ᑕᖕᒫᕝᕕᒻᒥ ᐃᓚᐅᔪᑦ ᐸᕐᓇᐄᔪᑦ ᖃᒧᑎᒥᓂᒃ ᓇᕈᓇᒋᐊᕆᔭᒥᓄᑦ ᐅᓪᓗᖓᓄᑦ ᑐᕌᖓᔪᒥᒃ

ᑕᐃᑲᙵᑦ ᐱᒋᐊᓐᓂᐊᑕ ᑖᔅᓱᒪ ᐃᓄᖕᓄᑦ ᖃᐅᔨᒪᓂᕆᔭᖏᓄᑦ ᖃᐅᔨᓇᓱᒍᑖ, ᐃᓐᓇᑐᖃᐃᑦ ᐅᖃᐅᓯᖃᐃᓐᓇᖅᐳᑦ ᑕᒪᓐᓇ ᓂᐱᓕᐅᖅᑕᐅᕙᓪᓕᐊᔪᖅ ᖃᐅᔨᒪᓂᖓᑦ TEK ᒪᒃᑯᒃᑐᓄᑦ ᐃᓕᓴᕈᑕᐅᖃᑦᑕᖁᓪᓕᒍ ᓄᓇᓕᒻᒥᐅᑕᐅᔪᓄᑦ. ᑖᓐᓇ ᑐᑭᒧᐊᕆᔭᖅ ᑕᖕᒫᕝᕕᒃᓴᖅ ᐃᓐᓇᑐᖃᑦ−ᒪᒃᑯᒃᑐᓪᓗ ᑕᖕᒫᕝᕕᖓᓂᒃ ᐊᖑᓇᓱᒡᕕᑐᖃᒥᒃ ᑲᖑᕋᓱᒃᑐᓄᑦ ᐅᖃᐅᓯᐅᓚᐅᖅᑐᖅ ᐃᓚᒋᔭᒃᓵ ᐊᑑᑎᓕᒃ ᓈᒻᒪᒃᑐᒥᒃ ᑕᑯᒃᓴᕈᐃᔪᓐᓇᕐᓗᑎᒃ. ᐃᓱᒪᓕᐅᕆᔭᖅ ᑕᖕᒫᕝᕕᖕᒥᒃ ᓴᖅᑮᓂᕐᒧᑦ ᐊᒃᓱᐋᓗᒃ ᐃᑲᔪᖅᓱᖅᑕᐅᓪᓗᓂ ᓄᓇᓕᐅᑉ ᐃᓄᖁᑎᒋᔭᖏᓐᓄᑦ.

ᑲᑎᓕᒫᖅᖢᒋᑦ ᐃᓄᐃᑦ 18 ᐃᓚᐅᖃᑕᐅᓪᓗᑎᒃ ᑕᖕᒫᕝᕕᖕᒥᑦ ᑐᑉᐸᒃᓴᖅᖢᑕ ᑕᐅᕙᓂ ᐃᒃᐱᐅᒐᓕᒃ (ᒥᑦᑎᒪᑕᓕᐅᑉ ᐊᑭᐊᖓ) ᐊᑯᓐᓂᐊᒍᑦ ᔫᓂ 10 − 17 2006. ᐃᓚᒋᓚᐅᖅᑕᑦᑎᓐᓂ, 5 ᐃᓐᓇᑐᖃᑦ/ᐊᖑᓇᓱᒃᑏᑦ, 10 ᒪᒃᑯᒃᑐᑦ, 1 ᑐᓵᔨ ᐊᒻᒪᑦᑕᐅᖅ 2 ᖃᐅᔨᓵᖃᖅᑑᒃ (ᑳᑐᕆᓐ ᐊ. ᒐᒡᓇᓐ ᐊᒻᒪᓗ ᑖᒪᓃᒃ ᐴᑕᐅᕐ). ᐅᑯᐊ ᑕᑯᒃᓴᕈᕋᓱᓚᐅᖅᑕᕗᑦ ᑐᑭᒧᐊᕆᔪᑦ ᖃᐅᔨᓵᖓᓐᓂᒃ:

• ᐊᔭᐅᕆᓪᓗᑕ ᑕᑯᒃᓴᐅᑎᑕᐅᓂᖏᑕ ᐊᑐᓕᒻᒪᒃᓴᐃᓂᖏᑕᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒃᑐᐊᔪᑦ ᑲᖑᕐᓄᑦ ᐊᒻᒪᓗ ᑎᕆᒐᓂᐊᓄᑦ, ᑭᓯᐊᓂᑦᑕᐅᖅ ᐊᓯᖏᑕ ᐊᕙᑎᐋᓃᑦᑑᑉ ᐃᓗᓕᑯᓘᔭᕆᔭᖏᑕ;
• ᐊᔭᐅᕆᓪᓗᒋᑦ ᒪᒃᑯᒃᑐᑦ ᐊᑐᓕᒻᒪᒃᓴᖅᑯᓪᓗᒋᑦ ᐊᑐᐃᓐᓇᖃᑦᑕᖁᓪᓗᑎᒍᓪᓗ ᐅᖃᐅᓯᕆᔭᒥᓐᓂᒃ;
• ᐱᑕᖃᖅᑎᑦᑎᓪᓗᑕ ᐊᑑᑎᖃᑦᑎᐊᖅᑐᒥᒃ ᐃᓕᓴᕈᓐᓇᐅᑎᐅᔪᒥᒃ ᐊᑐᖅᑕᐅᔪᓂᒃ ᐊᑯᓐᓂᐊᒍᑦ ᐃᓐᓇᑐᖃᐃᑦ ᐊᒻᒪᑦᑕᐅᖅ ᒪᒃᑯᒃᑐᑦ;
• ᐱᑕᖃᖅᑎᑦᑎᓪᓗᑕ ᐊᑑᑎᖃᖅᑎᐊᖅᑐᓂᒃ ᐅᖃᐅᓯᖃᑎᒌᓐᓂᐅᔪᓂᒃ ᐱᓕᕆᐋᖃᖅᖢᑎᒃ ᐊᑯᓐᓂᐊᑕ ᐃᓐᓇᕆᔭᖏᑕ, ᒪᒃᑯᒃᑐᑦ, ᖃᐅᔨᓴᖅᑏᑦ ᐊᒻᒪᑦᑕᐅᖅ ᑲᓇᑕᐅᑉ ᒥᕐᖑᐃᖅᓯᕝᕕᖏᑕ ᐃᖅᑲᓇᐃᔭᖅᑎᖏᓐᓄᑦ. ᑕᒪᐃᓐᓂᒃ ᐊᔾᔨᒌᙱᑦᑐᓂᒃ ᐃᓂᖃᖅᖢᑎᒃ ᐱᔭᒃᓴᕆᔭᐃᓐᓇᖃᕋᒥᒃ ᑐᑭᓯᐅᒪᓇᓱᖕᓂᕐᒥᒃ ᐱᐅᓕᐊᖃᓐᓂᕐᒥᒡᓗ ᐆᒪᔪᑦ ᐊᐅᓚᑦᑎᐊᕐᓂᖏᑕ ᓄᓇᒋᔭᖏᑕ ᐊᕙᑖᒍᑦ;
• ᑎᑎᕋᐅᓯᕆᓗᒋᑦ ᐅᓂᒃᑳᕆᔭᐅᓗᑎᒡᓗ ᖃᐅᔨᒪᓂᖃᐅᓯᖏᑦ ᒥᒃᓵᓄᑦ ᑲᖑᐃᑦ, ᑎᕆᒐᓂᐊᑦ ᓇᔪᒐᕆᔮᑕᓗ ᓄᓇᖏᑕ ᐊᕙᑎᐊᓃᓲᑦ.

ᐱᓇᓱᐊᕈᓯᐅᔪᒃᑯᑦ, ᖃᐅᑕᒫᑦ ᐱᓕᕆᐋᖑᑲᑕᓚᐅᖅᐳᑦ ᐊᖑᓇᓱᒋᐊᖅᑐᑦ ᑲᙱᐊᖅᑐᑦ ᓇᑦᑎᐋᕕᓂᕋᓱᒃᑐᓪᓗ, ᒪᓐᓂᒃᑕᕆᐊᖅᑐᑦ ᑲᖑᐄᑦ ᐃᕙᕝᕕᖓᓐᓂᒃ, ᐱᓱᒡᕕᒋᓪᓗᑎᒍ ᖃᐅᔨᓴᕐᕕᑦᑕ ᑕᖕᒫᕝᕕᒋᓲᖓᑦ, ᐳᓛᖅᑕᐅᓪᓗᑕ ᒥᕐᖑᐃᖅᓯᕝᕕᐅᑉ ᐱᓱᒃᑎᖏᓐᓂᒃ ᐅᓂᒃᑳᕆᔭᖃᖅᖢᑎᒃ ᒥᕐᖑᐃᖅᓯᕝᕕᐅᑉ ᐱᒋᐊᕈᑖᓂᒃ ᐊᑐᖅᓯᒪᔭᖏᓪᓗ ᑲᒪᒋᔭᕆᐊᖃᓲᖏᓄᓪᓗ, ᐅᐸᒍᑎᓪᓗᑕ ᓄᙳᕕᒃ ᐃᑦᑕᕐᓂᓴᖃᕝᕕᖏᑕ ᓄᓇᖓᓄᑦ, ᐱᓱᑲᑕᖃᑦᑕᖅᖢᑕ, ᐅᓂᒃᑳᖅᑐᐊᖃᑦᑕᖅᖢᑎᒃ ᐊᒻᒪ ᖃᐅᔨᒪᓂᕆᔭᐅᔪᑐᖃᑦ ᖃᓄᖅ ᑲᖑᐃᑦ ᐱᓇᔪᒃᑕᐅᓲᖑᓂᖏᑦ ᖁᑭᐅᑎᖃᕋᑎᒃ ᐊᒻᒪᑦᑕᐅᖅ ᓇᑦᑎᕋᓲᑎᑐᖃᑦ ᐃᓄᐃᑦ, ᒥᑭᒋᐊᖃᖅᑎᓐᓇᒍ ᑎᕆᒐᓂᐋᕋᓲᑎᕕᓂᑦ ᐳᓪᓚᑎᑦ, ᐃᓄᓪᓚᕆᒃᑎᑐᑦ ᐊᓐᓇᐅᒪᓇᓱᐊᕈᑏᑦ ᐊᔪᙱᑦᑕᕆᐊᓖᑦ, ᒪᒥᓴᐃᔾᔪᑏᑦ ᐊᒻᒪᓗ ᖃᓄᐃᙱᑦᑎᐊᕋᓱᓐᓂᕐᒧᑦ ᐊᑐᖅᑕᑐᖃᑦ. ᒪᒃᑯᒃᑐᑦ ᐃᓕᓐᓂᐊᖅᑎᑕᐅᒋᓪᓗᑎᒃ ᓇᑦᑎᖅᑕᑦ ᖃᓄᖅ ᐸᕐᓈᕆᔭᐅᓲᖑᓂᖏᑕ ᕿᖕᓂᔭᐅᓂᐊᓪᓗᑎᒃ ᐊᒻᒪᓗ ᐃᑲᔪᐃᖃᑕᐅᓪᓗᑎᒃ ᐃᓐᓇᑐᖃᓂᒃ ᑲᖑᕐᒥᒃ ᓴᓇᒃᓴᖅᑎᓪᓗᒍ. ᐊᓯᖏᑦ ᖃᐅᑕᒫᖅ ᑲᒪᒋᔭᕆᐊᖃᓲᑦ ᑕᖕᒫᕝᕕᖃᖅᖢᓂ: ᐃᒥᖅᑕᖃᑦᑕᕐᓂᖅ, ᓂᖅᖠᐅᑲᑕᖕᓂᖅ ᓂᕿᑐᖃᓂᒃ (ᐆᔪᖅ ᓇᑦᑎᖅ, ᑲᖑᐃᑦ ᒪᓐᓂᖏᓪᓗ), ᐸᓚᐅᒑᓕᐅᖅᖢᑎᒃ, ᐃᒋᑕᒃᓴᑦ ᑲᒪᒋᓪᓗᒋᑦ, ᐸᕐᓈᕆᔭᖃᖅᖢᑎᒃ ᓯᑭᑑᒥᓂᒃ ᐊᒻᒪᑦᑕᐅᖅ ᖃᒧᑎᒥᓐᓂᒃ ᐊᐅᓪᓚᓚᐅᖅᑎᓐᓇᒋᑦ, ᐅᖅᓴᐄᖃᑦᑕᖅᖢᑎᒃ ᓱᐴᔪᒥᓂᒃ ᐊᖏᓂᒡᓗ. ᒪᒃᑯᒃᑐᑦ ᐃᑲᔪᖁᔭᐅᕙᒃᖢᑎᒃ ᑕᒪᐃᓐᓂᒃ ᑖᒃᑯᓂᖓ ᐱᔭᒃᓴᐅᔪᓂᒃ. ᐊᓯᖏᑦ ᑭᐱᙳᐃᔭᐅᑎᑦ ᐃᓚᖁᖅᖢᑎᒃ ᒪᑭᑦᑕᐅᑎᓂᒃ, ᕿᓂᕈᓘᔭᖅᖢᑎᒃ ᓇᓂᔭᕆᐊᓕᖕᓂᒃ, ᓴᓇᔭᖃᖅᖢᑎᒃ ᓱᐴᔪᒃᑯᕕᖕᒥᒃ ᒪᓐᓂᒃᑕᕐᓂᐊᓕᕋᒥᒃ, ᐃᙱᑲᑕᒃᐸᒃᖢᑎᒃ, ᐱᙳᐊᖅᖢᑎᒃ ᐊᒻᒪ ᓈᓚᒃᖢᑎᒃ ᐊᒋᐊᒐᖅᑐᓂᒃ ᐊᒻᒪᓗ ᐃᙱᐅᑎᓄᑦ. ᑕᖕᒫᕝᕕᒻᒥ ᐱᕕᖃᖅᑎᓚᐅᕆᕗᖅ ᖃᐅᔨᓴᖅᑏᑦ ᐅᖃᖃᑎᖃᕈᓐᓇᖅᖢᑎᒃ ᐸᐃᑉᐹᖑᖏᑦᑐᒃᑯᑦ ᐃᓐᓇᑐᖃᓂᒃ/ᐊᖑᓇᓱᒃᑎᓂᒃ ᐃᓚᖏᓄᑦ ᖃᐅᔨᓯᒪᔭᐅᔪᓂᒃ ᑎᑎᕋᐅᓯᔪᑦ ᐃᓗᐊᒍᑦ ᐃᓄᖕᓄᑦ ᖃᐅᔨᒪᓂᕆᔭᖏᓄᑦ ᖃᐅᔨᓇᓱᒍᑖ.

ᑕᖕᒫᕝᕕᒃ ᐃᒃᐱᐅᒐᓕᖕᒥ ᐊᑭᐊᖓᓂ

ᐃᓐᓇᖅ ᑲᖒᑉ ᒪᓂᖏᓐᓂᒃ ᓂᖅᖠᐅᑐᖅ