ᑲᖑᐃᑦ ᐊᖏᔪᑦ ᐅᑎᖅᑕᖃᑦᑕᖅᑐᑦ ᑎᒻᒥᐊᑦ ᐱᑭᐅᒐᔪᓐᓂᖅᓴᐅᔪᑦ ᑲᓇᓐᓇᖓᓂ ᑲᓇᑕᒥ ᐅᑭᐅᑕᖅᑐᖓᓂ, ᐅᐊᓐᓇᖓᓂ ᕿᑭᖅᑖᓗᒻᒥ ᐅᐊᓐᓇᖓᓄ ᐊᐅᓱᐃᑦᑑᑉ ᕿᑭᖅᑖᓗᐊ, ᐃᓚᖏᑦ ᑎᒻᒥᐊᑦ ᐱᑭᐅᖃᑦᑕᖅᑐᑦ ᐱᖓᓐᓇᖓᓂ ᐊᑯᑭᑦᑐᑦ. ᑲᖑᐃᑦ ᐅᑭᐅᑕᖅᑐᒨᖃᑦᑕᖅᑐᑦ ᐊᐅᔭᒃᑯᑦ ᐱᔾᔪᑎᒋᓪᓗᒍ ᓄᓇᖓ ᐱᐅᔫᓂᖓᓄᑦ ᖃᓄᐃᓐᓂᖓᓄᑦ ᐱᑭᐅᕐᓗᓂ ᐊᒻᒪ ᑯᖑᐊᕋᓕᐅᕐᓗᓂ. ᐊᕐᕌᒍ ᐃᓚᓕᒫᖓᓄᑦ, ᑲᖑᐃᑦ ᐅᑎᖅᑕᖃᑦᑕᖅᑐᑦ ᓂᒋᖓᓄ ᓂᓪᓕᓇᖅᑐᒦᑦᑕᐃᓕᓪᓗᑎ ᐅᑭᐅᑕᖅᑐᒥᑦ.
ᐅᑎᖅᑕᖃᑦᑕᑎᓪᓗᒋᑦ, ᑲᖑᐃᑦ ᐊᑐᖃᑦᑕᖅᑐᑦ ᑕᒪᐅᓇᔅᓴᐃᓐᓇᐸᓗᒃ ᐊᖅᑯᑎᖃᖅᐸᑦᑐᑦ. ᐊᕐᕌᒍᑕᒫᑦ, ᐅᑭᐅᑕᖅᑐᒦᒍᓐᓃᐸᑦᑐᑦ ᓄᖑᖏᓐᓂ ᐋᒡᒌᓯ ᐊᒻᒪ ᐅᑎᖅᑐᑎᑦ ᖃᓪᓗᓈᑦ ᓄᓇᖓᓐᓄᑦ ᓂᒋᖓᒍᑦ ᑯᐸᐃᒃ ᓇᔪᖅᓯᕕᒋᕙᑦᑕᖏᑦ 6 ᑎᑭᑦᑐᒍ 8 ᐱᓇᓱᐊᕈᓯᕐᓄᑦ, ᓄᒃᑭᑎᒃᑲᓐᓂᖃᑦᑕᖅᑐᒋᑦ ᑎᒥᖏᑦ ᓂᕿᓂᑦ ᐱᕈᖅᓰᕈᕕᓐᓂᑦ ᐊᒻᒪ ᒪᓴᕐᓂᑦ. ᑕᒫᖓᑦ, 900-ᑭᓚᒦᑕᐃᑦ ᓂᒋᕐᒧᑦ ᑎᒻᒥᕙᑦᑐᑦ ᐅᑭᐊᓪᓕᕕᒋᕙᑦᑕᖏᓐᓄᑦ ᒥᐊᓕᒐᒃᑯᓐᓂᑦ ᕿᑎᐊᓂ ᐊᑦᓛᓐᑎᒃ ᐊᕕᑦᑐᓯᒪᔪᑦ ᑎᑭᑦᑐᒍ ᓄᐊᑦ ᑭᐅᕈᓚᐃᓇ. ᐅᐱᕐᖔᒃᑯᑦ, ᑲᖑᐃᑦ ᐅᑭᐊᓪᓕᕕᖏᓐᓃᒍᓐᓃᖃᑦᑕᖅᑐᑦ, ᓱᓕ 6 ᑎᑭᑦᑐᒍ 8 ᐱᓇᓱᐊᕈᓯᒃᑲᓂᕐᓂᑦ ᐅᐊᓐᓇᖓᓂ ᑯᐸᐃᒃ ᐅᑭᐅᑕᖅᑐᒨᕆᐊᓚᐅᖅᑎᓐᓇᒋᑦ ᐱᑭᐅᖃᕐᕕᖏᓐᓄᑦ (3,000 ᑭᓚᒦᑕᐃᑦ ᐅᐊᓐᓇ). ᑎᒻᒥᐊᑦ ᓄᖅᑲᑕᕐᕕᖓᓃᖔᓕᖅᐸᑦᑐᑦ ᐊᑯᓐᓂᖏᓐᓂ 15 ᐊᒻᒪ 25 ᒪᐃ ᑎᑭᑦᑐᑎᑦ ᐱᑭᐅᕐᕕᖏᓐᓄᑦ ᒪᐃ ᑎᑭᑦᑐᒍ ᐱᒋᐊᕐᓂᖏᓐᓄᑦ ᔫᓂ.
