ᐅᒃᐲᑦ ᐃᓚᒋᔭᐅᕗᑦ ᓂᕿᒃᓴᖅᓯᐅᑎᐅᕙᒃᑐᓄᑦ ᑎᖕᒥᐊᕐᓄᑦ, ᐃᓛᓐᓂᓚᐅᓱᖓᖅ ᐱᑕᖃᓲᖑᓪᓗᑎᒃ ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ. ᑕᒪᒃᑯᐊ ᐊᖏᔪᐊᓗᐃᑦ ᐅᒃᐲᑦ ᓄᓕᐊᖅᐸᒃᑐᑦ ᓄᓇᒥ ᓇᓂᑐᐃᓐᓇᖅ ᐅᑭᐅᖅᑕᖅᑐᖅᐸᓯᐅᓂᕐᒥ. ᐅᒃᐲᑦ ᓂᒡᓚᓱᒃᑐᐊᓗᖕᒥ ᐅᒫᐃᓐᓇᕈᓐᓇᕋᓗᐊᖅᓱᑎᒃ ᐅᑭᐅᖄᓗᒃᑯᑦ, ᓯᕗᓂᐊᒍᑦ ᓱᓕᔪᕆᔭᐅᕙᓚᐅᖅᐳᖅ ᐅᑮᕙᒐᓱᒋᔭᐅᓗᑎᒃ ᓂᒋᖅᐸᓯᐅᓂᖅᓴᐅᓂᕐᒥ, ᓲᕐᓗ ᑲᓇᑕᐅᑉ ᓂᒋᖅᐸᓯᐊᓂ, ᐊᒥᐊᓕᑲᒥᐃᓪᓗ ᓄᓇᖓᑕ ᐅᐊᖕᓇᖅᐸᓯᖏᓐᓂ ᐊᒻᒪᓗ ᔪᕇᓯᔭᐅᑉ ᕿᑎᖅᐸᓯᐊᓂ, ᐱᑕᖃᕐᓂᖏᓐᓂ ᓇᐹᖅᑐᖃᖏᓐᓂᐅᔪᓂ, ᒪᓴᐅᓂᖏᓐᓂ ᐊᒻᒪᓗ ᓄᓇᑐᐃᓐᓇᐅᔪᓂ, ᒥᑭᔫᑎᓂᒃ ᓂᕿᒃᓴᖅᓯᐅᕐᕕᒋᔪᓐᓇᖅᑕᖏᓐᓂᒃ ᑕᒪᒃᑯᓇᓂ. ᑭᓯᐊᓂᓕ, ᖃᐅᔨᓴᖃᑦᑕᖅᓯᒪᔭᑦᑎᓐᓂᒃ ᖃᐅᔨᓯᒪᓕᖅᑐᒍᑦ ᓄᓕᐊᖃᑦᑕᕐᓂᖏᓐᓂ ᑲᓇᑕᐅᑉ ᐅᑭᐅᖅᑕᖅᑑᓂᖓᑕ ᑲᓇᖕᓇᖅᐸᓯᖓᓂ, ᐅᑭᐅᖅᑕᖅᑑᓂᕐᒦᖏᓐᓇᓲᖑᓪᓗᑎᒡᓗ ᐅᑭᐅᒃᑯᑦ, ᐊᑐᖃᑦᑕᕋᒥᒃ ᑕᕆᐅᒥᓗ ᓯᒡᔭᖅᐸᓯᐅᓂᕐᒥᓗ ᐊᕙᑎᓂᒃ ᓂᕿᒃᓴᖅᓯᐅᕐᕕᒋᕙᑦᑕᖏᓐᓂᒃ. ᐊᕐᕋᒍᐃᑦ ᐊᑯᓂᖏᓐᓂ 2007 ᐊᒻᒪᓗ 2016-ᒥ, ᑎᒍᓯᓚᐅᖅᑐᒍᑦ ᐊᒥᔅᓱᒐᓴᖕᓂᒃ ᐱᕈᐊᓂᒃᓯᒪᔪᓂᒃ ᐅᒃᑐᖕᓂᒃ ᑕᐅᕙᖓᑦ ᒥᑦᑎᒪᑕᓕᐅᑉ ᕿᑭᖅᑖᓗᐊᓂᒃ ᐊᒻᒪᓗ ᓄᓘᔭᕐᒥᒃ (ᓄᓇᕗᒻᒥ) ᐊᒻᒪᓗ ᓴᓪᓗᐃᑦ ᐊᐃᑉᐸᖓᓂ (ᑯᐸᐃᒃ ᑕᕐᕋᖓᓂ) ᐃᓕᐅᖃᕕᐅᓚᐅᖅᓱᑎᒃ ᖁᒻᒧᐊᒃᑎᑕᐅᓯᒪᔪᒃᑯᑦ ᒪᓕᒍᑎᓂᒃ ᓇᒧᓐᖓᐅᓲᖑᓂᖏᓐᓂᒃ ᐱᓪᓚᕆᖕᓂᖏᓐᓂ ᐊᑯᓂᐅᓕᖕᒧᑦ ᐱᖓᓱᓄᑦ ᐊᕐᕋᒍᓄᑦ. ᖃᐅᔨᓴᖅᑕᐅᓂᖏᓐᓂ ᖃᐅᔨᓚᐅᖅᑐᒍᑦ ᑕᒪᐃᓐᓂᓕᒫᑲᓴᒃ ᐅᒃᐲᑦ ᐊᒥᔅᓱᒐᓴᖕᓂᒃ ᐱᓇᓱᐊᕈᓯᒐᓴᖕᓂᒃ (ᑕᒫᓂ 101-ᓂᒃ ᐅᓪᓗᓂᒃ) ᓯᑯᒦᖃᑦᑕᓚᐅᕐᓂᖏᓐᓂ ᓯᑰᓪᓗᓐᓃᑦ ᖃᓂᒋᔭᖏᓐᓃᐸᓚᐅᕐᓂᖏᓐᓂ ᑕᒫᓂ ᑎᓯᐱᕆᒥᒃ ᐄᐳᒧᑦ ᑎᑭᓪᓗᒍ. ᑕᒪᕐᒥᑲᓴᐃᑦ ᓇᓃᓐᓂᖏᑦ ᖃᓂᑐᒦᖃᑕᓚᐅᖅᑐᑦ ᐃᒪᐅᓂᕐᒧᑦ ᓯᑯᒥ ᑕᐃᔭᐅᔪᓂᒃ ᐊᐅᒃᑲᕐᓃᑦ ᓯᑯᔪᐃᑦᑐᑦ ᒥᑏᑦ ᐱᑕᖃᔪᖕᒪᑕ ᑕᒪᒃᑯᓇᓂ ᐅᑭᐅᒃᑯᑦ. ᐊᐅᒃᑲᕐᓃᑦ ᐅᑎᖅᑕᕐᕕᐅᕙᖕᒪᑕ ᐅᑭᐅᒃᑯᑦ ᒥᑎᕐᓄᑦ ᑕᕆᐅᒥᓱᖑᔪᓄᑦ, ᖃᐅᔨᒪᓇᕈᑕᐅᕙᒃᑐᑦ ᐅᑭᐅᒃᑯᑦ ᓂᕿᖁᒃᓴᕆᔭᐅᖃᑕᕐᓂᖏᑦ ᐅᑭᐅᖅᑕᖅᑑᑉ ᖁᑦᑎᒃᑑᓂᖏᓐᓂ ᑕᐃᒫᒃ ᕿᓚᒥᐅᓂᖅᓴᖅ ᑎᑭᑐᓐᓇᖃᑕᕐᓂᖏᓐᓄᑦ ᓄᓕᐊᕐᕕᒋᕙᒃᑕᖏᓐᓄᑦ, ᓴᓂᐊᓂᒃ ᑕᐃᒃᑯᐊ ᐊᓯᖏᑦ ᐅᑮᕙᖕᓂᖏᓐᓂ ᓂᒡᓚᓱᖏᓂᖅᓴᐅᕙᒃᑐᓂ ᐊᕕᒃᑐᖅᓯᒪᓂᐅᔪᓂ. ᐅᒃᐲᑦ ᐅᑮᕕᒋᓂᐊᖅᑕᖏᓐᓄᑦ ᓇᔪᕐᓂᐊᖅᑕᖏᓐᓄᖓᐅᒑᖓᒥᒃ (ᑕᕆᐅᕐᒥᓗᓐᓃᑦ ᓯᑯᒥ ᓄᓇᖅᐱᐅᓂᕐᒥᓗᓐᓃᑦ) ᐊᒻᒪᓗ ᓇᓃᓚᖓᓂᖏᓐᓂ (ᐅᑭᐅᖅᑕᖅᑑᓂᕐᒥᓗᓐᓃᑦ ᓂᒋᖅᐸᓯᐅᓂᖅᓴᐅᓂᐊᖅᑐᓂᓗᓃᑦ), ᑕᐃᑯᓄᖓᑦᓴᐃᓇᖅ ᑎᑭᒐᔪᒃᐳᑦ ᐊᑐᐊᓂᓚᐅᖅᑕᖏᓐᓄᑦᒃ ᐊᕐᕋᒍᑕᒫᖅ. ᐊᔾᔨᒌᒍᓐᓃᖃᑕᕐᓂᖏᖅ ᑕᑯᒋᐊᕐᓗᒋᑦ ᒪᕐᕈᖕᓂᒃ ᑭᖑᓕᕇᓚᐅᖅᑑᖕᓂ ᐅᑭᐅᖑᓚᐅᖅᑑᖕᓂᒃ, ᐅᑮᔭᖅᑐᖅᓯᒪᓚᐅᖅᑐᑦ ᐅᖓᓯᓂᓕᖕᒥ 389 ᑭᓛᒥᑕᓂᒃ ᑕᐃᒃᑯᓇᖓᑦ ᓄᓇᓂᒃ ᓇᔪᒐᕆᓚᐅᖅᑕᖏᓐᓂᒃ ᓯᕗᓂᐊᒍᑦ ᐅᑭᐅᒎᓚᐅᖅᑐᒥ. ᐃᓚᖏᑦ ᐅᒃᐲᑦ ᐅᖓᓯᖕᓂᖃᖅᑎᒋᑐᐃᓐᓇᖃᑦᑕᕋᓗᐊᕐᒥᔪᑦ 20 ᑭᓛᒥᑕᓂᒃ ᓇᔪᖃᑦᑕᓚᐅᖅᑕᖏᓐᓂᒃ ᓯᕗᓂᐊᒍᑦ ᐅᑭᐅᖑᓚᐅᖅᑐᑉ, ᑭᓯᐊᓂᓕᑦᑕᐅᖅ ᐊᓯᖏᑦ ᐅᒃᐲᑦ ᐊᐅᓪᓛᖃᑦᑕᖅᓯᒪᖕᒥᔪᑦ ᐅᖓᓯᖕᓂᖃᖅᑎᒋᔪᒥᒃ 2,731-ᓂᒃ ᑭᓛᒥᑕᓂᒃ ᐅᖓᓯᖕᓂᓕᖕᓄᑦ. ᑕᒪᒃᑯᐊ ᐊᑐᖃᑦᑕᖅᑕᖏᑦ ᖃᓂᓐᓂᖅᓴᐅᕙᖕᒥᔪᑦ ᑎᑭᓴᕐᕕᒋᕙᒃᑕᖏᓐᓄᑦ ᓄᓕᐊᕐᕕᒋᕙᒃᑕᖏᓐᓄᑦ ᐊᐅᔭᐅᓚᐅᖅᑑᖕᓂ ᒪᕐᕉᖕᓂᒃ ᑭᖑᓕᕇᓛᐅᖅᑑᖕᓂ. (ᑕᑯᓗᒋᑦ ᓄᓕᐊᕐᕕᐅᕙᖕᓂᖏᑦ ᐊᕙᑎᖏᑦ, ᐊᑕᓃ ᑕᑯᒃᓴᐅᔪᑦ). ᐅᑭᐅᒃᑯᑦ ᐱᑕᖃᓕᖃᑦᑕᕐᓂᖏᑦ ᐅᒃᐲᑦ ᓂᒡᓚᓱᖏᓂᖅᓴᐅᕙᒃᑐᓂ ᓄᓇᓂ ᑲᓇᑕᒥ (ᓂᒋᖅᐸᓯᐊᓂ ᐊᒻᒪᓗ ᐊᒥᐊᓕᑲᒥᐅᑦ ᐅᐊᖕᓇᖅᐸᓯᖏᓐᓂ) ᐱᓗᐊᖅᑐᒥᒃ ᒪᒃᑯᒃᑑᓂᖅᓴᐅᒐᔪᒃᐳᑦ ᐊᕐᕋᒍᒥ ᐊᒻᒪᓗ ᐱᕈᐊᓂᓵᖅᓯᒪᔫᕙᒃᓱᑎᒃ, ᐊᒥᔅᓱᓂᒃ ᒪᓐᓂᖃᓚᐅᖅᓱᑎᒃ ᐊᐅᔭᐅᓚᐅᖅᑐᖅ ᐅᑭᐅᖅᑕᖅᑐᖅᐸᓯᐅᓂᕐᒥ, ᐱᕈᐊᓂᒃᓯᒪᔪᑦᑕᐅᖅ ᐅᒃᐲᑦ ᑕᒪᒃᑯᓄᖓᐅᕙᖕᒥᔪᑦ ᐃᓚᖏᓪᓗ ᑭᐳᒃᓯᓲᒻᒪᕆᐅᓪᓗᑎᒃ ᓇᓃᓚᖓᓕᕐᓂᕐᒥᓂᒃ ᐊᑯᓐᓂᖏᓐᓂ ᑭᖑᓕᕇᒃᐸᒃᑐᓂ ᐅᑭᐅᕐᓂ.

