ᒥᑦᑎᒪᓕᐅᑉ ᕿᑭᖅᑕᖓᓂ ᐱᑕᖃᕋᔪᐃᓐᓂᖅᐹᖑᔪᓂᒃ ᐊᓯᖏᓐᓂ ᓄᓇᒥ ᐱᑕᖃᕐᕕᐅᕗᖅ ᐅᑭᐅᖅᑕᖅᑐᖅᐸᓯᖕᒥ ᐱᕈᖅᐸᒃᑐᓂ ᓄᓇᖏᓐᓂ ᑕᒪᒃᑯᐊᓗ ᐱᑕᖃᕐᓂᖏᓐᓄᑦ ᑎᑭᓯᒪᓗᑕᐅᕙᒃᑐᑦ, ᓂᕿᒃᓴᕆᔭᐅᕙᒃᓱᑎ ᐊᒥᔅᓱᓄᑦ ᑎᑭᑉᐸᒃᑐᓄᑦ ᑎᖕᒥᐊᒐᓴᐅᕙᒃᑐᓄᑦ, ᑕᒪᒃᑯᓂᖓ ᐃᓚᖃᖅᑐᓂᒃ ᓂᕐᓕᖕᓇᕐᓂ, ᐊᕿᒡᒋᕐᓂᒃ ᐊᒻᒪᓗ ᑲᖑᕐᓂᒃ. ᑎᖕᒥᐊᖃᓲᖑᓪᓗᑎᒃ ᐅᖓᑕᓃᖃᑦᑕᖅᑐᓂᒃ 100,000-ᖏᓐᓂᒃ ᐊᐅᔭᑕᒫᖅ ᑕᐃᒃᑯᐊ ᑲᖑᐃᑦ ᐊᖏᔫᑎᐅᓂᖅᓴᐃᑦ ᐊᒥᔅᓲᓂᖅᐹᖑᕙᒃᓱᑎᒃ ᐱᕈᖅᑐᓂᒃ ᓂᕿᖃᓱᖑᔪᓂᒃ ᑕᒪᒃᑯᓂᖓ ᕿᑭᖅᑕᖓᓂ. ᐅᐱᕐᖔᒃᑯᑦ ᑎᑭᑉᐸᒃᑐᑦ ᑎᖕᒥᐊᑦ ᓂᕿᓴᖃᓲᖑᕗᑦ ᐊᒥᔅᓱᓂᒃ ᓄᓇᒥ ᐱᕈᖅᑐᓂᒃ ᓄᓇᐅᑉ ᐃᓗᐊᓂᒃ. ᐊᐅᔭᑐᖃᐅᓂᖅᓴᐅᓕᖅᑎᓪᓗᒍ, ᑲᖑᐊᕋᖃᓕᖅᑎᓪᓗᒋᑦ, ᓂᕿᒃᓴᖅᓯᐅᕐᓂᖅᓴᐅᕙᒃᐳᑦ ᑭᓂᐸᓂᓴᐅᓂᖏᓐᓂ ᓄᓇᒥ ᒪᔅᓴᐅᓂᕐᒥ, ᓂᕿᖃᕈᓐᓇᕐᕋᒥᒃ ᐱᕈᐊᓂᓵᖅᓯᒪᓂᖏᓐᓂ ᐃᕕᖕᓂᒃ ᐊᒻᒪᓗ ᑭᓕᕐᓇᕐᓂᒃ. ᑕᐃᒪᖓᑦ 1960-ᖏᓐᓂ ᐊᕐᕋᒎᓕᖅᑐᓂᒃ, ᑲᖑᐃᑦ ᐅᔾᔨᕆᔭᐅᓯᒪᓕᖅᑐᑦ ᐊᒥᓱᕈᖅᓯᒪᕐᔪᐊᕐᓂᖏᑦ. ᐃᓚᖓᓂᒃ ᐃᓱᒪᓘᑕᐅᓂᖅᐹᖑᕗᖅ ᐊᒥᓲᓗᐊᓕᕐᓂᖏᓄᑦ, ᓄᓇᐃᑦ ᓱᕋᖅᑎᖅᑕᐅᔪᓐᓇᕐᓂᖏᓐᓂᒃ, ᓂᕿᒃᓴᖅᓯᐅᕐᕕᐅᓯᒪᓗᐊᓕᕈᓐᓇᕐᓂᕐᒧᑦ, ᓄᓇᐃᑦ ᓇᔪᒐᕆᕙᒃᑕᖏᑦ ᓄᓕᐊᖅᐸᓪᓕᐊᓕᕌᖓᒥᒃ. ᓲᖃᐃᒻᒪᓗᓐᓃᑦ, ᑲᖑᕐᓄᑦ ᒥᑭᓐᓂᖅᓴᐅᔪᓄᑦ ᓱᕋᖅᑎᖅᑕᐅᓯᒪᓂᖏᑦ ᐊᖏᔫᑎᐊᓗᐃᑦ ᒪᔅᓴᐅᓂᖏᑦ ᑭᓂᐸᓂᖏᑦ ᓄᓇᖏᓐᓂ ᑕᐅᕙᓂ ᓄᓇᒥ ᑕᐃᔭᐅᔪᒥ La Pérouse Bay-ᒥ, ᕼᐊᑦᓴᓐᐲᑉ ᑕᕆᐅᖓᑕ ᐅᐊᖕᓇᖓᓃᑦᑐᒥ (ᑲᓇᑕᒥ). ᑕᐃᒪᓕᐅᖅᑕᐅᔪᐊᓗᒃᑕᖃᖅᓯᒪᖏᑦᑐᓪᓕ ᓱᓕ ᒥᑦᑎᒪᑕᓕᐅᑉ ᕿᑭᖅᑕᖓᓂ ᓄᓇᖏᑦ, ᑭᓯᐊᓂ ᐃᓕᑕᕆᔭᐅᕙᒌᕈᓐᓇᖁᓪᓗᒋᑦ ᐱᐅᔪᓐᓃᕈᑕᐅᔪᓐᓇᕐᓂᖏᑦ ᐊᒃᑐᖅᑕᐅᓯᒪᔪᓐᓇᕐᓂᖏᑦ, ᐱᓕᕆᓂᑦᑎᓐᓂ ᓇᐅᑦᑎᖅᑐᖅᑕᐅᔪᒻᒪᕆᐊᓘᕙᒃᑐᑦ ᑕᒪᒃᑯᐊ ᒪᔅᓴᐅᓂᖏᑦ ᓄᓇᐃᑦ ᐱᕈᖅᑐᖃᕐᓂᖏᑦ (ᖃᓄᑎᒋ ᐱᕈᕐᕕᐅᓯᒪᓕᕐᒪᖔᑕ) ᐊᒻᒪᓗ ᑲᖑᕐᓄᑦ ᓂᕿᒃᓴᖅᓯᐅᕐᕕᐅᖃᑕᕐᓂᖏᓐᓂᒃ ᒪᔅᓴᐅᓂᖏᑦ ᓄᓇᐃᑦ ᖃᐅᔨᓴᖅᑕᐅᖃᑦᑕᕆᐊᓕᓚᐅᖅᑐᑦ ᑕᐃᒪᖓᑦ 1990-ᒥ ᑕᐅᕙᓂ ᖃᕐᓕᒃᑐᕐᕕᐅᑉ ᕿᑭᖅᑕᖓᓂ (ᐱᕈᖅᓴᐃᓕᕌᖓᒥᒃ ᑲᖑᐃᑦ ᑲᖑᐊᕋᖏᓐᓂᒃ ᑕᐅᕙᓂ) ᐊᒻᒪᓗ ᑕᐃᒪᖓᑦ 1998-ᒥᒃ ᖃᐅᔨᓴᖅᑕᐅᖃᑕᕆᐊᓕᓚᐅᖅᑐᑦ ᑲᖑᕐᓄᑦ ᐅᓪᓗᖃᕐᕕᐅᕙᖕᓂᖏᑦ. ᐊᐅᔭᑕᒫᖅ, ᐊᐳᑎᖃᔅᓱᖓᖅᑎᓪᓗᒍ ᓱᓕ, ᐊᕙᓗᓕᐅᕐᕕᐅᓯᒪᕙᒃᑐᑦ ᑕᒪᒃᑯᐊ ᒪᔅᓴᐅᓂᖏᑦ ᓄᓇᐃᑦ ᑲᖑᕐᓄᑦ ᑎᑭᑕᐅᑦᑕᐃᓕᒥᑎᑕᐅᓗᑎᒃ ᐱᕈᖅᑐᓂᒃ ᓂᑭᒃᓴᖃᕈᓐᓇᕐᓂᖏᓐᓄᑦ. ᐊᐅᔭᖅ ᐃᓱᐊᓕᑦᑕᕌᖓᑦ, ᐆᒃᑐᕋᖅᑕᐅᖃᑦᑕᖅᑐᑦ ᐱᕈᖅᑐᑦ ᐃᓗᐊᓃᑦᑐᑦ ᐊᕙᓗᐃᑦ ᐊᒻᒪᓗ ᓯᓚᑖᓃᑦᑐᑦ ᐊᕙᓗᐃᑦ ᓇᓚᐅᑖᕈᒪᓪᓗᒋᑦ ᒪᔅᓴᐅᓂᕐᒥ ᐱᕈᖅᑐᖃᓚᐅᕐᓂᖏᑦ ᐊᒻᒪᓗ ᑲᖑᕐᓄᑦ ᓂᕿᒃᓴᖅᓯᐅᕐᕕᐅᓚᐅᖅᑐᑦ ᐊᒃᑐᖅᑕᐅᓯᒪᓂᖏᑦ. ᑕᒪᐃᓐᓂᒃ ᑕᑯᔪᒪᒍᕕᑦ ᖃᐅᔨᔭᐅᓯᒪᔪᓂᒃ ᐅᓂᒃᑳᖅᑐᓂᒃ ᑭᓂᐸᓂᖏᓐᓂᒃ ᒪᔅᓴᐅᓂᖏᓐᓂᒃ ᓄᓇᖏᓐᓂ ᖃᐅᔨᓴᖅᑕᐅᓚᐅᖅᑐᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ ᐊᑐᐃᓐᓇᐅᕗᑦ ᐅᕙᖓᑦ ᖃᕆᑕᐅᔭᒃᑯᑦ ᑐᕌᕈᑎᓕᖕᒥ NordicanaD.