ᐊᒥᓲᓂᖏᑦ
1965−ᒥᓂᑦ, ᑲᓇᑕᒥ ᐆᒪᔪᓕᕆᔨᒃᑯᑦ ᐱᔨᑦᑎᖅᑏᑦ ᐊᕐᕌᒍᑕᒫᑦ ᖃᖓᑕᓲᒃᑯᑦ ᖃᐅᔨᓴᖃᑦᑕᖅᑐᑦ ᑲᖑᕐᓂᑦ ᐅᐱᕐᖔᒃᑯᑦ ᐅᑎᖅᑕᑎᓪᓗᒋᑦ ᒥᔅᓴᐅᓴᑦᑕᐅᓪᓗᑎ ᐊᒥᓲᓂᖏᑦ. ᑖᓐᓇ ᖃᐅᔨᓴᕐᓂᐅᖃᑦᑕᖅᑐᑦ ᓄᖑᖏᓐᓂ ᐃᐳᕈ ᐅᕝᕙᓘᓐᓃᑦ ᐱᒋᐊᕐᓂᖏᓐᓂ ᒪᐃ (ᑐᓐᖓᓂᖃᖅᑐᖅ ᓯᓚᖓᓄᑦ) ᐊᑕᖏᖅᑐᑎᑦ ᓂᒋᖓᓃᑎᓪᓗᒋᑦ ᑯᐸᐃᒃ. ᑕᓪᓕᒪᑦ ᖃᖓᑕᓲᑦ ᐊᑐᖅᑕᐅᕙᑦᑐᑦ ᐊᑕᐅᑦᑎᒃᑯᑦ ᐊᑕᖐᓂᐊᖅᑐᑎᑦ ᐅᓪᓗᕐᒥᑦ ᐊᑕᐅᓯᕐᒥᑦ, ᐊᖏᔪᖅ ᓄᓇᖓ ᓇᔪᖅᑕᐅᔪᑦ ᐅᖓᓯᓐᓂᖃᖅᑐᑦ ᐱᒋᐊᖅᑐᓂ Lac Champlain, ᑯᐸᐃᒃ, ᓂᒋᖓᓂ Lac St-Jean, ᑯᐸᐃᒃ, ᐅᐊᓐᓇᖓᓂ ᐊᒻᒪ ᑲᓇᓐᓇᖓᓂ ᐋᓐᑎᐅᕆᔪ ᐱᖓᓐᓇᖓᓂ Baie-des-Chaleurs ᑲᓇᓐᓇᖓ. ᑎᒻᒥᐊᓕᒫᑦ ᑲᑎᓐᖓᔪᑦ ᖃᐅᔨᔭᐅᔪᑦ ᐊᔾᔨᓕᐅᖅᑕᐅᓚᐅᖅᑐᑦ ᐊᒻᒪ ᐊᑐᖅᑕᐅᓪᓗᑎᑦ ᒥᔅᓴᐅᓴᒍᑕᐅᓪᓗᑎ ᐊᒥᓲᓂᖏᓐᓄᑦ.
 |
| ᓄᓇᐃᑦ ᖃᐅᔨᒋᐊᕐᕕᐅᓯᒪᔪᑦ ᑲᖑᐃᑦ ᐅᐱᕐᖔᒃᑯᑦ ᐅᑎᖅᐸᓪᓕᐊᓵᕐᓂᖏᓐᓂ ᐅᑭᐅᖅᑕᖅᑑᓂᕐᒧᑦ. |
ᐊᓯᖏᑎᑐᑦ ᑲᖑᕐᓂᑦ ᐆᒪᔪᓂᑦ, ᑲᖑᐃᑦ ᐊᒥᓲᓂᖏᑦ ᐊᖏᔪᒥᑦ ᖁᕝᕙᕆᐊᖅᓯᒪᔪᑦ 1960-ᖏᓐᓂ. ᐃᓚᒋᔭᖓ ᐱᔾᔪᑎᓪᓗᐊᑕᖓ ᑖᔅᓱᒧᖓ ᐊᒥᓱᕈᕆᐊᕐᓂᖏᓐᓄᑦ ᐊᑐᖃᑦᑕᕐᓂᖏᓐᓄᑦ ᐱᕈᖅᑐᓕᐅᕐᕕᓂᑦ ᑭᓪᓕᖃᖏᑦᑐᓂᑦ ᓂᕿᖃᖅᑎᑦᑎᔪᑦ ᐅᑭᐅᒃᑯᑦ (ᒥᐊᓕᒐᓂᑦ ᐊᒻᒪ ᑲᓇᓐᓇᖓᓂ) ᐊᒻᒪ ᐅᑎᖅᑕᑎᓪᓗᒋᑦ ᓄᖅᑲᑕᕐᕕᖏᑦ (ᓂᒋᖓᓂ ᑯᐸᐃᒃ). ᖃᓄᐃᓐᓂᕆᔭᖏᑦ ᐊᒥᓱᕈᕐᓂᖏᓐᓄᑦ ᑲᖑᐃᑦ ᐊᔅᓱᕈᖅᑎᑦᑎᔪᑦ ᐊᑦᑕᓇᖅᑐᒥᑦ ᐅᑭᐅᑕᖅᑐᒥ ᐱᑭᐅᕐᕕᖏᓐᓂ ᓇᔪᖃᑦᑕᑕᖏᓐᓂ. ᒪᑭᒪᑎᑦᑎᐊᓂᐊᕐᓗᒋᑦ ᑖᒃᑯᐊ ᑲᖑᐃᑦ ᐊᒥᓲᓂᖏᑦ, ᐊᐅᓚᑎᓂᕐᒧᑦ ᖃᓄᐃᓕᓯᒋᐊᕈᑏᑦ ᐅᐱᕐᖔᒃᑯᑦ, ᐅᑭᐊᒃᑯᑦ ᐊᒻᒪ ᐅᑭᐅᒃᑯᑦ ᐱᓕᕆᐊᖑᓯᒪᓕᕐᑐᖅ 1999-ᒥᓂᑦ ᑲᓇᑕᒥ ᐊᒻᒪ 2009 ᒥᐊᓕᒐᓂᑦ. ᑐᕌᒐᓪᓗᐊᑕᕆᔭᖓ ᑖᒃᑯᓂᖓ ᒪᑭᒪᑎᑦᑎᐊᕐᓗᒋᑦ ᐊᒥᓲᓂᖏᑦ 1 ᒥᓕᐊᓐ ᐅᕝᕙᓘᓐᓃᑦ ᑐᖔᓂ. ᑲᓇᑕᒥ ᐅᒪᔪᓕᕆᔨᒃᑯᑦ ᐱᔨᑦᑎᑏᑦ ᐊᒻᒪ ᐊᑦᓛᓐᑎᒃ ᑎᖏᓗᓂ ᑲᑎᒪᔩᑦ ᐋᖅᑭᔅᓯᓚᐅᖅᑐᑦ ᑐᕌᖅᑕᐅᔪᒥᑦ ᐊᒥᓲᓂᖏᓐᓄᑦ ᐊᑯᓐᓂᖏᓐᓂ 500,000 ᐊᒻᒪ 750,000 ᑲᖑᐃᑦ, ᒪᑭᒪᑎᑦᑎᒐᔭᖅᑐᑦ ᓈᒻᒪᑦᑐᓂ ᐊᒥᓲᓂᖏᓐᓄᑦ ᐊᒻᒪ ᐊᑦᑎᓪᓕᑎᑦᑎᒋᐊᖅᑐᓂ ᐊᑦᑕᓇᕈᑎᐅᔪᓐᓇᖅᑐᓂᑦ ᐊᑦᑐᐃᓂᖏᓐᓄᑦ ᐊᕙᑎᖓᓂᑦ ᖃᓄᐃᓐᓂᖓᓂᑦ ᓇᔪᖅᑕᐅᕙᑦᑐᓂᑦ ᐊᒻᒪ ᐆᒪᔪᓂᑦ ᐊᔾᔨᒌᖏᑦᑐᓂᑦ. ᐅᓪᓗᒥᒧᑦ ᑎᑭᑦᑐᒍ, ᑖᒃᑯᐊ ᖃᓄᐃᓕᓯᒋᐊᕈᑏᑦ ᑲᔪᓯᑦᑎᐊᖅᓯᒪᔪᑦ ᐊᒥᓲᓂᖏᓐᓄᑦ.
ᐱᑭᐅᓂᕐᒧᑦ ᐊᕙᑎᖓ
ᐊᑭᖓ ᒥᑦᑎᒪᑕᓕᐅᑉ ᐊᒥᓲᓛᖑᔪᑦ ᑲᑦᑎᓐᖓᔪᑦ ᑎᒻᒥᐊᑦ ᑲᖑᕐᓂᑦ ᑲᓇᑕᒥ ᐅᑭᐅᑕᖅᑐᒥ ᖁᑦᑎᑦᑐᒥᑦ, ᓈᒻᒪᑦᑐᒥᑦ ᖃᐅᔨᓴᕐᕕᖃᖅᑎᑦᑎᔪᖅ ᐱᑭᐅᕐᕕᖏᓐᓄᑦ ᐊᕙᑎᖓᓂᑦ ᐊᒻᒪ ᐊᑦᑐᐃᓂᖏᑦ ᐅᑭᐅᑕᖅᑐᒥ ᓇᔪᖃᑦᑕᖅᑕᖏᓐᓂ. ᑎᑭᒐᐃᒻᒪᑕ, ᑲᖑᐃᑦ ᐱᑕᖃᕐᓂᖏᑦ ᓲᕐᓗ ᓂᒋᖓᓂ ᓵᖓᔪᑦ ᖃᖅᑲᖏᓐᓄᑦ ᐊᒻᒪ ᑰᒐᓛᓄᑦ, ᐊᐳᑎ ᐊᐅᕝᕕᒋᕙᑦᑕᖓ ᐊᒻᒪ ᐱᕈᖅᑐᓂ ᓴᖅᑭᑎᑦᑎᓪᓗᓂ. ᑲᖑᐃᑦ ᑕᒫᓂ ᓂᕆᒋᐊᓐᖓᐸᑦᑐᑦ ᑭᓯᐊᓂ ᕿᓚᒥᑯᓗᒃ ᐊᑦᑎᑦᑐᓄᑦ ᓄᓇᖓᓅᖅᐸᑦᑐᑦ, ᓇᔪᖔᕈᒪᔭᖏᑦ ᐱᑭᐅᓂᕐᒧᑦ ᐊᐳᑎ ᐊᐅᑉᐸᓪᓕᐊᑎᓪᓗᒍ.
ᓇᒧᖓᖃᑦᑕᕐᓂᖏᑦ ᑲᐃᑦ ᐊᑭᖓᓂ ᒥᑦᑎᒪᑕᓕᐅᑉ ᐊᔾᔨᒌᖏᖃᑦᑕᖅᑐᑦ ᐊᐅᔭᒃᑯᑦ. ᐱᑭᐅᖅᑎᓪᓗᒋᑦ ᐱᒋᐊᖅᑐᓂ ᔫᓂ ᑎᑭᑦᑐᒍ ᐱᒋᐊᕐᓂᖏᓐᓄᑦ ᔪᓚᐃ, ᑲᖑᐃᑦ ᐊᒥᓲᓂᕆᔭᖏᑦ 20 km² ᓇᔪᖅᑕᐅᔪᒥᑦ ᑭᓚᒦᑕᒐᓚᓐᓂᑦ ᐅᐊᓐᓇᖓᓂ Pointe Dufour ᐃᒪᖅᐸᓯᒻᒥ. ᑖᒃᑯᓇᓂ ᑎᒻᒥᐊᓂᑦ, ᐱᑭᐅᑦ ᐊᒥᓲᓂᖏᑦ ᖁᕝᕙᓯᑦᑐᑦ, ᐊᒥᓲᓂᕆᒐᔪᑦᑕᖏᑦ 490 ᐱᑭᐅᑦ ᐊᑕᐅᓯᖅ ᑭᑉᐹᕆᑦᑐᖅ ᑭᓚᒦᑕ (ᐊᑯᓐᓂᖏᓐᓂ: 42 ᑎᑭᑦᑐᒍ 1053). ᐊᕐᕌᒍᖏᓐᓂᑦ ᖁᕝᕙᓯᑦᑐᒥᑦ ᑎᒻᒥᐊᓕᐅᖅᑎᓪᓗᒋᑦ (ᓲᕐᓗ. ᐊᒥᓱᑦ ᑲᖑᐃᑦ ᐱᑭᐅᖅᑐᑦ), ᑲᑎᓐᖓᓂᕆᔭᖏᑦ ᐊᒥᓱᕈᒃᑯᓂᖅᑐᑦ, ᐊᒻᒪ ᐊᓯᖏᑦ ᐱᑭᐅᖃᕐᕕᔅᓴᐅᔪᑦ ᐊᑐᖅᑕᐅᓪᓗᑎ ᕿᑭᖅᑕᒥ, ᑕᐃᒫᕌᓘᖏᓂᖅᓴᖅ.
ᐊᔾᔨᒌᖏᓐᓂᖏᑦ ᓈᓴᐅᑎᖏᑦ ᑎᒻᒥᐊᓄᑦ ᐊᐅᔭᒥ ᕿᑭᖅᑕᒦᑉᐸᑦᑐᑦ ᐊᐅᓚᑕᐅᔪᑦ ᐅᐱᕐᖔᒃᑯᑦ ᓯᓚᖓᓄᑦ ᐊᒻᒪ ᐱᑭᐅᕐᓂᖏᓐᓄᑦ ᑲᔪᓯᑦᑎᐊᕐᓂᖏᓐᓄᑦ. ᑲᖑᐃᑦ ᓇᒻᒥᓂᖅ ᐱᑭᐅᓕᐅᕈᓐᓇᖏᑦᑐᑦ ᐱᑭᐅᖃᕐᕕᒋᔭᖏᑦ ᐊᐳᑎᖃᕈᓐᓃᓚᐅᖅᑎᓐᓇᒋᑦ. ᒪᓐᓂᖃᓕᕋᔪᑉᐸᑦᑐᑦ ᑲᖑᐃᑦ ᐊᑭᖓᓂ ᒥᑦᑎᒪᑕᓕᒃ 12 ᔪᓂ (ᐊᑯᓐᓂᖏᓐᓂ 6 ᑎᑭᑦᑐᒍ 20 ᔪᓂ). ᐊᕐᕌᒍᑕᒫᑦ ᐊᔾᔨᒌᖏᓐᓂᖏ ᒪᓂᖃᒐᔪᓕᕐᓂᖏᑦ ᐊᑦᑐᐊᓂᖃᓗᐊᖅᑐᖅ ᓯᓚᖓᓄᑦ ᖃᓄᐃᓐᓂᖓᓄᑦ ᐅᐱᕐᖔᒃᑯᑦ, ᐊᐳᑎ ᐊᐅᕋᑖᖅᑎᓪᓗᒍ ᑭᖑᕙᓯᓛᖓ ᑭᖑᕙᖅᑎᓪᓗᒍ.
ᐊᐳᐱᑎ ᐊᐅᓐᓇᓵᖅᑎᓪᓗᒍ, ᐊᒥᓱᑦ ᑎᒻᒥᐊᑦ ᐱᑭᐅᓕᑐᐃᓐᓇᐸᑦᑐᑦ ᐱᕕᔅᓴᖃᖏᓗᐊᕐᓂᖓᓄᑦ ᐱᔭᕇᖅᑕᐅᓗᓂ ᑎᒻᒥᐊᓕᐅᒃᑲᓂᕐᓂᖅ ᐅᑭᐊᔅᓵᒃᑯᑦ ᖁᐊᓚᐅᖅᑎᓐᓇᒍ. ᐃᕙᖃᑦᑕᕐᓂᖏᑦ ᐊᑯᓂᐅᓂᖏᑦ ᓇᓗᓇᐃᖅᓯᒪᔪᑦ ᑎᒻᒥᐊᓂᑦ, ᑯᖑᕐᓄᑦ ᑲᖑᕋᕈᖅᐸᑦᑐᑦ 23 ᑎᑭᑦᑐᒍ 24 ᐅᓪᓗᐃᑦ ᒪᓐᓂᑖᓚᐅᖅᑎᓪᓗᒋᑦ ᐊᒻᒪ ᒪᓐᓂᓕᒫᑦ ᐃᓄᕈᖅᐸᑦᑐᑦ ᐃᑲᕋᓂᑦ 24−ᓂᑦ. ᑕᐃᒪᐃᓐᓂᖓᓄᑦ, ᑲᖑᐊᕋᕈᖃᑦᑕᕐᓂᖏᑦ ᐅᓪᓗᖏᑦ ᒪᓕᖃᑦᑕᖅᑐᑦ ᐊᓯᔾᔨᖅᑐᓂᑦ ᒪᓐᓂᑖᕐᓂᖏᓐᓄᑦ ᐅᓪᓗᖏᓐᓄᑦ: ᑲᖑᐃᑦ ᒪᓐᓂᑖᖅᓴᕋᐃᒃᑯᑎ ᐊᕐᕌᒍᒥ ᐊᑕᐅᓯᕐᒥᑦ, ᒪᓐᓃᑦᑕᐅᖅ ᑯᖓᐊᕋᕈᖅᓴᕋᐃᓂᐊᖅᑐᑦ. ᑯᖑᐊᕋᕈᔪᖃᑦᑕᕐᓂᕆᓚᐅᖅᑕᖏᑦ ᐅᓪᓗᖏᑦ ᐊᑭᖓᓂ ᒥᑦᑎᒪᑕᓕᒃ 9 ᔪᓚᐅ (ᐊᑯᓐᓂᖏᓐᓂ: 3 ᑎᑭᑦᑐᒍ 15 ᔪᓚᐃ).