ᐅᑭᐅᒃᑯᑦ ᐅᒃᐱᒃᑕᖃᕐᕕᐅᕙᖕᓂᖅᐹᖑᓂᖏᑦ. ᑎᒍᓯᕝᕕᐅᓯᒪᓚᐅᖅᑐᑦ ᓄᓇᖏᑦ ᒥᑦᑎᒪᑕᓕᐅᑉ ᕿᑭᖅᑕᖓ (ᐅᓪᓗᕆᐊᖅ), ᓄᓘᔭᖅ (ᓄᕗᓕᒃ) ᐊᒻᒪᓗ ᓴᓪᓗᐃᑦ ᐊᐃᐸᖓᓂ (ᑭᑉᐹᕇᒃᑐᖅ). Robillard et al. 2018, DOI 10.1111/jav.01707.		ᐅᑭᐅᒃᑯᑦ ᐱᕈᐊᓂᒃᓯᒪᔪᓂᒃ ᐅᒃᐱᖃᕐᕕᐅᔪᑦ. ᐊᑐᓂ ᐊᔾᔨᒋᖏᑦᑐᑦ ᑕᖅᓴᐃᑦ ᓴᕿᐅᒪᑎᑦᑎᔪᑦ ᐊᑐᓂ ᐊᔾᔨᒌᖏᑦᑐᓂᒃ ᐅᒃᐱᖕᓂᒃ. Robillard et al. 2018, DOI 10.1111/jav.01707.		ᓄᓕᐊᕐᕕᐅᕙᖕᓂᖏᑦ ᐱᕈᐊᓂᒃᓯᒪᔪᓂᒃ ᐅᒃᐱᑕᖃᕐᕕᐅᔪᑦ. ᑎᒍᓯᕝᕕᐅᓯᒪᓚᐅᖅᑐᑦ ᓄᓇᖏᑦ ᒥᑦᑎᒪᑕᓕᐅᑉ ᕿᑭᖅᑕᖓ (ᐅᓪᓗᕆᐊᖅ), ᓄᓘᔭᖅ (ᓄᕗᖑᐊᓕᒃ) ᐊᒻᒪᓗ ᓴᓪᓗᐃᑦ ᐊᐃᐸᖓᓂ (ᑭᑉᐹᕇᒃᑐᖅ). ᐊᑐᓂ ᐊᔾᔨᒋᖏᑦᑐᑦ ᑕᖅᓴᐃᑦ ᓴᕿᐅᒪᑎᑦᑎᔪᑦ ᐊᑐᓂ ᐊᔾᔨᒋᖏᑦᑐᓂᒃ ᐅᒃᐱᖕᓂᒃ. Robillard et al. 2018, DOI 10.1111/jav.01707.

