ᐊᕐᕋᒍᖏᑦ 2000-ᒥ ᐱᒋᐊᓕᓵᕐᓂᖏᓐᓂ, ᖃᐅᔨᓴᖅᑏᑦ ᐱᓕᕆᕙᒃᑐᑦ ᒥᑦᑎᒪᑕᓕᐅᑉ ᕿᑭᖅᑕᖓᓂ ᐅᔾᔨᕈᓯᓕᓚᐅᖅᑐᑦ ᐱᓕᕆᖃᑎᖃᑦᑎᐊᕐᓂᖅᓴᐅᔭᕆᐊᖃᕐᓂᕐᒥᓂᒃ ᐃᓄᖕᓂᒃ ᒥᑦᑎᒪᑕᓕᖕᒥ, ᐃᓄᐃᑦ ᐊᐅᓪᓚᖃᑦᑕᐃᓐᓇᕐᒪᑕ ᐊᖑᓇᓱᒋᐊᖃᑦᑕᐃᓐᓇᖅᓲᖑᓪᓗᑎᒃ ᕿᑭᖅᑕᖓᓂ ᑕᐃᒪᖓᓕᒫᖅ. ᑕᒪᓐᓇ ᐱᓕᕆᖃᑎᒌᑦᑎᐊᕆᐊᖃᕐᓂᖅ ᐃᓕᑕᕆᔭᐅᓚᐅᖅᑐᖅ ᐊᑐᖅᑕᐅᓂᖏᓐᓂ ᐃᓄᐃᑦ ᖃᐅᔨᒪᓂᖏᓐᓂᒃ ᐱᓕᕆᐊᖑᔪᑦ ᑕᐃᒃᑯᓂᖓ ᑲᖑᓕᕆᓂᕐᒥᒃ ᐊᒻᒪᓗ ᑎᕆᒐᓂᐊᕐᓂᖅ ᐱᔾᔪᑎᖃᖅᑐᓂᒃ ᐃᓚᒋᔭᐅᓪᓗᑎᒃ ᐃᓐᓇᑐᖃᐃᑦ ᐊᒻᒪᓗ ᐊᖑᓇᓱᒃᑏᑦ ᒥᑦᑎᒪᑕᓕᖕᒥ, ᐊᕐᕋᒍᓂ 2004-ᒥ 2007-ᒧᑦ, ᑲᑎᒪᕕᐅᖃᑦᑕᕆᐊᓕᓚᐅᖅᑐᓂᒃ ᐃᓐᓇᑐᖃᕐᓄᑦ-ᒪᒃᑯᒃᑐᓄᓪᓗ ᓄᓇᒦᖃᑕᖅᓱᑎᒃ, ᑕᐃᒃᑯᑎᒎᓇᓗ ᖃᐅᔨᓴᖅᑏᑦ ᐱᓕᕆᖃᑦᑎᐊᕐᓂᖅᓴᐅᔪᓐᓇᖅᓯᓚᐅᖅᑐᓂᒃᐃᓄᖕᓂᒃ. ᐊᕐᕋᒍᒥᒃ 2005-ᒥᓂᒃ ᐱᒋᐊᖅᓱᑎᒃ ᐊᕐᕋᒍᑕᒫᖑᓕᖅᑐᓂᓗ ᒪᕐᕈᖕᓂᒃ ᐱᖓᓱᓂᒡᓗᓐᓃᑦ ᑕᐃᒪᖓᓂᒃ, ᓯᕗᓕᐅᖅᑎᐅᖏᑦ ᖃᐅᔨᓴᖅᑏᑦ ᐱᓇᓱᐊᑦᑎᐊᖃᑦᑕᖅᓯᒪᔪᑦ ᐋᕿᐅᒪᑎᑦᑎᒋᐊᕐᓂᖅ ᐅᑭᐅᒃᑯᑦ ᐃᓕᓐᓂᐊᖅᑎᑦᑎᖃᑕᕐᓂᖅ ᑲᑎᒪᑎᑦᑎᖃᑕᖅᓱᑎᒃ ᓄᓇᖓᓐᓂ ᐅᖃᐅᓯᐅᔪᓐᓇᕐᓂᕐᒪᑕ ᐱᓕᕆᐊᕆᔭᖏᑦ ᐊᒻᒪᓗ ᒪᑐᐃᖓᔪᒥᒃ ᐅᖃᐅᓯᐅᖃᑦᑕᕈᓐᓇᕐᓂᖏᓐᓂᒃ ᑕᒪᒃᑯᐊ ᐃᓄᖕᓄᑦ ᓄᓇᓕᖕᓄᑦ. ᑲᑎᒪᓂᖏᓐᓂ ᐃᓕᓐᓂᐊᖃᑦᑕᖅᓱᑎᒃ ᐊᒥᓱᓂᒃ ᖃᓄᐃᓕᐅᕈᑎᒃᓴᓂᒃᑕᐅᓯᒪᓕᖅᑐᑦ ᖃᐅᔨᓴᖅᑕᐅᖃᑦᑕᖅᑐᑦ ᒥᑦᑎᒪᑕᓕᐅᑉ ᕿᑭᖅᑕᖓᓂᒃ, ᑕᐃᒃᑲᓂ ᖃᐅᔨᓴᕐᕕᖓᓂᒃ ᐊᒻᒪᓗ ᐱᓕᕆᐊᖑᕙᓪᓕᐊᔪᓂᒃ ᑕᒪᒃᑯᓂᖓ ᐱᔾᔪᑎᖃᖅᑐᓂᒃ ᐆᒪᔪᓕᕆᓂᕐᒥᒃ, ᐱᕈᖅᓯᐊᓕᕆᓂᕐᒥᒃ, ᖁᐱᕐᕈᖕᓂᒃ, ᓱᕈᕐᓇᖅᑐᓕᕆᓂᕐᒥᒃ ᐊᒻᒪᓗ ᓄᓇᐅᑉ ᐃᓗᐊᒍᑦ ᖁᐊᖑᐃᓇᕐᓂᕐᒥᒃ. ᐊᕐᕋᒍᑕᒫᖅ, ᒥᑦᑎᒪᑕᓕᐅᑉ ᕿᑭᖅᑕᖓᓄᖓᐅᕙᓕᐊᓂᐊᓕᕌᖓᒥᒃ, ᖃᐅᔨᓴᖅᑎᑦ ᓯᕗᓕᐅᖅᑎᖏᑦ ᐱᕕᒃᓴᓕᐅᖃᑦᑕᖅᐳᑦ ᐃᓄᖕᓂᒃ ᒥᑦᑎᒪᑕᓕᖕᒥ ᑲᑎᒪᖃᑎᖃᕈᓐᓇᕐᓂᖅ ᐊᖅᑯᑎᖃᕐᓗᑎᒃ ᓄᓇᓕᖕᓂ ᑎᒥᖁᑎᒋᔭᐅᔪᓂᒃ ᓲᕐᓗ ᕼᐊᒻᒪᓚᑯᓐᓂᒃ ᒥᑦᑎᒪᑕᓕᖕᒥ ᐊᒻᒪᓗ ᑕᐃᒃᑯᓂᖓ ᒥᑦᑎᒪᑕᓕᖕᒥ ᐊᖑᓇᓱᒃᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓂᒃ. ᑕᒪᒃᑯᐊ ᒪᓕᒐᓪᓗᑐᖃᖏᓂᖅᓴᐅᕙᖕᓂᖏᑦ ᑲᑎᒪᓂᕆᔭᐅᕙᒃᑐᑦ ᑕᐃᒪᖓᑦ ᖃᐅᔨᓴᖅᑎᓄᑦ ᐅᓂᒃᑳᕐᕕᐅᖃᑦᑕᖅᓯᒪᔪᑦ ᐱᓕᕆᐊᕆᓂᐊᖅᑕᖏᓐᓂᒃ, ᑐᓴᕐᕕᖃᕈᓐᓇᕐᓂᖏᓐᓂᒡᓗ ᓄᓇᓕᖕᓄᑦ ᐃᓱᒫᓘᑕᐅᔪᓂᒃ ᐊᒻᒪᓗ ᑐᓴᕐᕕᐅᔪᓐᓇᕐᓂᖏᓐᓂᒃ ᐃᓱᒪᒋᔭᖏᓐᓂ ᓄᓇᓖᑦ. ᑖᒃᑯᓇᓂ ᑕᒡᕙᓂ ᑐᓂᓯᓕᖅᑐᒍᑦ ᖃᐅᔨᒪᔾᔪᑎᒃᓴᐅᔪᓂᒃ ᒪᓐᓇᓵᖑᓚᐅᖅᑐᖅ ᑲᑎᒪᓂᕆᔭᐅᓚᐅᖅᑐᓂᒃ ᐃᓕᓐᓂᐊᖅᑎᑕᐅᓚᐅᖅᑐᓂᒃ ᒥᑦᑎᒪᑕᓕᖕᒥ.

ᑐᓴᕐᑎᑦᑎᖃᑎᒌᖕᓂᖅ ᐃᓕᓐᓂᐊᕐᓗᑎᒃ ᑲᑎᒪᓗᑎᒃ ᐆᒪᔪᓕᒫᑦ ᐊᕙᑎᓕᒫᖏᓪᓗ ᒥᐊᓂᕆᔭᐅᓂᖏᓐᓂᒃ ᖃᐅᔨᓴᖅᑕᐅᖃᑦᑕᕐᓂᖏᓐᓂᒃ (2020)

ᐅᓇ 2020 ᑐᓴᕐᑎᑦᑎᖃᑎᒌᖕᓂᖅ ᐃᓕᓐᓂᐊᖅᖢᑎᒃ ᑲᑎᒪᓪᓗᑎᒃ ᖃᐅᔨᒋᐊᖅᑕᐅᑲᓐᓂᕐᕕᖃᖅᖢᑎᒃ ᓯᕗᓪᓕᐅᓚᐅᖅᑐᒥ ᑐᑭᓯᖃᑎᒌᒐᓱᐊᕈᑕᐅᓚᐅᖅᑐᓂᑦ ᐊᒻᒪᓗ ᐱᕕᖃᖅᑎᑦᑎᓪᓗᑎᒃ ᖃᓄᐃᓕᖓᓕᖕᒪᖔᑕ ᓄᓇᓖᑦ ᐱᔾᔪᑎᒋᓪᓗᒍ ᑲᔪᓯᔪᒥᒃ ᐆᒪᔪᓕᒫᑦ ᐊᕙᑎᓕᒫᖏᓪᓗ ᖃᐅᔨᓴᕐᓂᕐᒧᑦ ᐃᖏᕐᕋᓯᑎᑕᐅᓯᒪᔪᑦ ᒥᑦᑎᒪᑕᓕᐅᑉ ᓄᓇᖓᓂ. ᐅᓇ ᖃᓄᐃᓕᐅᕈᑕᐅᔪᑦ ᐊᒥᓱᐃᖅᖢᑎᒃ ᓵᖓᓪᓗᑎᒃ ᑲᑎᒪᖃᑦᑕᓚᐅᖅᑐᑦ ᑲᑎᒪᖃᑎᒋᓪᓗᒋᑦ ᓄᓇᓕᖕᓂ ᐊᐅᓚᑦᓯᔨᑦ, ᐅᓪᓗᖅ ᐊᑕᐅᓯᖅ ᐃᓕᓐᓂᐊᕐᑎᑦᑎᓪᓗᑕ ᑲᑎᒪᓪᓗᑕ ᐊᒻᒪᓗ ᓄᓇᓕᖕᓂᒃ “ᒪᑐᐃᖓᓪᓗᑕ ᑭᒃᑯᑐᐃᓐᓇᓄᑦ” ᐃᓄᓕᒫᑦ ᑐᓐᖓᓱᒃᑎᓪᖢᑎᒍᑦ. ᑕᒪᕐᒥᒃ ᖃᓄᐃᓕᐅᕈᑕᐅᔪᑦ ᐃᓂᖃᓚᐅᖅᑐᑦ ᒥᑦᑎᒪᑕᓕᖕᒥ ᑕᐃᑲᓂ ᕕᕗᐊᕆ 3-ᒥᑦ ᕕᕗᐊᕆ 6-ᒧᑦ, 2020, ᑖᒃᑯᐊᓗ 37 ᐃᓚᐅᓚᐅᖅᑐᑦ ᐅᓪᓗᖅ ᐊᑕᐅᓯᖅ ᐃᓕᓐᓂᐊᖅᑎᑦᑎᓪᓗᑕ ᑲᑎᒪᓪᓗᑕ ᐊᒻᒪᓗ ᐅᖓᑖᓂ 40 ᓄᓇᓖᑦ ᐳᓛᖅᖢᑎᒃ ᒪᑐᐃᖓᑎᓪᓗᑕ ᑭᒃᑯᑐᐃᓐᓇᓄᑦ. ᐊᐅᓚᑦᓯᔨᑦ ᐃᓚᐅᓚᐅᖅᑐᑦ ᐃᓕᓐᓂᐊᖅᑐᓂ ᑲᑎᒪᔪᓂ ᐃᓚᖏᑦ ᒥᑦᑎᒪᑕᓕᒃ ᐊᖑᓇᓱᒃᑐᓕᕆᔨᒃᑯᑦ, ᕼᐋᒻᓚᒃᑯᑦ ᒥᑦᑎᒪᑕᓕᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᒥᕐᖑᖅᓯᕐᕕᓕᕆᔨᒃᑯᑦ ᑲᓇᑕ (ᓯᕐᒥᓕᒃ ᑲᓇᑕᒥ ᒥᕐᖑᐃᖅᓯᕐᕕᒃ) ᐊᒻᒪᓗ ᐊᓯᖏᑦ ᑲᑐᔾᔨᖃᑎᒌᑦ ᒥᕐᖑᐃᖅᓯᕐᕕᓕᕆᓂᕐᒧᑦ ᐊᐅᓚᑦᑎᔩᑦ ᑲᑎᒪᔨᕋᓛᖏᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓇᓱᐊᖃᑎᒌᒃᐸᒃᑐᑦ, ᐊᕙᑎᓕᕆᔨᒃᑯᑦ ᑲᓇᑕ, ᐃᓕᓐᓂᐊᖅᑐᑦ ᓯᓚᓐᓂᐊᕐᓂᕐᒥᒃ ᓄᓇᕗᑦ ᐅᑭᐅᖅᑕᖅᑐᒧᑦ ᓯᓚᑦᑐᖅᓴᕐᕕᖓᓂᑦ, ᓄᓇᕗᑦ ᒐᕙᒪᒃᑯᑦ, ᐃᓛᕐᕕᒃ ᐊᒻᒪᓗ ᓯᒫᑦ ᐊᐃᔅ. ᑐᑭᓕᐅᕈᑕᐅᕙᓪᓕᐊᔪᑦ 2020 ᑐᑭᓯᓇᓱᖃᑎᒌᒡᖢᑎᒃ ᑲᑎᒪᓪᓗᑎᒃ ᐃᓕᓐᓂᐊᖅᖢᑎᒃ ᑐᓴᕈᒥᓇᓚᐅᖅᑐᑦ, ᐅᖃᖃᑎᒌᓚᐅᖅᑐᑦ ᐊᒻᒪᓗ ᑭᐅᔭᐅᓚᐅᖅᑐᒍᑦ ᓄᓇᓕᖕᓂᑦ ᐃᓚᐅᔪᑦ ᐊᒻᒪᓗ ᐊᐅᓚᑦᓯᔨᓂᒃ ᐅᑯᓄᖓ:

1. ᐃᓱᐊᓂ ᐋᕿᐅᑎᔪᑦ ᐊᒻᒪᓗ ᐊᑐᓕᖁᔭᐅᔪᒃ ᐅᑯᐊ ᓴᕿᑦᑐᓂᑦ ᓇᕿᑐᐃᓐᓇᖅ ᑐᑭᓯᓇᓱᖃᑎᒌᒡᖢᑕ ᒥᑦᑎᒪᑕᓂᖕᒥ 2018 ᖃᐅᔨᓴᖅᑎᓂᑦ ᑲᑎᖓᔪᓂᑦ;
2. ᐱᓕᕆᐊᖑᓂᐊᖅᑐᑦ ᑖᒃᑯᓇᖓ ᖃᐅᔨᓴᖅᑎᓂᑦ ᐱᓕᕆᐊᖑᓯᒪᓕᖅᑐᑦ ᑕᐃᒪᖓᓂ 2018 ᑭᐅᓯᔾᔪᑎᒋᓪᓗᒋᑦ ᐊᑐᓕᖁᔭᐅᔪᓂᒃ ᐊᒻᒪᓗ ᐃᓱᒫᓘᑎᓂᒃ ᐅᖃᐅᓯᐅᔪᑦ ᑕᐃᑲᓂ 2018 ᐃᓕᓐᓂᐊᖅᑎᓪᓗᒋᑦ ᑲᑎᒪᓪᓗᑎᒃ;
3. ᑲᔪᓯᔪᒥᒃ ᐆᒪᔪᓕᒫᑦ ᐊᕙᑎᓕᒫᖏᓪᓗ ᖃᐅᔨᓴᖅᑕᐅᓗᑎᒃ ᐱᓕᕆᐊᖑᓗᑎᒃ ᐊᒻᒪᓗ ᐃᖏᕐᕋᓯᑎᑕᐅᓗᑎᒃ ᑕᐃᑲᓂ ᒥᑦᑎᒪᑕᓕᐅᑉ ᖃᓂᒋᔭᖏᓐᓂ ᓄᓇᓂ;
4. ᐃᑲᔪᖃᑎᒌᖃᑦᑕᕐᓗᑎᒃ ᐊᕙᑖᓂᑦ ᖃᐅᔨᓴᖅᑎᑦ ᐊᒻᒪᓗ ᓄᓇᓕᖕᓂ ᐃᓱᒫᓘᑕᐅᑎᓪᓗᒍ ᖃᐅᔨᓴᕐᓂᕐᒧᑦ ᐃᖏᕐᕋᓯᑎᑕᐅᓯᒪᔪᑦ ᐊᒻᒪᓗ ᓴᕿᑕᐅᓯᒪᔪᖅ ᓯᕗᓂᒃᓴᑦᑎᓐᓂ ᖃᐅᔨᓴᕐᕕᒃ ᐃᒡᓗ ᒥᑦᑎᒪᑕᓕᖕᒥ;
5. ᑲᔪᓰᓐᓇᕐᓂᐊᖅᑐᒥᒃ ᐱᕙᓪᓕᐊᑎᑦᑎᓗᑎᒃ ᓯᑯ ᐃᖏᕐᕋᑎᑕᐅᓲᖅ ᐆᒃᑐᑎ ᐃᓚᒋᔭᐅᓪᓗᑎᒃ ᓂᕐᔪᑎᓂᒃ ᑕᑯᔭᖅᑐᖅᑐᑦ;
6. ᓄᓇᓕᖕᓂ ᓂᕆᐅᒋᔭᐅᔪᑦ ᐊᒻᒪᓗ ᑕᐃᒪᓐᓇᐅᔪᓐᓇᕋᓱᒋᔭᐅᔪᑦ ᐃᑲᔪᖃᑎᒌᒍᑕᐅᒍᑎᒃ ᖃᐅᔨᓴᕐᑎᓪᓗ ᐱᔾᔪᑎᒋᓪᓗᒋᑦ ᐊᒃᑐᐃᓂᖅ ᐅᔭᕋᖕᓂᐊᖅᑐᓂᑦ ᓄᓇᖓᓂ.

