ᑕᑯᓇᒋᐊᓪᓗᑕ ᕿᒪᒃᑕᑦᑎᓐᓂᒃ...

ᐅᓪᓗᒥ ᑖᒃᑯᐊ ᐆᒪᔪᓂᒃ ᖃᐅᔨᓵᕆᔭᐅᓲᑦ ᒥᑦᑎᒪᑕᓕᐅᑉ ᐊᑭᐊᖓᒍᑦ ᐱᒋᐊᖅᑕᐅᓂᑯᑦ ᐊᕐᕌᒍᐊᒍᑦ 1988 ᑲᑐᔾᔭᐅᓪᓗᓂ ᐊᑯᓐᓂᐊᒍᑦ ᓯᓚᑦᑐᖅᓴᕐᕕᒡᔪᐊᖓᑕ ᓚᕚᓪ (ᑐᑦᑕᕐᕕᒃ ᖃᐅᔨᓵᓄᑦ ᐅᑭᐅᖅᑕᖅᑐᒥ) ᐊᒻᒪᑦᑕᐅᖅ ᑖᒃᑯᐊ ᑲᓇᑕᐅᑉ ᐆᒪᔪᓕᕆᔨᑦ ᐱᔨᑦᑎᕋᖅᑎᖏᑦ (ᑯᐸᒃ ᐊᕕᒃᓯᒪᓂᐊᓄᑦ). ᓯᕗᓂᐊᑕ ᑖᔅᓱᒪᐅᑉ, ᖃᔅᓯᒐᓚᐃᑦ ᐆᒪᔪᓕᕆᔩᑦ ᑎᑭᐅᑎᓯᒪᓪᓗᑎᒃ ᕿᑭᖅᑕᖓᓄᑦ ᐆᒪᔪᖁᑎᖏᓐᓂᒃ ᖃᐅᔨᓵᖃᕋᓱᒃᖢᑎᒃ, ᐱᓗᐊᖅᑐᒥᒃ ᕿᑭᖅᑖᑕ ᑎᖕᒥᐋᕈᓘᔮᓗᖏᓐᓂᒃ. ᐃᓚᖃᖅᖢᓂ ᐱᒋᐋᕆᔾᔪᑕᐅᔪᒥᒃ ᖃᐅᔨᓵᖑᔪ ᔮᔅᓯᓚᓐ ᕚᓐ ᑕᐃᓐ, ᕕᓕᐋᒻ ᕼᐋᓚᓐᑦ ᑐᕉᕆ, ᓗᐄᔅ ᓕᒥᐅ ᐊᒻᒪᓗ ᓚᔅᓕ ᒪ. ᑕᒃ ᑕᐃᔅᓱᒪᓂ 1950 ᐊᕐᕌᒍᖏᓂ, ᐊᒻᒪ ᖃᖓᑦᑎᐋᕋᑖᖑᓂᖅᓴᖅ ᖃᐅᔨᓵᕆᔭᖏᑦ ᔭ. ᑕᒡᓚᔅ ᕼᐊᐃᓚᓐᑦ ᐊᒻᒪᓗ ᕼᐃᐅ ᐳᐃᑦ ᐱᒋᐊᓕᓵᖅᑎᓪᓗᒋᑦ ᐊᕐᕌᒍᖏᑦ 1970. ᑭᓯᐊᓂᓕ, ᐅᓪᓗᒥᐅᔪᖅ ᖃᐅᔨᓵᕆᔭᖅ ᐊᑯᓂᐅᓂᖅᐹᖑᔪᖅ ᐊᖏᓛᖑᓪᓗᓂᓗ ᖃᐅᔨᓵᖃᕈᓯᖏᑦ ᕿᒥᕐᕈᐃᓂᕆᔭᖏᓪᓗ ᕿᑭᖅᑕᕆᔮᒍᑦ.

ᐊᒥᓱᐋᓘᓪᓗᑎᒃ ᑲᖑᕗᑦ ᐊᖏᓂᖅᓴᐃᑦ ᐃᕙᖃᑦᑕᓲᖑᕗᑦ ᕿᑭᖅᑕᖓᒍᑦ ᑖᓐᓇᓗ ᐱᒋᐊᕈᑕᐅᓂᑰᓪᓗᓂ ᖃᐅᔨᓵᕆᔭᐅᔪᓂᒃ. ᐱᔾᔪᑎᒋᓪᓗᒍ ᓱᒃᑲᔪᐋᓗᖕᒥᑦ ᐊᒥᓱᕈᓗᐋᓕᕐᓂᖏᓄᑦ ᐊᕐᕌᒍᖏᒍᑦ 1980 ᐃᓗᐊᓂ, ᐅᓗᕆᐋᒋᔭᐅᓚᐅᖅᑐᖅ ᑖᒃᑯᐊ ᐊᒥᓱᕈᓗᐊᕈᑎᒃ ᓱᕋᓇᐃᑐᐄᓐᓇᓕᕋᔭᒻᒪᑕ ᓇᔪᖅᑕᖓᑕ ᓄᓇᖓᓐᓂᒃ. ᐱᒋᐊᕈᑎᕗᑦ ᑎᑭᓐᓇᓱᐊᒐᐅᓂᑯᑦ ᖃᐅᔨᓵᕆᔭᑦᑎᓐᓄᑦ ᓴᖅᑮᒋᐊᕋᓱᓐᓂᖅ ᐃᓗᐃᑦᑑᔪᒥᒃ ᑐᑭᓯᕚᓪᓕᓪᓗᑎᒍᑦ ᖃᓄᐃᑦᑑᓂᖏᑦ ᑲᖑᐄᑦ ᐊᕐᕌᒍᓕᕇᒃᑐᑦ ᖃᓄᐃᓕᖓᓂᖏᑕᓗ ᐊᕐᕌᒍᒐᓵᓗᓐᓄᑦ−ᓇᓗᓇᐃᒃᑯᓯᖅᑕᐅᖏᓐᓇᓪᓗᑎᒃ ᖃᐅᔨᓵᕆᔭᖃᓪᓗᑎᒃ ᕿᒥᕐᕈᔭᐅᖏᓐᓇᓪᓗᓂ ᓂᒻᒪᔪᒃᑕᐅᕙᓪᓕᐊᔪᑦ ᑲᖑᕐᓄᑦ ᓄᓇᖏᒍᑦ ᓇᔪᓲᖏᑕ. ᑭᓯᐊᓂᓕ, ᐊᕐᕌᒍᒐᓴᑦ ᐊᓂᒍᖅᓯᒪᓕᒻᒪᑕ, ᖃᐅᔨᓵᕆᔭᖃᖅᑐᑦ ᐱᓕᕆᐋᖑᔪᒥᒃ ᐃᑭᖅᑐᓯᒋᐋᖅᓯᒪᔪᐋᓘᒋᕗᖅ ᐃᓚᖃᓕᖅᖢᓂ ᐊᒥᓱᐋᓗᖕᓂᑦ ᐃᓗᓕᒐᓛᓗᖏᑕ ᓄᓇᐅᑉ ᐆᒪᔪᖏᑕ ᐊᐅᓚᕝᕕᒋᓲᕆᔭᖏᓐᓂᒃ. ᕿᑎᕋᖅᑐᖅ ᐃᓱᒪᖃᐅᓯᕆᓕᖅᑕᕗᑦ ᖃᐅᔨᓵᕆᔭᑦᑎᓐᓄᑦ ᕿᒥᕐᕈᖔᓕᖅᖢᒍ ᖃᓄᖅ ᐊᒃᑐᐊᖃᑎᒌᒃᑑᒻᒪᖔᑕ ᐊᑯᓐᓂᖃᐅᓯᖏᓪᓗ ᐱᕈᖅᑐᑦ, ᐱᕈᖅᑐᖅᑏᑦ ᓂᕿᑐᖅᑏᓪᓗ ᐃᓱᒪᒋᓪᓗᒍ ᓄᓇᔾᔪᐊᑉ ᐊᔾᔨᒋᔪᓐᓃᓕᕈᑖ. ᑕᐃᒫᒃ, ᐃᓚᖃᖅᑐᖅ ᑲᖑᕐᓂᒃ, ᑎᕆᒐᓂᐊᕐᓂᒃ ᐊᕕᙵᕐᓂᒡᓗ, ᐊᓯᖏᑦ ᑎᖕᒥᐊᑦ ᐃᕙᓲᑦ ᐊᒻᒪᑦᑕᐅᖅ ᐱᕈᖅᑐᑦ ᓂᒻᒪᔪᒃᑕᐅᓲᑦ ᖃᐅᔨᓵᕆᖃᓯᐅᑎᓕᖅᑕᕗᑦ. ᑐᑭᓯᕚᓪᓕᕈᒪᒋᕗᒍᑦ ᖃᓄᖅ ᑕᒪᒃᑯᐊ ᓂᕆᐅᒋᔭᐅᔪᑦ ᓯᓚᐅᑉ ᐊᔾᔨᒋᔪᓐᓃᓕᕐᓂᖏᑕ ᓴᖅᑭᑎᖅᑕᖏᑦ ᐊᒃᑐᐃᓂᖃᕋᔭᕐᓂᖏᑕ ᓂᔾᔪᑎᖏᓂᒃ ᐱᕈᖅᑐᖏᑕᓗ ᓄᓇᐃᓐᓇᐅᑉ.

ᐊᕐᕌᒍᑦ ᐊᓂᒍᖅᑐᓂᒃ, ᐊᑭᐊᖓᓂ ᖃᐅᔨᓴᕐᕕᒃ ᐱᓕᕆᐋᖑᔪᖅ ᐱᕈᖅᐸᓪᓕᐊᖏᓐᓇᖅᐳᖅ ᐊᖏᓛᖑᖃᑕᐅᓕᖅᖢᓂ ᐊᒻᒪ ᐊᑯᓂᐅᓛᖑᖃᑕᐅᓕᖅᖢᓂ ᐆᒪᔪᑦ ᐊᐅᓚᓂᖏᓄᑦ ᖃᐅᔨᓵᖃᖅᑐᑦ ᓄᓇᕘᒥ. ᑖᓐᓇ ᖃᐅᔨᓴᕝᕕᕗᑦ ᐃᓚᒋᔭᐅᒋᕗᖅ ᖃᔅᓯᐊᔾᔪᓐᓄᑦ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥᑦ ᖃᐅᔨᓴᖅᑏᑦ ᑲᑎᖃᑎᒌᒃᓯᒪᔪᓄᑦ ᐱᖃᓯᐅᔾᔨᔪᖅ ᐅᑯᓂᖓ ArcticNet, ArcticWEB, ᑖᓐᓇ Arctic Wildlife Observatories Linking Vulnerable EcoSystems (ArcticWOLVES), ᑖᓐᓇ Circumpolar Biodiversity Monitoring Programme (CBMP), ᑖᓐᓇ International Network for Terrestrial Research and Monitoring in the Arctic (INTERACT) ᐊᒻᒪᓗ ᑖᓐᓇ Canadian Network of Northern Research Operators (CNNRO).

Greater snow geese - Tim Moser
ᖃᐅᔨᓵᖑᔫᑉ ᓄᓇᖏᑦ