ᓄᓇᐃᑦ ᒪᔅᓴᐅᓃᑦ ᐱᕈᕐᕕᐅᓯᒪᕙᖕᓂᖏᑦ

ᓄᓇᐃᑦ ᒪᔅᓴᐅᓂᖏᓐᓂ ᐱᕈᕐᕕᐅᕙᒃᑐᑦ ᑐᑭᓯᓂᐊᖅᑕᐅᕙᒃᑐᑦ ᐆᒃᑐᕋᖅᑕᐅᖃᑦᑕᖅᓱᑎᒃ ᐱᑕᖃᕐᓂᖏᑦ ᓄᓇᐃᑦ ᖄᖓᓂ ᐱᕈᖅᑐᑦ ᓂᕿᒃᓴᖅᓯᐅᕐᕕᐅᓯᒪᓐᖏᓂᖏᓐᓂ (ᐃᓗᐊᓃᑦᑐᑦ ᐊᕙᓗᓕᐊᕆᔭᐅᓯᒪᔪᑦ ᓴᐳᓐᓂᐊᖅᑕᐅᓯᒪᕝᕕᖕᓂ). ᖃᐅᔨᓴᖅᑕᐅᒐᒥᒃ ᑕᒪᒃᑯᐊ ᒥᑦᑎᒪᑎᓕᐅᑉ ᕿᑭᖅᑕᖓᓂ, ᐱᕈᖅᓯᒪᔪᑦ ᐊᕕᒃᑐᖅᑕᐅᓯᒪᓲᖑᔪᑦ ᐱᖓᓱᐃᓕᖃᖓᔪᓄᑦ ᐊᖏᔫᑎᐅᓂᖏᓐᓂᒃ ᖃᐅᔨᓴᖅᑕᐅᓂᖏᓐᓂ, ᒪᑯᓂᖓ: ᑲᖒᔭᕐᓂᒃ/ᐳᐊᓗᖑᐊᕐᓂᒃ (ᓂᕿᒃᓴᕆᔭᐅᓂᖅᓴᐅᕙᖕᓂᖏᓐᓄᑦ), ᑕᒪᒃᑯᐊᓗ ᐃᕖᑦ (ᐱᓗᐊᖅᑐᒥᒃ ᑕᐃᒃᑯᐊ ᓄᓇᒥ ᓇᓂᑐᐃᓐᓇᖅ ᐱᕈᖅᐸᒃᑐᑦ, ᐱᔪᒪᔭᐅᓂᖅᓴᐅᕙᖕᒥᔪᑦ ᑲᖑᕐᓄᑦ) ᐊᒻᒪᓗ ᑕᐃᒃᑯᐊ ᑭᓕᕐᓇᐃᑦ. ᐊᑐᓂ ᑕᒪᒃᑯᐊ ᐱᑕᖃᓕᕐᓂᖏᑦ ᐊᔾᔨᒌᖃᑦᑕᖏᑦᑐᑦ ᐱᕈᖅᐸᖕᓂᖏᑦ ᐊᕐᕋᒍᒥᒃ ᐊᕐᕋᒍᒧᑦ, ᒪᓕᒃᑲᒥᒃ ᐊᐅᔭᒃᑯᑦ ᓯᓚᐅᑉ ᖃᓄᐃᓚᐅᕐᓂᖓᓄᑦ. ᓲᖃᐃᒻᒪᓗᓐᓃᑦ, ᐊᐅᔭᐅᓂᖓ ᕿᓚᒥᐊᓗᒃ ᐃᓱᓕᓴᕋᐃᓐᓂᖓᓄᑦ, ᐊᕐᕋᒍᑕᒫᖅ ᓄᓇᐃᑦ ᐱᕈᕐᕕᐅᔪᓐᓇᕐᓂᖏᑦ ᐅᑭᐅᖅᑕᖅᑐᒥ ᐊᒃᑐᖅᑕᐅᓴᕋᐃᑦᑐᒻᒪᕆᐅᕗᑦ ᓯᓚᖓᑕ ᐅᖂᓇᕐᓂᖓᓂᒃ/ᓂᒡᓚᓱᖕᓂᖓᓄᓪᓗᓐᓃᑦ. ᐊᕐᕋᒍᒐᓴᐅᓕᖅᑐᓂ ᖁᓕᓂᒃ ᐊᓂᒍᖅᑐᓂᒃ ᐅᖂᓇᖅᓯᕙᓪᓕᐊᑐᐃᓐᓇᖅᑎᓪᓗᒍᓗ ᓯᓚᖓ (ᑕᑯᓗᒋᑦ ᓯᓚᐅᑉ ᖃᐅᔨᓴᖅᑕᐅᓯᒪᓂᖏᑦ ᑐᑭᓯᒋᐊᑎᐊᒃᑲᓐᓂᕐᕈᒪᒍᕕᑦ).

