ᐊᑐᖅᑕᑐᖃᕆᔭᖏᑦ ᐊᒻᒪᓗ ᐃᓄᖕᓄᑦ ᐊᑑᑎᖃᐅᓯᖏᑦ

ᐃᓄᐃᑦ ᖃᑕᙳᑎᒌᑦ ᓄᓇᖃᖅᓯᒪᔪᑦ ᒥᑦᑎᒪᑕᓕᐅᑉ ᐊᕙᑖᓂᒃ ᑕᐃᒪᙵᑦ ᐃᓱᒪᒋᔭᖃᖅᓯᒪᓲᑦ ᑲᖑᕐᓂᒃ ᒪᓐᓂᖏᓐᓂᒡᓗ ᓂᕿᒃᓴᑦ ᐊᑐᐃᓐᓇᐅᔪᑦ ᐊᒻᒪ ᐊᓯᒍᐃᔭᕈᑏᑦ, ᑕᒪᐃᑕ ᐃᓅᓯᑐᖃᖏᒍᑦ ᓄᓇᓕᖕᒥᐅᑕᐅᓕᖅᑎᓪᓗᒋᓪᓗ. ᑭᓯᐊᓂᓕ ᑖᒃᑯᐊ ᐃᓚᒌᑦ ᖃᓂᒃᓴᖅᓯᒪᒍᑎᒃ ᑲᖑᐃᑦ ᐃᕙᕝᕕᒋᓲᖓᓄᑦ ᐊᐱᖅᓱᖅᑕᐅᔪᖅ ᐃᓄᒃ ᑕᖕᒫᖃᑦᑕᕐᓂᕕᓂᕐᒥᓄᑦ ᓱᕈᓯᐅᓪᓗᓂ, ᑖᒃᑯᐊ ᐊᕐᓇᑦ/ᐊᖑᑎᑦ ᒪᒪᖅᓴᓐᓂᖅᓴᐅᓪᓗᑎᒃ ᑲᖑᕐᓂᒃ ᒪᓐᓂᖏᓂᒡᓗ ᒪᒪᕆᔮᓗᒋᓪᓗᓂᔾᔪᒃ.

ᓯᕗᓂᐊᑕ ᓄᓇᓕᒻᒥᐅᑕᕈᓐᓂᖏᑕ (ᐊᒻᒪᓗ ᖁᐊᖅᓰᕕᑦ ᑎᑭᓯᒪᓕᖅᑎᓪᓗᒋᑦ), ᑲᖑᐃᑦ ᐱᔭᕆᔭᐅᒑᖓᒥᒃ ᓂᕆᔭᐅᑲᐅᑎᒋᓪᓗᑎᒃ ᐃᒍᓇᓚᐅᖅᑎᓐᓇᒋᑦ. ᑭᓯᐊᓂᓕ, ᐃᓚᖏᑦ ᖃᑕᙳᑎᒌᑦ ᓂᒃᑯᑦᑏᓪᓗᑎᒃ ᕿᖕᓂᓯᕙᒃᖢᑎᒡᓗ ᑲᖑᓐᓂᒃ ᓂᕆᔭᐅᓛᖅᖢᑎᒃ ᑭᖑᓂᐊᒍᑦ. ᐃᓄᓪᓚᕆᒃᑎᑐᑦ, ᑲᖒᑉ ᓱᓇᒃᑯᑖᖏᑦ ᐊᑐᖅᑕᐅᕙᓚᐅᖅᑐᑦ ᑐᐱᖃᖅᑎᐅᔪᓄᑦ. ᐃᓴᕈᖏᑦ ᓴᓂᐅᑕᐅᓪᓗᑎᒃ, ᐊᒥᖓ ᓱᓗᖏᓪᓗ ᒥᖅᓱᖅᑕᐅᓪᓗᑎᒃ ᐊᓪᓕᓂᓕᐊᕆᔭᐅᓪᓗᑎᒃ, ᖁᓂᒍᖓ ᐊᑐᖅᑕᐅᓪᓗᓂ ᐊᓐᓄᕌᓄᑦ ᐃᓗᓪᓕᕈᑕᐅᓪᓗᓂ, ᐃᓯᒐᔮᖏᑦ ᐴᑲᑕᓕᐊᖑᔪᓐᓇᖅᖢᑎᒃ. ᑐᖅᖢᖓ ᐊᑐᖅᑕᐅᕙᓚᐅᕆᕗᖅ ᓱᕈᓯᓄᑦ ᓂᐱᖃᐅᑕᐅᓪᓗᓂ ᓱᐴᒐᓕᐊᕆᓪᓗᒍ> ᐅᓪᓗᒥᐅᔪᖅ, ᐃᓚᖏᑦ ᐃᒡᓗᖃᖅᑏᑦ ᓱᓕ ᐊᑐᓲᑦ ᑲᖒᑉ ᐃᓴᕈᖏᓐᓂᒃ ᓴᓂᐅᑎᒋᓪᓗᒋᑦ ᐅᕝᕙᓗ ᑕᑯᒥᓇᐅᑎᓕᐊᕆᓪᓗᒋᑦ ᐊᑭᙵᒧᑦ ᐊᒻᒪᓗ ᖁᓂᒍᖏᑦ ᓱᓕ ᐊᑐᖅᑕᐅᓲᑦ ᐅᖅᑰᓴᐅᑎᒋᔭᐅᓪᓗᑎᒃ ᐊᓐᓄᕌᑦ ᐃᑭᐊᖅᖠᓕᖅᑕᐅᓪᓗᑎᒃ.

ᑕᐃᒪᓕ ᑲᖑᐃᑦ ᑎᑭᕋᓯᒋᐊᕐᓂᖏᑦ ᓇᓗᓇᐃᖅᓯᓪᓚᑦᑖᕐᒪᑦ ᑕᑯᒃᓴᐅᔪᒥᒃ ᐅᐱᕐᖔᖅ ᑎᑭᓯᒪᓕᕐᓂᐊᓂᒃ ᐅᑭᐅᙳᔾᔮᕈᓐᓃᖅᑐᖅ ᐊᒃᓱᕈᓐᓇᙱᓚᐅᑲᓕᓐᓂᖓ, ᑯᖑᐃᑦ ᐃᓄᖕᓄᑦ ᖃᑕᖑᑎᒌᓄᑦ ᐊᒃᑐᐋᓪᓚᕆᒃᑐᒥᒃ ᐃᓅᓂᕐᒥᓄᑦ ᐊᓐᓂᕆᔭᐅᓂᖃᓲᑦ, ᐊᒃᑐᐊᔪᖅ ᓂᕆᐅᒋᔭᖃᕈᓐᓇᓕᕐᓂᒻᒥᑕ ᓯᕗᓂᐊᓂᒃ ᑎᑭᑎᓪᓗᒋᑦ ᑲᖑᐃᑦ.

ᐊᐅᓚᓂᕆᓲᖏᑦ ᐊᖏᓂᖅᓴᑦ ᑲᖑᐃᑦ

ᐃᓴᐅᔪᑦ ᐊᐅᓚᓂᖏᑦ

ᐊᐱᖅᓱᒐᐅᔪᑦ ᐃᓗᐊᓂ ᑖᔅᓱᒪ ᐃᓄᖕᓄᑦ ᖃᐅᔨᒪᓂᕆᔭᖏᓄᑦ ᖃᐅᔨᓇᓱᒍᑖ ᐊᐱᕆᔭᐅᓪᓗᑎᒃ ᐅᖃᐅᓯᖃᕈᒪᒍᑎᒃ ᖃᖓᒃᑯᑦ ᑲᖑᐃᑦ ᐃᓴᐅᓕᓲᖑᒻᒪᖔᑕ, ᐱᓗᐊᖅᑐᒥᒃ ᓇᒦᖢᑎᒃ ᓄᓇᒥᒃ ᐃᓴᐅᔭᖅᑐᓲᖑᓂᖏᑕ. ᖁᓖᑦ ᑎᓴᒪᓪᓗ ᑭᐅᔪᑦ ᐅᓂᒃᑳᖃᖅᖢᑎᒃ. ᑖᒃᑯᓇᙵᑦ, ᐅᓄᕐᓂᖅᓴᑦ ᐅᓂᒃᑳᖅᖢᑎᒃ ᑲᖑᐃᑦ ᐃᕙᙱᑦᑐᑦ ᐃᓴᐅᖑᖅᑳᓲᑦ ᑕᒪᒃᑯᓇᙵᑦ ᑲᖑᐊᕋᖃᖅᑐᓂᒃ.

ᐅᖃᐅᓯᖃᓕᕋᒥᒃ ᑐᕌᖓᓂᖅᓴᓂᒃ ᑐᑭᓯᐅᒪᔾᔪᑎᓂᒃ ᖃᖓᒃᑯᑦ ᐅᓪᓗᖃᓲᖑᓂᖏᑕ ᐃᓴᐅᔪᑦ, ᐊᕐᕕᓂᓖᑦ ᑐᑭᓯᐅᒪᑎᑦᑎᔪᑦ ᐅᖃᐅᓯᖃᖅᖢᑎᒃ ᐃᕙᓯᒪᙱᑦᑐᑦ ᑲᖑᐃᑦ ᐃᓴᐅᓕᓲᑦ ᔫᓂᐅᑉ ᓄᕐᖑᐊᒍᑦ, ᐃᓚᖓᓪᓗ ᐅᖃᖅᖢᓂ ᖃᓂᒃᓴᕐᓂᖅᓴᖅ ᔪᓚᐃᑦ ᕿᑎᖓᓄᑦ. ᖁᓕᐅᙱᑦᑐᑦ ᑖᒃᑯᓇᙵᑦ ᖁᓖᑦ ᑎᓴᒪᓪᓗ ᑐᑭᓯᐅᒪᑎᑦᑎᔪᓂᒃ ᐊᐱᖅᓱᖅᑕᑦ ᐊᖏᖃᑎᒌᒃᖢᑎᒃ ᑕᒪᒃᑯᐊ ᐃᓴᐅᖅᑲᓐᓂᖏᑕ ᐃᕙᙱᑦᑐᑦ ᑲᖑᐃᑦ ᔪᓚᐃ ᑕᖅᑭᖓᓂ. ᒪᕐᕉᒃ ᐊᐱᖅᓱᖅᑕᐅᔫᒃ ᐋᒡᒐᓯᒥ ᐊᐱᖅᓱᖅᑕᕕᓃᑦ ᐅᖃᖅᖢᑎᒃ ᑕᕝᕙᒎᖅ ᐃᕙᙱᑦᑐᑦ ᑲᖑᐃᑦ ᑎᖏᔪᓐᓇᖅᓯᓕᓵᖅᑐᑦ, ᑖᒃᑯᐊ ᑲᖑᐊᕋᖃᖅᑐᑦ ᐃᓴᐅᓕᓵᖅᑎᓪᓗᒋᑦ.

ᐃᕙᔪᓄᑦ ᑲᖑᕐᓄᑦ, ᖁᓖᑦ ᐊᐱᖅᓱᖅᑕᓂᒃ ᐅᖃᐅᓯᖃᖅᖢᑎᒃ ᑖᒃᑯᐊ ᐃᓴᐅᓕᑕᐃᓐᓇᓲᑦ ᑲᖑᐊᕋᖏᑦ ᐊᖏᒡᓕᐋᔾᔪᓕᕌᖓᑕ ᒪᓕᒃᓴᕈᓐᓇᑦᑎᐊᓕᖅᑎᓪᓗᒋᑦ. ᐃᓚᖓ ᐊᐱᖅᓱᖅᑕᖅ ᐅᖃᖅᖢᓂ ᔪᓚᐃᑉ ᕿᑎᐸᓗᐊᓂ ᐱᒋᐊᓲᑦ. ᐊᑕᐅᓯᖅ ᐅᖃᖅᖢᓂ ᔪᓚᐃᑉ ᐃᓱᖅᐸᓯᐊᒍᑦ ᐊᐱᖅᓱᖅᑕᖅ ᑲᖑᐊᕋᓖᑦ ᐃᓴᐅᓂᐊᓕᖅᑐᑦ, ᐃᓚᖓᓪᓗ ᐊᐱᖅᓱᖅᑕᖅ, ᐅᖃᕆᓪᓗᓂ ᔪᓚᐃᑉ ᐃᓱᖓᒍᑦ ᐊᐱᖅᓱᖅᑕᐅᓪᓗᓂ, ᑖᒃᑯᐊ ᑲᖑᐊᕋᓖᑦ ᐃᓴᐅᕙᓪᓕᐊᓂᖏᑕ.