ᒪᓐᓃᑦ ᐊᑕᐅᓯᕐᒦᑦᑐᑦ ᐊᔭᐅᖅᓯᔪᖅ ᐊᑯᓂᐅᓂᖓᓄᑦ ᒪᓐᓂᓕᐅᖃᑦᑕᕐᓂᖏᓐᓄᑦ ᒪᓐᓂᓕᐅᖃᑦᑕᖅᑐᑦ ᖃᓂᒋᔭᐸᓗᐊᓂ 34 ᐃᑲᕐᕋᐃᑦ. ᒪᓐᓃᑦ ᐊᒥᓲᓂᖏᑦ ᑕᑯᔅᓴᐅᑎᑦᑎᔪᖅᑕᖃᓄᐃᓘᖃᑦᑕᐅᑎᐊᕐᓂᖏᓐᓄᑦ ᒪᓐᓂᓕᐅᕐᓂᖏᓐᓄᑦ ᐅᓪᓗᖓ: ᐊᖏᔫᔪᖅ ᑲᖑᐃᑦ ᒪᓐᓂᑖᖅᓴᕋᐃᒐᐃᒻᒪᑕ ᐊᒻᒪ ᒥᑭᔫᓪᓗᑎ ᒪᓐᓂᑖᕐᓇᓵᕋᐃᒐᒥ. ᐊᑦᑎᓪᓕᒋᐊᖅᓯᒪᓂᖏᑦ ᒪᓐᓃᑦ ᐊᕐᕋᒎᓯᒪᔪᓂᑦ ᐱᔾᔪᑎᖃᓗᐊᖅᑐᑦ ᐊᕐᓇᐃᑦ ᖃᓄᐃᓐᓂᖏᑦ ᐊᑦᑎᓪᓕᒋᐊᖅᓯᒪᓂᖏᓐᓄᑦ ᓂᕆᕕᔅᓴᖅᑕᖃᑦᑎᐊᖏᓐᓂᖓᓄᑦ ᐊᒻᒪ ᐊᐅᔭᑭᓐᓂᖅᓴᐅᓂᖓᓄᑦ ᐱᕈᐃᓗᑎ. ᐊᑕᖏᖅᑐᓂᑦ ᒪᓐᓂᕆᒐᔪᑦᑕᖏᑦ ᑲᖑᕐᓄᑦ ᐊᑭᖓᓂ ᒥᑦᑎᒪᑕᓕᒃ 3.7 ᒪᓐᓃᑦ ᐊᑐᓂ ᐱᑭᐅᓂᑦ (ᐊᑯᓐᓂᖏᓐᓂ: 3.1 ᑎᑭᑦᑐᒍ 4.4).
ᐊᑭᖓᓂ ᒥᑦᑎᒪᑕᓕᒃ, ᐱᑭᐅᓄᑦ ᑲᔪᓯᖏᔾᔪᑎᒋᕙᑦᑕᖓ ᑲᖑᕐᓄᑦ ᓂᕆᔭᐅᖃᑦᑕᕐᓂᖏᓐᓄᑦ. ᐊᑦᑎᓪᓕᕙᓪᓕᐊᔪᑦ ᐱᒻᒪᕆᐅᓂᖏᓐᓄᑦ, ᓂᕆᖃᑦᑕᑐᓗᐊᖑᐊᐸᑦᑐᑦ ᑎᕆᒐᓂᐊᑦ, ᓇᐅᔭᕕᐊ, ᖃᖁᓪᓗᐃᑦ ᐊᒻᒪ ᑐᓗᒐᐃᑦ. ᐊᑐᖅᑕᐅᒐᔪᑦᑐᒥᑦ, ᐱᑭᐅᑦ ᑲᔪᓯᑦᑎᐊᐸᑦᑐᑦ 66% ᑭᓯᐊᓂ ᑖᓐᓇ ᑭᓪᖓ ᐊᔾᔨᒌᖏᖃᑦᑕᖅᑐᖅ ᐊᖏᔪᑲᓪᓚᒻᒥᑦ ᐊᕐᕌᒎᔪᓂᑦ (ᐊᑯᓐᓂᖏᓐᓂ: 14 ᑎᑭᑦᑐᒍ 90%). ᐊᕙᑎᒧᑦ ᖃᓄᐃᓐᓂᖏᑦ ᐊᒻᒪ, ᐱᒻᒪᕆᐅᓛᖑᔪᒥᑦ, ᓂᕆᖃᑦᑕᖅᑐᑦ ᐱᑕᖃᕐᓂᖏᑦ ᓇᓗᓇᐃᖅᓯᔪᑦ ᐱᑭᐅᓂᑦ ᑲᔪᓯᓂᖃᑦᑎᐊᖅᑐᓂᑦ. ᑲᔪᓯᑦᑎᐊᕐᓂᖏᑦ ᐊᑦᑎᑦᑐᑦ ᐊᒻᒪᓗᑦᑕᐅᖅ ᐆᒪᔪᓕᐅᒃᑲᓐᓂᕋᓱᐊᕐᓂᖅ ᐊᑦᑎᓪᓕᒋᐊᖅᑎᓪᓗᒍ ᐊᐳᑎ ᐊᐅᓐᓇᓵᕐᓂᖓᓄᑦ. ᐱᑭᐅᑦ ᑲᔪᓯᓂᖃᑦᑎᐊᐸᑦᑐᑦ ᐊᔾᔨᒌᑉᐸᖏᒻᒥᔪᑦ ᐅᑎᖅᑕᖃᑦᑕᕐᓂᖏᓐᓄᑦ ᐊᓯᔾᔨᕐᓂᖏᓐᓄᑦ ᐊᕕᓐᖓᐃᑦ ᐱᑕᖃᕐᓂᖏᓐᓄᑦ (ᑕᑯᒍᒃ ᐊᕕᓐᖓᐃᑦ). ᐊᕕᓐᖓᑭᑦᑎᓪᓗᒍ, ᓂᕆᖃᑦᑕᖅᑐᑦ ᓲᕐᓗ ᓴᑎᕆᒐᓂᐊᑦ ᐊᒻᒪ ᓇᐅᔭᕕᐊᑦ ᓴᖑᓂᐊᖅᑐᑦ ᑲᖑᕐᓄᑦ ᐊᒻᒪ ᐊᒥᓱᓂᑦ ᒪᓐᓂᓂᑦ ᐱᓗᑎᑦ, ᐱᑭᐅᓂᑦ ᑲᔪᓯᓂᖃᑦᑎᐊᑎᑦᑎᖏᑦᑐᖅ. ᑖᓐᓇ ᐊᑦᑐᐃᓂᖓ ᐊᖏᓪᓕᒋᐊᖅᑕᐅᔪᖅ ᑲᖑᕐᓄᑦ ᐱᑭᐅᖅᑕᖃᕐᓂᖓ ᖓᑦᑎᑎᓪᓗᒍ, ᓲᕐᓗ ᐃᓚᒋᔭᐅᓐᓇᑎ ᑲᑎᓐᖓᔪᓂᑦ ᑎᒻᒥᐊᓂᑦ.