ᓄᓕᐊᕐᕕᐅᕙᖕᓂᖏᑦ ᐊᕙᑏᑦ

ᖃᐅᔨᒪᔭᐅᒐᓗᐊᖅᓱᑎᒃ ᑕᒪᒃᑯᐊ ᓅᑭᑕᖃᑕᕐᓂᕋᖅᑕᐅᕙᖕᓂᖅ, ᑕᐃᒪᖓᑦ ᐱᐅᓯᕐᒥᒍᑦ ᐊᒻᒪᓗ ᐱᑕᖃᓯᑳᓪᓚᒍᓐᓇᕐᓂᖏᑦ ᐅᒃᐲᑦ ᑕᐃᒪᐃᖃᑦᑕᖅᐳᑦ ᐊᓯᔾᔨᑭᑕᖃᑦᑕᕐᓂᖏᓐᓄᑦ ᐱᑕᖃᕐᓂᖏᑦ ᓂᕿᒃᓴᕆᓪᓗᐊᑕᖅᐸᒃᑕᖏᑦ ᐊᕕᓐᖓᐃᑦ, ᓄᓕᐊᕐᓇᐅᓕᖅᑎᓪᓗᒍ ᐊᕐᕋᒍᒥ. ᑕᒫᓂ ᒥᑦᑎᒪᑕᓕᐅᑉ ᕿᑭᖅᑖᓗᐊᓂ, ᑕᐃᒃᑯᐊ ᖃᐅᓪᓗᖅᑐᑦ ᐊᒻᒪᓗ ᑲᔪᐃᑦ ᐊᕕᓐᖓᐃᑦ ᐃᒪᓐᓇᑎᒋ 96% ᐳᓴᓐᑎᖏᓃᑦᑐᒥᒃ ᓂᕿᒋᔭᐅᕙᒃᑐᑦ, ᐊᒻᒪᓗ ᐃᓛᓂᒃᑯᑦ ᓂᕿᖃᓲᑦ ᑲᖑᐊᕋᕐᓂᒃ, ᐊᒻᒪᓗ ᓂᕿᒋᔭᐅᒐᔪᐃᓐᓂᖅᓴᐅᒐᓗᐊᕆᓪᓗᑎᒃ ᑕᒪᒃᑯᐊ ᖁᐸᓄᐊᑦ, ᓯᒡᔭᖅᐸᓯᐅᓂᕐᒥᓲᑦ ᑎᖕᒥᐊᑦ, ᑎᕆᐊᓪᓗ, ᑎᕆᒐᓂᐊᒐᐃᓪᓗ. ᑕᐃᒪᐃᓂᖓᓄᑦ ᐅᒃᐲᑦ ᐊᑕᐅᓰᓐᓇᕐᒥ ᓄᓇᐅᓂᕐᒦᓲᖑᖏᓚᑦ ᓄᓕᐊᕐᕕᐅᕙᒃᑐᓂ, ᓄᓕᐊᕈᓐᓇᓲᖑᒐᒥᒃ ᑭᓯᐊᓂ ᐊᕕᖓᓕᒻᒪᕆᖕᒦᒃᑯᑎᒃ, ᐱᐊᕋᖏᑦ ᐅᒃᐱᐊᕋᖏᑦ ᓂᕿᒃᓴᓂᒃᑕᐅᓯᒪᑦᑎᐊᕆᐊᖃᕐᓂᖏᓐᓄᑦ. ᐊᕐᓇᐃᓪᓗᑦ ᒪᓕᒃᑕᐅᕙᓪᓕᐊᓚᐅᖅᑐᑦ ᖁᒻᒧᐊᒃᑎᑕᐅᓯᒪᔪᑎᒍᑦ ᑕᑯᒃᓴᐅᖃᑦᑕᓚᐅᖅᑐᑦ ᓄᓕᐊᖃᑕᕐᓂᖏᑦ ᑕᒫᓃᒐᔪᒃᑐᒥᒃ 710-ᓂᒃ ᑭᑉᐹᕆᒃᑐᓂ ᐅᖓᓯᖕᓂᓕᖕᓂ km (ᐊᕙᓗᖏᓐᓂ ᐅᖓᓯᒌᒃᑎᔪᓐᓇᖅᑐᓂ 85-ᓂᒃ 1,617-ᓄᑦ ᑭᓛᒥᑕᓕᖕᓂᒃ) ᓄᓕᐊᕐᕕᒋᓚᐅᖅᑕᖏᓐᓂᒃ ᐊᕐᕌᓂᐅᓚᐅᖅᑐᖅ.