ᑐᓴᕋᓱᐊᓐᓂᕗᑦ ᐆᒪᔪᖁᑎᖏᑕ ᐊᐅᓚᓂᕆᔭᖏᓐᓂᒃ ᐅᔾᔨᖅᓵᕋᓐᓂᖅ ᕿᑭᖅᑖᓘᑉ ᐅᐊᓐᓇᖓᑕ ᐊᒡᒍᖅᓯᒪᓂᖓᓐᓂᒃ (2018)

ᒪᓕᒃᖢᒋᑦ ᐊᕙᑏᑦ ᐊᕐᕌᒍᑦ ᐅᖓᑖᓂ ᓄᓇᖓᒍᑦ ᐆᒪᔪᖁᑎᖏᑕ ᐊᐅᓚᓂᕆᓲᖏᓄᑦ ᖃᐅᔨᓴᓐᓃᑦ ᐅᔾᔨᖅᓵᕆᔭᓪᓗ ᐊᑭᐊᖓᓂ ᒥᑦᑎᒪᑕᓕᐅᑉ, ᖃᐅᔨᓴᖅᑏᑦ ᐱᓕᕆᐊᖃᖅᑐᑦ ᒥᑦᑎᒪᑕᓕᐅᑉ ᐊᑭᐊᖓᓂ ᖃᐅᔨᓴᕝᕕᖓᓐᓂᒃ (ᑲᖑᓕᕆᕝᕕᒃ) ᐱᔪᒪᓂᖃᖅᖢᑎᒃ ᑐᓴᕈᒪᓂᒻᒥᒃ ᐊᕙᑎᒨᖓᔪᓂᒃ ᐃᓱᒫᓘᑕᐅᔪᓄᑦ ᓯᕗᓕᐅᕆᖁᔭᖏᑕᓗ ᐃᓄᖁᑎᖏᑕ ᕿᑭᖅᑖᓘᑉ ᐅᐊᓐᓇᖓᓂ. ᑲᑐᔾᔨᓪᓗᑎᒃ ᐸᓐᓈᕆᔭᖃᖅᖢᑎᒃ ᐃᓗᑦᑑᔾᔫᒥᔪᒥᒃ ᑐᓴᕋᓱᐊᓐᓂᒻᒥᒃ ᑖᔅᓱᒪᐅᑉ ᐃᓚᒋᔭᖏᓐᓄᑦ ᐃᓱᒪᒃᓴᖅᓯᐅᕆᔭᖃᖅᖢᑎᒃ ᑲᑎᒪᖃᑕᐅᔪᓄᑦ, ᓄᖅᑲᕈᑎᖃᙱᑦᑐᒥᒃ ᐅᖃᖃᑎᒌᓐᓂᒻᒥᒃ, ᐃᓱᒪᓕᐊᔅᓴᓂᒃ ᓴᖅᑮᓇᓱᒃᖢᑎᒃ ᕿᓂᖅᖢᑎᓪᓗ ᖃᓄᖅ ᑲᑐᔾᔨᖃᑎᖃᓐᓂᖅᓴᐅᓗᒃᑎ ᐱᓕᕆᖃᑎᖃᕈᓐᓇᒻᒪᖔᑕ ᒥᑦᑎᒪᑕᓕᐅᒻᒥᐅᓂᒃ ᐃᑉᐱᐊᔾᔪᒻᒥᐅᓂᓪᓗ. ᑖᓐᓇ ᐱᒋᐊᕈᑎᐅᔪᖅ ᐃᓚᖃᖅᖢᓂ ᐱᖓᓲᔪᖅᑐᓂᒃ ᑲᑎᒪᓂᐅᑉ ᓯᕗᓂᐊᒍᑦ ᑐᓴᕋᓱᐊᓐᓂᐅᔪᓂᒃ ᓄᓇᓕᐅᑉ ᑎᒥᖁᑎᖏᓐᓂᒃ ᑲᑎᒪᔨᕋᓛᖏᓂᓪᓗ ᒪᓕᒃᑎᖃᖅᖢᓂ ᒪᕐᕉᓐᓄᑦ− ᐅᓪᓘᓐᓄᑦ ᐃᓕᓐᓂᐊᕈᑎᒥᒃ ᑲᑎᒪᓂᐊᓂᒃ. ᐱᓕᕆᐊᖑᔪᑦ ᒥᑦᑎᒪᑕᓕᒻᒥ ᐊᑯᓐᓂᐊᒍᑦ ᔮᓐᓄᐊᕆ 23 ᐊᒻᒪᓗ ᕖᕝᕗᐊᕆ 8−ᒧᑦ 2018 ᐊᕐᕌᒍᐊᓂ 50−ᓂᒃ ᑲᑎᒪᖃᑕᐅᔪᖃᖅᖢᓂ, ᐅᓄᓛᖑᔪᑦ ᐅᑭᐅᖅᑕᖅᑐᑉ ᓄᓇᓕᖏᓐᓂᒃ ᑎᒥᒋᔭᖏᓐᓃᙶᖅᖢᑎᒃ. ᑎᒥᑦ ᐃᓚᐅᑎᑦᑎᔪᑦ ᑐᓴᕋᓱᐊᕆᓂᑦᑎᒍᑦ ᐃᓚᖃᖅᖢᑎᒃ ᒥᑦᑎᒪᑕᓕᐅᑉ ᐊᖑᓇᓱᑦᑐᓕᕆᔨᖏᑕ ᑎᒥᖓᓂᒃ, ᓄᓇᓕᐅᑉ ᒪᒃᑯᒃᑐᓄᑦ ᑲᑎᒪᔨᖏᓐᓂᒃ, ᒥᑦᑎᒪᑕᓕᐅᑉ ᕼᐋᒻᒪᓚᖏᑕ ᑲᑎᒪᔨᖏᑦ, ᐃᑳᕝᕕᒻᒥᑦ, ᐃᓐᓇᑐᖃᐃᑦ, ᑲᓇᑕᐅᑉ ᒥᕐᖑᐃᖅᓯᕝᕕᓕᕆᔨᖏᑦ ᐊᒻᒪᑦᑕᐅᖅ ᐃᓄᐃᑦ ᖃᐅᔨᒪᔨᖏᓄᑦ ᑲᑐᔾᔨᔨᖏᓐᓂᒃ ᑲᑐᔾᔭᐅᔪᒃᑯᓪᓗ ᒥᕐᖑᐃᖅᓯᕝᕕᐅᑉ ᑲᑎᒪᔨᕋᓛᖏᓐᓂᒃ, ᑲᓇᑕᒥ ᐆᒪᔪᓕᕆᓂᒻᒧᑦ ᐱᔨᑦᑎᖅᑎᖏᑦ ᑎᒻᒥᐊᓕᕆᓂᒻᒧᑦ ᑲᑎᒪᔨᕋᓛᖏᓪᓗ ᑲᑐᔾᔭᐅᔪᒥᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐊᕙᑎᒧᑦ ᓯᓚᐅᓪᓗ ᐊᓯᔾᔨᕈᑎᒋᔭᖓᓄᑦ ᑲᓇᑕᒥ. ᑲᑎᒪᖃᑕᐅᔪᑦ ᐃᓚᐅᔪᕕᓃᑦ ᓯᕗᓂᐊᑕ−ᑲᑎᒪᓂᐅᑉ ᑐᓴᕋᓱᐊᓐᓂᖏᓐᓂᒃ ᐊᑐᓃᖓᔪᒃᑯᑦ ᐅᖃᐅᓯᖃᕈᓐᓇᖅᑎᑕᐅᓪᓗᑎᒃ ᐊᕙᑎᒧᑦ ᐃᓱᒫᓘᑎᖏᓐᓂᒃ, ᐅᖃᐅᓯᕆᖁᓪᓗᒋᑦ ᑲᑎᒪᖃᑕᐅᔪᓄᑦ, ᐊᒻᒪᑦᑕᐅᖅ ᑲᑐᔾᔨᖃᑎᒌᓪᓗᑎᒃ ᐸᓐᓈᕆᔭᖃᓪᓗᒃᑎ ᐊᑕᐅᓯᕈᐃᓗᑎᓪᓗ ᐃᓱᒪᓕᐊᕆᔭᒥᓐᓂᒃ ᐊᑭᙵᒧᑦ ᐅᖃᓕᒫᒐᔅᓴᓄᑦ. ᑎᓴᒪᓪᓗᐊᑕᑦ ᐃᓱᒪᒋᔭᔅᓴᓕᐊᑦ ᑕᑯᔅᓴᕈᖅᖢᑎᒃ ᑲᑎᒪᓂᐅᑉ ᓯᕗᓂᐊᒍᑦ ᑐᓴᕋᓱᐊᕈᑎᑦᑎᓐᓂᒃ:

1. ᓄᓇᐅᑉ ᐊᐅᓚᓂᕆᔭᖏᑦ ᐊᔾᔨᐅᔪᓐᓃᖅᑐᓪᓗ ᐊᒃᑐᐃᓂᖃᓕᖅᑐᑦ ᓄᓇᖓᓐᓂᒃ;
2. ᐃᓅᖃᑎᒌᑦ ᐱᓕᕆᐊᖃᓐᓂᖏᑦ ᐊᒃᑐᐃᓂᖃᖅᑐᑦ ᓄᓇᒋᔭᖓᓐᓂᒃ;
3. ᑕᕆᐅᖑᖏᑦᑐᒥ ᐃᖃᓗᖁᑎᖏᑦ ᐊᒻᒪᓗ;
4. ᓂᔾᔪᑏᑦ ᓄᓇᒥ ᐊᓐᓇᐅᒪᓇᓱᐊᖃᑦᑕᓲᑦ.

ᑲᑎᒪᓂᑦᑎᒍᑦ, ᑲᑎᒪᖃᑕᐅᔪᑦ ᑲᑐᔾᔨᖃᑎᖃᖅᖢᑎᒃ ᐱᓕᕆᐊᖃᖃᑦᑕᓚᐅᖅᐳᑦ ᐊᑐᓂ ᑎᓴᒪᐅᔪᑦ ᐃᓱᒪᓕᐊᕆᔭᓄᑦ ᓴᖅᑮᖁᓪᓗᒋᑦ ᐊᑐᖅᑕᐅᓪᓚᕆᒍᓐᓇᖅᑐᓂᒃ ᖃᐅᔨᓴᐃᓂᐅᔪᓂᒃ ᑐᕌᒐᖃᖅᑐᑦ ᑭᐅᓇᓱᐊᕆᓂᒻᒥᒃ ᐃᓱᒪᒋᖁᔭᓄᑦ ᓴᖅᑭᑕᐅᔪᕕᓃᑦ ᓯᕗᓂᐊᒍᑦ ᑐᓴᕋᓱᐊᖅᑎᓪᓗᒋᑦ ᑎᒥᐅᔪᓂᒃ. 7−ᓂᒃ (ᐱᖓᓲᔪᖅᑐᑦ ᐊᑕᐅᓯᓪᓗ) ᖃᐅᔨᓴᕋᔅᓴᑦ ᐱᓕᕆᐊᖑᔭᐅᓪᓗᑎᒃ ᐅᑯᓂᖓ ᓵᙵᔭᖃᕋᓱᒃᖢᑎᒃ ᐃᓱᒪᒋᖁᔭᐅᓯᒪᔪᓂᒃ:

1. ᐊᓯᔾᔨᐅᑎᔪᑦ ᓄᓇᒥᒃ ᐊᒃᑐᖅᓯᕙᓪᓕᐊᔪᑦ, ᐱᓗᐊᖅᑐ ᐃᑭᐊᖃᖓ ᖁᐋᖑᐃᓐᓇᐅᔭᓐᓂᐊᑕ ᐊᐅᒍᑎᓕᓐᓂᖓ, ᑎᓲᖅᑐᑦ ᖄᖏᔭᖅᖢᑎᒃ ᒪᕐᕋᐄᓪᓘᓐᓃᑦ ᓯᒡᔭᐅᓪᓗ ᓄᖑᑕᐅᕙᓪᓕᐊᓕᓐᓂᖏᑦ;
2. ᐊᒃᑐᐃᓂᖃᓐᓂᖏᑦ ᐅᔭᕋᓐᓂᐊᖅᑑᑉ ᐱᓕᕆᔭᖏᓄᑦ ᐃᒪᖓᓄᑦ ᓯᓚᐃᓐᓇᐅᓪᓗ ᓴᓗᒪᓂᕆᔭᖓᓐᓄᑦ ᑕᑉᐱᑲᓂ ᕿᙳᐊᑕ ᑰᖃᑎᒋᔮᓂ;