ᐃᓚᖏᓐᓂ ᐱᑭᐅᖅᑐᓂᑦ ᑎᒻᒥᐊᓂᑦ, ᑕᐃᒃᑯᐊ ᔭᒐᐃᕙᑦᑐ ᒪᓐᓂᓕᒫᖏᓐᓂᑦ ᓂᕆᔭᐅᓪᓗᑎ ᒪᓐᓂᓕᐅᒃᑲᓂᔾᔮᖏᑦᑐᑦ. ᐅᖓᑖᓃᑐᑦ 90% ᑲᖑᐃᑦ ᐆᒪᔪᓕᐅᒃᑲᓐᓂᕈᓐᓇᖏᑦᑐᑦ ᐅᕝᕙᓘᓐᓃᑦ ᔭᒐᐃᓗᑎ ᐱᑭᐅᖓᓂ ᕿᑭᖅᑕᒥᑦ ᐊᐅᔭᕋᑖᒥᑦ ᐊᓯᖏᓐᓄᑦ ᐅᑭᐅᑕᖅᑐᒥ ᐊᕕᑦᑐᖅᓯᒪᔪᓂᑦ. ᑕᐃᒪᐃᑦᑎᓪᓗᒍ ᐊᒥᓱᓄᑦ ᐃᒪᕐᒥᐅᑕᓄᑦ ᑎᒻᒥᐊᓄᑦ, ᑲᖑᐃᑦ ᓱᓗᐃᔭᖃᑦᑕᖅᑐᑦ (ᓱᓗᐃᔭᖅᑐᑦ ᐊᒻᒪ ᓄᑖᓂᑦ ᓱᓗᑖᖅᑐᑎᑦ) ᑎᒻᒪᐅᑎᖏᑦ ᓱᓗᓕᒫᖏᑦᐊᑕᐅᓯᐊᖅᑐᑎᑦ ᐊᐅᔭᑕᒫᑦ, ᑎᖏᒍᓐᓇᐃᓪᓕᕙᑦᑐᑦ ᐊᒻᒪ ᐊᑦᑕᓇᖅᑐᒦᓕᖅᑐᑎᑦ ᓂᕆᖃᑦᑕᖅᑐᓄᑦ . ᐱᑭᐅᓕᐅᖅᐸᖏᑦᑐᑦ ᐅᕝᕙᓘᓐᓃᑦ ᑲᔪᓯᓂᖃᖅᓯᒪᖏᑦᑐ ᐱᑭᐅᖏᓐᓂᑦ ᑕᐃᒪᐃᓐᓂᖓᓄᑦ ᕿᒪᐃᕙᑦᑐᑦ ᕿᑭᖅᑕᒥᑦ ᓱᓗᐃᔭᕐᕕᖃᖅᑐᑎᑦ ᓴᐳᒻᒥᔭᐅᔪᓐᓇᖅᑐᑎᑦ ᓂᕆᖃᑦᑕᖅᑐᓂᑦ, ᐊᔾᔨᒋᖏᑕᖏᑎᒍᑦ ᐊᖏᔪᖅᑳᖑᔪᑦ ᑎᒻᒥᐊᑦ ᑎᒻᒥᐊᓛᖏᓐᓃᖏᓐᓇᖃᑦᑕᖅᑐᑦ ᐊᒻᒪ ᓱᓗᐃᔭᖅᑐᑎᑦ ᐊᑭᖓᓂ ᒥᑦᑎᒪᑕᓕᒃ.
