ᒥᑦᑎᒪᑕᓕᐅᑉ ᐊᑭᐊᖓ ᐃᓂᖃᖅᑐᖅ ᕿᓛᑕ ᕿᑭᖅᑖᓘᑉ ᐅᐊᖕᓇᖓᑕ ᓄᕗᖅᐸᓯᐊᓂ, ᓄᓇᕗᑦ, ᑲᓇᑕᒥ. ᖃᓂᓛᖅ ᓄᓇᓕᒃ ᐊᑭᐊᖓᓅᕈᒪᓪᓗᓂ ᑕᕝᕙ ᒥᑦᑎᒪᑕᓕᒃ (Mittimatalik) ᐅᐊᖕᓈᑕ ᕿᑭᖅᑖᓘᑉ ᑐᓄᖓᓂ. ᓴᖅᑭᑕᐅᒋᐊᕐᓂᑯ ᐊᕐᕌᒍᐊᓂ 2001, ᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕝᕕᖓ ᐊᕙᓗᐃᓯᒪᕗᖅ ᑕᒪᐃᓐᓂᐸᓗᒃ ᒥᑦᑎᒪᑕᓕᐅᑉ ᐊᑭᐊᖓᓂᒃ, ᐅᑭᑕᐅᓯᒪᒐᓛᒃᖢᑎᒃ ᖃᔅᓯᒐᓛᐃᑦ ᐃᓄᖕᓄᑦ ᓇᖕᒥᓂᕆᔭᑦ ᓄᓇᐃᑦ. ᑖᓐᓇ ᒥᕐᖑᐃᖅᓯᕝᕕᒃ ᓴᓂᕝᕙᐃᓯᒪᕗᖅ ᓄᓇᒥᒃ ᑎᑭᐅᒪᔪᖅ 22,000 ᑭᓛᒥᑕ²,(ᑭᑉᐹᕆᖓᔪᑦ) ᑕᐅᕗᖓᓕᒫᖅ ᐃᓚᓕᐅᑎᓯᒪᔭᖃᖅᖢᓂ ᕿᑭᖅᑖᓘᑉ ᐅᐊᖕᓈᑕ ᓄᓇᖏᓐᓂᒃ ᐊᖏᓛᖑᖃᑕᐅᓪᓗᓂᓗ ᑲᓇᑕᐅᑉ ᒥᕐᖑᐃᖅᓯᕝᕕᓕᒫᖏᓐᓂᒃ ᓇᒥᑐᐃᓐᓇᖅ. ᓯᕐᒥᓕᒃ, ᑐᑭᖃᖅᐳᖅ “ᓄᓇᖓ ᓯᕐᒥᖃᐅᖅᑐᐋᓗᒃ” ᐃᓄᒃᑎᑐᑦ, ᑕᕐᕇᓯᓯᒪᓪᓚᕆᒃᑐᖅ ᐊᑭᐊᖓ ᑕᑖᖅᑕᐅᑲᓴᖕᒪᑦ ᓯᕐᒥᐋᓗᖕᓄᑦ ᓇᒧᕈᓘᔭᖅ ᓴᖑᐃᖓᔪᑦ ᐃᓗᐊᑦᑐᐋᓗᐄᓪᓗ ᖄᓪᓚᕆᖓᓃᑦᑐᑦ ᐊᑭᐊᖓᑕ. ᐅᓄᓛᖑᔪᖅ ᓄᓇᒋᔮᑕ 11,100 ᑭᓛᒥᑕ² ᒥᑦᑎᒪᑕᓕᐅᑉ ᐊᑭᐊᖓᑕ ᖄᒥᑕᐅᓯᒪᕗᖅ ᐳᖅᑐᔪᐋᓗᖕᓄᑦ ᐱᖑᓐᓄᑦ ᓯᕐᒥᖃᖅᖢᑎᒃ ᖄᒥᒍᑦ. ᑖᒃᑯᐊ ᖃᓪᓗᓈᑎᑐᑦ ᐊᑎᖃᖅᑎᑕᑦ ᐸᐃᔭᒻ ᒪᐅᑎᓐ ᐱᖑᖏᑦ, ᐃᓚᒋᔭᐅᖃᑕᐅᔪᑦ ᐊᖏᓂᖅᓵᓘᑉ ᐅᑭᐅᖅᑕᖅᑑᑉ ᓯᖓᐅᒪᓂᐅᔫᑉ ᖃᖅᑲᓕᐊᖑᓕᖅᓯᒪᔪᑦ ᐱᒋᐊᖅᖢᑎᒃ ᕿᑭᖅᑖᓘᑉ ᑲᓇᖕᓈᓂᒃ ᑕᑉᐸᐅᖓᓕᒫᖅ ᐃᐅᔅᒥᐅᑉ ᕿᑭᖅᑖᓗᐊᓄᑦ ᖃᖅᑲᒐᓛᓘᓪᓗᑎᒃ. ᐱᖓᓐᓈᒍᑦ ᐊᑭᐊᖓᑕ, ᐱᓗᐊᖅᑐᒥᒡᓗ ᓂᒋᖔᖓᒍᑦ ᓇᑎᓐᓈᓗᐊᒍᑦ, ᐃᓕᖅᑯᓯᓖᑦ ᐅᖓᓯᑯᑖᒃᑐᒧᑦ ᓇᑎᓐᓇᑯᑖᒑᓗᐃᑦ ᓄᓇᖏᑦ ᖄᒥᑕᐅᓯᒪᓪᓗᑎᒃ ᐱᕈᑦᑎᐊᖅᓯᒪᔪᐋᓗᖕᒥᑦ ᓄᓇᐃᓐᓇᐅᑉ ᐱᕈᖅᑐᖏᓐᓂᒃ.

ᑕᐃᒪᓕ ᖃᐅᔨᓴᕐᕕᕗᑦ ᖃᐅᔨᓵᖃᖅᑑᒐᓗᐊᖅ ᑕᐃᒪᓐᓂᒃ ᓇᑦᑎᓐᓇᕆᔮᓂᒃ ᕿᑭᖅᑖᑕ (1,600 ᑭᓛᒥᑕ²), ᖃᐅᔨᓴᕝᕕᕗᑦ ᐃᓂᓪᓚᖓᕗᖅ ᐊᖏᔪᑲᓪᓛᕐᔪᒻᒥᒃ ᓯᕐᒥᐆᑉ ᓇᖅᓴᓕᐊᖓᓂᒃ ᐅᖅᑯᖔᐸᓗᐊᒍᑦ ᕿᑭᖅᑖᐅᑉ (73°08’N, 80°00’W). ᐃᒻᒪᖄ 10,000 ᐊᕐᕌᒍᑦ ᐊᓂᒍᓕᖅᑐᑦ, ᑖᓐᓇ 70 ᑭᓛᒥᑕ² ᓇᖅᓴᖓ, ᐊᑎᖃᖅᑎᑕᖅ ᖃᓪᓕᒃᑐᕐᕕᒃ, ᓯᕐᒥᒧᑦ ᓴᐅᔭᐅᓯᒪᓚᐅᖅᑐᖅ. ᐃᒻᒪᖄ ᑎᑭᖢᒍ 6,000 ᐊᕐᕌᒍᓪᓗᐊᑦ ᓯᕐᒥᖓ ᐊᐅᒋᐋᓕᖅᖢᓂ, ᕿᒪᕉᑎᕙᓪᓕᐊᒐᒥ ᕿᒪᐃᓪᓗᓂ ᓯᖃᓕᓯᒪᔾᔪᐊᖅᑐᓂᒃ ᐊᓄᕆᒧᑦ ᑎᒃᑕᐅᓂᑯᓂᒃ ᐊᒻᒪᑦᑕᐅᖅ ᐆᒪᔪᕕᓃᑦ ᕿᒻᒪᒃᑯᖏᑦ ᑲᑎᖅᓱᓕᓐᓂᖅᖢᑎᒃ ᐃᔾᔪᓯᓕᕋᒥᒃ ᐃᔾᔪᕈᖅᖢᑎᒃ ᐱᕈᖅᑐᑦ ᑐᙵᕕᒋᓕᖅᖢᓂᔾᔪᒃ ᓇᖅᓵᑕ ᓄᓇᖓᒍᑦ. ᐊᕐᕌᒍᓕᒫᓪᓗ, ᖁᐊᖅᑐᖅ−ᐊᐅᒃᑖ ᐅᑎᖅᑕᕋᓐᓂᖓ ᓴᓇᔭᖃᕆᓪᓗᓂ ᓄᓇᖓᓂᒃ ᐅᓪᓗᒥ ᑕᐅᑦᑐᕆᓕᖅᑕᖓᓄᑦ. ᐅᓪᓗᒥ, ᓇᖅᓴᖓ ᐃᓚᖃᕈᓘᔭᖅᑐᖅ ᓄᓇᐃᓐᓇᐅᑉ ᓴᖅᑭᓲᖏᓐᓂᒃ ᑭᑉᐹᕆᖓᐅᖅᑐᑦ, ᐊᐅᒍᑎᔪᑦ ᑕᓯᕐᓗᑦ ᐊᒻᒪᓗ ᐃᒪᖅᓱᕋᓛᑦ ᐊᐅᒍᑎᔪᑦ. ᐃᒪᖃᕈᓐᓇᕐᓂᖓ ᓄᓇᖏᑕ ᐃᓕᖅᑯᓯᖏᑦ ᑕᑯᓪᓗᒋᑦ ᑰᑦᑎᐊᕈᓐᓇᖏᓐᓂᖓᓄᓪᓗ ᓄᓇᐅᓪᓗ ᐊᑎᖔᖓ ᖁᐋᖑᐃᓐᓇᓲᑉ (ᐃᑭᐊᖅ ᖁᐊᖑᓲᖅ) ᓴᖅᑮᔭᖃᓲᑦ ᐱᑕᖃᓕᖅᑎᑦᑎᓪᓗᑎᒃ ᒪᓴᐅᓲᓂᒃ ᐱᕈᖅᑐᖃᕝᕕᐅᔪᓂᒃ ᐃᒃᑲᑦᑐᔮᕌᓗᓐᓂᒃ. ᐱᕈᖅᑐᖏᑦ ᓇᓂᔭᐅᓲᑦ ᒪᓴᐅᓂᐅᓲᑦ ᓄᓇᖏᓐᓂᒃ ᐃᓕᖅᑯᓯᖃᒐᔪᓲᑦ ᐃᒪᖅᓱᒐᒻᒥᐅᑦ, ᐃᕕᒃᓱᒐᐃᑦ ᐊᒻᒪᓗ ᐊᓯᕈᓘᔭᖏᑦ ᑎᖏᐅᔭᐅᑉ ᐱᕈᖅᑐᕈᓘᔭᖏᑦ ᑕᒪᒃᑯᐊᓗ ᓂᖃᑐᓲᑦ. ᐃᒡᓗᐊᓃᑦᑐᑦ ᒪᓴᐅᓂᕆᔮᑕ ᓄᓇᐃᑦ, ᐸᓂᖅᓯᒪᓂᖅᓴᑦ ᓄᓇᐃᑦ ᓇᓂᔭᒃᓴᐅᕗᑦ ᓯᕕᖓᓂᐅᔪᓂᒃ, ᐱᖑᐊᔾᔪᖕᓂᑦ ᐊᒻᒪᓗ ᐊᑯᓂᖅᓱᖅᑐᑦ ᓇᑎᓐᓇᐅᓃᑦ ᐊᕙᑖᒍᑦ ᓇᖅᓵᑕ ᐳᒃᑭᓂᕆᔭᖏᑕ, ᐊᒻᒪᓗᑕᐅᖅ ᓯᓇᔾᔪᖏᑕ ᓄᓇᐅᑉ ᑭᑉᐹᕆᖓᔪᖏᑕ. ᑕᒪᒃᑯᐊ ᐃᒪᐃᔭᑦᑎᐊᓐᓂᖅᓴᑦ, ᐸᓂᕐᓂᖅᓴᐃᑦ ᐃᔾᔪᖏᑦ ᓇᔪᒐᖃᕝᕖᑦ ᐱᑕᖃᖅᑎᑦᑎᓲᑦ ᐊᔾᔨᒌᙱᑦᑐᓂᒃ ᓄᓇᕋᖏᓐᓂᒃ. ᑕᒪᒃᑯᐊ ᐱᕈᖅᑐᖏᑦ ᐃᓚᖃᓲᑦ ᓂᕿᒃᓴᕆᔭᑦ, ᐃᕕᒃᓱᒐᑦ ᐊᒻᒪᓗ ᐅᖅᐱᒐᐃᑦ ᐅᕕᓗᐃᓪᓗ. ᖃᓪᓗᓈᓄᑦ ᑕᒪᒃᑯᐊ ᑕᐃᒍᖅᑕᑦ ᐳᖅᑐᓂᖅᓴᑦ ᓄᓇᐃᑦ, ᑕᑯᓪᓗᒋᑦ ᐊᒃᑎᒋᓂᖓ 90% ᓂᒋᖅᐸᓯᐊ ᑕᒪᒃᑯᐊ ᒪᓴᐅᓂᕆᓲᖏᑦ ᓄᓇᐅᑉ ᑎᑭᐅᒪᓪᓗᑎᒃ 10%.

ᖃᕐᓕᒃᑐᕐᕕᐅᑉ ᓄᓇᖓᓂ		ᒪᔅᓴᐅᓂᕐᒥ ᐸᓂᖅᑐᒥᓗᓐᓃᑦ ᓇᑎᕐᓇᐃᑦ ᐊᕕᒃᑐᓪᓛᓯᒪᔪᑦ, ᓯᑯᐃᔭᖅᐸᓪᓕᐊᓂᖏᑦ ᑕᓯᐊᕐᔪᐃᑦ ᑕᓰᓪᓗ

ᑕᒪᒃᑯᐊ ᒪᓴᐅᓂᕆᓲᖏᑦ ᓂᒋᖅᐸᓯᐊᑕ ᓇᑦᑎᓐᓈᓗᐊᓂ ᐊᑭᐊᖓᒍᑦ ᓇᔪᒐᕆᔭᐅᒋᕗᖅ ᐊᔾᔨᖃᙱᑦᑎᐊᖅᑐᓂᒃ ᐱᕈᖅᑐᑦ ᓄᓇᕋᖏᓪᓗ ᐱᐅᓂᕆᔮᓂᒃ ᐱᕈᑦᑎᐊᕈᓐᓇᕐᓂᖏᑕᓗ ᐅᑭᐅᖅᑕᖅᑑᑉ ᐊᕙᑎᒋᓲᖏᓂᒃ. ᑖᒃᑯᐊ ᐱᕚᓪᓕᕈᑎᖃᓲᑦ ᑖᔅᓱᒪᐅᑉ “ᐅᑭᐅᖅᑕᖅᑑᑉ ᐅᖅᑯᐋᖓᓂᒃ” ᐅᑯᐊᖑᕗᑦ >160 ᐊᔾᔨᒌᙱᑦᑐᑦ ᐱᕈᖅᑐᑦ, >15 ᒥᖅᑯᓖᑦ ᓂᕐᔪᑎᖏᑦ ᐊᒻᒪᓗ >70 ᑎᖕᒥᐊᑦ ᐆᒪᔪᖏᑦ. ᐃᓱᒪᒋᔭᐅᔪᖅ ᐊᑑᑎᖃᓪᓚᕆᒃᑑᓂᖓ ᐊᖅᑯᓵᒐᕆᔭᐅᓪᓗᑎᒃ ᓄᓇᖏᑦ ᐊᒥᓱᓄᑦ ᑎᑭᑦᑕᓲᑦ ᑎᖕᒥᐊᓄᑦ, ᒥᑦᑎᒪᑕᓕᐅᑉ ᐊᑭᐊᖓ ᑕᐃᔭᐅᓕᖅᖢᓂ ᑎᑭᑦᑕᓲᑦ ᑎᖕᒥᐊᑦ ᐱᐅᖅᓱᐊᖅᑕᐅᕝᕕᒃᓵ ᐊᕐᕌᒍᐊᒍᑦ 1965. ᐃᓚᒋᖃᓯᐅᑎᔭᖏᑦ ᑎᑭᑦᑕᓲᑦ ᑎᖕᒥᐊᑦ ᓂᕐᒪᔪᓲᑦ ᒪᓴᐅᓲᑉ ᓂᕆᔭᒃᓴᖏᓐᓂᒃ ᐱᕈᖅᑐᖏᓂᒃ, ᐊᖏᓛᑦ ᑲᖑᐃᑦ ᐅᔾᔨᕆᔭᐅᓪᓗᑎᒃ ᖃᐅᔨᓴᖅᑎᓄᑦ ᑕᐃᔅᓱᒪᓂ ᐃᓱᓕᓕᒑᓕᖅᑎᓪᓗᒋᑦ ᐊᕐᕌᒍᖏᑦ 1980. ᐃᓛᓪᓚᑦᑖᖅ, ᓇᑦᑎᓐᓈᓗᖓ ᒥᑦᑎᒪᑕᓕᐅᑉ ᐊᑭᐊᖓᓂ ᓇᔪᖅᑕᐅᓲᖅ ᓄᓇᔾᔪᐊᓕᒫᒥᑦ ᐊᖏᓛᖑᖃᑕᐅᔪᑦ ᑲᖑᕐᓂᒃ ᐃᕙᓲᖑᔪᓂᒃ ᐊᒻᒪᓗ ᑖᓐᓇ ᒪᓴᐅᓲᖅ ᓄᓇᖓ ᖃᓪᓕᒃᑐᕝᕕᐅᑉ ᓇᖅᓴᖓᓂ ᑭᒡᒐᖅᑐᐃᓪᓗᓂ ᑲᖑᐊᕋᖃᕝᕕᓪᓗᐊᑕᖓ ᕿᑭᖅᑕᕆᔮᑕ. ᐅᖓᑖᓄᑦ ᑎᖕᒥᐋᑦ 100,000 ᐊᐅᔩᓲᑦ ᐊᑭᐊᖓᑕ ᓄᓇᖏᓐᓂᒃ, ᓇᓗᓇᙱᑦᑎᐊᖅᑐᖅ ᑲᖑᐃᑦ ᐅᓄᓛᑦᑎᐊᖑᕗᑦ ᐱᕈᖅᑐᖅᑐᓲᓂᒃ ᕿᑭᖅᑖᒍᑦ. ᖄᒃᑲᓐᓂᐊᒍᑦ ᑲᖑᓕᕆᓂᕐᒧᑦ ᖃᐅᔨᓵᑦᑎᒍᑦ, ᐊᓯᖏᑦ ᐱᕈᖅᑐᖅᑏᑦ ᓇᓂᔭᐅᓲᖑᒋᕗᑦ ᕿᑭᖅᑖᓂ ᐊᕕᙵᑦ ᐊᒻᒪ ᐊᒥᖅᖤᑦ, ᓂᕐᓕᓐᓇᐃᑦ, ᐅᑲᓖᑦ, ᐊᒻᒪᓗ ᐅᔭᕋᐅᑉ ᐊᕿᒡᒋᖁᑎᖏᑦ. ᓄᓇᐅᑉ ᓂᕿᑐᖅᑎᖏᑦ ᑕᑯᔭᐅᒐᔪᒃᑐᑦ ᕿᑭᖅᑖᓂ ᑎᕆᒐᓂᐊᖅ, ᐃᓱᙵᖅ, ᐃᓱᙵᓪᓗᒃ, ᓇᐅᔭᖅ, ᑐᓗᒐᖅ, ᑳᔫᖅ ᐊᒻᒪᓗ ᐅᒃᐱᔾᔪᐊᖅ.