ᓇᐅᑦᑎᖅᑐᖅᑕᐅᕙᓪᓕᐊᖏᓐᓇᖅᑐᑦ ᐅᓪᓗᖃᕐᕕᒋᕙᒃᑕᖏᑦ ᐅᒃᐲᑦ ᑕᐅᕙᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ ᑕᐃᒪᑦ 1993-ᒥ, ᑕᑯᔭᐅᒐᔪᓲᖑᓗᑎᒃ ᐊᐅᔭᒃᑯᑦ ᐊᕕᖓᓕᐊᓘᓂᖏᓐᓂ ᓄᓇᓂ. ᐊᐅᔭᐅᓂᖓᓂ, ᐱᑕᖃᖃᑦᑕᖅᓯᒪᔪᑦ 98-ᖏᓃᑦᑐᓂᒃ ᐅᓪᓗᖃᕐᕕᐅᔪᑦ ᑕᐃᑲᓂ ᖃᐅᔨᓴᕐᕕᒋᖃᑦᑕᖅᓯᒪᔭᑦᑎᓐᓂ ᑭᓯᐊᓂ ᑕᐃᒃᑯᐊ ᖃᕐᓕᒃᑐᕐᕕᖕᒦᑦᑐᑦ ᖃᐅᔨᓴᖅᑕᐅᓂᖅᓴᐅᖃᑦᑕᐃᓐᓇᖅᑐᑦ. ᐊᕐᕋᒍᓂ ᐊᕕᓐᖓᖃᑦᑎᐊᖏᓂᖏᓐᓂ, ᐅᒃᐲᑦ ᕿᑭᖅᑕᖓᓃᖃᑦᑕᖏᑦᑐᑦ ᐅᕝᕙᓗᓐᓃᑦ ᐊᒥᔅᓲᖏᑦᑐᒻᒪᕇᑦ ᐅᒃᐲᑦ ᑕᐅᔭᐅᖃᓚᐅᖅᑐᑦ ᐅᐱᕐᖔᒃᑯᑦ, ᑕᐅᕙᓃᑦᑐᓐᓃᖃᑦᑕᖅᓱᑎᒃ ᓄᓕᐊᕐᕕᒋᓂᐊᖅᑕᖏᓐᓄᐊᖑᒑᒥᒃ ᐊᕕᓐᖓᖃᕐᓂᖅᓴᐅᔪᓂ.

ᐅᒃᐲᑦ ᐅᓪᓗᖃᓲᑦ ᓄᓇᒥ ᖁᑦᑎᖕᓂᖅᓴᐅᔪᓂ, ᒥᑭᔫᑎᓂᓗᓐᓃᑦ ᓲᕐᓗ ᖃᐃᖅᑐᕐᒥ ᐅᕝᕙᓗᓐᓃᑦ ᓄᓇᒥ ᐃᓗᑐᓂᕐᒥ ᑭᓂᐸᓂᖅᓴᐅᔪᖃᖅᑐᓂ. ᑕᒪᒃᑯᐊ ᓄᓇᖏᑦ ᓯᕗᓪᓕᐅᓂᖅᓴᐅᒐᔪᖕᒪᑕ ᐅᐱᖔᒃᑯᑦ ᐊᐳᑎᖃᕈᓃᕐᕕᐅᓂᖅ ᑕᐃᒪᐃᓂᖓᓄᓪᓗ ᐅᒃᐲᑦ ᓄᓕᐊᕈᓐᓇᖅᓯᓲᖑᓪᓗᑎᒃ ᐅᐱᕐᖏᕙᓪᓕᐊᓕᓵᕐᓂᖓᓂ. ᐅᓪᓗᖏᓐᓂ ᒪᓐᓂᖏᑦ ᐃᓐᓄᒐᔪᒃᐳᑦ ᑕᐅᕙᓂᓕ ᒥᑦᑎᒪᑕᓕᐅᑉ ᕿᑭᖅᑕᖓᓂ ᒪᐃ 21-ᒥ (ᑕᒪᓃᓗ: ᒪᐃ 13-ᒥᒃ 