3. ᖃᐅᔨᓵᖑᓂᖏᑦ ᐳᓚᕋᑏᑦ ᐊᑐᖃᑦᑕᖅᑕᖏᑕ (ᐳᓚᕋᑎᓄᑦ ᐅᒥᐊᔾᔪᐊᑦ, ᓇᒻᒥᓂᕆᔭᑦ ᐅᒥᐊᔾᔪᐋᕋᓛᑦ) ᐊᑐᓪᓕᑕ ᐊᔾᔨᓕᐅᕇᓐᓇᐅᔭᖅᑐᓂᒃ ᐃᓱᒪᒋᔭᕆᐊᖃᖏᑦᑐᓂᒃ;
4. ᐃᖃᓗᐃᑦ ᓇᔪᖅᑕᖏᑦ ᓄᓇᒥ ᖃᓄᐃᙱᑦᑎᐊᓐᓂᖏᓄᓪᓗ;
5. ᑎᓲᖃᑦᑕᓐᓂᖏᑦ ᐃᖃᓗᐃᑦ;
6. ᖃᓄᐃᓐᓂᕆᔭᖏᑦ ᕿᑭᖅᑖᓘᑉ ᑐᒃᑐᖁᑎᖏᑕ ᐊᒻᒪᓗ;
7. ᑎᖕᒥᐊᑦ ᖃᓄᐃᖏᓐᓂᖏᑦ ᒪᓐᓂᒃᑐᖅᑕᐅᓲᓪᓗ ᐃᓄᒋᔭᖏᓐᓄᑦ ᐃᕙᐅᕋᓕᕌᖓᑕ ᑎᖕᒥᐊᑦ.

ᐃᓱᐊᒍᑦ, ᐊᑐᓂ ᑲᑐᔾᔨᖃᑎᒌᒃᑐᑦ ᐅᓂᒃᑳᕆᔭᖃᖅᖢᑎᒃ ᐃᓗᐃᑦᑐᓄᑦ ᑲᑎᒪᖃᑎᒌᒃᑐᓄᑦ ᑐᓴᕋᓱᐊᖅᑕᐅᓪᓗᑎᒃ ᐅᖃᐅᓯᔅᓴᖏᑦ ᐊᐱᖅᓱᒐᒻᒥᓪᓗ ᓴᓇᓪᓗᑎᒃ ᑲᑎᒪᖃᑎᒌᒃᑐᓂᒃ ᖃᓄᑎᒋ ᐱᔪᒥᓇᓐᓂᖃᒻᒪᖔᑦ ᐃᑲᔫᑎᔅᓴᐅᒐᔭᖅᑐᓪᓗ ᓄᓇᓕᐅᔪᒧᑦ ᖃᐅᔨᓵᖑᓂᐊᕈᑎᒃ. ᓴᖅᑭᑦᑐᓐᓇᖅᑐᑦ ᑲᑐᔾᔨᖃᑎᒋᔭᐅᓂᖏᑦ ᑮᓇᐅᔭᖃᕈᑎᔅᓴᖏᑕᓗ ᓇᒦᓐᓂᖏᑕ ᐊᑐᓂ ᖃᐅᔨᓴᕈᒥᒋᔭᐅᔫᑉ ᐅᖃᐅᓯᐅᓪᓗᑎᒃ ᕿᓂᖅᑕᐅᓪᓗᑎᓪᓗ. ᑐᓴᕋᓱᐊᓐᓂᖅ ᑖᓐᓇ ᓴᖅᑮᓪᓗᐊᓐᓂᐊᖅᑐᑦ ᐊᐅᓚᔾᔭᒋᐊᕆᓂᒻᒧᑦ ᐸᓐᓈᖑᔪᒥᒃ ᓵᙵᔭᖃᖅᑐᑦ ᐊᕙᑎᒨᖓᔪᓂᒃ ᐃᓱᒪᒋᔭᔅᓴᐅᔪᓂᒃ ᐊᑑᑎᖃᓛᑦ ᐅᑭᐅᖅᑕᖅᑑᑉ ᐃᓄᖏᓐᓄᑦ ᐱᓕᕆᖃᑎᒋᖔᓪᓗᑎᒍᑦ. ᑕᒪᓐᓇ ᐊᐅᓚᓂᕆᔭᖓ ᐃᓱᒪᒋᔭᖏᑎᒍᑦ ᑲᑎᒪᖃᑕᐅᔪᑦ ᑲᔪᓯᓂᖓ ᐱᐆᔫᓂᕋᖅᖢᒍ ᐊᐱᖅᓱᐊᕆᔭᐅᓕᕋᒥᒃ ᑲᑎᒪᑎᑦᑎᓂᕆᔭᑦᑕ ᐃᓱᐊᒍᑦ.