ᐱᔾᔪᑎᒋᓪᓗᒋᑦ ᐃᓴᐅᕝᕕᐅᓲᑦ ᓄᓇᖏᑦ ᑲᖑᐊᕋᖃᖅᑐᓄᑦ ᐊᒻᒪᓗ ᐃᕙᓂᑰᙱᑦᑐᓄᑦ ᑲᖑᕐᓄᑦ, ᐃᓚᖏᑦ ᐊᐱᖅᓱᖅᑕᑦ ᓇᓗᓪᓗᑎᒃ ᑕᒪᒃᑯᐊ ᐃᕙᓂᑰᙱᑦᑐᑦ ᓄᓇᒥᒃ ᓂᕈᐊᓲᖑᒻᒪᖔᖏᑕ ᐃᓴᐅᖑᑎᓪᓗᒋᑦ, ᑭᓯᐊᓂᓕ ᐃᓚᖏᑦ ᐅᖃᕆᓪᓗᑎᒃ ᑲᖑᐊᕋᓖᑦ ᐃᕙᓂᑰᙱᑦᑐᓪᓗ ᑲᖑᐃᑦ ᑲᑎᙵᔪᓐᓇᙱᑦᑐᑦ ᐃᓴᐅᓪᓗᑎᒃ, ᐊᑕᐅᓯᖅ ᐃᓄᒃ ᓇᓗᓇᐃᖅᓯᓪᓗᓂ ᓇᓗᓂᕐᒥᓂᒃ ᑕᒪᒃᑯᐊ ᑲᑎᖓᓲᖑᒻᒪᖔᖏᑕ. ᐊᑕᐅᓯᖅ ᐊᐱᖅᓱᖅᑕᖅ ᐅᖃᖅᖢᓂ ᑕᒪᐃᓐᓂᒃ ᑲᖑᐃᑦ ᐃᕙᓂᑯᑦ ᐃᕙᓯᒪᙱᑦᑐᓪᓗ ᐃᓴᐅᖑᓲᑦ ᒥᑦᑎᒪᑕᓕᐅᑉ ᐊᑭᐊᖓᓐᓂ. ᐃᓚᖏᑦ ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᐅᖃᐅᓯᖃᖅᖢᑎᒃ ᐃᓚᖏᑦ ᑲᖑᐊᕋᓖᑦ ᑕᓯᖃᖅᑐᓂᒃ ᑲᑎᖓᓕᓲᑦ ᐃᓴᐅᓂᕐᒥᓂᒃ ᑕᒪᒃᑯᐊᓗ ᐃᕙᓂᑰᙱᑦᑐᑦ ᓄᓇᑐᓂᖅᓴᒥᒃ ᐃᓴᐅᓲᑦ, ᑭᓯᐊᓂᓕ ᐊᑕᐅᓯᖅ ᐊᖑᓇᓱᒃᑎ ᐅᓂᒃᑳᕆᔭᖃᓚᐅᕆᓪᓗᓂ ᑲᖑᐊᕋᓖᑦ ᐃᓴᐅᖑᔪᑦ ᓄᓇᑐᔪᒦᑦᑐᓐᓇᓐᓂᖏᑕ.

ᐊᐱᕆᔭᐅᒐᒥᒃ ᐊᓯᔾᔨᖅᓯᒪᓕᕐᒪᖔᖏᑕ ᐃᓴᐅᕝᕕᐅᖃᑦᑕᖅᑐᑦ ᓄᓇᖏᑦ ᑲᖑᕐᓄᑦ ᐊᑐᖅᑕᑦ ᑕᐃᒪᙵᑦ ᒪᒃᑯᓚᐅᕈᑖᑕ, ᐅᓄᕐᓂᖅᓴᑦ ᐅᖃᐅᓯᖃᖅᖢᑎᒃ ᐊᓯᔾᔨᖅᓯᒪᙱᑦᑐᖅ ᐅᕝᕙᓘᓐᓃᑦ ᐊᐱᖅᓱᖅᑕᐅᔪᖅ ᖃᐅᔨᒪᓇᓂ ᑕᒪᓐᓇ ᓄᓇᒋᓲᖓ ᐃᓴᐅᔪᓄᑦ ᐊᓯᔾᔨᖅᓯᒪᓕᕐᒪᖔᑦ.

ᐊᐅᓪᓛᓐᓂᖏᑦ: ᐅᓪᓗᕆᓲᖏᑦ ᐅᑭᐊᒃᓵᒃᑯᑦ ᐊᐅᓪᓛᖅᑎᓪᓗᒋᑦ, ᐊᖅᑯᑎᒋᓲᖏᑦ ᐊᒻᒪ ᑕᖃᐃᖅᓯᕝᕕᐅᓲᑦ

ᐊᐱᕆᔭᐅᒐᒥᒃ ᑲᖑᐃᑦ ᐊᐅᓪᓛᖅᑕᕐᓂᕆᓲᖏᓄᑦ, ᐅᓄᕐᓂᖅᓴᑦ ᐊᐱᖅᓱᖅᑕᑦ ᐅᓂᒃᑳᖃᓚᐅᖅᑐᑦ ᖃᐅᔨᒪᔭᒥᓂᒃ. ᐅᓂᕐᓂᖅᓴᑦ ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᐊᐱᖅᓱᖅᑕᐅᔪᑦ ᐊᖏᖃᑎᒌᒃᖢᑎᒃ ᐅᑭᐊᒃᓵᒃᑯᑦ, ᑲᖑᐃᑦ ᐊᐅᓪᓛᓕᓲᑦ ᐃᓱᓕᓯᒋᐊᕋᒥ ᐋᒡᒐᓯ ᐱᒋᐊᓐᓂᐊᓄᑦ ᓯᑎᐱᕆᐅᑉ, ᐅᕝᕙᓘᓐᓃᑦ ᑎᖏᔪᓐᓇᖅᓯᔪᐃᓐᓇᐅᔭᕌᖓᒥᒃ ᑲᖑᐊᕋᕆᔭᖏᑦ.

ᖁᓖᑦ ᑕᓪᓕᒪᓪᓗ 16−ᖑᔪᓂᒃ ᐊᐱᖅᓱᖅᑕᐅᔪᓂᒃ ᐅᖃᐅᓯᖃᕆᓪᓗᑎᒃ ᑖᒃᑯᐊ ᑲᖑᐃᑦ ᐊᐅᓪᓛᓕᓲᑦ ᐃᓚᒌᒃᓱᖅᖢᑎᒃ, ᑭᓯᐊᓂ ᐊᓯᖏᑦᑕᐅᖅ ᐅᒃᐱᕆᔭᖃᖅᖢᑎᒃ ᑲᑎᖅᓱᐋᓕᓲᑦ ᐅᖅᑯᒨᓕᕌᖓᒥᒃ ᐱᓗᐊᖅᑐᖅ ᖃᓪᓗᓈᑦ ᓄᓇᖏᓐᓄᑦ. ᐊᖅᑯᓵᒐᑦ ᓄᓇᐃᑦ ᓇᓗᓇᐃᖅᑕᐅᓪᓗᑎᒃ ᓄᓇᙳᐊᑎᒍᑦ, ᑕᒪᒃᑯᐊᓗ ᐊᔾᔨᐸᓗᒋᓪᓗᓂᔾᔪᒃ ᑎᑎᖅᑕᐅᓂᑰᔪᑦ ᐅᐱᕐᖔᒃᑯᑦ ᐊᒻᒪᓗ ᐅᑭᐊᒃᓵᒃᑯᑦ ᐊᖅᑯᓵᖅᑕᖏᑕ ᐃᓂᖏᑦ, ᒪᓕᒃᖢᒍ ᐅᐊᖕᓇᒥᑦ−ᓂᒋᕐᒧᑦ ᐱᒋᐊᖅᖢᒍ ᓇᑦᑎᓐᓈᓗᐊᑕ ᒥᑦᑎᒪᑕᓕᐅᑉ ᐊᑭᐊᖓᓂ ᕿᑭᖅᑖᓘᑉ ᐅᐊᖕᓈᓄᑦ. ᐊᖅᑯᓵᕝᕕᐅᑦᑕᖅᑐᑦ ᑲᖑᓐᓄᑦ ᑕᖃᐃᖅᓯᖅᖢᑎᒃ ᓂᒻᒪᔪᒃᖢᑎᒡᓗ ᐊᐅᓪᓛᓕᕌᖓᒥᒃ ᑎᑎᕋᖅᑕᐅᒋᓪᓗᑎᒃ ᓇᓗᓇᐃᖅᑕᐅᓐᓂᕌᖓᑕ.

ᓇᒧᙵᖅᐸᓪᓕᐊᓂᖏᑦ ᐊᒥᓲᓂᖏᑕ ᐊᒻᒪᓗ ᐊᕕᒃᓯᒪᐅᓐᓂᕆᓲᖏᓂᖏᑕ

ᐅᖃᐅᓯᖃᓕᕐᒪᑕ ᐊᒃᑎᒋᓂᐊᓄᑦ ᑕᑯᔭᐃᓐᓇᕆᓪᓗᒋᑦ ᑲᖑᐃᑦ ᐊᒥᓲᓂᕆᓲᖏᑦ ᖃᓕᒋᔮᒍᑦ ᒥᑦᑎᒪᑕᓕᐅᑉ ᓄᓇᖏᑕ, ᑭᐅᔭᑦ ᐊᑕᐅᓯᐅᓚᐅᙱᑦᑐᑦ ᐊᑯᓐᓂᐊᒍᑦ ᖁᓖᑦ ᐱᖓᓱᓪᓗ ᐃᓐᓇᑐᖃᑦ ᐊᒻᒪ ᐊᖑᓇᓱᒃᑏᑦ ᐅᖃᐅᓯᒃᓴᖃᓚᐅᖅᑐᑦ ᑕᒪᑐᒧᖓ. ᑎᓴᒪᑦ ᐅᖃᖅᖢᑎᒃ ᐊᓯᔾᔩᓇᓱᒋᓗᐊᓐᓇᒍ ᐊᒥᓲᓂᖏᑦ, ᒪᕐᕉᒃ ᑕᑯᔭᐃᓐᓇᕆᓪᓗᒋᑦ ᐊᒥᓱᕈᖅᑐᒥᒃ ᓅᓐᓂᖃᓕᖅᑐᑦ, ᒪᕐᕉᒃ ᐅᐸᓲᒥᓂᒃ ᑲᖑᐃᕈᑎᓂᕋᐃᓕᖅᖢᑎᒃ ᐊᒻᒪᓗ ᑕᓪᓕᒪᑦ ᐅᖃᖅᖢᑎᒃ ᖃᐅᔨᒪᙱᓐᓂᒻᒥᓄᑦ ᐅᕝᕙᓘᓐᓃᑦ ᕿᒥᕐᕈᔭᒥᒍᑦ ᑕᐅᑐᙳᐊᕋᑎᒃ ᓇᓕᐊᓐᓅᕐᒪᖔᑦ ᐊᒥᓲᓂᕆᔭᖏᑦ. ᑎᓴᒪᑦ ᖁᓕᑦ ᐱᖓᓱᓂᓪᓗ ᐅᖃᐅᓯᖃᕆᓪᓗᑎᒃ ᐊᔾᔨᒌᖃᑦᑕᖏᓐᓂᐊᑕ ᐊᒥᓲᓂᖏᑦ ᐅᑎᓲᑦ ᑕᐅᕗᖓ ᐊᕐᕌᒍᒥᑦ ᐊᕐᕌᒍᒧᑦ. ᑭᓯᐊᓂᓕ, ᐅᓄᕐᓂᖅᓴᑦ ᐊᖏᖃᑎᒌᒃᖢᑎᒃ ᖃᖑᐃᑦ ᑕᐃᔅᓱᒪᙵᓂᑦ ᐊᕗᑎᓯᒪᓂᖅᓵᐅᓕᖅᑐᑦ ᓇᔪᖅᐸᓚᐅᖅᑕᒥᓂᒃ ᑲᑎᙵᔪᐋᓘᔪᓐᓃᓕᖅᖢᑎᒃ ᐊᑭᐊᖓᓂ ᑭᓯᐊᓂᓕ ᐊᓯᖏᓄᑦ ᓅᑉᐸᓪᓕᐊᓯᒪᓕᖅᑐᑦ. ᐃᓚᖓᑦ ᐃᓐᓇᑐᖃᖅ ᐅᖃᐅᓯᖃᖅᖢᓂ ᐅᔾᔨᕆᔭᖃᓗᐊᖅᓯᒪᖏᓐᓂᐊᓂᒃ ᓇᒧᙵᓲᖑᓂᖏᓄᑦ ᑲᖑᐃᑦ.