29-ᒧᑦ). ᐊᕐᓇᐃᓪᓗ ᒪᓐᓂᖃᓲᖑᔪᑦ ᐊᑯᓂᖏᓐᓂᒃ ᐱᖓᓱᓂᒃ 3 ᐊᒻᒪᓗ 11-ᓂᒃ (ᒪᓐᓂᖃᕋᔪᖕᓂᓴᐅᓪᓗᑎᒃ: 7-ᓂᒃ ᐅᓪᓗᖏᓐᓂ) ᓄᓇᒥ ᐃᓗᑐᓂᓕᐊᕆᓯᒪᔭᖏᓐᓂ. ᐊᕐᓇᐃᓪᓗᐃᑦ ᒪᓐᓂᒃᑖᖅᐸᓪᓕᐊᖃᑦᑕᖅᑐᑦ ᐊᑕᐅᑎᒃᑰᖏᑦᑐᓂᒃ, ᐊᑯᓐᓂᖅᓱᖃᑦᑕᖅᑐᓂ ᒪᕐᕉᖕᓂ ᐅᓪᓘᑕᒫᖕᓂᒃ ᒪᓐᓂᒃᑕᖅᐸᓪᓕᐊᓪᓗᑎᕐ ᐊᒻᒪᓗ ᐃᓐᓄᒃᓴᓂᒃᑕᐅᕙᓪᓕᐊᓕᖃᑦᑕᖅᑐᑦ ᒪᓐᓂᕈᑐᐊᕌᖓᒥᒃ, ᒪᓐᓂᖏᑦ ᐃᓐᓄᒃᐸᓪᓕᐊᖃᑦᑕᖅᑐᑦ ᐊᑕᐅᑎᒃᑰᖓᕙᖏᑦᑐᒥᒃ. ᐃᓐᓄᒐᔪᒃᑐᑦ ᒪᓐᓂᖏᑦ ᑕᒫᓃ ᔫᓐ 21-ᒥ (ᑕᒫᓂᓗ: ᔪᓐᓂ 14-ᒥᒃ 30-ᒧᑦ). ᐃᓄᖃᓕᖅᑎᓪᓗᒋᑦ ᐅᒃᐱᕋᖏᑦ ᐅᓪᓗᒥᓃᑦᑐᓐᓃᖃᑦᑕᖅᑐᑦ ᐊᖓᔪᒃᓯᐅᓂᖏᑦ ᑭᖑᓕᕇᒃᓱᑎᒃ ᒪᓕᒃᑐᓂᒃ ᒪᕐᕉᖕᓂᒃ ᐱᖓᓱᓂᒡᓗᓐᓃᑦ ᐱᓇᓱᐊᕈᓯᖃᓕᖅᑎᓪᓗᒋᑦ.

ᓄᓕᐊᕐᕕᐅᕙᖕᓂᖏᑦ ᓲᕐᓗ ᒪᓐᓂᖃᓕᖃᑦᑕᕐᓂᖏᑦ ᐊᒻᒪᓗ ᐊᒥᔅᓲᓂᖏᑦ ᒪᓂᖏᑦ ᐊᔾᔨᒌᖃᑦᑕᖏᑲᓗᐊᖅᑎᓪᓗᒋᑦ ᐊᕐᕋᒍᒐᓴᐅᔪᓂ, ᖃᐅᔨᓴᖅᓯᒪᔭᑎᓐᓂ ᐊᒃᑐᖅᑕᐅᓯᒪᔪᔮᖃᑕᖏᑦᑐᑦ ᐅᐱᕐᖔᕈᖅᐸᓪᓕᐊᓂᕐᒧᑦ ᓯᓚ (ᓲᕐᓗ ᐆᒃᑑᑎᒋᓗᒍ, ᐊᐳᑎᖃᕈᓃᖅᐸᓪᓕᐊᓂᖓᓄᑦ) ᐅᕝᕙᓗᓐᓃᑦ ᐊᒥᔅᓲᓂᖏᓐᓄᑦ ᐊᕕᓐᖓᐃᑦ. ᐅᒃᐲᑦ ᓲᕐᓗ ᐃᓱᒪᓕᐅᖅᑐᔮᕌᖓᒥᒃ ᐅᓪᓗᓕᐅᖅᐸᓪᓕᐊᕕᒋᓂᐊᓕᖅᑕᖏᓐᓂ, ᐅᓪᓗᖃᑦᑎᐊᖃᑕᕐᓂᖏᑦ ᑲᔪᓯᑦᑎᐊᖅᑐᐊᓘᔪᔮᖅᐸᒃᑐᑦ. ᐊᕕᖓᓕᐊᓘᓚᐅᕋᓗᐊᖅᑐᓂᓗ ᐊᕐᕋᒍᓂ ᐃᓚᖏᓐᓂ, ᐅᒃᐲᑦ ᓇᓂᔭᐅᓚᐅᖏᓐᓂᕗᑦ ᐅᓪᓗᖃᕐᓂᖏᑦ ᕿᑭᖅᑕᖓᓂ (ᓲᕐᓗ ᐊᕐᕋᒍᓂ ᑕᒫᓂ 2011-ᒥᓗ 2015-ᒥᓗ) ᐃᓱᒪᓇᖅᐳᑦ ᓄᓕᐊᕆᐊᓚᐅᖏᓂᖏᓐᓂ ᓱᓕ (ᒫᔾᔨᒥᒃ ᒪᐃᒧᑦ ᐊᕐᕋᒍᒥ) ᐅᒃᐲᑦ ᕿᓂᖅᐸᓪᓕᐊᓕᖃᑦᑕᖅᑐᑦ ᓄᓇᒥᒃ ᐅᓪᓗᖃᕐᕕᒋᔪᓐᓇᕐᓂᐊᖅᑕᖏᓐᓂᒃ, ᓄᓇᓂ ᓯᕗᓪᓕᕐᒥ ᐊᕕᖓᓕᐊᓘᓂᕐᒥ. ᑕᒪᒃᑯᐊ ᐊᑐᕐᓂᖏᓐᓂ ᐊᕐᕋᒍᐃᑦ, ᐊᕕᓐᖓᐃᑦ ᑕᑯᔭᐅᕙᓚᐅᖅᑐᑦ ᒥᑦᑎᒪᑕᓕᐅᑉ ᕿᑭᖅᑕᖓᓂ ᐊᔾᔨᑲᓴᒋᓇᔭᖅᑕᖏᑦ ᓇᓂᑐᐃᓐᓇᖅ ᐊᖏᔫᑎᐅᓂᖅᓴᓂ ᓄᓇᓂ ᐅᒃᐲᑦ ᐅᓪᓗᓕᐅᖅᐸᓪᓕᐊᓵᕋᐃᓂᖅᓴᐅᔪᓐᓇᕐᓂᖏᓐᓂ ᐅᖂᓇᕐᓂᖅᓴᐅᔪᓂ ᓄᓇᒦᓗᑎᒃ ᐊᒻᒪᓗ ᓄᓕᐊᕈᓐᓇᕐᓂᕐᒥᓂᒃ ᐱᓇᓱᖕᓂᖅᓴᐅᔪᔮᖃᑦᑕᖅᑐᑦ ᐅᐊᖕᓇᖅᐸᓯᐅᓂᕐᒧᐊᕋᓱᖏᓂᖅᓴᐅᓪᓗᑎᒃ ᐅᑭᐅᖅᑕᖅᑑᖅᐸᓯᐅᓂᕐᒧᑦ ᓄᓇᖏᓐᓂ ᐊᕕᓐᖓᖃᕐᓂᖅᓴᐅᔪᓐᓇᕐᒥᔫᒐᓗᐊᓂ ᓂᕿᒃᓴᖃᕐᓂᖅᓴᐅᔪᓐᓇᕐᒥᔫᒑᓗᐊᓂ.

ᑕᒪᐃᓐᓂᒃ ᑕᑯᔪᒪᒍᕕᑦ ᖃᐅᔨᔭᐅᓯᒪᔪᓂᒃ ᐅᓂᒃᑳᖅᑐᓂᒃ ᐅᒃᐱᖕᓂᒃ ᐅᓪᓗᖃᕐᕕᐅᓂᖏᓐᓂᒃ ᖃᐅᔨᓴᖅᑕᐅᓚᐅᖅᑐᓂ ᒥᑦᑎᒪᑕᓕᐅᑉ ᕿᑭᖅᑕᓂᖓ, ᐊᑐᐃᓐᓇᐅᕗᑦ ᐅᕙᖓᑦ ᖃᕆᑕᐅᔭᒃᑯᑦ ᑐᕌᕈᑎᓕᖕᒥ Nordicana D.