ᒪᔅᓴᐅᓂᖏᓐᓂ ᓄᓇᐃᑦ ᐱᕈᕐᕕᐅᑎᒋᔪᓐᓇᖅᑐᑦ ᐃᒪᓐᓇᑎᒋ ᑕᒫᖓᑦ 20-ᓂᒃ 100-ᓄᑦ g/m²-ᓄᑦ ᒍᓛᒻᒥᒃ ᐅᖁᒪᐃᓐᓂᓕᖕᓄᑦ, ᐊᑕᐅᓯᕐᒥ ᒥᑕᒫᕐᒥ ᑭᑉᐹᕆᒃᑐᒥ, ᒪᓕᒃᑕᐅᓪᓗᑎᒃ ᖁᑎᒃᑐᕐᒥᐅᑕᐅᓂᖏᓐᓂ ᓄᓇᕐᔪᐊᕐᒥ, ᐅᑭᐅᖅᑕᖅᑑᓂᕐᒥ ᓄᓇᐃᑦ ᐱᕈᕐᕕᐅᒐᔪᐃᓐᓂᖅᓴᐅᕙᖕᓂᖏᓐᓄᑦ ᓴᓂᐊᓂᒃ ᑕᐃᒃᑯᓇᖓᑦ ᐊᑦᑎᒃᑑᑕᐅᓂᖅᓴᐅᔪᓂ ᐅᑭᐅᖅᑕᖅᑐᒥ ᒪᔅᓴᐅᓂᖏᓐᓂ ᓄᓇᒥ. ᑕᐃᒪᖓᑦ 1990-ᒥ, ᑕᒪᐃᓐᓂ ᐃᓱᒪᒋᓪᓗᒋᑦ ᓄᓇᐅᑉ ᖄᖓᒍᑦ ᐱᕈᕐᕕᐅᕙᖕᓂᖏᑦ ᐱᕈᖅᑐᕕᓂᐅᓯᒪᒐᔪᒃᐳᑦ ᐃᒪᓐᓇᑎᒋ 51 g/m² ᒍᓛᒻᒥᒃ ᐅᖁᒪᐃᓐᓂᓕᖕᓂᒃ ᐊᑕᐅᓯᕐᒥ ᒥᑕᒫᕐᒥ ᑭᑉᐹᕆᒃᑐᒥ, ᑕᐅᕙᓂ ᖃᕐᓕᖅᑐᕐᕕᐅᑉ ᓄᓇᖓᓂ. ᑕᒪᒃᑯᐊ ᐱᕈᖅᑐᑦ ᐱᑕᖃᖅᑎᒋᓚᐅᖅᑐᑦ ᐃᕖᑦ 61% ᐳᓴᓐᑎᖏᓃᑦᑐᓂᒃ, ᑕᒪᒃᑯᐊᓗ ᑲᖒᔭᐃᑦ/ᐳᐊᓗᖑᐊᑦ 32% ᐳᓴᓐᑎᖏᓃᓚᐅᖅᓱᑎᒃ ᐊᒻᒪᓗ ᑭᓕᕐᓇᐃᑦ ᐱᑕᖃᖅᑎᒋᓚᐅᖅᓱᑎᒃ 7% ᐳᓴᓐᑎᒥᒃ ᑕᒪᐃᓐᓂᒃ ᐃᕕᐅᔭᒐᓴᐅᕙᒃᑐᓂᒃ ᐱᕈᖅᐸᖕᓂᖏᓐᓂ. ᑕᐃᒪᖓᓂᒃ 1990-ᒥ, ᑕᑭᔫᑎᐅᕙᒃᑐᓂᒃ ᖁᒻᒧᑦ ᐱᕈᖅᐸᒃᑐᑦ ᐱᑕᖃᓕᖅᐸᓪᓕᐊᔪᔮᖅᑐᑦ ᖃᕐᓕᒃᑐᕐᕕᐅᑉ ᓄᓇᖓᓂ. ᓲᖃᐃᒻᒪᓗᓐᓃᑦ, ᑕᐃᒪᖓᓂᒃ 1998-ᒥᒃ, ᐱᕈᖅᐸᓪᓕᐊᔪᑦ ᓄᓇᒥ ᐱᑕᖃᕐᓂᖏᑦ ᐊᖏᒡᓕᕙᓪᓕᐊᓕᖅᑐᑦ ᓴᓂᐊᓂᒃ ᐊᑯᓂᐊᓗᒃ ᖃᓄᐃᓕᖓᕙᓚᐅᕐᓂᖏᓐᓂᒃ ᐱᕈᖅᐸᓚᐅᕐᓂᖏᓐᓂ.

ᑲᖑᐃᑦ ᐅᓪᓗᖃᕐᕕᒋᕙᒃᑕᖏᓐᓂ ᐱᕈᖅᐸᒃᑐᑦ ᖁᒻᒧᑦ ᑕᑭᔪᑯᑖᖑᕙᒃᑐᑦ ᐱᕈᖅᓯᒪᒐᔪᒃᐸᓚᐅᖅᑐᑦ ᐃᒪᓐᓇᑎᒋ 38 g/m² ᒍᓛᒻᒥᒃ ᐅᖁᒪᐃᓐᓂᓕᖕᓂᒃ, ᐆᒃᑐᕋᐅᑎᓕᖕᒥ ᐊᑕᐅᓯᕐᒥᒃ ᒥᑕᒫᕐᒥ ᑭᑉᐹᕆᒃᑐᒥ ᑕᐃᒪᖓᑦ ᐊᕐᕋᒍᓂᒃ 1998-ᒥᒃ ᑎᑭᓪᓗᒍ 2010-ᒧᑦ (ᓴᓂᐊᓂ ᐃᒪᐃᓕᖓᕙᓚᐅᖅᑑᒐᓗᐊᓂᒃ 55 g/m² ᒍᓛᒻᒥᒃ ᐅᖁᒪᐃᓐᓂᓕᖕᓂᒃ, ᐆᒃᑐᕋᐅᑎᓕᖕᒥ ᐊᑕᐅᓯᕐᒥ ᒥᑕᒫᕐᒥ ᑭᑉᐹᕆᒃᑐᒥ, ᑕᐃᒃᑯᓂᖓᑦᓴᐃᓐᓇᖅ ᑕᐃᔭᐅᔪᓂᒃ ᐊᕐᕋᒍᐃᑦ ᐃᓗᐊᓂ ᖃᕐᓕᒃᑐᕐᕕᐅᑉ ᓄᓇᖓᓂ). ᐱᕈᖅᑐᑦ, ᐱᓗᐊᖅᑐᒥᒃ ᐃᕖᑦ ᐱᑕᖃᖅᑎᒋᕙᒃᑐᑦ ᐊᕝᕙᓪᓗᕆᔭᐅᔪᒥᒃ ᑕᒪᐃᓐᓂᒃ ᐱᕈᖅᐸᒃᑐᓂᒃ, ᑕᐃᒃᑯᐊᓗ ᐳᐊᓗᖑᐊᑦ ᐱᑕᖃᖅᑎᒋᓪᓗᑎᒃ ᑕᒫᓂ 46% ᐳᓴᓐᑎᖏᓐᓂᒃ ᐊᒻᒪᓗ ᑭᓕᕐᓇᐃᑦ ᐱᑕᖃᖅᑎᒋᓪᓗᑎᒃ ᑕᒫᓂ 4% ᐳᓴᓐᑎᒥ. ᐊᕐᕋᒍᒥ ᐸᓂᖅᑐᐊᓘᓚᐅᕐᓂᖏᓐᓄᑦ ᓄᓇᖓ, ᐊᕝᕙᓪᓗᐊᖏᑦ ᑲᖑᕐᓄᑦ ᐅᓪᓗᖃᕐᕕᐅᕙᓚᐅᕐᓂᖏᑦ ᐊᓯᔾᔨᖅᓯᒪᓚᐅᖅᑐᑦ ᐃᓂᒋᔭᐅᔪᓐᓃᖅᓯᒪᓪᓗᑎᒃ 2011-ᖑᓕᖅᑎᓪᓗᒍ, ᑕᐃᒪᐃᓂᖓᓄᓪᓗ ᐊᔾᔨᒌᖏᓂᖏᓐᓂᒃ ᖃᓄᐃᓕᖓᓚᐅᕐᓂᖏᓐᓂᒃ ᖃᐅᔨᓇᕈᓐᓇᓚᐅᖏᑦᑐᑦ ᐱᕈᖅᑐᖃᓚᐅᕐᓂᖏᓐᓂ ᑕᐅᕙᓂ. ᑕᑭᔪᑯᑖᖑᕙᒃᑐᓂᒃ ᖁᒻᒧᑦ ᐱᕈᖅᓯᒪᕙᒃᑐᑦ ᑕᐃᒪᖓᓂᒃ ᐊᕐᕋᒍᒥ 2011-ᒥ ᐱᕈᖅᓯᒪᒐᔪᓚᐅᖅᑐᑦ ᐃᒪᓐᓇᑎᒋ 106 g/m² ᒍᓛᒻᒥᒃ ᐅᖁᒪᐃᓐᓂᓕᖕᓂᒃ ᐊᑕᐅᓯᕐᒥ ᒥᑕᒫᕐᒥ ᑭᑉᐹᕆᒃᑐᒥ, ᐊᒥᓱᓂᖅᓴᐅᕙᒃᓱᑎᒃ ᐱᑕᖃᕐᓂᖏᑦ ᐳᐊᓗᖑᐊᑦ, (64% ᐳᓴᓐᑎᖏᓂᒃ), ᐃᕕᒐᓴᐃᓪᓗ (35% ᐳᓴᓐᑎᖏᓐᓂᒃ) ᐱᑕᖃᑦᑎᐊᖏᒻᒪᕆᒃᓱᑎᒡᓗ ᑕᒪᒃᑯᐊ ᑭᓕᕐᓇᐃᓐ (1% ᐳᓴᓐᑎᒦᑦᑐᑦ).

ᐱᕈᖅᑐᖃᕐᓂᖏᑦ ᑭᓂᐸᓂᖏᓐᓂ ᒪᔅᓴᐅᓂᕐᒥ ᑲᖑᕐᓄᑦ ᐅᓪᓗᖃᕐᕕᐅᕙᒃᑐᓂ. ᐊᕝᕙᓪᓗᐊᖏᑦ ᐊᕙᓗᓕᐅᕐᕕᐅᓯᒪᓚᐅᖅᑐᑦ ᐲᔭᖅᑕᐅᔭᕆᐊᖃᓕᓚᐅᖅᑐᑦ ᓅᑕᐅᓪᓗᑎᒃ ᐊᓯᐊᓄᑦ ᓄᓇᒧᑦ 2011-ᒥ ᐊᕐᕋᒍᒥ, ᑕᐃᒪᐃᓂᖓᓄᑦ ᓈᓴᐅᓯᕆᓂᖏᑦ ᐊᑐᖅᑕᐅᓚᐅᖅᑐᑦ ᐊᕕᒃᑐᖅᓯᒪᓪᓗᑎᒃ ᐊᒻᒪᓗ ᐊᑯᓂᐅᓚᐅᖅᑐᖅ ᖃᓄᐃᓕᖓᒐᔪᒃᐸᓚᐅᕐᓂᖏᑦ ᓈᓴᖅᑕᐅᒋᐊᑲᓐᓂᓕᓵᓚᐅᖅᓱᑎᒃ ᐃᖕᒥᒎᖓᑎᑕᐅᓕᖅᓱᑎᒃ ᓯᕗᓂᐊᒍᑦ/ᑭᖑᓂᐊᒍᓪᓗ ᐊᕐᕋᒎᑉ 2011. ᖃᐅᔨᒋᐊᕈᑎᒃᓴᖃᖏᑦᑐᖅ ᑕᒫᒃᑯᓂᖓ ᑕᐃᒪᖓᓂᒃ 2020-ᒥᒃ.