 |
 |
 |
 |
ᑲᖑᐊᕋᕈᕋᐃᒻᒪᑕ, ᐊᒥᓱᑦ ᑲᑎᓐᖓᔪᑦ ᕿᒪᐃᕙᑦᑐᑦ ᐱᑭᐅᖃᕐᕕᖏᓐᓂ ᑲᑎᓐᖓᔪᓂᑦ ᐊᒻᒪ ᓇᒧᑐᐃᓐᓈᖅᑐᑎᑦ ᕿᑭᖅᑕᒥᑦ, ᐱᑕᖃᕐᓂᖃᖅᑐᑎᑦ ᒪᓴᕐᓂᑦ. ᑖᒃᑯᐊ ᒪᓴᐃᑦ ᐊᒥᓱᓂᑦ ᐱᑕᖃᐅᖅᑐᓂᑦ ᐱᕈᖅᑐᖃᖅᑐᑦ ᐱᔭᐅᖔᕈᒪᔪᑦ ᑲᖑᐊᕋᕐᓄᑦ, ᐊᒻᒪ ᐊᒥᓱᑦ ᑎᓯᕋᓛᑦ ᕿᒫᕕᐅᕙᑦᑐᑦ ᑲᑎᓐᖓᔪᓄᑦ ᐱᓇᓱᐊᖅᑕᐅᑳᓪᓚᒃᑯᑎ ᓂᕆᖃᑦᑕᖅᑐᓄᑦ. ᑲᑎᓐᖓᔪᑦ ᖁᒻᒧᑦ ᐅᖓᓯᓐᓂᖃᓂᖓᓅᕈᓐᓇᖅᑐᑦ 50 ᑭᓚᒦᑕᐃᑦ ᐊᒥᓲᖏᑦᑐᓂᑦ ᐅᓪᓗᓂᑦ ᐃᓂᑖᕐᓗᑎ ᐱᖁᐃᑦᑎᐊᕕᔅᓴᐅᔪᒥᑦ ᕿᑭᖅᑕᒥᑦ. ᐊᐅᔭᐅᒍᓐᓃᓕᖅᑎᓪᓗᒍ, ᐊᒥᓱᑦ ᑲᑎᓐᖓᔪᑦ ᓄᓇᖅᐸᓯᒻᒨᐸᑦᑐᑦ, ᐃᓛᓐᓂᒃᑯᑦ ᖁᕝᕙᓯᓐᓂᖏᑦ ᖃᖅᑲᓂ ᓂᖀᑦ ᒪᓴᕐᓂᑦ ᐱᖃᓯᐅᑎᓪᓗᑎ ᐱᑕᖃᕐᓂᖏᑦ ᐱᕈᖅᓯᐊᓕᐅᖅᑐᑦ ᓄᐸᖅᐸᓯᒻᒥ ᓇᓗᓇᐃᔭᐃᔪᖅ ᑖᒃᑯᓂᖓ ᓅᓐᓂᐅᔪᓂᑦ. ᐱᒻᒪᕆᐅᓛᕆᔭᕗᑦ ᖃᐅᔨᓴᖃᑦᑕᓂᕐᒧᑦ ᑕᒪᑐᒪᓂ ᐱᔭᐅᓪᓗᑎ ᐊᒻᒪ ᓇᓗᓇᐃᒃᑯᓯᖅᑐᒋᑦ ᐊᒥᓱᓂᑦ ᑲᖑᕐᓂᑦ ᑲᑎᓐᖓᔪᓂᑦ. ᓇᓗᓇᐃᒃᑯᓯᖅᑐᒋᑦ ᐃᓛᒃᑯᑦ ᐱᒻᒪᕆᐅᔪᖅ ᖃᐅᔨᓴᕐᓗᒋᑦ ᐆᒪᓂᖏᑦ ᐊᒻᒪ ᓇᒧᓐᖓᖃᑦᑕᕐᓂᖏᑦ ᐊᑯᓂᐅᔪᒥᑦ ᐆᒪᓲᓄᑦ ᑎᒻᐊᒥᓂᑦ ᓲᕐᓗ ᑲᖑᐃᑦ. ᐆᑦᑐᖅᑕᐅᓂᖏᑦ ᐊᒻᒪ ᐅᖁᒪᐃᓐᓂᓂᐊᖅᑕᐅᓂᖏᑦ ᐱᔭᐅᔪᓂᑦ ᑲᖑᐊᕋᕐᓂᑦ ᑐᑭᓯᒋᐊᕈᑎᔅᓴᖃᒃᑲᓂᖅᑎᑦᑎᔪᖅ ᐱᕈᕐᓂᖏᓐᓄᑦ ᐊᐅᔭᒃᑯᑦ. ᖃᐅᔨᒋᐊᒃᑲᓐᓂᕈᒪᒍᕕᑦ ᓇᓗᓇᐃᒃᑯᓯᖅᓯᓯᖃᑦᑕᓂᕐᒧᑦ ᐱᓕᕆᐊᑦᑎᓐᓂ, ᐅᕗᖓ ᖃᐅᔨᒋᐊᕐᓗᑎᑦ ᑲᖑᕐᓂᑦ ᓇᓗᓇᐃᖅᓯᒪᔪᓂᑦ ᐱᑕᖃᕐᓂᖏᓐᓄᑦ ᖃᐅᔨᓴᕐᓂᐅᔪᑦ ᐃᕐᖏᓐᓈᕈᑎᒃᑯᑦ ᑐᑭᓯᒋᐊᕐᕕᖓ.
ᐊᑕᖏᖅᑐᒋᑦ ᑐᑭᓯᒋᐊᕈᑏᑦ ᖃᐅᔨᓴᕐᓂᕆᔭᑦᑎᓐᓂ ᑲᖑᕐᓂᑦ ᐱᑭᐅᕐᓂᖏᓐᓄᑦ ᐊᑭᖓᓂ ᒥᑦᑎᒪᑕᓕᒃ ᐊᑐᐃᓐᓇᐅᔪᑦ ᐅᕙᓂ NordicanaD.