ᐅᖃᐅᓯᐅᑎᓪᓗᒍ ᑲᖑᐃᑦ ᒥᑦᑎᒪᑕᓕᐅᑉ ᐊᑭᐊᖓᓃᓲᑦ ᑐᕌᖓᓪᓚᕆᒃᑐᒥᒃ, ᑎᓴᒪᐅᔪᖅᑐᑦ ᑖᒃᑯᓇᙵᑦ ᖁᓖᑦ ᑕᓪᓕᒪᓪᓗ ᐊᐱᖅᓱᒐᓂᒃ ᐅᖃᐅᓯᖃᖅᖢᑎᒃ ᐅᓄᙱᓐᓂᖅᓴᐅᓕᕐᓂᖏᑕ ᑲᖑᐃᑦ ᓇᔪᖅᑕᖃᓲᑦ ᑕᐅᕙᓂ ᐃᕙᕕᒡᔪᐊᕝᕕᐊᓂ ᐃᓄᖃᓕᕐᒪᑦ. ᑕᑯᒃᓴᕈᐃᓇᓱᒃᖢᑎᒃ, ᑎᓴᒪᑦ ᐅᖃᐅᓯᖃᖅᖢᑎᒃ ᑲᖑᐃᑦ ᓇᒥᕈᓘᔭᖅ ᓇᓂᔭᒃᓴᐅᕙᓚᐅᖅᓯᒪᔪᑦ ᕿᑭᖅᑕᖓᓐᓂᒃ. ᐊᕐᕕᓂᓖᑦ ᑖᒃᑯᓇᙵᑦ ᖁᓖᑦ ᑕᓪᓕᒪᓪᓗ ᐅᖃᕆᓪᓗᑎᒃ ᑲᖑᐃᑦ ᐅᓄᓗᐋᕐᓂᑯᒧᑦ ᑕᐃᔅᓱᒪᓂᑐᖃᖅ ᑲᑎᙵᓪᓗᑎᒃ ᐊᐳᑎᐅᖅᑰᔨᓪᓗᑎᒃ ᓄᓇᖓᒍᑦ, ᑕᒪᓐᓇ ᑕᑯᔭᐅᔪᓐᓇᐃᓪᓕᔪᖅ ᐊᑭᐊᖑᓂ ᐅᓪᓗᒥᐅᔪᖅ. ᐊᐱᖅᓱᖅᑕᐅᔪᑦ ᐅᖃᐅᓯᖃᕆᓪᓗᑎᒃ ᑕᒪᒃᑯᐊ ᑲᖑᐃᑦ ᓅᓯᒪᓕᖅᑐᑦ ᐱᖓᓐᓇᖔᖓᓄᑦ ᐊᒻᒪᓗ ᓄᓇᑐᓂᖅᓴᓄᑦ ᕿᑭᖅᑕᕆᔭᖓᑕ. ᐊᔾᔨᒌᙱᑦᑐᓂᒃ ᓄᓇᐅᔪᒃᑯᑦ, ᐅᓄᖅᓯᓕᖅᑐᓂᒃ ᐅᓄᕈᓐᓃᓕᖅᑐᓂᒡᓗ ᖃᐅᔨᔭᖃᖅᓯᒪᕗᑦ.

ᒪᓕᒃᖢᒋᑦ ᐃᓚᖏᑦ ᐊᐱᖅᓱᐋᖑᔪᑦ, ᐊᓯᔾᔨᓐᓂᐅᔪᑦ ᐅᔾᔨᕆᔭᐅᓯᒋᐊᓐᓂᑯᑦ ᑖᒃᑯᐊ ᖃᐅᔨᓴᖅᑏᑦ ᐆᒪᔪᓕᕆᔨᑦ ᑲᖑᕐᓂᒃ ᐸᒡᕕᓵᖃᖃᑦᑕᓕᕐᒪᑕ ᒥᑦᑎᒪᑕᓕᐅᑉ ᐊᑭᐊᖓᒍᑦ. ᑕᒪᓐᓇ ᐱᒋᐊᓐᓂᑯ ᐊᕐᕌᒍᒋᑦ 1980 ᐱᒋᐊᓕᓵᖅᑎᓪᓗᒋᑦ. ᒪᕐᕉᒃ ᐊᐱᖅᓱᖅᑖᒃ ᑭᐅᒋᓪᓗᑎᒃ ᖃᖓᑦᑎᐊᕋᑖᖅ ᐊᓯᔾᔨᖅᓯᒪᔪᑦ, ᐊᒻᒪᓗ ᐊᑕᐅᓯᖅ ᑕᐃᑲᙵᓂᑦ 1970 ᐊᕐᕌᒍᖏᓐᓂᒃ, ᖁᑭᐅᑏᑦ ᓯᑭᑑᓪᓗ ᐊᑐᐃᓐᓇᐅᓯᒋᐊᖅᑎᓪᓗᒋᑦ ᐃᓄᓕᒫᓄᑦ. ᑭᖑᓪᓕᖅᐹᒥᒡᓗ, ᒪᕐᕉᒃ ᖁᓕᐅᔪᓂᒃ ᐊᐱᖅᓱᖅᑕᓂᒃ ᐅᔾᔨᕆᔭᖃᖅᓯᒪᔪᑦ ᑲᖑᐃᑦ ᐊᒥᓲᓂᖏᑕ ᐊᔾᔨᒋᔪᓐᓃᓐᓂᖓᑕ ᓱᕈᓯᐅᔾᔪᓯᕕᓂᐊᓂᒃ (ᐃᓚᖓ ᐱᒋᐊᖅᑐᕕᓂᖅ ᐊᕐᕌᒍᑦ 1940 ᐊᕐᕌᒍᖏᒍᑦ ᐊᒻᒪᓗ 1950), ᐃᓐᓇᐅᓂᖅᓴᖅ ᐅᓄᖅᓯᓂᕋᐃᓪᓗᓂ ᑖᓐᓇ ᑭᖑᓪᓕᐅᔪᖅ ᐅᖃᖅᖢᓂ ᓄᓇᕕᓂᖏᓐᓂᒃ ᐅᓄᕈᓐᓃᕐᓂᖅᓴᑦ.