ᑲᖑᕐᓄᑦ ᓂᕿᒃᓴᖅᓯᐅᕐᕕᐅᕙᖕᓂᖏᓐᓄᑦ ᐊᒃᑐᖅᑕᐅᓯᒪᓂᖏᑦ

ᒥᑦᑎᑕᓕᐅᑉ ᕿᑭᖅᑕᖓᓂ, ᑲᖑᕐᓄᑦ ᓂᕿᒃᓴᖅᓯᐅᕐᕕᐅᕙᒃᑐᑦ ᐊᒃᑐᖅᑕᐅᓯᒪᓂᖏᑦᑦ ᓈᓴᐅᓯᕆᔭᐅᕙᒃᑐᑦ ᑕᐃᒫᒃ ᒪᓕᒃᑐᓂᒃ ᐱᑕᖃᖅᑎᒋᓂᖏᓐᓂᒃ ᓄᓇᐅᑉ ᖃᖓᓃᑦᑐᑦ ᐱᕈᖅᑐᑦ ᓂᕿᒃᓴᖅᓯᐅᕐᕕᐅᕙᖕᓂᖏᓐᓂᒃ ᑲᖑᕐᓄᑦ ᖃᐅᔨᓴᖅᑕᐅᓪᓗᑎᒃ (ᐊᔾᔨᒌᖏᓐᓂᖏᓐᓂᒃ ᐱᕈᖅᑐᖃᕐᓂᖏᑦ ᑕᒪᐃᓐᓂᒃ ᐃᓗᐊᓂᓗ ᓯᓚᑖᓂᓗ ᐊᕙᓗᓕᐅᕐᕕᐅᓯᒪᔪᓂᒃ) ᑕᒪᒃᑯᐊ ᐊᒃᑐᖅᑕᐅᓯᒪᔪᓐᓇᕐᓂᖏᑦ ᐊᔾᔨᒌᖃᑦᑕᖏᓂᖏᓐᓄᑦ ᐊᕐᕌᒍᒥᒃ ᐊᕐᕌᒍᒧᑦ, ᒪᓕᒃᐸᖕᒪᑕ ᐊᒥᔅᓲᓂᖏᓐᓂᒃ ᑲᖑᐃᑦ ᓄᓕᐊᕐᓂᖏᓐᓂ ᐃᕙᕝᕕᖏᑦ ᑕᐅᕙᓂ ᕿᑭᖅᑕᖓᓂ. ᑕᐃᒪᖓᑦ 1990-ᒥ, ᑲᖑᐃᑦ ᓄᖑᑎᕆᓯᒪᕗᑦ, ᑕᐃᒪᐃᒐᔪᑐᒥᒃ ᐊᑐᕋᔪᒃᑕᖏᓐᓂ ᑕᒫᓂ, ᐊᕐᕋᒍᑕᒫᖅ ᓄᓇᐅᑉ ᖄᖓᓃᑦᑐᓂᒃ ᐱᕈᖅᓯᒪᔪᓂ ᒪᔅᓴᐅᓂᖏᓐᓂᒃ ᓂᕿᒃᓴᓂᒃᓯᒪᑎᒋᕙᖕᓂᖅ 32% ᐳᓴᓐᑎᖏᓃᑦᑐᒥ 1993-ᒥ, ᑲᖑᐃᑦ ᐱᑕᖃᕈᓐᓃᖅᑎᑦᑎᓚᐅᕐᓂᖏᓐᓂᒃ ᐊᖏᓂᓕᖕᒥᒃ 60% ᐳᓴᓐᑎᖏᓃᑦᑐᓂᒃ ᐱᕈᖅᓯᒪᔪᓂᒃ ᖃᕐᓕᒃᑐᕐᕕᐅᑉ ᓄᓇᖓᓂ. ᑕᒫᓂᑦᑕᐅᖅ ᐊᕐᕋᒍᒥ ᒪᓕᑐᐃᓐᓇᓚᐅᕆᕗᑦ ᐊᒥᓲᓂᖅᐹᖑᓯᒪᓂᖏᓐᓂᒃ ᑲᖑᐃᑦ ᒥᑦᑎᒪᑕᓕᐅᑉ ᕿᑭᖅᑕᖓᓂ. ᑭᖑᓂᐊᒍᑦ ᒪᕐᕉᖕᓂᒃ ᐊᕐᕋᒎᓚᐅᕐᒥᔫᖕᓂᒃ ᐃᖅᑲᐅᒪᔭᐅᑦᑎᐊᕆᕗᑦ ᓄᓇᐃᑦ ᐊᒃᑐᖅᑕᐅᓯᒪᔪᔮᓚᐅᓐᖏᑦᑎᐊᕐᓂᖏᓐᓂᒃ ᓂᕿᒃᓴᖅᓯᐅᕐᕕᐅᓂᕐᒧᑦ ᒪᔅᓴᐅᓂᖏᓐᓂ ᓇᔪᕋᔪᒃᑕᖏᓐᓂ ᑲᖑᐊᕋᖃᕐᓂᖏᓐᓂ (ᑕᒪᓂ 2004-ᖑᓚᐅᖅᑐᖅ ᐊᒻᒪᓗ 2010). 2004-ᖑᑎᓪᓗᒍ, ᒪᖅᑯᒡᔪᐊᖅᑐᐊᓘᖃᑦᑕᓚᐅᕐᒪᑦ ᑕᖅᑭᖓᓂ ᔪᓚᐃᒥ, ᐅᓕᑦᑕᐅᓯᒪᓚᐅᕐᒪᑦ ᖃᕐᓕᒃᑐᕐᕕᐅᑉ ᓄᓇᖓ, ᐊᔪᓕᕈᑕᐅᓪᓗᓚᐅᖅᑐᖅ ᑲᖑᕐᓄᑦ ᓂᕿᓴᖅᓯᐅᕐᕕᐅᔪᓐᓇᕐᓂᖅ ᑕᐃᔅᓱᒪᓂ. 