ᑎᒻᒥᐊᑦ ᐃᓚᒌᑦ ᐱᑕᖃᕐᓂᖏᑦ ᐊᒻᒪ ᓇᒧᓐᖓᖃᑦᑕᕐᓂᖏᑦ ᐊᑭᖓᓂ ᒥᑦᑎᒪᑕᓕᒃ
ᐊᒥᓲᓂᓪᓚᕆᒋᔭᖏᑦ ᐱᑭᐅᓕᐅᖃᑦᑕᖅᑐᑦ ᐊᑭᖓᓂ ᒥᑦᑎᒪᑕᓕᒃ ᐊᔾᔨᒌᖏᖃᑦᑕᖅᑐᖅ ᐊᖏᔪᒥᑦ ᐊᕐᕌᒍᒥᑦ ᐊᕐᕌᒍᒧᑦ. ᐱᑭᐅᓕᐅᑦᑎᐊᖃᑦᑕᑎᓪᓗᒋᑦ ᐊᕐᕌᒍᖏᓐᓂ, ᑎᑭᓯᒪᔪᑦ 70,000 ᐃᓐᓇᐃᑦ ᑲᖑᐃᑦ ᑕᑯᔭᐅᓯᒪᔪᑦ ᕿᑭᖅᑕᒥ ᐊᐅᔭᒃᑯᑦ ᑭᓯᐊᓂ ᐱᑭᐅᓕᐅᑦᑎᐊᖅᓯᒪᑎᓐᓇᒋᑦ ᐃᓐᓇᐃᑦ ᑲᖑᐃᑦ ᐊᑦᑎᓐᓂᖃᕈᓐᓇᖅᑐᑦ 2,000. ᖃᐅᔨᓴᕈᓐᓇᓂᐊᕐᓗᒋᑦ ᐊᒥᓲᓂᖏᑦ ᐊᒻᒪ ᓇᒧᖓᖃᑦᑕᕐᓂᖏᑦ ᑲᖑᐃᑦ ᐊᑭᖓᓂ ᒥᑦᑎᒪᑕᓕᒃ, ᑲᓇᑕᒥ ᐆᒪᔪᓕᕆᔨᒃᑯᑦ ᐱᔨᑦᑎᖅᑏᑦ ᖃᖓᑕᓲᒃᑯᑦ ᖃᐅᔨᓴᕐᓂᖃᓚᐅᖅᑐᑦ ᐱᑭᐅᓕᐅᖅᑎᓪᓗᒋᑦ 5-ᐊᕐᕌᒍᓂᑦ ᐅᖓᓯᒌᓐᓂᖃᖅᑐᓂᑦ ᐊᑯᓐᓂᖏᓐᓂ 1983 ᐊᒻᒪ 2008. ᓴᓂᐊᓂ ᐊᒥᓲᓂᖏᓐᓄᑦ ᐊᒻᒪ ᓇᒧᖓᖃᑦᑕᕐᓂᖏᓐᓄᑦ, ᖃᐅᔨᓴᕐᓂᐅᔪᑦ ᑐᑭᓯᒋᐊᕈᑎᖃᖅᑎᑦᑎᓚᐅᕐᒥᔪᑦ ᐊᕐᕌᒍᖏᓐᓂ (ᐃᓐᓇᐃᑦ ᐅᕝᕙᓘᓐᓃᑦ ᑯᖑᐊᕋᐃᑦ), ᐆᒪᔪᓕᐅᒃᑲᓂᕐᓂᖏᑦ ᖃᓄᐃᓕᖓᓂᖓ (ᐱᑭᐅᓕᐅᖅᑐᑦ ᐅᕝᕙᓘᓐᓃᑦ ᐱᑭᐅᓕᐅᖏᑦᑐᑦ) ᐊᒻᒪ ᖃᓄᐃᑦᑑᓂᖏᐃᑦ ᓇᔪᖅᑕᖏᑦ ᐊᑐᖅᑕᐅᔪᑦ ᑲᖑᕐᓄᑦ.
ᑲᖑᐃᑦ ᐊᒥᓲᓂᖏᑦ ᖁᕝᕙᕆᐊᖅᑎᓪᓗᒋᑦ, ᓇᒧᖓᖃᑦᑕᕐᓂᖏᑦ ᐊᑭᖓᓂ ᒥᑦᑎᒪᑕᓕᒃ ᐊᓯᔾᔨᓚᐅᕐᒥᔪᖅ. ᐱᑭᐅ ᖁᕝᕙᓯᑦᑐᓂᑦ ᐊᒻᒪ ᕿᑎᕋᖅᑐᓂᑦ ᑲᑎᓐᖓᔪᓂᑦ ᐱᑭᐅᓕᐅᓂᑭᑦᑎᓪᓗᒋᑦ ᐊᒥᓲᓂᖏᑦ (ᓲᕐᓗ. 1983 ᐊᒻᒪ 1988), ᑲᑎᓐᖓᔪᑦ ᓇᒧᖓᖃᑦᑕᕐᓂᖏᑦ ᓇᓗᓇᐃᖅᑕᐅᓚᐅᖅᑐᑦ ᐊᒥᓱᒐᓚᖑᓪᓗᑎᑦ ᖁᕝᕙᓯᑦᑐᓂᑦ ᐊᒻᒪ ᕿᑎᕋᖅᑐᓂᑦ ᑲᑎᓐᖓᔪᓂᑦ ᐊᒥᓲᓂᖏᓐᓂᑦ, ᐊᖏᓂᖅᓴᕆᔭᖓ ᓂᒋᖓᓂ ᐊᑦᑎᑦᑐᑦ ᑲᑎᓐᖓᔪᓂᑦ ᑲᖑᕐᓂᑦ ᐱᑕᖃᕐᓂᖏᓐᓄᑦ, ᖁᕝᕙᐸᓪᓕᐊᓪᓗᑎ ᐊᒥᓱᓂᖏᑦ (1993 ᐊᒻᒪ 1998), ᓇᒦᓐᓂᖏᑦ ᖁᕝᕙᓯᑦᑐᑦ ᕿᑎᕋᖅᑐᓄᑦ ᐱᑕᖃᕐᓂᖏᑦ ᓯᐊᒻᒪᓚᐅᖅᑐᖅ, ᒥᑭᔪᒥᑦ ᐊᒥᐊᒃᑯᓪᓗᑎ ᐊᑦᑎᑦᑐᓂ ᑲᑎᓐᖓᔪᓂᑦ ᑲᖑᕐᓂᑦ ᐱᑕᖃᕐᓂᖏᓐᓄᑦ.
| ᑎᕆᒐᓂᐊᖅ |