕᕆᔨᒃᑯᑦ ᑲᒪᒋᔭᖓ ᐃᓄᖕᓄᑦ ᖃᐅᔨᒪᓂᕆᔭᖏᓄᑦ ᖃᐅᔨᓇᓱᒍᑖ ᐊᒻᒪᑦᑕᐅᖅ ᓄᓇᓕᒋᔮᑕ ᒥᑦᑎᒪᑕᓕᐅᑉ. ᑕᕝᕘᓇᓕᒫᖅ ᖃᐅᔨᓴᐃᓂᐅᔪᒃᑯᑦ, ᖃᐅᔨᓴᖅᑏᑦ ᑐᕌᖅᑕᖃᕋᓱᐃᓐᓇᖅᐳᑦ ᐱᔫᒥᓴᐃᓂᒻᒥᒃ ᒪᑐᐃᕆᔪᓂᒃ ᐊᑑᑎᖃᓪᓚᕆᒃᑐᒃᑯᑦ ᑕᐅᖅᓰᖃᑎᖃᓐᓂᕐᒥᒃ ᑲᑐᔾᔨᖃᑎᖃᕋᓱᓐᓂᒻᒥᓪᓗ ᐊᑯᓐᓂᕆᔭᖏᒍᑦ ᓄᓇᓕᐅᑉ ᐃᓄᖏᑕ, ᖃᐅᔨᓴᖅᑏᑦ ᐊᒻᒪ ᑲᓇᑕᐅᑉ ᒥᕐᖑᐃᖅᓯᕝᕕᓕᕆᔨᖏᑕ ᐃᖅᑲᓇᐃᔭᖅᑎᖏᓐᓂᒃ. ᑕᒪᐃᓐᓂᒃ ᐃᓂᖅᑲᖅᑐᐃᓐᓇᐅᕗᑦ ᐊᔾᔨᒌᙱᑦᑐᓂᒃ ᑐᑭᓯᐅᒪᓇᓱᖕᓂᕐᒧᑦ ᐱᐅᖅᓱᐊᕆᔭᖃᓐᓂᕐᒥᒡᓗ ᐆᒪᔪᑦ ᐊᐅᓚᓂᕆᓲᖏᒍᑦ ᐃᓕᖅᑯᓯᖅᓱᑦᑎᐊᖅᑐᒥᒃ ᐊᕙᑎᒋᔭᖏᒍᑦ.

ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐊᑐᐃᓐᓇᖅᑕᖃᖅᑐᖅ ᐆᒪᐅᑉ ᖃᐅᔨᓴᐃᓂᐅᑉ ᑲᒪᒋᔭᐅᔫᑉ ᒥᒃᓵᓄᑦ ᒪᒃᐱᒐᖅᑎᒍᑦ ᐊᒡᒋᖅᑐᒃᑯᑦ ᐊᒻᒪᓗ ᖃᐅᔨᓴᖅᑏᑦ ᑎᑎᕋᐅᓯᓕᐊᕆᔮᒍᑦ ᐅᖃᐅᓯᐅᒋᓪᓗᑎᒃ:
Gagnon, C.A. & D. Berteaux. 2009. Integrating traditional ecological knowledge and ecological science: a question of scale. Ecology and Society 14: 19