2010-ᒥᓕ, ᐅᒃᐱᕐᔪᐊᖅᑕᖃᕐᓂᖓᓄᑦ ᑕᐅᕙᓂ ᕿᑭᖅᑕᖓᓂ ᑲᖑᐃᑦ ᐅᓪᓗᖃᕐᒋᕙᒃᑕᖏᓐᓂ, ᐊᒥᔅᓱᕙᓚᐅᖏᓚᑦ ᑲᖑᐃᑦ ᐅᓪᓗᖃᓚᐅᖅᑐᑦ ᑕᐅᕙᓂ ᐅᒃᐱᖕᓄᑦ ᐅᓪᓗᖃᕐᕕᐅᓚᐅᖅᑐᓂ. ᑕᐃᒪᐃᓂᖓᓄᑦ ᐱᕈᖅᑐᓕᐊᓘᓚᐅᕋᓗᐊᖅᑎᓪᓗᒍ ᓄᓇᖓᑦ ᐊᕐᕋᒍᒥ 2010-ᒥ ᑲᖑᐃᑦ ᐊᓯᖔᖏᓐᓄᑦ ᒪᔅᓴᐅᓂᕐᒧᑦ ᑎᑭᓯᒪᖔᕋᓱᒋᔭᐅᓕᓚᐅᖅᑐᑦ, ᑲᖑᐊᕋᖃᕐᓂᖏᓐᓂ. ᐅᓪᓗᖃᕐᕕᐅᒐᔪᒃᑐᑐᖃᐅᔪᓂᓕ, ᑲᖑᐃᑦ ᓄᖑᑎᕆᓚᐅᖅᐳᑦ ᐃᒪᓐᓇᑎᒋ 27% ᐳᓴᓐᑎᖏᓃᑦᑐᓂᒃ ᓄᓇᐅᑉ ᖄᖓᒍᑦ ᐱᕈᖅᓯᒪᔪᓂᒃ. ᑕᒪᓐᓇ ᐊᔾᔨᑲᓴᒋᓚᐅᕐᒥᔭᖓ ᑕᐃᑯᓄᖓ ᖃᐅᔨᔭᐅᓚᐅᖅᑐᓂ ᖃᕐᓕᒃᑐᕐᕕᐅᑉ ᓄᓇᖓᓂ ᑕᐃᒃᑯᓇᓂᑦᓴᐃᓐᓇᖅ ᐊᕐᕋᒎᓚᐅᖅᑐᓂ (ᓲᕐᓗ ᐆᒃᑑᑎᒋᓗᒍ 28% ᐳᓴᓐᑎᖏᓃᓚᐅᖅᑐᓂ ᐱᕈᖅᑐᑦ ᓄᖑᑎᖅᑕᐅᓯᒪᓚᐅᕐᓂᖏᑦ ᑕᐃᒪᖓᓂᒃ ᐊᕐᕋᒍᒥ ᐱᒋᐊᓚᐅᖅᑐᓂᒃ 1998-ᒥᒃ). ᐅᓪᓗᒥᒧᑦ ᑎᑭᓪᓗᒍ, ᓴᕿᑦᑎᓯᒪᔪᖃᓚᕆᖏᑦᑐᖅ ᓱᓕ ᑲᖑᐃᑦ ᓂᕿᒃᓴᖅᓯᐅᖃᑕᕐᓂᖏᓐᓄᑦ ᐱᐅᖏᑦᑐᒥᒃ ᐊᒃᑐᖅᓯᕙᓪᓕᐊᓂᖏᓐᓂᒃ ᐱᕈᖅᓯᒪᔪᓂᒃ ᓄᓇᓂ ᒪᔅᓴᐅᓂᖏᓐᓂ ᒥᑦᑎᒪᑕᓕᐅᑉ ᕿᑭᖅᑕᖓᓂ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓂᕿᒃᓴᖃᑦᑎᐊᕈᓐᓇᕐᓂᕐᒧᓪᓗ ᓈᒻᒪᓈᖅᓯᒪᕙᓐᖏᓐᓂᖏᑦ

ᐱᕈᖅᑐᓂᒃ ᓂᕿᒃᓴᖃᔅᓲᖑᓪᓗᑎᒃ, ᑲᖑᐃᑦ ᐱᓇᓱᐊᕐᓂᖅᓴᐅᕙᒃᑐᑦ ᐱᐅᔪᐊᓘᓂᖏᓐᓂᒃ ᓂᕿᒃᓴᕆᓂᐊᖅᑕᖏᓐᓂᒃ, ᓂᕿᒃᓴᖃᑦᑎᐊᕆᐊᖃᕐᓂᕐᒥᓄᑦ ᐊᕐᕋᒍᒥ. ᐊᐅᔭᐅᓂᖓᓂ, ᑲᖑᐊᕋᖏᑦ ᐱᕈᖅᓴᔭᕆᐊᖃᓲᖑᖕᒪᑕ ᑎᒥᖏᓐᓂᒃ 20-ᖏᖅᑕᖅᓯᒪᔫᑉ ᐅᖓᑖᓂ ᐊᖏᓂᓕᖕᒥᒃ, ᑕᒫᓃᓐᓇᑯᓗᒃ ᐊᑯᓂᐅᓂᓕᖕᒥ ᒪᕐᕉᖕᓂᒃ ᑕᖅᑮᖕᓂᒃ, ᐊᐅᓪᓚᖃᑕᐅᔪᓐᓇᕆᐊᖃᕐᓂᐊᕐᒪᑕ ᑲᖑᐃᑦ ᐅᑎᖅᐸᓪᓕᐊᓕᕈᑎᒃ ᑲᓇᑕᐅᑉ ᓂᒋᐊᓄᑦ ᓄᓇᒧᑦ. ᑕᐃᒪᐃᓂᖓᓄᑦ, ᐱᕈᖅᓴᑦᑎᐊᕐᓇᖅᑐᓂᒃ ᓂᕿᖃᑦᑎᐊᕆᐊᖃᐃᓐᓇᖅᐳᑦ ᐊᖏᔪᒥᒃ. ᐊᒻᒪᓗ ᓱᓕ ᑕᐃᒪᐃᓂᖓᓄᑦ, ᑲᖑᐃᑦ ᓄᓕᐊᕈᓐᓇᕐᓂᖏᑦ ᓇᒻᒪᓈᑎᐊᖃᑕᕆᐊᖃᖅᑐᑦ ᐃᓐᓄᒡᕕᒃᓴᖏᓐᓄᑦ ᒪᓐᓂᖏᑦ, ᖃᖑᐊᕋᖏᑦ ᓂᕿᒃᓴᑦᑎᐊᕆᐊᖃᕐᓂᐊᕐᒪᑕ ᐱᐅᔪᓂᒃ ᓂᕿᒃᓴᖃᕐᕕᐅᓂᕐᒧᑦ, ᐱᑕᖃᓲᖑᔪᓂᒃ ᔪᓚᐃᑉ ᑕᕿᐅᑉ ᐱᒋᐊᓕᓵᕐᓂᖓᓂ. ᑭᓯᐊᓂᓕᑕᐅᖅ, ᐅᐱᓐᖏᕙᓪᓕᐊᓕᓴᕐᓂᖓᓂ ᐅᑭᐅᖅᑕᖅᑐᒥ, ᑲᖑᐃᑦ ᓇᒻᒪᓈᕈᓐᓇᐃᓕᕙᒃᑭᕗᑦ ᐱᕈᖅᑐᖃᓕᕐᕕᒃᓴᓄᑦ ᑎᑭᓯᒪᔭᕆᐊᖃᓲᖑᓂᖏᓐᓂ ᓯᕗᓂᐊᒍᑦ ᓄᓕᐊᕐᕕᒋᓂᐊᖅᑕᖏᓐᓂ ᓄᓇᒥ ᐱᔾᔪᑕᐅᖃᑕᕐᓱᑎᒃ ᐊᕙᑎᐅᑉ ᖃᓄᐃᓕᖓᓂᖓᑦ ᐊᑐᓂ ᓄᖃᖅᑕᕐᕕᒋᕙᒃᑕᖏᓐᓂ ᓯᓚᖏᑦ ᐊᔾᔨᒌᖃᑦᑕᖏᒻᒪᑕ ᑲᔪᓯᕙᓪᓕᐊᓕᖅᑎᓪᓗᒍ ᐅᑭᐅᖅᑕᖅᑐᖅᐸᓯᖕᒧᑦ. ᑕᐃᒪᐃᑦᑕᕌᖓᒥᒃ ᐊᕐᕌᒍᐃᑦ ᑕᐅᕙᓂᓕ ᒥᑦᑎᒪᑕᓕᐅᑉ ᕿᑭᖅᑕᖓᓂ, ᑲᖑᐊᕋᖃᓕᓲᖑᕗᑦ ᑭᖑᓂᖔᖓᒍᑦ ᐱᐅᔫᑎᐅᓚᐅᕐᓂᖏᑦ ᐱᕈᖅᓯᒪᔪᑦ ᐊᓂᒍᐊᓂᒃᓯᒪᓕᖅᑎᓪᓗᒋᑦ, ᓯᕗᕙᓯᒃᓯᒪᕙᓕᕐᓂᖏᓐᓂᓗ ᑕᒪᒃᑯᐊ ᓯᓚᐅᑉ ᐊᓯᔾᔨᖅᐸᓪᓕᐊᓯᒪᓕᕐᓂᖓᓄᑦ. ᓇᒻᒪᓈᖅᓯᒪᖃᑦᑕᕈᓃᕐᒪᑕ. ᓈᒻᒪᓈᖅᓯᒪᖏᓐᓂᖅ ᐱᔾᔪᑕᐅᕙᒃᑐᖅ ᐱᕈᖏᓐᓂᖅᓴᐅᕙᖕᓂᖏᓐᓄᑦ ᐊᖏᓂᖅᓴᐅᔪᓐᓃᖃᑕᕐᓂᖏᓄᓪᓗ ᑲᖑᐊᕋᐃᑦ. ᐅᑭᐅᖅᑕᖅᑑᓂᕐᒥ, ᐱᕈᕐᕕᐅᔪᓐᓇᕐᓂᖏᑦ ᕿᓚᒥᑯᓘᕙᖕᒪᑦ (<100 ᐅᓪᓗᐃᑦ ᐊᑖᓂ) ᐱᒋᐊᖃᑕᕐᒪᑦ ᑕᒪᓐᓇ ᐊᐳᑦ ᐊᐅᒃᐸᓪᓕᐊᓕᑐᐊᕌᖓᑦ. ᓯᓚᐅᑉ ᐆᓇᖅᓯᕙᓪᓕᐊᓂᖓᓄᑦ ᐅᑭᐅᖅᑕᖅᑐᒥ ᖁᓕᐅᓈᖅᑐᓂ ᐊᒥᓱᒐᓴᐅᓕᖅᑐᓂ ᐊᕐᕋᒍᓂᒃ ᐊᓂᒍᖅᓯᒪᓕᖅᑐᓂ, ᓈᒻᒪᓈᕈᑕᐅᕙᓐᖏᖕᓂᖏᑦ ᑲᖑᕐᓄᑦ ᓂᕿᒃᓴᖃᑦᑎᐊᕆᐊᖃᕐᓂᖏᓐᓄᑦ ᓴᕿᑉᐸᓪᓕᐊᑐᐃᓐᓇᕈᓐᓇᖅᑐᑦ ᓯᕗᓂᒃᓴᒥ, ᐱᐅᖏᑦᑐᒥᒡᓗ ᖃᓄᐃᓕᖓᓕᕈᑕᐅᔪᓐᓇᖅᓱᑎᒃ ᑲᖑᐃᑦ ᐱᑕᖃᓲᖑᓂᖏᓐᓄᑦ.