ᐆᒪᔪᓕᕆᔨᑦ ᖃᐅᔨᓵᖃᖅᖢᑎᒃ ᐊᑐᖃᑦᑕᓐᓂᖏᑕᓗ ᖁᓕᒥᒎᓂᒃ ᐱᓕᕆᐋᖃᖅᑎᓪᓗᒋᑦ ᐸᒡᕕᓵᖃᓗᐊᕆᔭᐅᓪᓗᑎᒃ ᐱᔾᔪᑕᐅᓇᓱᒋᔭᐅᓪᓗᑎᒃ ᐊᓯᔾᔨᖅᐸᓪᓕᐊᔾᔪᑎᔪᓄᑦ. ᐅᓄᕐᓂᖅᓴᓄᑦ ᐊᖑᓇᓱᒃᑕᐅᓕᕋᒥᒃ ᐊᒻᒪ ᓄᑖᖑᓂᖅᓴᓂᒃ ᐊᖑᓇᓲᑎᓂᒃ ᐊᑐᓕᕐᓂᐊᑕ ᐃᓄᐃᑦ ᓲᕐᓗ ᖁᑭᐅᑏᑦ ᓯᑭᑑᓪᓗ ᐱᔾᔪᑎᒃᑲᓐᓂᐅᓇᓱᒋᔭᐅᓪᓗᑎᒃ, ᐊᒻᒪᓗ ᐅᓄᖅᓯᒋᐊᕐᓂᖏᓄᑦ ᖃᖓᑕᓲᑦ ᖃᖓᑕᑲᑕᓲᑦ ᒥᑦᑎᒪᑕᓕᐅᑉ ᐊᕙᑖᒍᑦ ᑎᕆᒐᓂᐊᓪᓗ ᐊᒥᓲᓂᖅᓴᐅᓕᕐᓂᖏᓄᑦ ᒥᑭᒋᐊᕋᓱᒃᑕᐅᔪᓐᓃᖅᑎᓪᓗᒋᑦ.

ᑕᐃᒪᓕ ᓱᓕᓂᖏᓄᑦ ᑲᑎᒪᑎᑦᑎᓪᓗᑕ ᑲᑭᐊᒃᑐᒥᒃ ᑐᑭᓯᐅᒪᔾᔪᑎᓂᒃ ᐱᓯᒪᔪᒪᓪᓗᑕ ᖃᓄᑎᒋ ᐊᓯᔾᔨᖅᓯᒪᓂᖏᓄᑦ ᑲᖑᐃᑦ ᐊᒥᓲᓂᕆᔭᖏᑦ, ᐊᖏᖃᑎᒌᒃᖢᑎᒃ ᑕᑯᔭᐃᓐᓇᕆᓪᓗᒋᑦ ᓇᒥᓕᒫᖅ, ᑲᖑᐃᑦ ᐅᓄᖏᓐᓂᖅᓴᐃᙱᑦᑑᒐᓗᐊᑦ, ᑭᓯᐊᓂᓕ ᐊᕙᑎᓯᒪᓂᖅᓴᐅᓕᖅᑐᑦ ᐸᒡᕕᓴᒃᑕᐅᓇᖏᓐᓂᖅᓴᐅᔪᓂᒃ ᓄᓇᓂᒃ.

ᐃᓄᐃᑦ ᖃᐅᔨᒪᓂᖃᕝᕕᖏᑦ ᑎᕆᒐᓂᐊᑦ ᒥᒃᓵᓄᑦ